خواتي ساعدوني ف مشكلتي

[خبايا سنين]

السلام عليكم
الساعه 2 الفجر وانا صاحية وما فيني رقاد والسبب زوجي الله يسامحه .... صار لي أسبوعين من ولدت وانا في بيت اهلي وهو مطنش ولا يسال. أخذني المستشفى كأنه بدون نفس وطول الطريق يتنازع يفول بسرعه وخلصونا وراي شغل وانا ساكته لحد ما انفجرت وقَعَدت ابكي في السيارة ونزلت عنه.

اتصل فيني 3 مرات وانا كنت مشغوله مع البيبي خفت ولما رديت عليه قالي اخته تبى تسافر وتريد تتسلف طقم الشنط !!!!! بصراحة عصبت وصارت بينا مشاده في الكلام يعني ما يحس فيني انا في النفاس وتعبانه وهو ولا مهتم ومتصل عشان اخته؟؟

نهاية الموضوع احينه صار له يومين مقاطعني ولا يكلمني، أطرش له رسايل ولا يرد، بصراحة خايفه الموضوع يكبر وفي نفس الوقت اريد اسكت عنه واشوف هل لي قيمة عنده ولا لا. شو تشورون علي ؟ للعلم سالفه المقاطعة دوم يسويها وانا هذا الشي اكره ما عندي. ودايما أرد له واعتذر بس عشان انهي الموضوع.

انتظر نصائحكم وربي يسهل أمور كل مبتلي أمين

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[لحنْ #]

دامج تردين له حتى لو هو غلطان وتطلبين السماح ، ف تعود فديتج
يطنشج لان يدري انج بتردين له
هالنوعيه من الريايل فديتج لا تحسبين ان يكبر الموضوع ولا شي
راويه انج مب مثل كل مره ، وطااااف بالنهايه بيي لج ركض
اكبر غلط انج تكلميه وانتي مب غلطانه عليه وفوقها مطنشج وانتي نفاس ! شو ها بعد ؟
هيه الانسان يضحي ويدوس ع نفسه شوي ها زواج مب لعبه وحياه وشريك وو لكن مثل نوعيه ريلج ف لا تعود ي قلبي
مثل ماعودتيه تركضين تراضيه ، عوديه ينهي هو بعد ويحس بقيمتج ويعتذر

[خبايا سنين]

جزاك الله خير اختي بس نفس الوقت كان المفروض احس أني غلطانه لاني قمت اتنازع عليه...... لو سكت بخلي الشيطان يكون بينا ويطول فترة للمقاطعه وانا ما ابغى هالشي.

عارفة أني وايد نزلت من عمري لما اعتذر في كل مرة بس عصبيتي تعبتني وأسلوب هالزوج في المقاطعة تعبتني اكثر

[Fa.R]

الله يكون في عونج حبيبتي

[أم مـايد]

فجي عنه شوي
ولاتسالين ولا اطرشين شي مول ادري صعب بس اتحملي وانشغلي
2 3 يوم بالكثير ان ماياج ركض يسال شوفيج ليش تغيرتتي
تعالي حاكميني

[خبايا سنين]

الله يكون في عونا

[ريم العسووله]

الله يعينج أختي العزيزة و يريح قلبج
أنتي سويتي الي عليج و أكثر
ريحي مخج و بالج و أهتمي بالياهل لين تطلعين من النفاس

[ام لامية]

ابنك على ما ربيتيه وزوجك على ما عودتيه
والله نصائح الكبار كنز
المشكلة انك بعيدة لو ببيتك كان اسهل
من كلامك مبين انك شوي عصبية وتجرحيه بالكلام فيبتعد
الحين حاولي تكلميه عادي لين ترجعين البيت بعدها غيري اسلوبك وخليه مرات ايبادر بالمصالحة حتى يتعود
وان شاء الله المولود الجديد ايقوى الروابط بينكم وتنشغلون بتربيتو والله يسعدكم

[sa7el]

