حفلة الخطوبة مب الملجة .. تكفون يالمتزوجات دخلوا

[lolatiy]

هلا و مرحبا

شحالكن الشيخات ؟

اليوم عندي استفسار و ان شاء الله تساعدوني ..

انا انخطبت عقبال كل البنات ويعرسون قبل العيد ان شاء الله ^_^
ناويه اسوي حفلة خطوبة لان خطيبي عنده ظروف خاصه فبتكون الملجة بعد سنة او اكثر بإذن الله

لكن ما اعرف شيء انا اكبر وحده فالبيت وانا اول وحده في العايلة تتزوج ما اعرف شيء عن حفلة الخطوبة متوتره ساعدوني و الله يحرم وجه كل من ترد علي او ترفع الموضوع عن النار آآآآآمين



1. الحين انا مادري محتارة اسوي حفلة خطوبة صغيرة بين الاهل بما انه باقي واايد عن الملجة يعني حفلة حريمية وعزومه عشا بسيطه ؟! ولا اكتفي بالخطوبة الرسمية بين الرياييل وهدفي الاشهار لان الملجة مطولة

2. ماعندي فكره شو الترتيبات والتجهيزات لحفلات الخطوبة ما صار وحضرت حفلة خطوبة قبل .. شو تسوي العروس شو مطلوب منها فهالحفلة اقصد شو فقرات الحفله او شو احداثها .. هي بتكون حفلة حريمية يعني امي وخواتي وام المعرس وخواته وفالبيت والرياييل بس ينزل لهم عشا لا معرس بيدش وولاشي ولا المفروض اني اتغطى ويدش يلبسني الدبله شو هو المتعارف عليه سااعدوني ؟

3. حفل الخطوبة تكاليفها تكون على المعرس ولا على العروس ؟ ربيعتي قالتلي ان اهل المعرس هم اللي ايبون صينية شوكليت + الدبله + العشا ؟

4. شو هو يوم الخطوبة ؟ ربيعتي قالتلي انه اليوم اللي ايون فيه الحريم عسب يشوفون البنت (طبعا انا ما اقصد النظره الشرعيه) اذا امه وخالاته وخواته شافوني بالنظره الشرعية قبل ليش يوم الخطوبة هذا هل هو ضروري ؟؟



ساعدوني خواتي الغاليات ادري فديتكن ما بتقصرون وياي ..
الي عندها خبره في الموضوع ما تخبل علي، وان شاءالله نستفيد كلنا من الموضوع
بانتظار المشاركات والسموحة

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[رسايل غلا]

اختي حبيبتي
الخطوبة عند غير الإماراتيين هي نفسها الملجة
وتعتبر كلام رسمي للزواج، فإذا انتي امكانياتج
تسمح تساعدين اللي متقدم لج سوو الملجة
في احتفال عائلي صغير لأنه خسارة تسوين حفلة
الحين حق خطوبة بس وعقب تسوين حفلة مجلة
وعقب العرس ف بتكون مصاريف بدون داعي
هذا مجرد رأي شخصي
والله يوفقج ويتمم لج ع خير

[[..دانــة..]]

عزيزتي نحن عندنا ملجة واللي هي كتب الكتاب
مافي شي اسمه حفلة خطوبة خصوصاً أنه في مجتمعنا هالشي ما يعتبر رسمي
وما أنصحج تسوين حفلة كبيرة فهالموضوع
فاهمه أنه هدفج التشهير بس التشهير للزواج ( كتب الكتاب وملجه رسمية ) يعتبر زواج رسمي بالقانون والشرع
سبحانه ما تعرفين قد تتغيير أمور كثيرة فالخطبة خصوصاً أنه مجرد كلام للحين ما ثبت بالأوراق الرسمية
ف مب حلوه في حقج بعدين وجدام العرب
فالأفضل التريث واستعجال الملجة عسب تكونين فعلاً في موقع قوي للاحتفال
اذا اصريتي بس سويه عشا بسيط للأهل المقربين ماله داعي للزيادات تحسُباً للمستقبل ما قد يطرأ عليه
هذي عاداتنا يمكن انتوا غير بس هذا رايي حسب اللي اجوفه

