الوظيفة

[طموح دبا]

صباح الخير
خواتي الكل عارف شو المشاكل اللي تواجهني مع زوجي وقاعدة أحاول اني اتخطاها بس للأسف محاولة من طرف واحد
انا موظفة ووظيفتي مسببه لي ضغط نفسي ، اقسم بالله اني ارجع من الدوام ما اروم اجابل عيالي ولا زوجي ولا حتى نفسي. كله أرجع تعبانه وابي انام والعصبية ما عند حد
واستخرت كثير بخصوص ترك الوظيفة لكن ما قدمت استقالتي
حابه اخذ من تجارب الحريم اللي تزوجن وهن موظفات كيف مرتبين حياتهم ??
وبعد منو بعد ما تزوجت تركت الوظيفة?? وشو تلاحظ تغيير حياتها الزوجية من بعد جلوسها فالبيت ??
وظيفتي ابدا ما مستمتعه فيها ومتعبة والشي المفيد منها هو الراتب!!
أما الصحة والنفسية داون.
أبا اعرف كيف حياة المتزوجة بعد ما تركت وظيفتها ??

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[Cobon]

انا يلست ف البيت يمكن 6 شهور
و عقب تمللت من نفسي و رجعت اشتغل لاني استقلت مع ان عندي بيبي
حسيت باكتئاب والله ما ادري كيف اشرح لج
يمكن لاني سنين متعودة ع الشغل و الراتب الزين و اهم شي مدلعه نفسي عدل


اهم شي ترحين نفسج ف الدوام و ادلعين نفسج
و طبيعة الحريم وايد حساسات و يتحسسون من اي كلمة !
التطنيش وايد مطلوب خاصة في الشغل مع حريم ههههههههه
و طبعا اللي تستلم راتب و قدره و متعودة ع الراتب غير عن اللي تيلس ف البيت
و تستلم مبلغ من زوجها

فما ادري شو اقول لج
كل وحدة تختلف ظروفها عن الثانية

كل شي يبغي له ترتيب
اليهال ممكن تودينهم الحضانة و تعودينهم عليه
قبل النوم تزهبين اغراضج و اغراض اليهال
و نفس الشي شغل البيت : جدول مرتب للخدامة و لج

افضل نصيحة خذي لج اجازة مدة شهر ل شهرين و جربي يلسة البيت و فكري

[سار90]

انا بقولج عن تجربتي وتجربة حرمة اخوي
انا موظفه بالنسبه لزوجي الأول قبل لا اتطلق منه.. فليل عقب صلاة العشا البشكاره اناديها اقولها طلعي هاللبس وانتي بكرامه هالنعال هالنشنطه وبخريهم اوكي يعني هالشي ماياخذ غير أمم 10دقايق اذا طولت وانا محتاره والصبح انش لصلاة الفجر وعقبها كنت اوعيه نصلي ونتلبس عشان كل حد يركب سيارته الظهر البشكاره مجهزة الغدى وصلت قبله بسررعه كنت اخذ شور والبشكاره تيب فحم لين اتلبس واتبخر واقعد عقبها بنص ساعه كان يوصل ونرقد ونش العصر ونخلص مشاويرنا او نا يروح لربعه. بس كنت افكر قول بودر وظيفتي عقب قلت مابيستوي لي كيان ؟؟ كيف اامن على نفسي؟؟
تجربة حرمة اخوي.. نفس الشي بس الظهر يريحون شوي وعقبها تدرس عيالها بسرررعه وعقب يكملون يومهم

[ورقة ناعمة]

خذيلج فترة إجازة من غير راتب لو شهر او شهرين اذا في مجال ,,, وجربي يلستج بالبيت ,,,

[$*ملكه*$]

