المطلقات و المحكمة

[همسة شوق99]

السلام عليكم ورحمة الله وبركاته
خواتي انا عندي اول جلسة في المحكمة مع ريلي لاني طالبة الطلاق ربي يعوضني خير ان شاءالله
وايد خايفة و متوترة خايفة ما أخذ حقي و ما اقدر أتكلم خاصة اني انا من النوع الخواف

خايفة يقول شي يفاجئني مع اني الحمدلله الحق كله معاي و انا اتحملته و صبرت كثييير بس هو عنده خبرة لأنه مطلق قبلي أخاف يسوي نفسه مسكين
علما أن نحن ما عندنا عيال
أسئلتي كالآتي :
المطلقات شو المواقف اللي صارتلكم في المحكمة ؟
هل في شي ندمتو انكم ما قلتوه او شي ندمتو انكم قلتوه؟
كيف الجو العام مريح ولا يوتر؟
هل تحسون أن الطلاق سهل ولا الواحد أو الوحدة لازم يكذب و يماطل عشان يخلص نفسه؟
شو الأسئلة اللي طرحوها عليكم؟
كيف الإجراءات كم المدة اللي اطلقتو فيها شهر شهرين سنة سنتين؟

ادري أسئلتي وايد بس ما عندي غيركم و هالشي غامض عندي ما اعرف شو اقول شو اسوي احتاج محامي ولا ولا أعرف شو الإجراءات
ابغی تفاصيل و ابغی استفيد من خبرتكن

يزاكن الله ألف خير

المزيد من آخر المواضيع من نفس القسم:

• اهم النصائح التى تساعد المطلقة على إعادة...
• نصائح هامه للفتيات المتاخرات عن الزواج
• نصائح للمرأة المطلقة لتبدأ حياتها من جديد
• رسالة هامة إلى حاملة لقب مطلقة
• اهم نصائح لحل مشكلة المتأخرات عن الزواج
• نصائح هامة لكل مطلقة كوني منطلقة لا مقيدة
• الزواج الثاني للمطلقة وطرق التعامل معه
• اجمل دعاء لتيسير الزواج
• نصائح ذهبية لكل متأخرة فى الزواج
• هل يمكن البدء من جديد بعد الطلاق

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[elshog 87]

ربي يهدي النفوس عزيزتي
ان شاء الله تلاقين الجواب من الاخوات

[Cobon]

خلج قوية و هادية ولا تخافين
دامج بتتطلقين الحضانة عندج ان شاء الله

ليش تخلعينه ؟ لو خلعتي لازم تتنازلين عن شي و هو المؤخر
مب تخلعين و انتي مب مستوعبة السالفة لان ربيعتي خلعت و زوجها قال تخلعني مقابل الحضانة
فتأكدي شو المقابل للخلع ؟

و اطالبين بنفقة كاملة و حضانة و مسكن


انا اللي اعرفه في وحدة سارت المحكمة تقول لي:
ريلي مجهز ورقة كاملة يشرح فيه سوالف بايخة و يبغي حاضنة وما ادري شو
فجهزي نفسج لكل شي اخاف انج داشة ع ويهج ولا مجهزة شي وما تدرين شو السالفة

[Ward-uae]

حبيبتي ليش ما تخليه هو يطلق جيه بتكونين انتي خلعتيه 
عادي يطالب بالذهب والخساير اللي حطها في العرس لانه انتي اللي تبين الطلاق مب هو حاولي تحلين المشكلة وتدخلين احد من اهلج يا امساك بمعروف او تسريح باحسان

[الوردة الجورية]

وعليكم السلام والرحمة

اختي قصدج التوجيه الاسري والا المحكمة؟؟؟

يعني خلصتوا الجلسات في التوجيه؟؟؟


التوجيه ممنوع يدخلون المحامين
بس لو مافي فايدة وماصار صلح والزوجة مصرة على الطلاق تتحول محكمة وانا افضل توكلين محامي

والحين ماشي خلع القوانين تغيرت
بس تطلقين منه للضرر (اذا تبين التوفيق لا تجذبين)

قال رسول الله صلى الله عليه وسلم: أيما امرأة سألت زوجها طلاقاً من غير بأس فحرام عليها رائحة الجنة.

البأس ممكن الزوج زاني او يغصبها على ارتكاب المعاصي او سكّير او مايصلي او يضربها "ضرب غير تأديبي"

وحطي كل طلباتج في ملف واحد لأنهم بيسألونج شو طلباتج
فإذا طلبتي شي وعقب تذكرتي اشياء ثانية بتكون دعاوي منفصلة وبتتبهدلين
فأحسن لج جمعيهم كلهم مرة وحدة كتبيهم في ورقة وقدميهم

طبعاً في حال ضررج يحق لج الطلاق مع أخذ كامل حقوقج بدون تنازلات


المؤخر

حق المتعة (لأنه دخل بج واستمتع)

نفقة العدة

واذا بينكم اطفال تطلبين زيادة:

