زوجة ثانية

[كيكه 2015]

السلام عليكم ورحمة الله وبركاته
اتصدقون ماتوقعت يوم أكتب في هالقسم ماعرف ليش !! عموماً عمري 30
وتقدملي من أسبوع رجل متزوج وعنده أطفال يمكن 5 ، وأنا شفت زوجته وعياله بسبب طبيعة عملي بس ماكان في تواصل بيننا

الريال اتصل على دوامي وطلب رقم والدي وانه يبي يتقدملي ويتزوج على سنة الله ورسولة وانا كان ردي السكوت لأني انصدمت من كلامه وقلتله السموحة منك اخوي ، لكن أنا ما أرغب بهالشي وقال لاتستعجلين صلي استخارة وعقب قرري مع السلامة

انا طبعا شليت الموضوع من راسي تمااااماااا وتميت اتخيل شكلي وانا متزوجة ريال عنده بنات ماشاء الله امورات ولكن المصيبة فيني أنا
ألا وهي انه من زمان ماعندي مشكلة ان زوجي يتزوج وحدة ثانية او انا اتزوج واحد متزوج ، والسبب اني ماحب اكون مسؤولة عنه لحالي أو يكون كل يوم موجود عندي
أنا وحده احب الهدوء واحب اكون لحالي واشغل نفسي بأشياء أحبها واعيشها ومب متخيلة اني اتزوج وزوجي كل يوم يرجع البيت وأشوفه كل يوم كل يوم وأنا من طبعي ملولة يعني احب كل يوم اسوي شي جديد حتى لو محكورة داخل البيت المهم اني اشغل نفسي

الحين ماباكم تقولون اني قاعدة اقنع نفسي لا والله اصلا انا اخر همي الزواج ، ولكن اعرف ان اهلي ماعندهم هالكلام الفاضي والعادات والتقاليد تحتم علينا الزواج وتكوين اسرة وإلى اخره

الموضوع الحين ان الريال يعرف مديري ومديري ربيع ابوي ، وقعد الريال مع مديري وقاله انا ريال مقتدر واقدر افتح بدال البيت عشرة بيوت وزوجتي الأولى رح اقعد معاها واخبرها وانا الحمدلله مو مقصر عليها بشي ولا راح اقصر معاها وانا اعرف انها بتضايق وبتزعل لكن نحن منتشر بعيلتنا الزواج بثانية يعني مابتكون مشكلة كبيرة وانا الريال وقد كلمتي واهلها بشيلهم على راسي هم يطلبون وانا بنفذ ، وانا اللي ابغيه الحين انه توصلوني لوالدها حتى لو هي رافضه بكلمه والشور شورها بالأول والآخر ، وقال انه بيسافر وبيرجع بعد كم يوم بيتواصل مع المدير ويشوف اذا قدر ياخذ مني رقم والدي

المهم المدير بمثابة جدي الله يرحمه ، قعد وياي وكلمني بالموضوع الريال جنتل ومحترم وذكي وماعليه قاصر هو ماطلب منج شي الا انج تصلين استخاره حتى لو رافضه ، انا بصراحه بصراحه انصدمت من طريقة الريال لان صارلي سبع سنوات اشتغل وكل اللي مرو علي ناس تبا تلعب واللي خطبوني كللللهم مو قادرين يفتحون بيت واللي مايشتغل واللي واللي وانا ملجت مره وفجيت الملجة سبة انه مايتحرك خطوة الا لازم يتصل على امه وياخذ شورها ولا كان يطلع الا لين امه تيي ويانا مع انه ريال كبير ماشاء الله عليه وصدمتي كانت كبيرة

والى الان اقول لنفسي معقوله سبع سنين كل اللي مرو علي بهالطريقة ، وانا اشوف بنات اهلي اللي تزوجو بصراحة شكاويهم تهد الحيييييل اللي ام زوجها مشغلتنها خدامه عندها هي وبناتها واللي زوجها حاكرنها ويهددها لو تحتشر بيطلقها وامه بتزوجه ثانيه واللي زوجها فارنها تصرف عالبيت وهو مادري وينه ،، والله خففففت انا ماتحمل هالنكد اصلا ليش ليييش اتزوج اذا انا في بيت اهلي مرتاحه ومو قاصرني شي وتحت رجول امي وابوي اطالعهم وينشرح صدري بصوتهم وحنانهم وخوفهم علي ليش اتزوج واحد مايفهم شي بالحياة وبالزواج يتحراني جارية عنده ولا عند اهله

