فترة النفاس و البعد الزوجي ؟؟؟؟

[المغتربة]

السلام عليكم







خواتي في وحدة اشتكت لي من زوجها انه كثير الانشغال عنها و شاكة فيه و زخته كذا مرة
و تموت عليه تصيح عليه !!!!
و قعدت معاها اجوف اساس المشكلة
هي تزوجت عن حب و مشاكل لين ما رضوا اهاليهم !!!!!!!!!!!!!!!!!!




الحرمة : جميلة جدا ، عندها اطفال ، خادمة ، ربة بيت ، يوصلها راتب شهري من زوجها
ساكنة في مسكن منفصل و راقي جدا و فلة كبيرة
طباخة
مربية اجيال


ما ننسى ان الزوج وسيم و موظف و و و فيه مميزات جميلة






بعدين شوي شوي اكتشفت ان اساس المشكلة كانت من فترة حملها و نفاسها






*الزوجة في فترة الحمل 9 شهور وحام و مالها خلق نفسها
و تنام بروحها بسبب انها تحب تنام ع دوشق مريح ! و 24 ساعه ظهري و ظهري
*في فترة النفاس 60 يوم في بيت اهلها بدون مبيت الزوج
يعني الزوج يمر عليها كل فترة و يرجع بيته ينام
* قبل الولادة بشهر تروح بيت اهلها ( لانهم في امارة ثانية )
* قعدت تراويني اغراضها ما لقيت قميص نوم او لبس مغري
كلها ملابس طويلة حتى والدتي ما تلبسها !!!! يعني والدتي تلبس احلى عنها



يعني لا تجابلينه ولا تلبسين له ولا تسوين له شي و تبغينه ما يخون
ولا يدور حد يسولف معاه
انا مكانه اقل شي تزوجت بالحلال !!!






اساس المشكلة البعد العاطفي بينهم
ياخي لا تقولين لي حب قبل الزواج 10 سنين الحب يطير بدون عشرة؟
وين العشرة في الموضوع يوم انج كله بعيدة عنه حتى و انتي نايمة ؟




-الزوج يطلب منها حقوقه الشرعية و هي اطنش متعذرة بالحمل

-يطلب منها تطلع معاه لمول و تتعذر بالابناء

<<< والله انا في التاسع و اكون منسدحة و تعبانة و من اييب لي طاري الطلعه اركض شرات ناصر القصبي الطلعة ترد روحي

- يطلب منها تسمح له يسافر مثلا تعصب و تتحرطم ؟؟
طيب انتي وينج عنه ليش ما تقعدين معاه ليش ما تجابلينه ؟









خواتي بعد كل هذا
و نقول الريال ليش يخون





حياتي ترى بو وزار و فانيلة يخون بدون سبب
لكن لما يكون في اسباب واضحة جدا هني الحرمة تكون مقصرة






ليش الوحدة لما تروح بيت اهلها نفاس ما تسحب زوجها معاها !!!






و ترتب لها غرفة و حمام لهم مدخل خاص
او مدخل بعيد عن اهلها و خواتها عشان ترتاحون
ليش تتركون رياييلكم 40 يوم بدونكم
لا هو بيحس فيج ولا بيحس انج تتعبين
و هو بيكون وحيد لا حد يجابله ولا حد يسولف معاه
و لما يكون معاج يساعدج
ليش دايما متعبين امهاتكم؟؟؟ كفاية عليهم التعب و انتوا صغار
شركوا ازواجكم في البيبي الصغير مع امهاتكم


بس لا تخلين الريال بروحه
مو عشان بيخون وما بيخون

عشان يتعود عليج وما يقدر ع فراقج









وحدة من بنات عمي تطلقت بعد 10 سنين زواج
تقول كنت مطنشتنه في النفاس و هاي غلطتي يعني معترفة


كلما تجوفني حامل
تقول لي يا المغتربة
لما تربين اسحبي زوجج معاج ! لا تنسين
ما فهمت قصدها لين لما جربت يكون زوجي معاي في النفاس
رتبت حجرة لي و حطيت فيها كل المستلزمات الضرورية من تلفزيون و ثلاجة صغيرة
و ملابسي و ملابسه و رتبت كل شي قبل الولادة
فعلا حسيت بتغيير ايجابي كبيرر و مب طبيعي