نفقة حاضنة

نفقة الاطفال

سكن او بدل سكن، يعطيج كاش وانتي تأجرين، حتى لو بتسكنين بيت اهلج عيالج ابوهم مسؤول عن سكنهم ولازم يدفع أجار سكنهم

يدفع فواتير الماء والكهرباء وخط التلفون الأرضي والإنترنت

رسوم المدارس الخاصة في حال هم من الاساس مسجلين في مدارس خاصة

تكلفة استقدام و راتب خادمة ، تحتاحين خادمة للغسيل والكوي والتنظيف لأنج انتي تتفرغين لتربيتهم و تدريسهم

تكلفة استقدام و راتب سائق

سيارة او بدل نقدي (وانتي تشترين السيارة) اذا سألج السبب قولي محتاجة سائق و سيارة يودي اليهال المدارس والمستشفيات



الله يجدّم لج اللي فيه خير و صلاح

والحياة الزوجية يبالها صبر

واذا مابينكم عيال غالباً يطلقون بسرعة مب مثل اللي عندهم عيال

ونصيحتي

صلي استخارة قبل ماتروحين واقري المعوذات و سورة البقرة

[همسة شوق99]

خلج قوية و هادية ولا تخافين
دامج بتتطلقين الحضانة عندج ان شاء الله

ليش تخلعينه ؟ لو خلعتي لازم تتنازلين عن شي و هو المؤخر
مب تخلعين و انتي مب مستوعبة السالفة لان ربيعتي خلعت و زوجها قال تخلعني مقابل الحضانة
فتأكدي شو المقابل للخلع ؟

و اطالبين بنفقة كاملة و حضانة و مسكن


انا اللي اعرفه في وحدة سارت المحكمة تقول لي:
ريلي مجهز ورقة كاملة يشرح فيه سوالف بايخة و يبغي حاضنة وما ادري شو
فجهزي نفسج لكل شي اخاف انج داشة ع ويهج ولا مجهزة شي وما تدرين شو السالفة

انا ما بخلعه انا طالبة الطلاق
و ما عندي منه عيال اصلا
و فعلا انا داشة علی ويهي ولا عارفة شو هو بيسوي
الله المستعان

[çϋтê мéмë]

لازم محامي
اذا انتي من النوع المتردد الي يخاف يتكلم جدام الريايل

[مونتاج]

لا حول ولا قوة الا بالله
اللي فيه الخير ان شاء الله بيكون

[D!or AD]

السلام عليكم اختي الله يهونها عليج فعلا" موقف صعب لكن خذيها مني لا تطلبين الطلاق سوي استدعاء فقط وحطي شروطج

[ريم العسووله]

الله ييسر أمورج عزيزتي و يوفقج

[فنون الحب]

سيري التوجيه الاسري وافتحي ملف .. وبيسالونج هناك شو تبين .. بتقولين انا ابا حقوقي كزوجة بيت ومصروف وخدامة وانه يحترم الحياة الزوجية وكل شي تبينه قوليه .. بيسالونج يمكن تبين الطلاق لاتطلبين الطلاق ابدا لانج بتخسرين كل شي افهمج كيف .. يعني عادي يخليج تردين كل مخاسيره من ذهب وغيره لانه بخيل .. وطبعا البخيل الي مايصرف على حرمته مستحيل يوافق انه يفتح بيت وايب خدامة هو من نفسه بيطلق لاتستعجلين خلج بااااردة وراويه انج قوية ومب هامنج .. طبعا التوجيه الاسري بيتصلون فيه لانهم بيطلبون رقمه منج وبيحددون لكم موعد وبيحضر وهالشروط ماتغيرينها .. اذا وافق وتعهد انه بيسويها تردين له واذا رفض هو من نفسه بيطلق وطبعا هالفترة تقعدين في بيت اهلج معززة مكرمة لين ينفذ هالشروط واول شي ياخذ لج بيت .. التوجية الاسري بيحاولون يخلونكم تتفاهمون لو ريلج من النوع الي يحب يتفاهم وياخذ ويعطي عشان يصلحون بينكم واذا رفض شروطج قوليله خلاص كل واحد يروح ف حاله الزواج قسمة ونصيب هاذي حقوقي انا كزوجة انته ريال ماتقدر تسويها على اي اساس اعيش وياك
المهم خلج قوية وبااااردة واطلبي حقوقج ولاتستحين ابد :14

كل شي تصبر عليه الحرمة الا انه الريال مايحترمها ومايصرف عليها وفوق هذا بخيل

ومذوقها الارف

عفان الله من هالريايل

[روح_الإمارات]

مثل ما قالوا الأخوات لا تطلبين الطلاق سيري التوجيه واطلبي حقوقج كزوجة و خبريهم عن كل شيء عقب القاضي هو بيحكم لج
انا سويت نفس الشيء ما طلبت الطلاق بس جلسات التوجيه نظر لها أبو عيالي إنها فضيحة فطلقني كنت اتمنى الطلاق بس ما طلبته مباشرة عسب ما تضيع حقوقي وحقوق عيالي

[أم زمرده]

كلما زادت أرواحنا قربًا من الله سيرتفع معدل السعادة بها

[3soo0la]

اختي انا سالفتي طويله..
طلبني بيت الطاعه .. وبعدين رفعت قضية طلاق للضرر ..تم يماطل وجو المحكمة ترعب ونحن كحريم كم بنتحمل قهر!!! نكر كل شي فثانيه!!!! وعادي عنده يخسر حرمته وولده... رفض يطلق عشان خسائر .. مع ان هو الي بدا وراح محكمه ينهي ،،!!
تعبت منه وهلكت قررت اخلع وتنازلت عن كل شي ...
وخلعته وماخذت منه الا ولدي ونفقته حمد الله ..

