طفلي والتوحد !

[شغف أنثى]

مساء الخير حبيباتي شحالكم ؟
فديتكم بغيت منكم تساعدوني بمشكلتي ، طفلي عمره ثلاث سنوات وعندي شك ان عنده أعراض التوحد ووايد خايفة عليه ، بغيت منكم مستشفى أو مركز أقدر أعالج ولدي فيه ومع دكتور ممتاز يعالج أطفال التوحد ومتخصص بهالموضوع ، وياريت اللي عندها خبرة تنصحني والله عايشة بهم ماله آخر لأني محتارة ومو عارفة شلون أتصرف ، خصوصا ان مافي طفل في العايلة مر بمثل ظروفه يعني أول مرة ، ويعني محد عنده خبرة فعايلتنا .
اذا أي وحدة عندها رقم مركز او دكتور او تجربة شخصية تخبرني حتى لو ع الخاص بكون ممنونة لها ، خصوصا اني خايفة يأثر عليه المرض في المستقبل ، ويأثر ع استيعابه وتعليمه ، خوفي تستمر معه الأعراض لين يكير ، ياترا مريض التوحد يعيش حياته عادي أو يواجه صعوبات وايد ؟ وشنو هالصعوبات ؟
السموحة ع الاطالة في الموضوع والله من خوفي ع ولدي ...
دعواتكم له بالشفاء من كل مما يعانيه

المزيد من آخر المواضيع من نفس القسم:

• اجمل اسماء مواليد جديدة بحرف الراء ومعانيها
• افضل الطرق البسيطة التي تساعد على تنويم...
• متى يسمع الطفل وطرق التعامل معه خلال هذه...
• اهم فوائد الحفاضات القماش وانواعها
• هل يمكن ان ينتقل فيروس كورونا خلال الرضاعة...
• افضل طرق علاج نزلات البرد عند الاطفال
• وصفة التوت والشوفان والكوسة للاطفال الرضع...
• وصفة التفاح المهروس والذرة وقرع الجوز...
• وصفة الجزر والذرة واليقطين للاطفال الرضع حصري
• افضل طرق التعامل مع المولود الجديد

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[غزالة AD]

حبيبتي الله يطمن قلبج عليه وان شا الله ما يكون فيه الا العافية يارب.. وديه عند مركز دبي للتوحد رقمهم 800288476 وهم بيشخصون حالته ويمكن ما يطلع فيه توحد لانج قلتي انج شاكه بس الاطباء تقيمهم غير. وديه ويارب يطلع الولد سليم ومافيه شي يارب. طمنينا عليه.

[شغف أنثى]

الله يسمع منج الغالية ، ومشكورة ع اهتمامج ، اتصلت لهم بس ردو علي في الاستقبال ان الدكاترة حاليا مسافرين بيرجعون اخر شهر 8 ، وعطوني أسماء عيادتين وأرقامهم للاستشارات النفسية بشكل عام ، ما أدري اذا عندهم تشخيص للتوحد ، وما أدري أروح عندهم ولا أنطر المختصين بمركز دبي لأني بصراحة أبي اتابع عند دكتور واحد وما اشتت ولدي ، بس فنفس الوقت ما أقدر أنطر شهر بعد ولازم أتحرك بسرعة ، فمحتارة وايد لدرجة اني فاقدة للتركيز ، الشي أحطه ما أذكر مكانه ، وبعد حاليا حامل وتاعبني الوحام وزوجي مو موجود وعايشة بروحي ، والحمد لله رب العالمين ع كل حال ، موضوع ولدي شاغلني حاليا أتمنى ما يكون عنده توحد .
دعواتكم عزيزاتي ،،،

[Ward-uae]

حبيبتي ان شاء الله ما فيه الا العافية سيري اي مستشفى حكومي دبي او لطيفة قسم الاطفال
اختي انتي ما تابعين ولدج توديه المستشفى بين فترة والثانية يقيسون وزنه وطوله اشياء روتينيه لو الولد ما فيه شي بس تطمنين عليه من ناحية تغذيته وسلوكه والتطورات العقليه

[المغتربة]

هل ولدج وحيدج ما عندج غيره ؟ يمكن بسبب ها الشي
تابعيه في مستشفيات دبي و حاليا دخليه الحضانة خليه يحتك مع الاطفال بسرعه

دايما اللي ولدها تشك فيه ادخله حضانة بسرعه و تراجع له في المستشفى

[غزالة AD]

اتري لين ما يرجعون الدكاترة في مركز دبي لانه المراكز الخاصة يمكن تكون تجارية وغالية واايد. وبعدين هذيلا المراكز حق الاستشارات النفسية بشكل عام مش حق التوحد..عشان جي اقولج اختي اهدي واتريي لين يخلص شهر 8 ويرجعون الدكاترة وتطمنين عليه وان شا الله مافيه شي..وخلال هالفترة حجزيله موعد في مركز دبي عشان تكسبين وقت واقري فالنت اكثر عن التوحد واعراضه..الولد باذن الواحد الأحد مافيه شي. الله يطمنج عليه يارب.