انا ماعرف شو بلاه راسي افتر ، خواتي يوم عرفو بالموضوع يقولون انتي كيف تفكرين !! بس انا جيه ماقدر اجابل الشخص نفسه كل يوم عالاقل لو متزوج بيكون مشغول بحد ثاني وايام بيتفرغلي

وافكر بعد بزوجته اللي بتنجرح لان اتوقع محد يفكر نفسي وانه عادي لو زوجها يتزوج عليها !!!!!!!!!! حد مثلي ولا انا بس

انا ماعندي تطلعات وايده بالزواج ، الزواج بالنسبة لي استقرار وتفاهم فققققط انا مافكر بالحب والغرام وفارس الاحلام انا ابا زوج يأمنلي بيت مستقل وقادر يصرف علي لان بصراحة كل اللي تزوجن حولي ولا وحده تطلع وعندها فلوس بمخباها مدري شالسالفة كله ديون ديون ديون ولكن اذا امه ولا اخته طلبت تطلع الفلوس واغلب اللي تقدمولي يكاسرون فالمهر !!! ياصدمة الحياة

يابنات بدون ماتشتطون علي .. انا وحده اتكلم من واقع اني لم اجد رجل يقال عنه ( رجل ) الين اليوم كل اللي حولي غير واعيين للحياة ومايعرفون الله

وانا مستحيييييييل احط نفسي بين ايدين رجال يهيني او يقلل من مقدار امي وابوي واهلي اللي هم تاج راسي والله ابيع الدنيا عشان عيونهم والله لو اصير خادمة تحت رجولهم قليل عليهم لكن الأزواج اللي اشوفهم الحين هذيلا مايخافون الله في حريمهم واخاف يفوتني العمر وماحصل الرجال اللي يحترم نفسه ويحترمني ويحترم اهلي

وهنا انتهى الموضوع .. عقب ماستخرت بديت افكر بجدية ولكن لم اقرر


بنات عزيزاتي صديقاتي خواتي حبيباتي .. المنبر لكم

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[مالتيزرس]

اختي نصيحة مني صلي استخارة ..ووصلي لحرمته سواء عبر التلفون او تقعدي معاها بمكان اسمعي رايها قوليلها ترا ريلج متقدم لي وقوليلها ان شاءالله راح نتعاون ونكون خوات واكثر من خوات .حسسيها انج ماتبينه لج بروحج والكلام كله اللي قلتيه فوق كله خبريه فيها يمكن تقتنع ..لاتسمعين من خطيبج الموافقة اسمعيها من راعية الشان ..واذا لج خير ترا ربج بيجدمه ..واذا لج شر الله يبعدج عنهواكرر لج اهم شي موافقتها هيه لانه صدقيني الريال تكسره الحرمة الاولى بالعيال وتلوي ايده فيهم بحيث تمنعه من شوفتهم ويحن عقب عليهم اللي تدفع الثمن الحرمة الثانية ..الله يسهل دربج ويكتب لج الخير

[mazyo0na]

الصرااااحه ماشاء الله عليج تفكيرج عقلاني جدااااا .... ورحم الله امرئ عرف قدر نفسه .... اتقولين انا ماحب اجابل ريال كل يوم بس الله واعلم يمكن بكره اذا تزوجتيه وحبيتيه تتغير وجهة نظرج ...وانا من وجهة نظري ﻻتتدخلين في زوجته الاولى وﻻ تتواصلين معاها انتي ماتعرفينها نهائيا وخليج مستقله بحياتج وهي بحياتها ... استخيري واسألوا عن الريال عدل وربي يوفقج ويسهل امرج يارب

[لحنْ #]

