ابغي اسافر بس

**future dreams** · 2015-07-12, 15:27

السلام عليكم

بصراحه وايد متضايقه احس مافي حد من اهلي في البيت متقبل اني اسافر اطلع اجازه اسبوع برع الامارات ..
الكل مشغول بالدوامات وانا عندي اجازه وعندي مبلغ يساعدني اسافر اسبوع اخواني مثل ما تعرفون تجنيد والي عندهم دوامات واحد بس قال بيقدر يطلع اجازه بس هل الواحد قاهرني وبط جبدي من كثر ما هو هيييييييييز ويتشرط ولو بنسير عمان مسقط يبا طيران الامارات وانتو تعرفون طيران الامارات كيف الاسعار ....شفت شركه اسبوع لتركيا ب ٣٩٠٠ درهم مع تذاكر وسكن وجي ...ما طاع اونه الطيران رخيص مب زين ...والي يسمع هو بيدفع ؟!!!!! وتم يقول هذا اكيد اي فندق ....انزين نحن ما بنسكن دهر هناك ..بصيح والله احس مخنوقه ابا اسافر وعندي امي بتروح ويايه وابويه موافق دامنه اخوي بيسير لكن هل الاخو يتشرط ع كيفه وانا ولا سويت ولا حجزت شي ....

شو اسوي انا محتاجه اسافر اغير جو اسبوع لاني من سنتين انشغلت بالدوام ودراسه الماجستير " تخيلو انتو دوام - بيت - دراسه "
الي بتقول شرات اخويه اتم في بلاادي امان واحسن لي ...
انا وياكم مافي احلا من الامارات ومن بلادي ،،،
العام خذنا يومين بوظبي في فندق " متنا من الملل " وما عرفنا وين نسير وشو نسوي وحياتنا كانت مآساه حشره الصغاريه ..

انا ابا اخذ راحه لنفسي اسبوع ...
ساعدوني شو اسوي خواتي الي عندهن فكره تساعدني ،،،،والي تقولي يلسي في البلاد تقترح عليه اماكن برع دبي " لاني من دبي "
ويزاكن الله خير

المزيد من آخر المواضيع من نفس القسم:

**Diana Sy** · 2015-07-12, 17:16

حبيبتي الله يسرلك وتسافرين برا تغيير جو وتستأنسين..
دام أخوكي يتشرط خلي هو يحجز بكيفه وخلاص المهم لا تضيعي فرصة السفر.. على فكرة معظم الإخوان متشابهين بهلحركات ..
الله يرزقك بالزوج الصالح وتسيري وياه

**ملاآك قلبكـ،،** · 2015-07-12, 20:20

انتي عرضيله
اذا بيسافر المكان اللي انتي تبينه
التكاليف عليج
بس لا يقص عليج ويخلي الشوبنق والحواطه الزايده عليج بعد

واذا هو يبا يروح ع كيفه
هو يتحمل تكاليف سفره

**future dreams** · 2015-07-13, 00:47

تصدقون طبعت له صور الجوازات من ثلاث اسابيع في غرفته واليوم تذكرهن !!

**Intisar** · 2015-07-13, 13:28

المشاركة الأصلية كتبت بواسطة future dreams

تصدقون طبعت له صور الجوازات من ثلاث اسابيع في غرفته واليوم تذكرهن !!

سوي مثلي و شوفيليج قروب بنات تسافرين وياهم...

**Ward-uae** · 2015-07-13, 16:58

سيري راك عندهم فنادق حلوه في الجزيرة الحمرا
وددولف استوريا حلو او اللي يبي مكان هادي
منتجع مرجان عائلي بحت احب اسيره فيه سبا وألعاب لليهال وقريب منه الحمرا مول عيبني اذا عندج اخوان معرسين سيري معاهم بيستانسون وانتي بعد بتستانسين
دبا فيه اماكن حلوه طبيعة تقدرين تستأجرين مزرعه وتقعدون قعدة عائلية لو خوانج ما يبون الوالده والوالد بتعيبهم القعده
عن السفر اذا تبين سيري استراليا جوهم حلو هالفترة سوي بكج وطلعي مع عمج وبناته حلوه طلعت البنات لكن يبالكم احد وياكم مثلا عمج او ابوج او خوالج مب لازم اخوج
فيه اماكن حلوة والطلعه في الشتا احلى في البلاد عندج فندق قصر السراب عيبني
مليحة وحتا وشوكه ومنيعي ومصفوت اماكن وايد حلوة وقت المطر هنا خبري اخوج بتعيبه هذي الاماكن
واذا ما سرتي لا تضايقين ان شاء الله الله بيرزقج ريل بيوديج وين ما تبين