[ورقة ناعمة]

ان شاء الله ولدج مافيه شي

وحتى لو فيه مرض التوحد بينتهي العالم ,,, أطفال مرضى التوحد وايد منهم طلعو بإنجاز وذكاء ووغيره

شوفي الأجانب كيف يتعاملون مع أطفال التوحد شوفي الأمهات الاجنبيات وايد منهم تعالجو عيالهم والسبب التعلم والاستمرار والامل ....

لاتوقفين وابدئ انتي بتتعلمين وبتفيدين غيرج ,,,والحمدلله على نعمة صحة الجسد والعقل والله يحفظه ويعافيه لج يارب

[شغف أنثى]

مشكورات حبيباتي على ردكم وتحفيزكم لي ، فميزان حسناتكم ان شاء الله .
أيوا انا ما حبيت أعرضه الا في مركز دبي عسب تكون المتابعة من أولها عدكم وبدون تشتت للياهل .
هذا مو وحيدي أختي المغتربة ، أنا عندي طفل في الصف الأول بس ما شاء الله متميز في دراسته والأنشطة المدرسية ، وبعدين الله رزقني توأم ، بنت وولد ، عمرهم 3 سنوات ،بس البنت طبيعية وتتعلم الكلام واجتماعية يعني ما عدها أي مشاكل ، بس الولد عنده تأخر بالنطق وأعراض شفت مثلها بالنت ، والمشكلة الأعراض يوميا تزيد أو تطلع أعراض يديدة ، ومشكلتي مو عارفة شلون أتعامل معاه الولد يصدني ما يبيني ، بس يبي أبوه يتبعه وين ما راح ، بعدين أبوه بيداوم بتم معي وهو مو متقبلني لدرجة انه يرفسني وأنا حامل أتألم واصيح وهو مو ع باله لأنه متبلد المشاعر وهذا عرض من أعراض التوحد .
أنا ودي أعلمه الاشياء الضرورية اللي تنفعه مستقبلا
والله ما أحاتي دراسته همي ينطق ويعتمد ع نفسه في اللبس والأكل ودخول دورة المياه الله يعزكم .

ابي اعرف هل يقدر يتعلم ويعتمد ع نفسه مستقبلا ؟
وهل في أطفال قدرو يندمجون في المجتمع بطريقة طبيعية بغض النظر عن الدراسة لأن الدراسة ممكن تطلع عندهم صعوبات ؟

بأسرع وقت ممكن أبي اوديه واعرف شلون ابدي وياه لأن حالته تتدهور من يوم ليوم .


دعواتكم خواتي والله محتاجة لدعوة كل وحدة فيكم حتى لو ما بترد علي ، فلعل احداكن مستجابة الدعوة .

[غزالة AD]

الله يطمن قلبج عليه يارب..وان شا الله يطلع مافيه شي. طمنينا عليج بليز.

[رسايل غلا]

اختي انتي تقولين انج شاكة

فهل انتي تعرفين شو هي اعراض التوحد؟ يمكن تكونين غلطانة وفاهمة تصرفات ولدج غلط
ياليت تشرحين لنا شوي عشان نقدر نساعدج وان شاء الله ولدج ما فيه الا العافية

[نسيم الجنه1]

ايه الاعراض ياقمر الى ملاحظها عليه

[شغف أنثى]

ياريت أطلع غلطانة .....
عنده الدوران في المكان مرات ومرات
الرفرفه بالايد وطول الوقت يطالع أصابعه
المشي عطول الجدار ومتابعة ظله
ركوب الاماكن المرتفعه مرات ومرات وحتى لو طاح عادي يرجع يركب مرة ثانية
طبعا عدم التركيز ولا يرد ع حدا اذا ناداه بإسمه
ما يختلط بغيره مع الاطفال ويلعب بروحه ف التراب
ما يطالع احد اذا كلمه
يحب يمسك اشياء معينه من طرفها ويدورها ويتم فترة ع هذا السلوك
يتمتم طول الوقت ويغني بصوت واحد من الصبح لليل
وما يتكلم أبدا
وطبعا معتمد علينا فكل شي
ما ياكل بروحه ولا يشرب بروحه وللحين ما علمته يروح دورة المياه الله يعزكم لانه ما يستجيب لي ويقاومني بكل الطرق
أبوه يقول عادي كل هالاعراض بتروح ولا تفكرين ، بس اشوف الولد ما متجاوب معانا كيف بيطلع للمجتمع ويتجاوب
عفكرة اخوه الكبير تكلم واعتمد ع نفسه بعمر 4 سنوات بس كان يستجيب ويلعب مع الناس فما كنت خايفة عليه

الله يجزيكم الخير منو كان عندها طفل بنفس حالة ولدي وشفي منها ؟

رحمتك ياربي .....

[شغف أنثى]

الغاليات في العين سمعت ان في مركزين للتوحد في العين حكومي وخاص
حد يعرف رقمهم ؟

[ليندااااا]

الله يحفظه وان شاء الله ما فيه الا العافية

[yummy mommy]

بالنسبة للمراكز الي سألتي عنها بالعين .. اتصلي للبدالة 181 وقولهم عطوني ارقام مراكز التوحد بالعين .. ودقي ع المركز واستفسري بالي تبغينه والله يحفظ ولدج ويعافيه ..