الأخ غير الشقيق

[ميثه زايد]

هلا حبايبي حابه استشيركم بموضوع خاص شوي

انا ابوي كان متزوج على امي وياب عيال وصار طلاق ومؤخرا قام ابوووي يتواصل مع اخواني من الحرمة الثانية لان امهم كانت تمنعهم نوعا ما... اخواني حاليا في العشرينات من عمرهم وكلهم اولاد واحد فيهم عمره 23 سنة انا اكبر عنه ب 11 سنة تقريبا وانا متزوجه وعندي عيال .. مؤخرا قام يتواصل معاي من خلال الواتساب خذ رقمي من اخوي شقيقي حسيت ريلي مب عايبنه الوضع بس ساكت ... ريلي يعرف انه اهو اخووووي بس يحس انه اخوي من ابوي وما كان بينا تواصل فمب عايبنه انه يتواصل معاي بس ساكت ...

امي كذلك ما تبانا نتواصل وياهم مافي سبب بس اتقول ما احب المشاكل .. ومرة اخوي واعد ابووي ويا بيتنا يسلم امي وايد عصبت وتمشكلت مع ابوووي وقالت له ما ابا احد من عيالك ايي بيتنا ... انا عاذرتنها لان ابوي خذ امهم على امي واكيد كانت محتره طبيعي هالشيء

اخوي هذا مع ان في فرق بينا بالعمر بس احس عقليته مثلي واحسه سابق عمره ... واحسه يفتقد جو الاسرة نوعا ما لان ابوي منفصل من سنين عن امه ....

مؤخرا يقولي ابا ايي ازورج في بيتج ... بصراحه انحرجت منه ... اخاف ريلي يعصب بنفس الوقت وايد ارحمه احسه يبي يكون اسرة خصوصا ان ما عنده خوات بنات شقيقات

ما اعرف هل ألبسه .... والا استقبله ... انا مستويه مثل امي ما احب المشاكل بصراحه

لان امهم الله يهديها وايد سوت مشاكل لامي من ضمنها ( سحور ) والله أعلم

المزيد من آخر المواضيع من نفس القسم:

• حساااب لبيع الانتيك الاشيا الاثريه القديمه
• ساعدوني .. محتاجة لدكتور قلب اطفال في دبي
• السلام عليكم
• المانيكير الاسلامي
• ترتيب ادوات المنزل
• أبا هالبرقر
• عجبني هالفستان من موقع فلوري داي
• عجبني هالفستان من موقع فلوري داي
• علاج ادمان المخدرات
• ديجي فاضل في أبوظبي

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[sama DXB]

وحليله

هذا اخوج وشال نفس الاسم

لاتقطعين حبل الوصل مادام هو بدا يحسن العلاقة

استقبليه وخلي عيالج يعرفون انه خالهم

وعن ريلج يلسي وياه وقوليه ترا هذا اخويه مب غريب

انا استانس يوم اعرف حد يصير خالي بالرضاعة ولاعمي

اتخيلي بالرضاعه ، فما بالج لو اخوج صدق

الله يألف بين القلوب وخلي مشاكل امج وامه ع صوب

[جنان الفجيره]

جوفي الغاليه اول شيئ كلمي ريلج بهداوة وقولي له هذا اخوي مالي غنى عنه ولازم اعيالك يجوفونه قولي له حتى انت لمن حد من اخوانك بي البيت بستقبلهم وخبريه انه دوم يطريه بالخير

وانج تتمنين يرجع شملكم من يديد لا تقطعين حبل اللوصال وتمي كلمي زوجج

[munamoor]

أنا لو اكتب لج قصة ابوي الله يرحمه بتقولين فيلم هندي
بس الوحيد الي يحبنا و يموت فينا اخوي العود و مرت ابوي
مادام باجي عيالها ما يجرجونها علينا ،،،
المهم يا غناتي هذا اخوج و لا لج بد منه ،،، حرام تلبسينه ،،،
اطلعي معاه ،،، اعزميه في مكان انتي و هو و أبوج
وكان الله غفور رحيم ،،،،

[انا و الشوق]

قال الله تعالى" " ولا تزر وازرة وزر أخرى"
افرضي حسن النية و مب شرط يطلع شرات أمه
اعذريه بعد.. ماله ذنب انولد بهالجو العائلي المشتت
ترى التشتت العائلي يؤدي لوايد مشاكل ...
اختي لازم تتواصلين معاه أكيد محتاج ايحس بإحساس العائلة.. لا تقطعين صلة الرحم بينكم
تفاديا لأي شي لا قدر الله اعزميه في مكان بعيد عن البيت و ريلج على علم طبعا
لحد ما تستقر الامور و تتعدل الامور بينكم
و بإذن الله تتسهل الامور

[لحنْ #]

مالها علاقه مشاكل امج ب امه ، ها اخوج وبتتحاسبين عليه ..
بالنهايه دمكم واحد ترا ومثله مثل اخوج اللي من امج وابوج ، وقولي هالكلام بعد لريلج ،
مافاول عليج لكن لو بكره بعده صارلج شي لا سمح الله ، محد بيوقف معاج غير اخوانج .. لا تخسريهن عشان شي ماله وجود
موفقه عزيزتي

[ماحد شراتي]

الخوات ما قصرن

حرام لا تردينه بالعكس استقبليه ببيتج وخبري ريلج قبلها وخذي موافقته وفالنهايه هذا اخوج مب حد غريب

[الأحلام الملونة]

سبحان الله انا خلاني الآقرب لآمي ولنا كانوا غير الآشقاء وعرفنا علي كبر أنهم اخوانها من أم ثانية ولا عمرها فرقت بينهم وبين أخوانها الآشقاء