حتى بعد شهر من النفاس
مثلا اروح الصالون ساعه او الجم ساعه اخلي النونو معاه و مع الخدامة
و تعلم كل شي يبدل و يسوي
اقول سبحان مغير الاحوال
لو ادري جان سحبتك و ربطتك بسلك حديدي من زمان

حتى والدتي مستانسة تقول لي ارتحت شوي منج ع الاقل يجابلج
هو وانا ارتاح نص اليوم







لازم فترة النفاس يكون معاج !! عشان يحس فيج
ومو فرض 40 يوم ؟؟؟؟
ولا اقعدي في بيتج و رتبي امورج
ولا تحملي الوضع ؟
ولا تقولين ما يساعدني ما يهتم في البيبي ما يشيله ما يسوي ما يحس فيني
ما يسأل عني

ما بيحس فيج يوم انج خامدة هناك 24 ساعه
و كل شي بأسلوبج و فطنتج و ذكائج


انا اقول الحريم مكارات و عندهم افكار و سوالف
فاستخدموا المكر بصورة ايجابية في حياتكم
و مع السلامة

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[الرومانسية89]

صح كلامج وياليت المتزوجات يشوفوا هالكلام
والله يزيج كل خير ويرزقج ويرزقنا وياج ويسعدج يارب

[شما الهاجري]

كلامج صحيح اختي 100%

[Cobon]

انا معاج




الحمد الله عندي ملحق خاص فيني
ادخل و اطلع ع راحتي
و ريلي مرتاح و هو يبات معانا يوم اربي




و كلنا نتساعد
مثلا الفير اتم ناشة لان كل ساعه يصيح يبغي حليب البيبي
و عقب الصبح هو يمسك البيبي و انام شوي و اشفط الحليب و احطه ف مرضعه
و مرات اخليه عند امي او خواتي
خاصة بعد شهر من الولادة ابغي اروح الصالون اتسمكر
تقولون كامري و صارت بنتلي الا بصبغ شعري و بتحنى و و و و بسوي تقشير لويهي اللي فيه كلف و حمام مغربي
فخلاص اعتمد عليهم مرة عند امي و مرة عند ريلي و مرة عند اختي ع حسب



بس اللي اهلها ما يرضون ريال داش و طالع او يتضايقون من وجود الزوج او ما عندهم مكان
مب لازم الوحدة تبات بيت اهلها
خلاص تبات في بيتها و ريلها مفروض يساعدها
و عندها خدامة
او اتييب خدامة بالساعات و ادبر نفسها
و كل فترة حد يمر عليها ام زوجها او امها او ربيعاتها و يتساعدون

[سار90]

جزاااااااج الله مليووووووووووووووووووووون خير
تسلم اناملج

[yummy mommy]

المفروض عندج بيتج وبشكارتج بتساعدج .. ف ماله داعي سوالف بتم ف بيت اهلي تراج حرمة وعندج قبل هالنونو عيال وتعرفين شقايل يبدل ويرضع وغيره ..
ليش الدلع والتثقيل ع الاهل؟! ما اقول لا تروحين لاهلج بالنفاس رووووحي عشان الوحدة اصلا تكون تعبانة نفسيتها وتحتاج تبربر ويا حريم يفهمونها . .
بس لو اول بيبي باتي عند اهلج اسبوع بالكثير وردي بيتج مملكتج عند زوجج خليه يفتهم شو هم العيال وكيف هي الحياة الاسرية والامومة والأبوة !

رأيي . .

[مالتيزرس]

كلامج عين العقل اختي المغتربة ويسلمو ع طرحج ع الموضوع ..
بس ماعرف خواتي كيف تخلن رياييلكن وياكن فبيت اهلكن يرقدون وشقايل ياخذون راحتهم..