"للعلم سالفه المقاطعة دوم يسويها وانا هذا الشي اكره ما عندي. ودايما أرد له واعتذر بس عشان انهي الموضوع"

انتي عودتيه غالغلط والحين تحملي عاد

تبين تادبينه،، خليه،، طنشيه،، انشغلي مع اهلج والبيبي
حتى لو أسبوع هي ما اتصل لا تتصلين وان اتصل مب تركضين تردين
خليه شوي
مويوم بتردين اثقلي

[khaleejiya]

مشكله عودتيه على هالشي
بس سؤال ليش كان مطنقر من البدايه؟؟ هل هو مب راضي اتمين عند اهلج فترة النفاس؟؟؟

[ورقة ناعمة]

الريال عنيد وانتي اعند ,,, وبالاخير محد خسران غيرج ,,, قطعتي الوصال قطع ,,,,تواصلتي تواصل ,,,,

انتي بوقت نفاس ومحتاجة راحة نفسية وراحة بال لاتضايقين عمرج الدنيا ماتسوى صحتج اهم وعيالج محتاجينها ,,,,

تقربي من ريلج بالاتصال بالمسجات بالطلام الطيب اعزميه يتعشى وياج او حتى الغدا وخليه يمر ’’ رمسي الوالدة ترمسه بيستحي يردها ,,,

[um fay]

الله يكون في عونج..ما اعرف شو اقوولج..
بس نصيحة، لا تطولين في بيت اهلج للنفاس..
ولما ترجعين .. ولا كأنه صاير شي، يعني لا تعتذرين و لا تفتحين وياه الموضوع

وعاتبيه ع تصرفاته...في لحظات يكون هادئ وتكونون قريبين من بعض..
عشان يسمع لج..

بس انا لو مكانج.، صار شبه هالموقف، زعل علي
اتصلت فيه ..يجيني ضروري ..
ولما جاا.. طلعت له سالفة مدري ايش فيه البيبي ..
وقلت له ابا ارجع البيت ناسية اغراض..
و شلني ويا بنتي..ورحنا و لما نامت البنت ..يلست وياه و عاتبته ع الخفيف ..
وخلصت السالفة ..

والبيبي الثاني ، يلست اسبوعين في بيت اهلي و شليت عمري عنده..
خليته يسهر وياي عشان البيبي ..و يساعدني ..

[نبض الشارقة]

الله يعينج صدق هده النوعية من الناس تقهر
بس دام انج مب غلطانه لا تريدين عليه خليه هو يحس عشان ما يتعود

[خبايا سنين]

شكراً خواتي على الردود والنصائح

اللي تقول طنشيه : هو اصلا يبغى هالشي لانه حالياً عندهم تدريبات في الدوام و دوم مشغول وإذا سكت عنه بياخذ راحته ولا حتى بيسال عنا يعني انا الخسرانه.

وإذا كلمته- هذا طبعاً اذا رد علي- بيقلب الموضوع على أني انا الغلطانه ويلف السالفه عشان يغلطني ويطلع منها بريء.

والله الحريم مرتاحات في بيوتهم وفرحانين بالطفل وانا كله احاتي وأبكي على حالي. الله المستعان

[Yazi.90]

حبيبتي الله يكون ف عونج ،،
انتي اذا تحسين انج غلطانه من خلال كلامج فالمشاده
اللي صارت فاعتذري احسن عشان يوم بتناقشينه
مايمسك عليج شي ،، قوليله اعتذرت وعرفت غلطي
اكيد انتي ادرى بنفسج و بسبب زعله من البدايه يوم طلعتي من المستشفى
حاولي تحلين الامور برواق وهداوه ،،

و الله الله بعمرج حرام لاتعبين نفسيتج
انتي نفاس الحين و مب لازم تزعلين نفسج وتصيحين
اهتمي بالبيبي وبصحتج ،،
و يارب يرجع لج ريلج و تتصالحون وترجع المياه لمجاريها ،،