اختي بعد الزواج بتحبيه ، ها فطره بكل انسان .. مب رايي او تفكير يختلف من شخص ل شخص
تلقائيآ بتلاقين نفسج تحبينه وبتبدين تغارين وتنهبلين يوم تشوفينه رايح حق الاولى ،
هذا 1
2 دام ان يقول حرمته بتزعل ، يعني يدري وعنده 5
حطي احتمال اختي ان حرمته تظل زعلانه منه .. تطلب الطلاق .. تحرمه من عياله
جم بيتحمل وجم بيوقف قدامها ؟
شي اخت ويانا ، عرست ع ريال متزوج وفهمها ان بيكلم حرمته بعد الزواج .. وان بتزعل لكن بتتقبل
وبعد ماتزوجها الاولى لوت يده بالعيال وهددته بالطلاق .. خاف وطلق الثانيه
بعد ماتورطت الثانيه ب حمل ونفقه الحين ومحاكم وووو
باين اختي من اسلوبج ان تبينه .. وتحاولين تقنعين نفسج بكلامج بأن توافقين
لكن كل النقاط اللي تكلمتي عنها مب موجووده ، مب حقيقه .. او بالاصح مب مضمونه .
برايي راجعي نفسج ، اقري كلامج مره ثانيه .. وحطي النقطه العكس قدامها وشوفي لو ممكن تصير ولو ممكن تتحملينها .
موفقه اختي وربي يكتب لج الخير

[مغليك]

ماشاءالله عليج احس عقلج كبير وفاهمة الحياة ..بس صدقهم الخوات باجر لا سرتي عنده بتتغير نظرتج للزوجج وبتحسيه انه ملكج وبتغارين عليه لما يروح للاولى لانه الغيرة فطرة فقلب كل حرمة فهالوجود ..مافيه وحدة ماتغار لزوجها حتى لو ماكان حلو ومافيه جمال بتغار عليه من حرمته ..
بس لو انا مكانج عايشة مرتاحة ويا اهلي ع شو أييب ع عمري الغصة والقهر واعيش ويا نص ريال يوم عندي ويوم عندها ..
انتي قيسي ع عمرج باجر هل بتتحملين يقولج بروح عند بناتي اليوم صاير جذة واليوم طالبيني واليوم حرمتي فيها وفيها ..هالشي لابد منه وهاي متطلبات الحياة ..اذا انتي تتحملين خلاص وافقي .
وع فكرة الريال يحن أكثر ع حرمته الاولى وعياله لانه العشرة اكثر ويا الاولى ..اعطيج مثال واحد من اهليه عرس ع بنت عمته بالسر وعنده منها بنت وعقب اللزواج كشفته من عقد الزواج وشلت قشها وظهرت من البيت والحين من ست سنوات وهيه عند اهلها وتصدقين للحين مب يائس ريلها يطلقها بين فترة وفترة يطرش عليها يباها واذكر مرة جافها بمكان وحن عليها قام يمسك ايدها غصب وهيه طابتنه وحاقرته ماتباه .عافته ..ودوم يقارن الثانية بالاولى ويعايرها حرمتى الاولى احسن عنج

وقصة ثانية ابوي خذ اماية الثانية وعقب فترة مرت السنين وتغير قومته ونشته ولبسه واسراره كله عند الاولى مرت ابوية لانه الحنين اكثر للاولى حتى لو الريال مايبين بس بقلبه اول حب عاشهواول حرمة عاش معاها ..

أنا مابقولج خطيبج مثلهم لكن اعطيج تجارب من الحياة وريال عن ريال يفرق

[ام هزاع2013]

الله يوفقج اختي .. بصراحه انا عن نفسي قبل ماتزوج زوجي الحالي .. تقدم لي واحد متزوج وكنت افكر نفسج ان مابا كل يوم اشوفه وابا امارس هواياتي وماحب التزم كل يوم فيه .. بس ماصار نصيب وتزوجت واحد ثاني مب متزوج وحبيته وصرت اغار واتصل وابا اشوفه كل يوم ..
المهم اختي فكري زين واهم شي موافقه حرمته الاولى ,, لان لو تزوج بالسر وعرفت يمكن تسوي له مشاكل وتوصل الامور للطلاق .. فاتحيه فهالموضوع شوفي ان شاء الله ربي بيكتب الي فيه الخير

[غرووب 22]

