طفلي والتوحد !

[LadyinSilk]

الله يطمن قلبج عليه

ماعليه شر ان شاء الله

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[غزالة AD]

من الحين لين الموعد اقطعي عنه منتجات القمح لانه مريض التوحد يمنعونه من القمح لانه يزيد الحالة.
يارب يكون سليم و ما يطلع فيه شي.

[شغف أنثى]

الله يسمع منكم ويسلمكم ،
وعسى الشر ما اييكم يارب ،
أنا دقيت عليهم وحجزت موعد لين ما يرجعون دكاترة التشخيص .
للحين ما بديت معه حمية وما أقدر اسويله حمية الا بعد معاينة الدكتور وعسى خير ، والله هو ترا بروحه ضعفان وزنه 13 كيلو فديته ،
المهم بغيت أقولكم اني قريت ان طفل التوحد محتاج احتواء من عايلته وأنا مع ابوه بدينا نهتم فيه ونحسسه بأنه ساس البيت ونرمسه وقطعنا عنه التلفزيون ، وبصراحة فرق كبير ، الاعراض اللي كتبتها لكم اختفى معظمها وصارت نفسيته أحسن ، ما يرفرف ولا يدور ولا يركب مكان عالي ، واذا سوا هالاشياء عطول نقوله عيب خلاص ينزل او يوقف ، وصار يحضنا طول الوقت ، وحزة النوم صار ما يعذبني ع طول يرجد من اشغله الرقية الشرعيه ، بالاول كان ما يرجد الا اذا ربطته بريولي ومعذبني بسبب حركته الزايدة ، بعدها نصحوني بالرقيه وعطول كنت اشغلها ، وحزه النوم ادخله مع اخوانه بمجرد ما يسمع الرقيه عطول ييي جنبي ويرجد بدون دواره ولا عذاب ، الحمد لله رب العالمين فرق كبير.
ومن شوي كان ماسك المكعبات عدهم للخمسة وتفاجأنا انا وأبوه ، لاني من زمان كنت معلمته مع اخته بس هو بسبب النطق ما كان يعد وياي ، حتى زوجي قالي انتي معلمته يعد للخمسه قلتله ايوا بس من زمان ، هو صحيح ما نطق الحروف صح بس نعرف انه يعد يعني واحد صح نطقها بعدين نينا لاته ابعه حسه يعني جذا يعد ، بغيت اقولكم شغله هو عنده اللسان الملتصق يعني مستحيل ينطق بعض الحروف مثل اللام والراء ، ووديته مستشفى حكومي وخاص ودكاترة الاطفال هناك قالو يباله عمليه بس مب مشكله يتأخر لان اللسان الملتصق ما يمنع الكلام بس الياهل بينطق بعض الحروف غلط ، وبصراحه احنا ما سويناها كنا ناطرين يخلص 3 سنوات ، لكن لما شفنا اخته تنطق خفنا عليه ووديناه دكتور اطفال قال تأخر النطق عنده مو بسبب اللسان الملتصق ، وانما بسبب التوحد يعني قصده حتى لو سوينا العمليه مارح نستفيد شي ، ابوه يقول يمكن شاف نفسه مايعرف يرمس عشان جي ما رمس ، عسى يكون هالسبب العضوي هو السبب ،
الوالدة تقول لا تستعيلو عليه وان شاء الله بيرمس ولا تعقدون الياهل ، احيانا اتمنى يكون كلامها صح ، لان ولدي الكبير ما نطق الا بعمر 4 سنوات ، وكنت احاول اعلمه بس ما ينطق لكنه كان يستجيب ويفهم ويسمع الكلام فما كنت خايفه عليه، والحمد لله من نطق نطق ببلاغة ومخارج الحروف صح وبالعربية الفصحى وبلا مشاكل ، لكن موضوع أخوه الصغير مخوفني بسبب الاعراض اللي قلتها لكم وبسبب عدم استجابته للاوامر وعدم اهتمامه لما حد يناديه باسمه وهذا للحين موجود معاه بس بعد بدرجه اقل والحمد لله رب العالمين .