**no name** · 2015-07-13, 17:25

الحين صلالة حلوه ورخيصة

**أم المزيونه33** · 2015-07-13, 22:33

الله يعينج يا اختي انا ما سافرت الا عقب ما عرست

جربي سافري وَيَا حد من اخوانج المعرسين مده اسبوع او حد من عيال اخوانج او عيال اخوانج

لا تقولين اخوانج الكبار مشغولين وعندهم عائله بس انتي اقترحي عليهم يسافرون وياج وعليج السكن والتذاكر يمكن يوافقون

**الحيــاة** · 2015-07-14, 01:20

حبيبتي انا شراتج من دبي وأبغي أسافر بس للاسف ما عندي حد أسير وياه والسفر مب حلو يوم الوحده
روحها احلى شي ويا أهلها والا اربيعاتها .. اهلي ماعندهم اجازات واربيعاتيه بيسافرن ويا هلهن دام انج من دبي
حياج اذا بسيرين ويايه ممكن تكون فرصه سعيده ونتعرف على بعض ونتشارك فالسفر .. انا وايد احب السفر
وأحب تكون ويايه وحده تحب السفر والوناسه وفي نفس الوقت تعرف حدودها و محترمه

**future dreams** · 2015-07-14, 13:15

حبيباتي مشكورين على اقتراحاتكم وتعاطفكم احبكم والله ..
شوفو صعب جدا اسير بروحي ويا شله بنات فيها قص رقاب ... اهلي اقصد عماتي اذا بيسافرون مع ريايلهن هن عادي عندهن بس فضيحه اسير وزوجها موجود وياها .. ومره رحت انا والوالده مع ولد خالتي وزوجته وبنته كان اوكي لانه ولد خالتي متعوده عليه بس اللحين يوم يحجزون للسفر ما يخبرونا مع انه يوم رحنا تذاكرنا والسكن وكل شي دفعنا من عندنا ... عشان جي مول ما احب اسير اعق عمري واقولهم احجزو لي وياكم ..

والي رشحت لي استراليا 😢 اعرف انها حلوة هل الفترة بس سفرة استراليا عندي بالذات باجلها للسنه اليايه
ان شا الله احصل منحه من الجامعه مع قروب من الدكاتره ..

**راقية بطبعها** · 2015-07-15, 03:11

اسالي عن هالة كاظم
هي صاحبة فكرة رحلة التغيير شي جيه
و هي مستشارة خليجية تسوي رحلات جماعية للحريم
و في الرحلة يكون دورات لتطوير الذات و أنشطة حلوى
و تكون قروب كبير و رفقه آمنه
يعني هي عبارة عن دورات مع سياحة برع البلاد
تغيرين جو و تستفيدين في وايد جوانب من حياتج مهنيا و اجتماعيا
أقترحي على اخوانج يمكن يوافقون

**عذوج** · 2015-07-15, 03:29

عليج بالاستغفار اكثر من الف مرة باليوم وشوفي كيف امورج بتتيسر

الموضوع: ابغي اسافر بس

أدوات الموضوع

عرض

ابغي اسافر بس

المزيد من آخر المواضيع من نفس القسم:

رد: ابغي اسافر بس

رد: ابغي اسافر بس

رد: ابغي اسافر بس

رد: ابغي اسافر بس

رد: ابغي اسافر بس

رد: ابغي اسافر بس

رد: ابغي اسافر بس

رد: ابغي اسافر بس

رد: ابغي اسافر بس

رد: ابغي اسافر بس

رد: ابغي اسافر بس

المواضيع المتشابهه

ابغي اسافر بس رشحوا لي مكان

ابغي اسافر بس محتارة ... !!!!!

ابغي اسافر ل ماليزيااااا...ساعدوني

ابغي اسافر واخذ الخدامات بس ...........

ابغي اسافر مصر حد يساعدني