لا حول ولا قوة الا بالله

[ملاآك قلبكـ،،]

اول شي انا حطيت نفسي بهالموقف
انا الكلام اللي بقولج اياه بطبقه على نفسي
مب بس عشان اقنعج او شي

انا لو مكانج مابوافق
و لأسباب عده
اولها انه عنده عيال
وهاي نقطة ضعف له

حرمته مثل ماقال ممكن تزعل
وتسويلج مشاكل وتتبلى عليج
تسوي اي شي بس ماتخليج تتهنين فيه

ومو اي واحد عنده فلوس نوافق عليه اختي

في وايد ناس تبدأ من الصفر
واكبر رجال الأعمال في البلاد بدو من دكان صغير
واقري بنفسج
يعني مافيها شي لو بديتي مع ريلج خطوه بخطوه

والفلوس مو كل شي
في وايد ناس عايشه في غرفه وحمام لكن عايشه سعيده
وفي ناس عايشه بقصور والله لا يوريج عيشتهم

انا اضمنلج انج لو تزوجتيه مابتعيشين مرتاحه
وبتين عقب سنين وبتقولين ملاك قالت

لان حرمته بتعصب وتزعل وماتدرين شو بتقول لعيالها عنج
وغير ها لا تتوقعينها تخلي عيالها يقعدون مع عيالج اذا الله كتبلج نصيب معاه
ولا يختلطون فيهم يعني بيعيشون في جو من التفكك الاسري


وانتي بعدج صغيره
يعني لو وصلتي للاربعينات بنقول انج تبين تتزوجين
بس توج ناضجه

فالمختصر المفيد انا لو مكانج بركز بوظيفتي
وعشان ارده بدون ما اسبب بلبله
بشترط عليه حرمته تي تخطبني وتحضر كل مراسم العرس

[Ward-uae]

اسألي عن السبب ليش يبي يعدد ؟ اذا بسبب انه حرمته تييب بنات ويبي ولد فاسمحيلي هذا مب سبب واسألي عن الريال عدل وخلي اهلج بعد يسألون عنه
صح انه أبوي معرس وخذ الثانية لكن ضد سوالف الحب والخرابيط ويختار وحده من مقهى وغيره لكن هالريال ياج من الباب وطلب ابوج وهنيه يبالج تستخيرين
اما عن الكلام الباقي عن الحريم وسوالفهم اصابع ايدج مب سوا وإذا تبين الريال يتغير بيتغير مب عشان يرضيج اذا شاف شي يحبه فيج لو شو ما بيتخلى عنج وعن سوالف أهل الريل هذي سوالف حريم وإذا من البداية تشرط تبي سكن خاص تتجنب القيل والقال

[dxb_love]

دام انه مقتدر وقادر يوفرلج على كلامه بدل بيت 10 , وقادر انه يصرف عليج وتقولين انه ريال جنتل واخلاق وين المشكله؟

بتقولين متزوج وزوجته بتنجرح . زوجته عارفه انه التعدد بعايلتهم شي طبيعي وعادي

بتقولين ماتحمله وكيف , بقولج نظرتج للريال بتتغير عقب الزواج يمكن تحبينه وتبين تجابلينه طول الوكت

اما التواصل وياحرمته فهالشي اكبر غلط , لان جي مابتحطلين للريال اعتبار وبيزعل يمكن , دام انه قال بيكلم حرمته خلاص

توكلي على الله واستخيري وان شاء الله ماتحصلين الا كل خير

وانتي فاهمه وواعيه , وتشوفين المشاكل بنفسج ربيعاتج والي من اهلج , الي مديون والي متسلف وهلزمن الصراحه مو زمن واحد يعيش بهم ونكد واخر شي طلاق لاسامح الله بسبه ديون وانه مايقدر يصرف ولا يقدر يوفر مسكن

[كيكه 2015]