[شغف أنثى]

بغيت أسألكم منو تعرف طفل بنفس وضع ولدي وودته مركز للتوحد ، وألحين تعالج الولد وصار عادي او ممكن يدخل مدارس حكوميه ويعتمد ع نفسه ؟
كل ما افتح النت ألاقي حالات قديمة من سنتين وثلاث كتبو عن حاله عيالهم والحين ما يدخلون ، فما أدري هل تشافو عيالهم وتحسن وضعهم او مشغولين معاهم لدرجه انهم تركو النت ومتابعه المواضيع ؟
ان شاء الله ولدي مافيه توحد ، هو ممكن يكون عنده سمات للتوحد وتروح مع العلاج والمتابعه ان شاء الله تعالى .

[غزالة AD]

الحمدلله انه بعض الاعراض اختفت..استمري فالاهتمام فيه وان شا الله كل شي بيخوز عنه. حبيبي فديته.

[Ward-uae]

الحمدالله بس شكله كان عنده طيف التوحد مادام بدى يتكلم ويسمع ويفهم شو تقولون
عن الالتصاق اللسان نحن من ينولد يسووله العمليه هي صغيره
ولدج بس كان محتاج رعاية واهتمام لكن زين حجزتي موعد حتى تطمنين

[شغف أنثى]

انا بغيت أسويله العملية بعد ولادته ع طول بس لانه تعبان من يوم كان صغير نصحونا الاطباء اننا نأجل العملية ، وألحين قريت عنها بالنت لقيت معظمهم يسوونها لعيالهم بعد الولادة عطول
الحمد لله عكل حال ، احنا وديناه بعمر سنة وشي لمستشفى خاص والدكتور نصحنا نأجل مع انه كان صغير .
ولد ربيعتي عنده اللسان الملتصق بس ينطق عادي ومفكرين يسوون العمليه حقه من يكبر عشان جذي انا أجلتها بعد .
والحمد لله عكل خير الله كاتبه ربي بيصير .
هو يتكلم شوي يعني أسماء بعض الحيوانات والنطق مش صح بعد ، ما يقول الاشياء الضروريه وأحيانا يطنشنا واحيانا لا .
بس الحمد لله انه صار يحضنا ويحس بوجودنا مو مثل أول
واليوم علمته يصنف الأشياء حسب الألوان وعطول عرف الحمد لله ، هو يعرف بعض الاشياء وما عنده مشاكل باستخدام الادوات ، بس مشكلتي ما أعرف شلون أعلمه وشو استخدم بحكم انه للحين ما تم تشخص بس الحمد لله خلال هالسبوعين الولد تغير من ناحية احساسه بالاهتمام ، ومستمرة معاه بإذن الله ، بس عاد الوحام ما عاطني فرصة مهلكني والحمد لله عكل حال ، بالاضافه انه رجعلي سكر الحمل وانا للحين ما دخلت الرابع وراجع بقوة بعد ، الحمل السابق راح وأتمنى هالمرة يروح بعد ، ادعولي عسى احداكن مستجابة الدعوة

[طيبة*قلب]

حبيبتي انا زيك وخايفه وصفك لولدك نفس ولدي واكذب اهلي اقول مافيه شي خوفتيني انا ولدي لانه لوحده وانا متغربه وعمره بعمر ولدك ان شاءالله مافيهم الا العافيه

[شغف أنثى]

ان شاء الله ما فيهم إلا العافية
وين مغتربة انتي ؟ وولدج مع منو حاطته ؟

[ام شركس]

حبيبتي في عندك مركز كيدز فيرست بشارع الوصل ممكن يفيدوكي، صديقتي ودت بنتها عندهم وعندها طيف توحد يعني حاله بسيطة من التوحد والحمد لله كتير صارت البنت تتفاعل مع الناس اللي حواليها احسن، ونصيحة تانيه كتير مهمه انه لما ابنك يدخل المدرسه انك تختاري مدرسه بتهتم بسلوك الطفل بنفس القدر اللي تهتم فيه اكاديميا لأن اطفال التوحد اكاديميا ما شاء الله عليهم بس مشكلتهم اجتماعيه وبتحتاجي احد يساعدك بهاد المجال، وتكون المعلمه عندها فكره كافيه عن الموضوع وتقدر تتعامل مع الطفل وانا لاحظت انه المعلمات الاجنبيات اكثر قدره على التعامل في هذا الموضوع لأنه ببلادهم شي عادي انه يكون عندها طالب عنده طيف توحد بينما في البلاد العربيه احس انه مش مألوف وما اعرف ازا المعلمات بياخدو دورات عن كيفيه التعامل مع اطفال التوحد ان وجد.