تأخر الحمل

**نبض عمري** · 2015-04-28, 21:28

السلام عليكم بنات اشحالكم. الله يرزق كل متزوجه الذريه الصالحه واللي حامل يثبت حملها ان شاء الله بنات صارلي خمس شهور معرسه وللحين ماحملت منو تعرف عياده فنانه ف راك شكرًا

المزيد من آخر المواضيع من نفس القسم:

**Um Sha5bo6** · 2015-04-29, 06:40

وعليكم السلام ورحمة الله وبركاته..
الله يرزقج بقرة عين لج حبيبتي..
اللي اعرفه ان اول سنه عرس بدون حمل تعتبر طبيعيه ومب شرط تكون بسبة مشكله..
الا إذا كانت العاده مب منتظمه عندج احسن تراجعين من الحين..
حبيت ادعي لج وان شاء الله البنات اللي من راك يفيدونج..

**نبض عمري** · 2015-04-29, 07:17

شكرا ع مرورج عزيزتي

**لحنْ #** · 2015-04-29, 07:30

مثل ماقالت الاخت ، بدايه العرس مانصحج تهتمين بهالموضوع وايد
لا من ناحيه تفكير او مستشفيات
لان جي ممكن تخربين نفسج وانتي يكون مافيج الا العافيه لكن فقط الموضوع اراده من رب العالمين
وبعدها فعلا تصيرين ف مشكله لا سمح الله ..
بعد سنه انصحج تدورين ل حل
موفقه اختي

**نبض عمري** · 2015-04-29, 07:58

اشكرج نجمه برونزيه
ان شاء الله خير ريحتيني

**ليندااااا** · 2015-04-29, 14:15

ينقل لقسم الحمل والولادة

**أحبه الغالي** · 2015-04-29, 17:32

ماعرف في راك بس مابقولج اتري سنه حتى لو ان كل الدكاتره يعتبرون فرصه سنه عادى
وجهة نظري تابعي التبويض بجهاز كلير بلو للاباضه وعيشي حياتج بعدج عروس لادخلين عمرج في دوامه عطي نفسج بعد ٣ شهور اذا ما صار حمل راجعي الدكتوره تسويلكم تحاليل انتي وريلج وتابع التبويض معاج بالسونار
وان شاء الله كل امورج طيبه وربي يرزقج الذريه الصالحه

**مالتيزرس** · 2015-04-30, 22:09

اختي بعدج ماكملتي سنه طبيعي هالشي اذا مرت سنة ذيج الساعة روحي ..
ويمكن ريلج مايكون موجود وياج فترة التبويض اللي هي اهم فترةة لحدوث الحمل ..
لاتستعيلين عيشي حياتج

**نبض عمري** · 2015-05-01, 18:17

شكرًا لكم عالردود😘

**Um.alyazia** · 2015-05-01, 19:59

السلام عليكم ورحمة الله وبركاته

شحالج اختي ؟

انا من وجهه نظري ان قبل السنه بعد طبيعي مايصير حمل
بس لو انتي و شريك حياتج ودكم بالضنا من الحين
افضل لج تراجعين لدكتوره حبوبه و هذي حياتكم

السموحه

**عواش2015** · 2015-05-01, 23:14

الله يرزقج بالذريه الصالحة

**عذآلي كثآر** · 2015-05-02, 00:25

انا هالشهر بكمل سنة وللحين ما حملت حمل سليم حملت مرتين اول الزواج وبعد أربع شهور من الزواج بس الحملين ما اكتملتوو.. ولما سويت تحاليل عسب اعرف السبب طلعت عندي تكيسات والحين صارلي ست شهور مستمرة ع العلاج..

إذا انتي خايفه من سبب التأخير خليها نصيحه مني سوى تشك آب انتي وريلج شوفي هرموناتج سليمة ومافيج أي شي ارتاحي ولا تشيلين هم هالتاخير من الله

أما إذا كان التأخير بسبب هرمونات أو شي ثاني خذي العلاج اللازم..

**ثريا 2014** · 2015-05-02, 00:27

الله يرزق الجميع الذرية الصالحة عاجل غي آجل

**عنودان** · 2015-05-02, 21:14

اختي انتي توج عروس لاتفكرين ولاتشغلين عمرج بالحمل صدقيني بتحملين
لكن تبهدلين عمرج ف العيادات والمستشفيات عيشي حياتج هالفترة لانها ما تتعوض

عليج اول شي بالاستغفار وقراءة سورة البقرة والتصدق بنية الانجاب

واختي في بعض الاشياء اتسوينها بعد المعاشرة

والله يرزقج بالذرية الصالحة يا رب

**حور 123** · 2015-05-03, 08:52

سوي فحص هرمونات وشوفي الوضع

احلام زينه بس زحمه واتبالغ ف الاسعار
و دكتورة كرامه قالولي راحت الزهراوي بعد فنانه

والله يرزقج الذريه الصحاله

الموضوع: تأخر الحمل

أدوات الموضوع

عرض