واذا علي المشاكل موجودة بين الضراير --------

نصيحة كلمي أمك الحين نحن بالدنيا وبكرة في موت وحساب لا تخلوا ابوكم يتحاسب علي عياله ويقطعهم -----

وأنت تكلمي مع زوجك باللغة الدين والحين الدنيا شاغلة الجميع اكسبي ثواب وجبة افطار بشهر رمضان لآخوك وزيارتك بأعياد الله

الله يجمعكم بما يرضي الله ويحب

[sa7el]

اصلا حرام امج تتضارب مع ابوج عشان ولده يا يزوره ،، بالعكس خليها تراويه الفرق بينها وبين أمه
وشو بيسوي يعني بيتعرف عليكم وبيكون سند لكم بعد ابوكم الله يطول بعمره يا رب
بالنسبة لريلج ماله حق الصراحة يمنعج من اخوج،، بس انتي قبل لا تتسرعين سولفي مع ريلج شوفي شو فكرته،،،سولفي معاه وضحي له فكرتج،، وهاتي ادلة من القران والسنة طبعا السالفة اذا وصلت للقران والسنة ريلج ما بيجادلج لانج يبتي كلام الله ورسوله
خلي ريلج يتواصل معاه،، يطلع احيانا معه يتعرفون على بعض ،، وعقب ما الجو يتلطف من بينهم،، اعزميه في بيتج،، بس عالواتس لا تقاطعينه،، حرام اخوج وفرق العمر 11 يمكن محتاي نصيحة أو حاس بنقص اسري واجتماعي
الدنيا بدور أختي وباجر لا سمح الله ممكن أي واحد منكم يكون مكانه محتاج حد يكون معاه ما يحصل
عن امه،، الله يسامحها ويبعد الشر عنكم هي بعيدة وانتوا بعاد عنها،، بس دام اخوكم الكبير حاب يتواصل معاكم وهو زين،، شو المانع

[mrs.abk]

اقول لج ابوج غلطان انه سمح بالتفريق بين عياله وامج غلطانة بافتعال المشاكل مع اخوانج

انا اقول اقعدي مع زوجج وكلميه بالمودة

وعطوا اخوج فرصة يثبت نواياه ..

[أم زمرده]

اللهم اغفر وارض عن كل عين بكت من خشيتك، وفاضت دموعها طمعًا في رحمتك

[ملاآك قلبكـ،،]

رديه وخلي الشي فذمتج
امج اذا عندها مشكله تتضارب مع ابوج
اخوج مايخصه لانه ماجبر ابوج يتزوج امج
وريلج اذا عنده مشاكل نفسيه يحلها بعيد عنج
تراه اخوج من لحمج ودمج وشايل اسم ابوج
يعني ملزومين فيه شرعا وقانونا

سمحيلي اذا ضايقج كلامي انا حالتي مشابهه لحالة اخوج
وبصراحه ما ارضى اخواني يعاملوني جي
احتويه قبل مايحتويج الندم

مابينفعج حد اذا اخوج انسجن بقضيه اخلاقيه او مخدرات لا سمح الله
بتكونين انتي وامج وريلج مسؤولين عن حالته

[أحب نفسك]

الحين عشان اخو طلع لج فجأه اغلبكم تنصحونها تتواصل معاه ومطنشين امها وتحكمون على تصرفاتها وان مالها داعي تسوي مشاكل!
اول شي تفاهمي مع امج عالموضوع مراعاة لمشاعرها وحاولي تقنعينها وخذي منها الموافقة المبدئية او عالاقل لو تقول لج انا مالي شغل في اللي بينكم وخلكم بعيد عني
جيه بتكونين سويتي الشيء برضاها وعقب تناقشين ريلج وتقنعينه بوجهة نظرج
وشوفي اذا ما يرضى بانه يزورج في بيتج.. اتفقي معاه ل مكان مع ابوج

صح هو ماله ذنب بس بعد ما يصير اطنشين رضى امج وريلج عشان اخو فجأه طلع بحياتج
وامج ممكن تكون حساسه وممكن تعرف المشاكل اللي ممكن تيكم من وراهم
وممكن بعد تفكر ان مب بكيفها طليقته متى ما تبى تحرم بتحرم عيالها ومتى ما تبى تخليهم يتواصلون بتخليهم بكيفها
شعور صعب على امج ان عيالها يتصرفون مع (عدوتها) بكيفهم
المهم مثل ما كانو بعاد عنكم سنين .. العلاقة ممكن ترد بس يبالكم وقت لين الكل يتقبلهم
لا تستعيلين وتفرضينه في حياتكم بسرعه
كل شي مع الوقت يصير اسهل ويبدون يتقبلون تدريج
وواضح اخوج محتاج ل حنان حرمة سواء ام او اخت

المهم لا تنسين رضى امج ثم ريلج واخيرا اخوج

[احلى بعفويتي]

حرااااااااااااااااااااام ريلج جي يسوي

احينا شو ها ليش جي


ماعرف لو انا بتواصل معاه بعدم وجود زوجي لان الرياييل حشره لو عرفهم
المهم تيمعوا في بيت ابوج احسن من بيتج

[Ward-uae]

يعتمد على اخوج اذا سيرته طيبة رمسيه لكن لو يسكر وراعي سوالف وخرابيط فأحسن تمين بعيد ويكون تواصلكم سلام وسؤال عن الأحوال واذا يبيج تساعديه في عرس او زواج دوريله 
اما عن ريلج اسمعيه يمكن يعرف اشياء لهذا السبب ما يبيج تتواصلين معاه اما لو بس يغار ما عليه تقدرين تتفاهمين معاه