طموح دبا بصراحه انا اشوف المشكله فالوقت هاتي لك ورقه وسجلي مثلا الساعه كم توعي من النوم وتروحي الدوام والساعه كم تردي بعدين قسمي الساعات المتبقيه للراحه وللزوج وللاطفال اسبوع عودي عمرك انك تنامي وقت مثلا 10خلي جدولك جااهز وحاولي تشبعي نوم لانه هذا الشي بيأثر على حالتك النفسيه وجربي تاخذي اجازه شهرين او شهر مثلا وشوفي كيف وظعك ترى لو خذتي اجازه بتحسين فالفرق وبتعدلي جدولك كاامل ونصييحه مني الصبر والهدوء وعدم العصبييه وخلي وظيفتك تكون خير عليك مثلا تجلسي اكبر وقت فالشغل اختمي القران استغفري وحاولي تتنشطي من اول وجديد الاستقاله يبغيلها تفكير عميق ولازم تفكري مابعد الاستقاله والجلوس فالبيت

[khaleejiya]

انا بعد من النوع اللي متعوده عالشغل ما احب يلسة البيت ابببدا جربتها تقريبا 3 سنين وزهقت من عمري لدرجه كنت اصيح لاني انتقلت لمنطقه بعيد عن منطقتي وماعرف حد وعلاقاتي انقطعت مع اللي كنت اعرفهم بحكم بعد المسافه
الحمدلله رجعت اشتغل وعيالي واحد منهم بالمدرسه والثانيه بحضانه في شغلي والحين حامل بس مطمنه الحمدلله لاني اسكن ويا اهل ريلي يعني عمتي تقدر تجابل البيبي لين ارد من الدوام غير انه عندي ساعة رضاعه وعندي خدامه
ريلي دوامه بالحقل يعني ينزل اسبوعين بالحقل ويتم اسبوع عندنا فالبيت ف الحمدلله ما اشوف حد ناقصنه شي
انتي يمكن طبيعة شغلج متعبه دوري لج بمكان ثاني واذا تشوفين عمرج تقدرين تستغنين عن الوظيفه اتركيها اهم شي راحتج

[احلى بعفويتي]

ماكتبتي شي عن وظيفتج
طبيعتها وساعات العمل و بعدها عن بيتج وجي

كيف بنفيدج

[أهلي عزوتي]

أهم شي في الوظيفة ترتيب الوقت و الاولويات ،، رتبي اغراضج من فليل عشان باجر ،، و عودي الخدامه على طبيعتج و كيف ترتيبج لبيتج في غيابج

صعبة قعدة البيت عقب الشغل و الطلعه و تغيير الجو ،، بعدين شو ذنب عيالج و ريلج // اذا كلش تكونين تعبانه ريحي اربعين دقيقة او ساعه عشان ترد الطاقة لجسمج

يوم تردين من الدوام اكيد عيالج مشتاقين لج ،، وفري لهم جو مريح بدل العصبية اللي مالها داعي

[um fay]

خذي لج اجازة بدون راتب.. وارتاحي
او خذي اجازة بنص الاسبوع.,دايما.. ترتااحين
صدقج تعب الدوام يسبب نرفزة و توتر و تطلع الحرة على اليهال و الزوج

بحكم انه ما عندي شغاله.. ارتب كل اموري بالليل
بعد ما يرقدون اليهال.. انظف و ارتب ..
اقعد عيالي معظم الوقت في الصالة ، اكل و لعب لانه لو يحوسون ع الغرف الثانية بدمرونها وانا ما فيني انظف كل شويات ..
يوم اخصصه للغسيل..ويكون في نص الاسبوع عشان اتهنى بالويكند
الاكل، ما اطبخ كثير و اذا طبخت اكون مجهزة اغراضه قبل ..