نحن عندنا منقود الريال يرقد عند حرمته .هيه عندها خوات مستحيل بتمن اربع وعشرين ساعة لابسات شيلة ومقيدات بسبة ريل اختهن ترا يحرم عليهم بعد هو مش حليل لهن ..ولا هو راح ياخذ راحته احسها صعبه عليه أكله وشربه فبيت حرمته أحسها مش حلوة ولا من العادات اصلا .

سبحان الله من عايلة لعايلة تختلف العادات

.أذكر بنت عمي طول فترة وحامها ريلها عندها راقد بيت اهلها وعقب عمي قالها عيب ومنقود شو بيقولون علينا الناس واهل الريال مخلية الريال يرقد عند اهلها وقايدته من أذنياته ؟ ..
الحرمة خلاص ثاني نونو من ولدت خلاص تظهر من المستشفى وسيدة ع بيت ريلها ..


مادري وين طلعت لنا هالموضة الريال يرقد فبيت اهل الحرمة أحسها غير ..؟؟!!

انا ريلي مستحيل يرضاها ع نفسه يرقد فبيت اهلي
يقوللي يخسي ارقد بيت اهلج وانا عندي بيت ..


وجهة نظر لا اكثر ماريد هجووووم ..


اسمحيلي راعية الموضوع يمكن طلعت خارج نطاق الموضوع ..

[أم محمد1988]

رايي من راي مالتيزرس

أشوفها صعبة كيف الريال يبات ف بيت أهل زوجته ؟!؟! وهو عنده بيت .. مادري أحس موب حلوووه ف حقه

وأكيد الأهل ما راح ياخذون راحتهم وخصوصا اذا عندج خوات فالبيت .. وما اعتقد انه بيتم ٢٤ ساعه فالحجره ما بيظهر منها .. أكيد بيظهر برع .. وكل شوي لازم تسوين له درب ..

مادري عيل شو الهدف من قعدتج ف بيت أهلج ؟!؟! انتي والزوج والعيال كلكم بتروحون بيت أهلج وتبينه يساعدج فالنونو الأفضل اتمون ف بيتكم أحسن لكم ولا تسحبين ريلج ل بيت أهلج ..

[Yazi.90]

---

رايي من راي مالتيزرس

أشوفها صعبة كيف الريال يبات ف بيت أهل زوجته ؟!؟! وهو عنده بيت .. مادري أحس موب حلوووه ف حقه

وأكيد الأهل ما راح ياخذون راحتهم وخصوصا اذا عندج خوات فالبيت .. وما اعتقد انه بيتم 24 ساعه فالحجره ما بيظهر منها .. أكيد بيظهر برع .. وكل شوي لازم تسوين له درب ..

مادري عيل شو الهدف من قعدتج ف بيت أهلج ؟!؟! انتي والزوج والعيال كلكم بتروحون بيت أهلج وتبينه يساعدج فالنونو الأفضل اتمون ف بيتكم أحسن لكم ولا تسحبين ريلج ل بيت أهلج ..

بالضبط نفس كلامي ،،

اللي تبا ريلها عندها تقعد فبيتها وعندها الخدامه
عاد الحين البيوت ماتخلا من الخدامات ،،
يعني امج لين متى بتم تعابلج مردج بتنفسين فبيتج الحين ولا بعدين !

[استغفر الله..]

الحين المغتربه وكوبؤن نفس العضوه ؟
دايما نفس الاراء ونفس المواضيع
او انكم خوات

عالعموم احس اصلا فشله الريال يرقد بيت حرمته
خصوصا لو الحرمه عندها خوات
ممكن ايي يزورها ويتم عندها لليل
بس يبات لا اشوفها صعبه لانه هو فكلتا الحالتين مبيته عند الحرمه مابينفعه بشي
يعني مابيقدر يمارس حقه الشرعي
حتئ لو كان وياها معناته بيخربط حتئ لو كان وياها وهو مب قادر يسوي هالشي سواء بوجودها او بدونه ؟
لا وياها ولا مب وياها لو هو خايف ومتقي ربه مابيسويها
بسكم خوف عهالريل والله شي مسؤوليات اكبر من انه الحرمه اتم معلقه حياتها ع ريال وتسويله مخابرات وتتعب نفسيتها عالفاضي وهو مب مفتكر !