اختي نصيحة مني صلي استخارة ..ووصلي لحرمته سواء عبر التلفون او تقعدي معاها بمكان اسمعي رايها قوليلها ترا ريلج متقدم لي وقوليلها ان شاءالله راح نتعاون ونكون خوات واكثر من خوات .حسسيها انج ماتبينه لج بروحج والكلام كله اللي قلتيه فوق كله خبريه فيها يمكن تقتنع ..لاتسمعين من خطيبج الموافقة اسمعيها من راعية الشان ..واذا لج خير ترا ربج بيجدمه ..واذا لج شر الله يبعدج عنهواكرر لج اهم شي موافقتها هيه لانه صدقيني الريال تكسره الحرمة الاولى بالعيال وتلوي ايده فيهم بحيث تمنعه من شوفتهم ويحن عقب عليهم اللي تدفع الثمن الحرمة الثانية ..الله يسهل دربج ويكتب لج الخير

الغالية الاستخاره لابد منها طبعا رب العالمين يبالنا الخير في الدنيا وفي الاخرة يعلج الخير

بس انا مابا اتواصل معاها بالتلفون

تعرفين شو افكر .... افكر انه لو قررت مثلا انه اعطيه رقم والدي عسب يتقدم
راح اخلي ابوي يطلب منه يجي مع والد زوجته الاولى واخوانها ويقعد وياهم واذا حد فيهم عنده شور ترى بيخبر ابوي

اشرايج انتي

وعلى عياله ترى هذول عياله بيحن لهم وبيحن لزوجته الاولى حقه وحلاله وماتقدر تمنعه من شوفتهم ترا هذا حلال رب العالمين
وسبحان الله الانسان دوم يشوف وين مصلحته مايقدر يبدي مصلحة غيره على نفسه الا على امه وابوي ومن يعزون عليه

[كيكه 2015]

الصرااااحه ماشاء الله عليج تفكيرج عقلاني جدااااا .... ورحم الله امرئ عرف قدر نفسه .... اتقولين انا ماحب اجابل ريال كل يوم بس الله واعلم يمكن بكره اذا تزوجتيه وحبيتيه تتغير وجهة نظرج ...وانا من وجهة نظري ﻻتتدخلين في زوجته الاولى وﻻ تتواصلين معاها انتي ماتعرفينها نهائيا وخليج مستقله بحياتج وهي بحياتها ... استخيري واسألوا عن الريال عدل وربي يوفقج ويسهل امرج يارب

كلااامج صحيح وعين العقل وفعلا انا هالكلام قالولي ياه
وانا معاج بإني ما اتواصل مع زوجته الأولى وربي يشهد اني مافكر اتدلع واكل عقل الريال وتدلع واراويه جمالي واني صغيره ورشيقه
حرمته يابتله خمس اطفال ماشاء الله عليهم ومتحمله مسؤوليتهم مابيي انا عقب عمرها كلله وتعبها وشقاها اقوم اتدلع عشان انا يديده عالزواج
ربي فوووووووووق والله انه يقلب حياتي للجحيم لو اكون ملكة جمال العالم وهي اخسف وحده

بس تعرفين اختي المزيونه
انا لاني ماعندي مشكله زوجي يتزوج ثانيه مو قادره اقيّم شعورها كزوجه أولى الاحساس للحين ماوصلني

وبعدين موضوع اني راح احبه واعشقه واغير عليه
ممكن هالشي يصير بالفترة الأولى لكن روتين الحياة يخليج تتعايشين مع الأوضاع
وبعدين والله لو الواحد يفكر ان رب العالمين مايكتبلج الا الخير
انا ليش ازعل ترا رب العالمين اختارلي هالشي ولو انا بوضع ثاني ماعتقد راح اكون سعيدة
وهي كزوجة اولى لو رب العالمين كتب انه يتزوج عليها اكيييييييييييييد انه خير لها
مانعرف حكمة رب العالمين الا ليييييييين نموت قهر وغم وضيق وعقب نشوف حكمته ونقول ليتنا صبرنا

[كيكه 2015]

مب رايي او تفكير يختلف من شخص ل شخص
تلقائيآ بتلاقين نفسج تحبينه وبتبدين تغارين وتنهبلين يوم تشوفينه رايح حق الاولى ،
هذا 1

كلامج صحيح ممكن بالفترة الأولى هالشي يصير لان الرجال يكون متعلق بزوجته بالفترة الأولى ولكن الحياة تمشي عادي وبيروح شغله وبيجابل عياله ترى انا اللي شليت ريل الحرمة مب هي اللي شلت ريلي ، ويكفي الجرح اللي سببتلها ياه ، الواحد ليش يترك مشاعره تمشيه وتوصله لهالمواصيل