الله يعين الحريم اللي يشتغلن و هن ربات بيوت..
خلي الزوج يتحمل شوي من مسؤولية البيت.. او يمسك وياج العيال..
بتحصلين وقت لنفسج شويات

[طموح دبا]

ماكتبتي شي عن وظيفتج
طبيعتها وساعات العمل و بعدها عن بيتج وجي

كيف بنفيدج

وظيفتي 8 ساعات فاليوم وتكون عندي مناوبة مرة بالشهر المسا بعد 8 ساعات
أما عن البعد ما يتجاوز 15 دقيقة
وطبيعتها طبية

[um fay]

مثل ما قالت ملكة.. نامي بوقت.. وخصوصا انه ما كل مرة نحصل فرصة ننام الظهر من العيال
عودت عيالي وانا ننام من الساعه 8 بالليل.. وصار حتى زوجي ينام بوقت مثلنا ، تعود على روتيننا
اروح الدوام نشيطة، ارجع نشيطة، وما فيني تعب وحتى صارت فترة العصر اطلع العيال الحديقة يلعبون..

[طموح دبا]

عندي خدامة مشتغلة قبل لكن ما أحب طبخها بعدها تطبخ طبخ خايس استغفر الله.
ومشكلة أنه بعدي ما اامن اخلي ولدي الصغير عندها بعدها تحت التجربة
كل يوم قبل لا ادوام اشلها مع الصغير بيت اهلي
ويوم أرجع الظهر طبعا وراها تنظيف وولدي صغير ما ينام اضطر اجابله لين تخلص تنظيف وبنتي تكون جوعانه اغديها وعني طبعا ما لي نفس أكل لا مطعم ولا من بيت اهلي
فلين ما تخلص تنظيف وتتسبح وتتغدا يكون المغرب وهني يجي وقت العشا وتدريس بنتي
يا ربي ملخبطه أحس اكتب وراسي يوجعني

[khaleejiya]

يبالج بس تنظيم وقت وتنظيم مسؤوليات وامورج طيبه ان شاءالله
معظم الدوامات 8 ساعات انا نفس الشي بس مب فالمجال الطبي
ولدج كم عمره؟؟

[أم الخليفي]

والله انا اتوقع ان ساعات الدوام المرهقه للمرأه هي السبب الرئيس يفي كل مشاكلنا


للاسف نحن مساوين بالرجل حتى في هذا الشي !!!

[أم الخليفي]

عندي خدامة مشتغلة قبل لكن ما أحب طبخها بعدها تطبخ طبخ خايس استغفر الله.
ومشكلة أنه بعدي ما اامن اخلي ولدي الصغير عندها بعدها تحت التجربة
كل يوم قبل لا ادوام اشلها مع الصغير بيت اهلي
ويوم أرجع الظهر طبعا وراها تنظيف وولدي صغير ما ينام اضطر اجابله لين تخلص تنظيف وبنتي تكون جوعانه اغديها وعني طبعا ما لي نفس أكل لا مطعم ولا من بيت اهلي
فلين ما تخلص تنظيف وتتسبح وتتغدا يكون المغرب وهني يجي وقت العشا وتدريس بنتي
يا ربي ملخبطه أحس اكتب وراسي يوجعني

شوفي عزيزتي انا بقترح عليج حل بسيط وشوفي اذا يناسبج ..



اذا عندج بيبي وانتي تاخذينه معاج كل يوم لبيت أهلج مع الخدامه ...خليها في بيت أهلج تخلص الكوي الخاص فيكم على الأقل في حال كان البيبي نايم .


واذا رديتي البيت معاها ..حاولي انج تمسكين ولدج علشان تخلص تنظيف ويفضل في مثل هالحاله ما يكون التنظيف والغسيل بشكل يومي ...


يعني يوم هيه ويوم لا ..


بالنسبة للغدا ..مافيه غير انج تطبخين فالليل وتحطينه بالثلاجه مثل إخوانا الوافدين وتسخنينه بالباجر


هذا اذا كان يناسبكم ...أو انج تعلمينها مره وثنتين وثلاث حتى تتقن الطبخ وترتاحين ...



وبالنسبة للعيال تراني مسؤولين عنهم مهما كان والخدامه صدقيني ما بتتحملهم كثر ما تتحملهم أمهم ...