وبالبركه يالغلا

[غزالة AD]

مع دانة

[ورقة ناعمة]

الخطوبة ماعدنا فديتج ( الخطوبة عند اخوانا العرب مثل المصريين والسوريين ,,,,,,,,,,,) تلبس وتكشخ ويلمون الاهل وكيكه بسيطة وعصير ويلبسها (خاتم الخطوبة )

وبعدها يحددون موعد العرس بعد سنة او اقل او على حسب ,,,,


نحن عدنا يوم يخطبها ويشاور أهلها خلاص والاهل عرفوا خلاص تنخطب لفلان ويحددون موعد الملجة ,,,

الحفله واللمة والحشرة تكون بالملجة فديتج ,,, نحن عدنا من تنخطب البنت يتحدد موعد الملجة بفترة مب طويله اقل شي شهر واحينه مع حجز القاعات شهرين او ثلاث ,,, ليش سنه ,,,


بس نصيحة لاتسوين حفله وتلمين العالم بشي اسمه خطوبة ,,, لان لاسمح الله يمكن مايكون من نصيبج ومب حلوة

[ام لامية]

الخطوبة ماعدنا فديتج ( الخطوبة عند اخوانا العرب مثل المصريين والسوريين ,,,,,,,,,,,) تلبس وتكشخ ويلمون الاهل وكيكه بسيطة وعصير ويلبسها (خاتم الخطوبة )

وبعدها يحددون موعد العرس بعد سنة او اقل او على حسب ,,,,


نحن عدنا يوم يخطبها ويشاور أهلها خلاص والاهل عرفوا خلاص تنخطب لفلان ويحددون موعد الملجة ,,,

الحفله واللمة والحشرة تكون بالملجة فديتج ,,, نحن عدنا من تنخطب البنت يتحدد موعد الملجة بفترة مب طويله اقل شي شهر واحينه مع حجز القاعات شهرين او ثلاث ,,, ليش سنه ,,,


بس نصيحة لاتسوين حفله وتلمين العالم بشي اسمه خطوبة ,,, لان لاسمح الله يمكن مايكون من نصيبج ومب حلوة

معاك ميه ميه نفس الشيء عندنا
وانا ضد شيء اسمه حفلة خطوبة
نشهر ونسمع العالم بشيء مو موثق ولا رسمي ومو مؤكد

[بنت السلطان قابوس]

مثل ماقالت الورقة الناعمة لا تسوي حقلة خطوبة كبيرة وتلمي الناس وبعدين مايكون من نصيبج لاااا سمح الله اتموا اموركم بالكتمان واذا فخاطرج ممكن تجتمعي باهلج المقربين مرة ( خالتج وبناتها مثلا) وسسولكم عشا بسيط اما موضوع الرجال ماله داعي لانه الرجال تكون عندهم الملجة ..
اتمنى الخوات افادوج والله يتمم لج على خير

[lolatiy]

بس خواتي انا وضحت بالموضوع شو الهدف من حفلة الخطوبة ؟
الحفله عسب ينتشر الخبر وتتأكد الخطوبة .. مب بس رمسه .. بس اشهار للناس ان هالبنت صارت مخطوبه لفلان
ولان الملجة مطوووووووووله رغم ان نادرا مايكون في حفلة خطوبة بس لان الملجة عادة تكون عقب الخطوبة بـ اسبوعين ولا شهر
بالكثير يعني لين ما يتفقون الطرفين و بعدين يملجون و ثاني يوم تكون حفلة الملجة ..
واللي اعرفه ان اي بنت ملجتها مطوله تسوي حفل خطوبه وأي بنت عرسها مطول تسوي حفل ملجه

[jumana]

والله ماعرف اذا امكانياتج تسمح وانتي حابه تسوين سوي بس انتي فكري فيها ترا بكون وراج فستان ومكياج وعزيمه ووووو فأنا رايي خلي كل هذا فالملجه


إحنا عدنا الخطوبه بين الرياييل وكل العيله بيعرفون انج مخطوبه وإذا حد يا وتقدم ترا عادي بتردون وبيعرفون انج مخطوبه

[غزالة AD]