دام ان يقول حرمته بتزعل ، يعني يدري وعنده 5
حطي احتمال اختي ان حرمته تظل زعلانه منه .. تطلب الطلاق .. تحرمه من عياله
جم بيتحمل وجم بيوقف قدامها ؟

يوم الرجال صدق يقول انا رجال وكلمتي هي اللي تمشي ساعتها بتعرفين ان الحرمة لابد انها تتقبل الوضع اللي زوجها حطها فيه ، وترا دام انه اقبل على الزواج بهالطريقة معناها هو متحكم بعيلته ماعتقد انه متزعزع الراي ، الريال شوره بيده

شي اخت ويانا ، عرست ع ريال متزوج وفهمها ان بيكلم حرمته بعد الزواج .. وان بتزعل لكن بتتقبل
وبعد ماتزوجها الاولى لوت يده بالعيال وهددته بالطلاق .. خاف وطلق الثانيه
بعد ماتورطت الثانيه ب حمل ونفقه الحين ومحاكم وووو

ليش تلوي ذراعه بالعيال !! انا استغرب والله .. الحرمة ماتقدر تلوي ذراع الريال اذا كان مب مقصر وياها والريال مايخاف الا اذا وراه سالفة وشخصيته مهزوزة ، وهي على اي اساس تمنعه من عياله ترا هذا شرع الله ولا بنعترض على شرع رب العالمين بعد !!

باين اختي من اسلوبج ان تبينه .. وتحاولين تقنعين نفسج بكلامج بأن توافقين
لكن كل النقاط اللي تكلمتي عنها مب موجووده ، مب حقيقه .. او بالاصح مب مضمونه

.

انا مب محتاجه اقنع نفسي بشي خصووصا اني اعرف ردة فعل الاغلبية وهي الرفض وانا قلت هالكلام انه محد يفكر مثل ما انا افكر ، انا يوم طرحت الموضوع بغيت اعرف الآراء وخصوصا اني مو قادره اوصل للاحساس اللي الحرمة تحس فيه يوم يتزوج عليها .. انا قريت كلامي مرتين وثلاث عشان خاطرج وانا قلت ان لو زوجي قال ابا اتزوج اكيد مابطيح عند ريوله بقوله تزوج ، انا مب قليلة عسب يكسرني رجال ولا ناقصني شي عسب يكملني رجال

يبا يستوي رجال عقب مايتزوج ثانيه ويقوم فيني وبواجباته انا اصيرله عسل ، يبا يقصر معاي يطق راسه بالطوفة كلن وله يومه احرق نفسي واحرق شبابي عشان ريال ليش ولا بطلب الطلاق ولا بسوي عملية تجميل ولا بفتكر فيه .. ابوي رباني وكبرني وامي اسهرت علي مب عشان يجي واحد ياخذني ويطقطق علي

[كيكه 2015]

ماشاءالله عليج احس عقلج كبير وفاهمة الحياة ..بس صدقهم الخوات باجر لا سرتي عنده بتتغير نظرتج للزوجج وبتحسيه انه ملكج وبتغارين عليه لما يروح للاولى لانه الغيرة فطرة فقلب كل حرمة فهالوجود ..مافيه وحدة ماتغار لزوجها حتى لو ماكان حلو ومافيه جمال بتغار عليه من حرمته ..
بس لو انا مكانج عايشة مرتاحة ويا اهلي ع شو أييب ع عمري الغصة والقهر واعيش ويا نص ريال يوم عندي ويوم عندها ..
انتي قيسي ع عمرج باجر هل بتتحملين يقولج بروح عند بناتي اليوم صاير جذة واليوم طالبيني واليوم حرمتي فيها وفيها ..هالشي لابد منه وهاي متطلبات الحياة ..اذا انتي تتحملين خلاص وافقي .
وع فكرة الريال يحن أكثر ع حرمته الاولى وعياله لانه العشرة اكثر ويا الاولى ..اعطيج مثال واحد من اهليه عرس ع بنت عمته بالسر وعنده منها بنت وعقب اللزواج كشفته من عقد الزواج وشلت قشها وظهرت من البيت والحين من ست سنوات وهيه عند اهلها وتصدقين للحين مب يائس ريلها يطلقها بين فترة وفترة يطرش عليها يباها واذكر مرة جافها بمكان وحن عليها قام يمسك ايدها غصب وهيه طابتنه وحاقرته ماتباه .عافته ..ودوم يقارن الثانية بالاولى ويعايرها حرمتى الاولى احسن عنج

