بيت الزوجية صندوق أسرار

[رسايل غلا]

السلام عليكم ورحمة الله وبركاته

اليوم حبيت اتكلم عن شي وايد مهم وهم نقطتين صغار.

أول نقطة هي أسرار بيت الزوجية:
بيتج أو ملحقج أو جناحج أو غرفتج أيا كانت هي عبارة عن صندوق أسرار
أو ممكن تعتبرينه صندوق لجمع المال تخيليه مثل ما تبين لهالسبب لازم
عقب ما تخيلتي هالشي انج تعرفين كيف تحتفظين بكل سر بينج وبين
ريلج وأهل بيتج, أي شي يصير بينكم ما يحق لأي مخلوق يعرفه
ولا يحق لج انتي كـ زوجة تبوحين به لأي شخص مهما كان قريب منج
حتى لو كانت أمج الا في حالة الاستشارة واقصد بهالأسرار
كل شي يأمنج عليه ريلج ويقولج انه مفروض ما يظهر برى
كل شي يخص عشرتكم وحياتكم الخاصة, محد فالدنيا له
دخل شو سويتي حق ريلج في ليلة رومانسية ولا شو رتبتيله
الا لو كنتي بس تعرضين فكرة او ابداع لانه هالشي وايد انتشر وهو سبب
في خراب وايد بيوت بدون وعي من الطرفين.

النقطة الثانية وهي الاستعراض والمباهاة المبالغ فيها:
فيه حريم بعمد او بدون قصد طول الوقت ماشي ع لسانهن
غير ريلي كذا وريلي كذا وريلي يابلي وريلي سوالي
وريلي يعرف فلان ويعرف علان
لازم كل وحدة تعرف انه نحن كـ أطراف خارج اطار حياتها الزوجية
مالنا خص شو سوى ريلها او شو كان ومنو يعرف وشو ياب
صح التحدث عن النعمة حلو بس مب كل شي فحياتنا نقوله
ومهم نراعي شعور الناس اللي جدامنا, يعني وحدة مثلا
ريلها انسان ع قد حاله او فقير او ما يشتريلها شي او يهاديها
لطبع موجود فيه او غيره شو ذنبها تسمعج وانتي طول الوقت
تخبرينها عن العقد الالماس اللي خذه ريلج لج ولا الشنطة
اللي بعشر وعشرين الف اللي كانت في خاطرج ويابلج اياها!
نحن مجتمع ما عندنا غير هالسوالف لو حاولنا نغيرها شوي
بتقل المشاكل اللي نسمع عنها والمقارنات اللي تستوي
بين كل زوجين بسبة مباهاة فلانة وعلانة بدون داعي
هالكلام قلته لأنه فعلا فيه حريم يقارنن وكل ما تسمع
وحدة تتمدح وتبالغ تسير تقول حق ريلها:
فلانة ريلها يابلها كذا وكذا وسوالها كذا وكذا وانت من خذتك
لا يبت ولا سويت او انت ما تهاديني ولا تشتريلي شي
حتى لو هي عارفة ظروف ريلها بس المقارنة هي السبب.

فالنهاية يا خواتي انا ادور مصلحة الجميع, ساعدوا بعض عشان تخف المشاكل اللي من هالنوع.

تقديري

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ڪبريآء طفلہۧ]

كلام من ذهب .

وفعلا اهم شي فالحياه الزوجيه , الخصوصيه
وان محد يدري لا عنج ولا عنه ولا شو صار بينكم سوآء خير او شر

لان انتي ماتعرفين الشخص اللي قاعده ترمسين جدامه شو ف نيته ولا شو يفكر ؟
فالواحد يريح باله ويتجنب هالمواقف ويحفظ حياته لنفسه وشريكه وبس

يعطيج العافيه

[غلآ نفسي]

بالضبط

كلامج صحيح

الخصوصيه الخصوصيه الخصوصيه

شي حريم حتى تفاصيل ( ....... ) تقوله ومتى صار واي وقت

وهالشي غلط

واللي شايفه خير عمرها ما بتقول يابلي وسوالي ووداني ويابني

بالتوفيق

[رسايل غلا]

كلام من ذهب .

