تبلد المشاعر

[أهلي عزوتي]

انا صار لين تقريبا قريب الثلاث سنوات متزوجة و عندي بنت عمرها سنتين و توني حامل بالثاني ..انا مشكلتي ويا ريلي عدم التفاهم .. ابدا ما اتفاهم وياه . كم مرة صارت بينا هوشات و زعل لدرجة انه الاهل يدخلون في الموضوع .. اخر مرة رحت لاهلي تميت عندهم ثلاث شهور

اللي يقهرني انه اذا استوى امبينا اي شي .. اي شي ما يكون بينا تفاهم سواء مشكله ,, نقاش ,, موضوع عادي
انا اكلمه شرق و هو اييني غرب و من غير انه يقولني كلام ما قلته و يزيد من عنده شوية بهارات

انا احبه و هو يحبني بس الحب وحدة ما يكفي .. اذا ما كان بينا تفاهم

صار لي تبلد في المشاعر تجاهه و لا اكلمه و اطنشه .. ما اعرف سو صارلي ،، كل مرة انصدم فيه اكثر لدرجة ما اعرف اذا احبه او لا

مرات افكر انه الحياه مستحيلة امبينا
صار يذمني عند اهله و انا بالمثل
ما ارتاح عنده ابدا ،، و ما اكون مبسوطة ،، لدرجة اني اهملت نفسي كثير ،،
ما اعرف شو اسوي جربت كل شي و ما فاد ،، و هو انسان ما عنده استعداد انه يتغير عشاني ،،، انتوا تعرفون الحرمة الاشياء البسيطة تفرحها ،، وانا هالاشياء ما القاها ،،

الحل ؟؟

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[فلاسيه114]

الحل حبيبتي انج تسايرين ريلج يعني اذا قالج شي سايريه ولا تعاندينه حاولي تتجنبين النقاشات لي تيب المشاكل. سولفي وياه عن البيبي اليديد وشو ناويه تشتريله. يعني افتحي مواضيع ما تيب المشاكل عشان خاطر بنتج. اذا الحب بعده ما زال امبينكم ترا كل شي بيتصلح .. خليج هاديه وياه وكلميه بطيب. واهم شي تخلين اي شي يستوي مبينكم يظل امبينكم. لا تسيرين تخبرين هلج .. وحتى هو بعد. الله يصلح امبينكم غناتي .. ومبروك على الحمال

[khaleejiya]

انا كنت شراتج مع اني وريلي متزوجين عن حب بس سبحان الله الواحد مايعرف الثاني الا لما يعاشره ويعيش معاه 24 ساعه
الخلافات هذي طبيعيه بأول سنين زواج
بس انا تعلمت بالطريقه الصعبه انه اكبر غلط هو تدخل الاهل
الخلافات بين الزوجين لازم تنحل فقط مابين الزوجين بدووون تدخل طرف ثالث
وروحتج لبيت اهلج 3 شهور هذي غلطه كبيييره
المشاكل تنحل بالمواجهه مب بالهروب
واهم شي السيطره عالاعصاب والغضب حاولي بقدر الامكان انج ما ترفعين صوتج على قولة عمتي كلما ارتفع الصوت كلما غاب العقل
عطينا امثله على خلافاتج ويا ريلج على شو تتهاوشون عادةً؟ اتوقع طلعاته ويا ربعه وغيابه عن البيت؟ هالشي وارد جدا بأول الزواج بس مع الوقت يتغير الريال بس عليج الصبر

[غلآ نفسي]

اذا هو ما يفهمج

حاولي انتي تفهمين شخصيته وطبعه

3 سنوات زواج مب معناته عرفتيه وعرفج

لا لا بعدكم فالبدايات

طبيعي هالفتره تكونون مخلتفين عن بعض هو شرق وانتي غرب

بس انتي ابدي من الحين افهمي شخصيه ريلج عدل اذا فهمتي طبعه وشخصيته وهو من أي نوع من الرياييل صدقيني بترتاحين من وايد أمور ومن وايد مشاكل

بالتوفيق

[أهلي عزوتي]

انا ما عندي مشكله في طلعاته و سهراته عند ربعه ،، انا مشكلتي معاه عدم التفاهم ،، مرات يتهمني باشياء انا اشوفها مب فيني ،، و اكثر خلافاتنا مادية ،، انا الحمدلله اشتغل و الله فاتحنها علينا ،، بس هو ما يحب يدفع و يعتبرني العب بالفلوس مع انه اللي اخذهن من عنده بس لعياله و للبيت مع العلم انا نسكن عند اهله

اكبر مشكله تواجهني ما يتفاهم وياي ،، افتقد الجلسات اللي كانت امبينا ،، حتى مواضيع بسيطة نتناقش فيها هو يكون رايه غير و انا غير ،، قليل ما ننجذب لبعض في السوالف

انا اعتبر نفسي مجربة كل شي تقريبا ،، حاليا متبلدة مشاعري غصبا عني ،، مليت و تعبت من حياتي وياه