وقصة ثانية ابوي خذ اماية الثانية وعقب فترة مرت السنين وتغير قومته ونشته ولبسه واسراره كله عند الاولى مرت ابوية لانه الحنين اكثر للاولى حتى لو الريال مايبين بس بقلبه اول حب عاشهواول حرمة عاش معاها ..

أنا مابقولج خطيبج مثلهم لكن اعطيج تجارب من الحياة وريال عن ريال يفرق

تخيلي تزوجت واحد اعزب ويموووت علي تبين تقنعيني انه مابيتلفت يمين ويسار ماااايقدرووون شباب اليوم مايقدرووووووووون متعودين على بنات الدوام وفالكوفي ومني ومناك وربعهم ماشااء الله كل واحد عنده وعنده

اوكي مابيتزوج وحده ثانيه لكن مخه وين !! عقله وين !! مب معاااي وانا بصرااحه بصراااحة مو مضطره اتم حاطه عيني عليه اللي يبا يغلط بيغلط من جدامي ولا من ورا ظهري .. ولو اكتشفنا خيانته قال هي مقصره معاي ماتلبس ماتترتب وانا ماظنتي خادمه عند اهله .. يوم كان عند اهله كان ياكل حشيش ويسكت .. عيل يجي عندي يسوي فيها نظيف .. تبون تقنعوني انهم يلبسون ويكشخون تراني اشوف رياييل خواتي كندورة نوم ولا وزار وفانيله وشوشته لين اخر الشارع .. عيل ليش انا ماطالعت يمين ويسار .. ابوي طول عمري اشوفه لابس سبور واخواني نفس الشي ليش مايكشخ هو بعد حاله حال الاوادم

انا ماقول الحرمه نفس الريال

انا اقووووووول اني مابتزوج عسب استويله سكيوريتي ومخي يخترب واعصابي وضغطي عشان يحب وحده ولا تزوج وحده ترى ربي بيرحمنا ونحن مارحمنا اعمارنا .. وبعد تخيلي عقب ماتموت الوحده عقب الولادة يجي يقول جسمج اخترب ضبطيه .. عقب ما الوحده تشوف الموت يوم ولادتها تسمع لها هالكلمتين من ريلها !!!!!!!!!!!!

والله دخل ايدك بجيبك وسفرني برا اسوي تجميل لو مب عاجبك جسمي .. حبيبتي كلللللللللللللللل امورنا بتنصلح بالعقل .. العقل .. العقل .. لاتترجمين لنفسج كلام غلط وتصدقينه
ربي خلقج كامله مكمله عيشي حياتج طول وعرض
تكونين بدون زواج ولا مطلقه ولا ارملة ولا معوقة ولا زوجة ثانية ولا حتى عاشرة
ماعليج من حد انتي فكري بنفسج

[بسمة أمـل]

السلام عليكم ورحمة الله وبركاته

حبيبتي بعد ما تصلين استخارة لو قلبج مب مرتاح للإرتباط بهذا الإنسان خبريه بكل صراحة انه مافي نصيب بينا خصوصاً انه السالفة انه متزوج وعنده بيت بالنهاية ربي بكتب لج الي فيه خير وبعدين الزواج سنة الحياة يعني ما تبين تكونين ام ؟ بغض النظر انج كنتي تفكرين بعمرج وما تبين ترتبطين بريال ومب كل الرياييل مب زينين مثل ما في الشين في الزين بالنهاية كل شخص يآخذ نصيبه في الدنيا وكلي امرج لله وهو بختار لج الشيء الزين والي مكتوب لج بصير سواء تزوجتي بهذا الريال او لا كل شيء مكتوب