وفعلا اهم شي فالحياه الزوجيه , الخصوصيه
وان محد يدري لا عنج ولا عنه ولا شو صار بينكم سوآء خير او شر

لان انتي ماتعرفين الشخص اللي قاعده ترمسين جدامه شو ف نيته ولا شو يفكر ؟
فالواحد يريح باله ويتجنب هالمواقف ويحفظ حياته لنفسه وشريكه وبس

يعطيج العافيه

تسلمين حبيبتي عالكلام الطيب من ذوقج
وصح فيه ناس يحبون يسمعون اسرار غيرهم ويتلاعبون بها وتكون حديثهم مع الناس
عسب جي الواحد لازم يحذر ويخلي اسرار بعيد عن السوالف مع الناس.

شكرا

[رسايل غلا]

بالضبط

كلامج صحيح

الخصوصيه الخصوصيه الخصوصيه

شي حريم حتى تفاصيل ( ....... ) تقوله ومتى صار واي وقت

وهالشي غلط

واللي شايفه خير عمرها ما بتقول يابلي وسوالي ووداني ويابني

بالتوفيق

صح فيه ناس يحبون يسولفون في اشياء خاصة وهالشي اصلا حرام
ما يجوز الحرمة تتكلم عن اللي يستوي بينها وبين ريلها من خصوصيات

تسلمين عالرد الطيب والله يوفقنا جميع.

[Yazi.90]

ما شاءالله عليج كلامج درر وماقصرتي ،،

يعطيج الف عافيه

[ثريا 2014]

هذه الصواب اختي رسايل غلا
جزاج الله كل خير على النصيحة القيمة

[رومنسية 84]

يزاج الله خير

[ليندااااا]

الله يجزيج الخير على النصايح
لكن شو الحل اذا كان الريال من طبعه الثرثرة
وما يخلي سر من اسرار البيت الا وتكلم فيها قدام ربعه
عن مصروف حرمته وتصرفاتها وكلامها
اسرار البيت واجب حفظه على جميع افراد البيت
سواء حرمة او ريال وحتى العيال لازم تعليمهم حفظ اسرار البيت من صغرهم

[Diana Sy]

من واجب الأم تعطي هلنصائح لبنتها قبل ما تعرس وتأكد عليها ضرورة الحفاظ على أسرار بيتها
مشكوورة أختي موضوع قيم ياليت الإدارة تثبته

[Cobon]

انا الحمد الله ما اسولف عن حياتي الخاصة ولا عن الهدايا ولا عن شي
يمكن مواضيع عامة و نصايح و سوالف حلوة
لدرجة اهلي يقولون تصدقين نحن مول ما نعرف ع حياتج الخاصة شي ؟؟
ليش لازم اعلن لكم يعني شو اييب لي و شو ما اييب لي و هو زين ولالأ ولا هو رومنسي ولا ما ادري شو


و اعرفوا اللي ع لسانها ريلي ريلي ريلي ريلي
يا انها خروفة او انها خريطة غير جذي ما شي

[ورقة ناعمة]

المحروم دايما يبرز نفسه عنده اللي محروم منه ,,,,اللي تتكلم عن تفاصيل حياتها

هذي تتكلم عن امنياتها او تتمنى يصير هالشي فيالسة تالف

وااللي شايف خير بيسكت مابيقول انا وانا وريلي وريلي لانها متعوده عالخير

[bnooota]

تسلمين

[رسايل غلا]

تسلمن على المشاركات الجميلة والتفاعل الحلو منكن

الريال اللي يطلع اسرار بيته هذا عنده خلل ونقص نفس الحرمة بالضبط
وعندهم فكرة انه سوالفهم هاي تنفيس عن اللي بداخلهم
شكل الروتين ويحسبونه عادي مع انهم بيتحاسبون عليه بعد

الله يهدي هالنوعية من الناس

[~شوق~]

جزاج الله خيراً

اللهم هب لنا من أزواجنا وذريتنا قرة أعين وأجعلنا للمتقين إماما

"اقضوا حوائجكم بالكتمان"