نحن ما نسوي حفلة خطوبة حتى لو الملجة مطولة..الصراحة اول مرة اسمع بهالشي..ودامج مخطوبة رسمي خلاص ليش الاشهار؟ الاشهار حق الملجة والعرس.
اللي يصير كالتالي:
ايون الحريم يتكلمون ويجوفون البنت.(هاي الخطوبة وممكن تسوون فوالة وعشا).
ايون الرياييل يخطبون رسمي.
يتحدد موعد الملجة (هني يكون الاشهار وممكن حفلة).
حفلة العرس

لكن حفلة حق خطوبة ما يحتاي ومحد يسوي حتى لو الملجة مطولة. يوم ايون الحريم يجوفون البنت هاي يسمونها خطوبه وصدقيني ما يحتاي الاشهار كل حد بيعرف. بالتوفيق.

[ورقة ناعمة]

بس خواتي انا وضحت بالموضوع شو الهدف من حفلة الخطوبة ؟
الحفله عسب ينتشر الخبر وتتأكد الخطوبة .. مب بس رمسه .. بس اشهار للناس ان هالبنت صارت مخطوبه لفلان
ولان الملجة مطوووووووووله رغم ان نادرا مايكون في حفلة خطوبة بس لان الملجة عادة تكون عقب الخطوبة بـ اسبوعين ولا شهر
بالكثير يعني لين ما يتفقون الطرفين و بعدين يملجون و ثاني يوم تكون حفلة الملجة ..
واللي اعرفه ان اي بنت ملجتها مطوله تسوي حفل خطوبه وأي بنت عرسها مطول تسوي حفل ملجه

حبيبتي لاتثقين وايد وترى مب كل وحدة تنخطب 100% يكون نصيبها واغلبيه الحريم ما يعلنون ولا يخبرون ان بنتهم انخطبت الا قريب مايتحدد موعد الملجة

مب تخبرين والكل يعرف انج مخطوبة ويوم يستوي شي او الريال يبغي يغير رايه شو راح تسوين بعد حفله تخبرين فيها الناس انج مب مخطوبة

الناس بس ما بتركز انج انفصلتي خلاص بتمين ببالهم مخطوبة وليش تبن تعلنين وانت بعده سنه لين الملجة وايد صافين صوب الباب عسب تخبرين الكل انج مخطوبة

اقضوا حوائجكم بالكتمان ماله داعي تقولين للكل خلاص انخطبتي لين موعد الملجة خبري العالم كلها مافي مشكله وانتي عاد كيفج

[غزالة AD]

ورقة ناعمة كفت ووفت.

احبج ورقة.

[غلآ نفسي]

انا سووولي حفله خطوبه بسيطه من المعرس طبعا

امه يات ولبستني الدبله عقب ما الرياييل خلصو كلامهم فالميلس

ووزعوا الكيك والجوكليت وهالسوالف

ورقصو الحريم ومن هالسوالف

وعقب طلعو

بالتوفيق

[Ward-uae]

على حسب
يدي سوالي عزيمة وعزم اهلي وأهل ريلي كلهم وخبرهم انه فلان حجز فلانه وحددوا المهر والملجة والعرس لانه عيال خوالي وعيال حمييي وعيال عمي وعمتي وعيال عمام ابوي كلهم كانوا متقدمين بوقت واحد كان يبي يخبرهم وما يحرج حد
من خطبتي للعرس 4 شهور فإنتي سنة للملجة وايد

[ملاآك قلبكـ،،]

نحن نسوي حفلة خطوبه
بس مرات مش دايما
وتكون عائليه بحته
يعني حتى اقرب صديقاتج ماتزقرينهم
اهلج واهله وقرايبكم وقرايبهم اللي وايد معاهم بس
وتلبسين شي بسيط فستان خفيف
وتحطين ميكب خفيف بروحج مب لازم صالون
وتسوين حركه بسيطه بشعرج وكله فالبيت مو لازم صالون

ويوم ايي يلبسج الدبله تلبسين عباتج وشيلتج
وبس تحطون عشا حتى مو لازم كيكه
وبس في عوايل تحط اغاني ورقص وبس انتهى الموضوع