ورجعت بيت اهلي استقبل الصفعه الثانية!!!
إنتي مطلقه يعني لاطلعه ولا دخله
والله انحرمت من كل شي حلو وبسيط
دمروني وتمنيت اني أتم ع ذمته ولا هالبهدله عند اهلي كأني ماسوى بيزه
مع اني انسانه واعيه ومثقفه وطموحة وايجابية
لكن دامج مطلقه لازم تموتيننن انتهت حياتج!!!!!

والله لهثانيه لازلت أعاني منهم.. لكن كلما أقول حققت أحلامي وتحديات ظلمهم وقهرهم.. اهدا وايد..
وأقول ربي عالم بنيتي وبيعوضني بعد هالتعب..

قدرت اشتغل بعد ماحرموني.. وقدرت اكمل دراستي والحين ادرس دعواتكم بالتوفيق.. وخذت موتر أحلامي.. وربيت ولدي احسن تربيه..

مغزى قصتي كلها ان الطلاق تعب ودمار .. وإدا مستعده له.. لازم تعرفين بتعانين اكثر من انج ترتاحين..

اذا في أمل ريلج يتغير حاولي.. ريل واحد ولا اهانة اهل

اول توجيه كم جلسه فالتوجه الاسري وتوقعيي اي شي يقوله لو يجذب جذب

بعدين يرفع القضاه وجلسات حوالي 6 حوالي 2 شهرين وبعدين تنفيذ حكم وبعدين الا مايستانف وووووو

الله يسر امرج ويوفقج وفكري كثير

[ام سلطانو]

السلام عليكم حبيبتي ورحمة الله وبركاته اول شي الله يصبرج ويهدي بالج ويخترلج الخير ربنا انا كنت خايفه مثلج لكن لاتخافين لان راح تتفاجأين بريلج في المحكمه وكأنج شخص غريب عنه وكأن اول مرة بتعرفينه ترى بالمحكمه يجذبون الرييايل انا ريلي سرقلي ذهبي وجدام القاضي وحلف واقسم انه ماسرقه ثاني شي انا رفع علي هو في البدايه قضية طلاق وقت سأل عرف انه راح يطلعلي كامل حقوقي سحب قضية الطلاق وصار يضغط علي لحتى انا ارفع قضية الطلاق مع اني كنت حامل لعوزني في المحكمه وصار يقلي انتي مافي كرامه عشان انا ارفع عليه قضية طلاق حبيبتي اول شي راح تمرون بالتوجيه الاسري راح يسألونج ويسألونه ويواجهوكم مع بعضكم شو اسباب الطلاق بعدها راح يحولوكم الى المحكمه اذا كنتي مصره على الطلاق اطلبي طلاق للضرر واذكري شو تبين حقوق واذا تقدرين تخلينه هو يرفع عليكي قضية طلاق بكون احسن مسكن مايطلعلج لان ماعندج عيال وقت تتحول قضيتك المحكمه لازم تذكرين للقاضي شو اسباب الطلاق بمذكرة كتابيه احسن عشان القاضي ماينسى ويتذكر واذكري كل الاسباب اللي عندج وبعد القاضي يحاول يصالحكم اذا لقى مافي فايده اطلبي حكمين من المحكمه يحكمو بينكم وقت يحددون جلسه بينكم عند الحكمين اذكري جدامهم كل الاسباب وبعدها يشوفون الحكمين الحق على منو بينكم اذا اثبتو الحق عليج ممكن انتي تدفعين له فلوس واذا الحكمين عرفو الحق عليه هو يكتبون للقاضي الحق عليه هو ولازم يطلعلك كامل حقوقج وبالنسبه للفترة بالمحكمه انا ضليتني سنه وشهرين لاني كنت حامل انتظر القاضي لحتى ربيت لكن اللي مش حامل واذا ريلج حضر كل جلسه وتم تبليغه بموعد الجلسه تتطلقين بسرعه من 3اشهر الى 6اشهر بتمنى اني كون فدتك وكوني جريئة ولاتخافين لكن اذا في مجال لاتتطلقين بكون احسن لان بعدها راح يكون خاطرج مكسور واذا تقدم لج خطيب يامتزوج او اعذب ويضله يعايرج انج مطلقه يعني استخري وحاولي معاه والله الطلاق صعب وبعدها عند الاهل ردتك وانت مطلقه صعبه شوي حاولي تتصالحين انتي وهو حاولي تجيبيله عيال يمكن يتغير حالكم