[بريد الذكريات]

اول ياهل هيه الوحده تبان عند اهلها يس اذا عندها درزن ﻻ
والريايل مب واحد في الي يساعد وفي الي يشوف ان هذا دور الحرمه ومايحط يده في شيء
يعني قولي حمدلله

[Lady Reem]

اسفة بس فترة النفاس مش عذر للخيانهة
كلها 40 يوم ..
في حريم رياييلهم برع للدراسة او العمل لسنوات وما خانوا
بس اللي عنده قابلية للخيانة يتعذر باي شي.

[احتاجك..]

الحرمة ليش تندر بيتها !! خلاااص موضة الاربعين جديييمة خخخخخ انا عن نفسي اول ياهل بس ف بيت الأهل وعقب خلاص مافي اربعين الا هم يومين عقب الطلعه من المستشفى ترتاح ف بيت اهلها وعقب ترد بيتها

او تخلي امها تي تتم عندها لو سمحتلها الظروف

[مراسيل الوفاآ]

اول ياهل لازم الحرمه تكون ف بيت اهلها، وبعدها عن ريلها ف هالفتره مب عذر للريال بأنه يخون
لا تحطون مبررات لخيانه الرياييل لأمور الحرمه مب مسؤوله عنها، يعني عقب الولاده يكفي التعب
اللي تحس به الحرمه وفوق هذا كله تجابل الياهل وما تحصل وقت عشان ترقد ف هي بحاجه لوقت
ترتاح فيه واذا عندها امها او خواتها يجابلون الياهل ف يتم هالوقت لها تريح وتهتم بنفسها اذا ما
رقدت وتكفي زياره الزوج سواء يوميا او كل يومين او اسبوعيا ع حسب اماره وشغل كل زوج
حتى لو ما اتم ف بيت اهلها ٤٠ يوم بالضبط ع الاقل شهر تتأقلم وتتعلم كل شي وعقب ترد عند ريلها
وتعلمه بدون ما تتوتر وتحس بضغط من الزوج والياهل اما الولاده عقب الاولى ف يعتمد ع عمر العيال
اللي قبلهم يعني اذا يدرسون ف اكيد بيتها ابرك لها تيلس فيه وعندها خبره فبتعرف كيف تنظم وقتها


الحرمه محتاجه لوقت تكون فيه بعيده شويه عن الزوج والمسؤوليات سواء بعد الولاده او فتره قصيره
تقضيها ويا اهلها كـ مثال سفره لمده اسبوعين او انها تبات ويا خواتها يوم او يومين بالكثير تسوي اي
شي هي ترتاح له ويغير من نفسيتها عشان ترد لريلها وتجابل بيتها بنفسيه حلوه ، لانه الضغوطات وخاصه
عقب العيال بروحها تبعد الزوجين وما تعطيهم وقت ييلسون فيه ويا بعض لكن هذا مب عذر للريال عشان يخون !
وبالتالي البعد سواء لفتره النفاس او النقاهه تخلي الزوجين يشتاقون لبعض لكن بشرط يكون شي اهتمام وتواصل
واهم شي الاسلوب الحلو والوقت المناسب اما اذا وحده تعرف انها بتقصر ف هالامور وهي بعيده ف هي ادرى
بأطباع ريلها وبالتالي هي اللي تقرر تبتعد ولا اتم ويا ريلها

[المغتربة]

انا حطيت الموضوع إلا للتذكير و للتنبيه
ما قصدت فترة الاربعين فقط
اقصد فترة الحمل و كثرة التعود ع النوم بدون الزوج حتى اللي تبات في غرفة و الزوج في غرفة
و للي 24 ساعه تتوحم و تركض ع بيت اهلها ؟؟؟ و الزوج كله روحه


لا اتي لي وحدة تقول مب عذر
لا حياتي عذر و نص
و شرع الله حلل له 4 بدل وحدة
و محد خسران غيرج لا انا خسرانة ولا باجي البنات
و شكرا ع مشاركاتكم