سكري الحمل

**شغف أنثى** · 2015-08-12, 13:19

السلام عليكم ورحمة الله وبركاته ،،،
خواتي بغيت أسألكم ، منو ياها سكري الحمل مرتين وراح عنها ؟
تفاجأت وانا بالثالث ان عندي سكر حمل ، وقالتلي الدكتورة دامه ياج بدري معناته عندج من الاساس ، وانتي ما تابعتيه ، طيب انا بعد الحمل الثاني كانت الممرضات يتابعنه لي بقسم الولادة 3 اسابيع وقالولي خلاص راح ، ومشيت اموري بعدين عأساس ما عندي . وما شيكت وايد طول هالفترة بس كل مرة اشيك يطلعلي عادي مب مرتفع عشان الاحظ !
المهم كانت عندي خربطة هرمونات وقالتلي الدكتورة يمكن هالخربطة رفعت السكر عندج يعني ماعندج بس ارتفع فجأه بسبب الخربطة وظهر ف الحمل كسكر حمل ، بس اللي مخوفني سكري الحمل للمرة الثانية خايفة هالمرة ما يروح ويثبت واصير مريضة سكري ، منو ياها سكر الحمل مرتين وراح عنها نهائي ؟
وشلون تخلصت منه ؟
للعلم هم قالولي المفروض تنظمين الهرمونات وبعدين تحملين بس انا ترا فجأة حملت ما كان ع بالي ، والفترة بين هالحمل والحمل السابق 3 سنوات ، يعني مو فترة بسيطة .
اللي عدها جواب مطمئن تطمني ، واللي تمر ع الموضوع وما عندها جواب تدعيلي من الخاطر ربي يشفيني من سكري الحمل .

المزيد من آخر المواضيع من نفس القسم:

**غزالة AD** · 2015-08-12, 13:21

الله يشفيج من سكر الحمل.

**دابشه** · 2015-08-12, 14:40

ربي يشافيج ان شاءالله

**الورقا** · 2015-08-12, 18:08

اختي محد امخبلنا غير هالاطبا .. يعقدون كل شي وبدل لا ايطمنون المريض يزيغونه .. انا عندي. سكر حمل الحمد لله عقب الحمل يخوز عني بس ايني من اول الحمل .. انتي سوي الحين التحليل التراكمي مال السكر هذا اتسوينه باي وقت في اليوم وموب لازم صايمة وشوفيه اذا طبيعي خلاص لا اتحاتين ان شاء الله عقب الولادة يخوز عنج .. لانه سكر الحمل يستوي بسبب المشيمة وعقب الولادة اتروح المشيمة وايروح السكر باذن الله

**شغف أنثى** · 2015-08-12, 18:50

مشكورين على الدعوات الحلوة والله يتمم لكم ع خير
نعم محد مخبل بنا غير هالدكاترة ، لاني اصلا في الاوقات العادية ينقص عني السكر وايد طبيعي جذه ، واصلا بعد ولادتي الثانية كنت مهتمة بوزني وما اكثر من الاكل واكلي كله صحي ، وكله معتمدة ع الشاي الاخضر والزنجبيل ، من غير الرياضة مهتمة فيها امشي ، يعني لو تم عندي سكر معناته بيروح ، ويمكن رد لي لاني استخدمت الانسولين بالحمل الثاني لانه كان توأم وما جدرت امشي فخفت وايد عشان جذي خذيت انسولين شهرين تقريبا ، هالمرة ما ابي اخذ انسولين ، رح اسوي التحليل التراكمي بشوف طريقته بالنت وعسى خير .
الله يسهل حملج وولادتج وتجومين بالسلامة ان شاء الله

**الــــدبـــــه** · 2015-08-12, 18:59

الغاليه عشان تنظمين سكر الحمل وماينتقل عندج لاسمح الله وانه يكون سكر دم دائم
لازم تنظمين أكلج وحياتج وتسوين رياضه خفيفه مثل المشي
اختي 3 حملات وكلهن سكر الحمل وماكانت تحاسب على عمرها ابدا
بس اخر حملين لها بعد هالـ3 حملات بدت تاكل أكل صحي وتمشي فاليوم بين ربع ساعه لـ 30 دقيقه
على حسب كم تتحمل وتقدر تمشي لأن عندها مشكله فالظهر ومسوين لها عمليه
والحمدلله على اخر حملين انتظمت وكل يوم وعقب كل وجبه تفحص فحص منزلي لسكر الدم
والحمدلله حتى عيالها الاثنينه يابتهم اصغر من اللي قبل
لأن سكر الحمل ينفخ الجنين واااااااايد ويأثر وقت الربى
انتي عليج بالمتابعه ولا تهملين نفسج وان شاء الله ماعليج شر

**شغف أنثى** · 2015-08-12, 19:27

ان شاء الله فديتج والله يشفي أختج
انا عطوني حمية وملتزمة فيها ألحين وعطول أقيس السكر
بس بغيت اسألج عن اختج
يعني هي كل حمل ييها سكر حمل فكل حملاتها ؟
ولا هي من الاساس عندها سكر قبل الحمل وبعده ؟
لاني فهمت منج ان سكر الحمل ييها وقت الحمل بس
والله يشفيها ويحفظ لها عيالها ويباركلها فيهم

**الــــدبـــــه** · 2015-08-13, 01:00

هيه الغاليه اييها وقت الحمل بس
ومن تربي يخوز عنها ولله الحمد
بس يقولون اللي تهمل عمرها لاسمح الله يستوي عندها دائم حتى بعد الحمل
هذا والله اعلم

**شغف أنثى** · 2015-08-13, 05:18

ترا الاهمال يسبب مشاكل ويثبت السكر ، لازم تهتم بنفسها عسب ما تصير مريضة سكر .
انا ما مقصرة ف نفسي من صغري احب التمارين والريجيم ووايد حركية ، ان شاء الله يخوز هالمرة ، ودوامي يفرض علي الحركة اصلا من الاساس .
قراءات السكر نازلة معي طول اليوم ما عدا الصبح ترتفع شوي، اخاف يصرفون لي انسولين للصبح ، ما ابا انسولين جربته ، واخاف اجازف واجربه مرة ثانيه
شورو علي الله يخليكم

**الورقا** · 2015-08-14, 01:17

كم يكون اول الصبح اختي ؟

**شغف أنثى** · 2015-08-14, 01:31

ع حدود 100
والمفروض صايمة يكون ع حدود 95

**الورقا** · 2015-08-14, 22:02

الغالية اذا ١٠٠ لا اتحاتين ما يعتبر ارتفاع .. تمي راقبي وكلما تتجدمين في الحمل يمكن يرتفع اكثر .. اللي عليج انج لو لاحظتي ارتفاع ما تقدرين اتسيطرين عليه بالحمية كلمي دكتورتج عسب اتشوف لج شي مناسب اما غلوكوفاق او الابر .. والله يعافيج وايعافينا يااارب ..

الموضوع: سكري الحمل

أدوات الموضوع

عرض