[khaleejiya]

بالهدوء والتفاهم كل شي ينحل ان شاءالله
تفتقدين الجلسات انزين بيدج هالشي خذيه بعيد عن جو البيت والعيال والازعاج اقعدوا بمكان هادي وتفاهموا
يمكن عنده وجهة نظر بخصوص صرفياتج فهميه انتي على شو تصرفين وانها كلها اشياء ضروريه مب كماليات
انا انصحج تسوين دفتر تكتبين فيه كللل المصروفات من اول ما ينزل الراتب وبجذي بيكون كل شي واضح لكم انتوا الاثنين واتفقوا كل واحد فيكم على شو يصرف مافيها شي لو ساهمتي وياه وساعدتيه

[هنايف35]

الحمل يخليج جي متبلدة شوي لا تاخين قرارات تندمين عليها والله والله في كل بيت مشااااكل ويمكن اكبر عن مشاكلج وما يعلم اسرار البيوت غير رب العالمين اول خمس سنين لازم مشاكل بين الزوجين بعدين بالطخين وبتذكرين كلامي استغفري وتوكلي على الله وربي يفرج همج يارب

[ورقة ناعمة]

يعني بالاربع والعشرين ساعة تسوون مقارنات ويومكم كله يضيع عشان مشكلة وتخسرين حياتج عشان ريلج مايتفاهم


حاولي تفهمين نفسج صح وحاولي عقب تفهمينه صدقيني الرياييل ماعندهم بارض بترتيب المشاكل او تعديلها مثلنا ,,,,

عشان شيه انتي شرق وهو غرب فكري براحتج الحين ماعليج منه وعقب الحمل يصير خير ,,,, اطلعي سيري امشي وحاولي ترتاحيين

وتريحين راسج

[ماحد شراتي]

الرياييل بشكل عام ملولين ومالهم خلق لشي فانتي الحين اهتمي بنفسج وسوي طاااااااف عالاشياء اللي تضايقج .. انتي الحين حامل فلا ضايقين نفسج .. شكلكم انتوا الاثنين عنيدين ولا انتي ولا هو مستعد يتنازل عن رايه عسب تحصلون حل ولهالسبب دوم ما تتوافقون فالاراء..

نصيحتي كلميه بهدوء وقوليله شو اللي يضايقج واختاري الوقت والمكان المناسب ..

تقومين بالسلامه الغلا

[A+k]

ليش ادخلين الأهل ف مشاكلكم هذا اكبر غلط حاولوا تحلون مشاكلكم بينكم بدون تدخل طرف ثالث

[طموح دبا]

الله يعينج,, نفس اللي عندي ما يعرف يتكلم معاي ابدا لازم شتم ومصخرة,, صرت ابتعد واتحاشى واشغل نفسي بعيالي
كل ما تقربت منه كل ما ابتعد,,
الحياة ما توقف على زوج,, ودام انه ما وقف حياته عشاني ليش افكر واوقف حياتي عند بابه؟؟؟؟

[كتكوتة حبيبي]

مشكلتكم العناد كل واحد يبا يبرز رايه بانه صح الزواج يباله تنازلات

[Ward-uae]

لما بتعصبين سيري اي غرفة وتوضي وصلي لج ركعتين واذا بترقدي حطي راسج ونامي
لما بتقومي ردي شوفي الموضوع من وجهة نظرج لا تناقشين حاولي بالاول تقنعين نفسج وامورج مرتبة وحطي اولوياتج قبل
انتي اذا بديتي تسوي هالطريقه ريلج بعد بالتدريج بيسوي شراتج
اذا انتي تضاربين وتصارخين ريلج بيرد عليج بنفس الطريقة

[Cobon]

و يوم الوحدة عندها مشاكل ليش ترد تحمل و اتييب عيال
حلوا مشاكلكم اول شي عقب احملوا و عيلوا

الحين انتي وراج حمل و تعب و لازم ادارين عمرج في البداية
انتي مشكلتج ما في نقاش و كمستري بينكم (chemistry )
ما عندج مشاكل انه يضرب او يخون او راعي خمر بعيد الشر عنج

فحاولي تشتغلين ع ها الامور قبل ما يفوت الفوت ؟؟؟؟ لان من اسلوب كتابتج مول متبلدة فيج المشاعر

الله يعينج يمكن من الحمل و روتين البيت و الحياة الروتينة حاولي حاولي تغيرين

[Amaaaal]

انا اييني هالاحساس احيانا احس اننا مش متفاهمين ابدا وساعات احس ما شاء الله اثنيتنا متفاهمين ,,, أحس تعريف او مفهوم "تفاهم" ملخبط عندي شوي هو عادة يرتبط بالاحترام ... لازم الطرفين يتنازلون عن بعض الاشياء وما يعاندون بعض ويحترمون بعض من كل النواحي اذا يحبج وتحبينه ويحترمج وتحترمينه يعني ان شاء الله متفاهمين ماله داعي الانفصال