موضوع عن المهور

[جنان الفجيره]

السلام عليكم ورحمه الله وبركاته

اليوم حبيت التكلم عن موضوع الزواج وتكاليفه

الحين لمن ايي شخص يخطب لازم ينكسر ظهره يعني المهر سبعين الف ويا الله حفله خطوبه اللي كانها عرس ومن غير الهدايا الذبايح خلصوا ييو للملكه هني بعد يتشرطون ما يبون غير قاعه ولا فندق ولا بعد يبون فرقه والمكياج و الفستان عليه من غير الذبايح اللي التم

و العرس عاد حدث ولا حرج بالتبذير و الشروط لا ابي الفندق الفلاني لا ابي القاعه الفلانيه ربيعتي هب احسن عني جي هو تنافس ومن غير الذهب اللي يطلبونه لين العروس وخواتها متزوجات ولا ولين اليدات

واخر شيئ مخشوش ترا في المندوس و لازم الفرقه الفلانيه ولا الفرقه الاستعراضيه

ليش ما تسهلون على الخاطب خففوا عليه شوي لا تكسرون ظهره بالديون الخطوبه خلوها عاديه حفله بسيطه و الملجه روحوا ملجوا بالمحكمه وعسب تزدهبين اطلبي شيئ بسيط


السوق ما بطير كل شيئ تشترونه ويتم مخزن بالكبت ولو كنتي تشتغلين ساعديه حطي ايدج بيده دفعي النص وهو النص لا تقارني نفسج بربيعاتج

لا خلج مقتصده بكل شيئ و الذهب اذا عارفه نفسج ما تلبسينه خبريه انه لا يكثر منه وليش تطلبين شغاله دام انتي وزوجج بالبيت ولا بعد طباخ ليش وانتي شو دورج

ترا الناس بيحضرون العرس بياكلون وبيروحون وانتوا بتموا تدفعون ديون العرس يسروا على الخاطب ولا تكثرون طلبات تكسر الظهر

وثانيا البنات اوكي عرس لبسي فستان لكن متحشم و الله ااروح اعراس استغفر الله لابسات فستان قصير يعني شو ساتره ما اعرف ولا بعد نصهن متزوجات وعندهم اعيال

المزيد من آخر المواضيع من نفس القسم:

• اهم النصائح التى تساعد المطلقة على إعادة...
• نصائح هامه للفتيات المتاخرات عن الزواج
• نصائح للمرأة المطلقة لتبدأ حياتها من جديد
• رسالة هامة إلى حاملة لقب مطلقة
• اهم نصائح لحل مشكلة المتأخرات عن الزواج
• نصائح هامة لكل مطلقة كوني منطلقة لا مقيدة
• الزواج الثاني للمطلقة وطرق التعامل معه
• اجمل دعاء لتيسير الزواج
• نصائح ذهبية لكل متأخرة فى الزواج
• هل يمكن البدء من جديد بعد الطلاق

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[السعدية 88]

الله يجازي خير على الكلام الصحيح

[كلي كلاسيكية]

ايي و الله اختي انا معاج و انا بصراحة دوم انصح البنات انهن يسهلن على الخاطب عشان ربي يسهل عليهم حياتهم و يبارك لهم فيها و المشاوف وايد منه وآخرته مشاكل بسبت البيزات الله يهديهن بس...

وربي يهديهن هالبنات اللي يلبسون قصير ويصلحهن يارب ...

[جنان الفجيره]

ان شاء الله بس يهتدون ولا يقلدون ترا التقليد وراه مصايب

[بسمة أمـل]

السلام عليكم

كلامج عين العقل حبيبتي زهور حق شو التكاليف ترى الخطبة اعلان لكل الناس وماله داعي حفلة كبيرة اللهم حفلة بين أهل البنت والريال وبالنسبة لحفلة الملجة ممكن تكون بعد بسيطة على القد والعرس ممكن يكون بسيط على قد امكانيات الريال وبخصوص المهر حق شو المبالغ الضخمة حلو البنت تكون عاقلة تفكر وتقول بينها وبين نفسها حق شو أثقل على الريال اهم شيء أكون مرتاحة معاه ويحترمني ويعاملني زين والبساطة ترى شيء مب عيب العيب هو الاسراف الكثير حتى الله سبحان وتعالى ما يحب المسرفين
الله يرزقني واياك وكل البنات الأزواج الصالحين يعطيج العافية حبيبتي على الموضوع

[جنان الفجيره]

جزاكم الله خير على مروركم هنا ونورتوا صفحتي

[يا معرفني]

فعلا كلامج صحيح مليون بالمية .

[Cobon]

البنت الكبيرة في العمر لازم تتنازل شوي و تخف من طلباتها
اكيد هي انسانة تبغي عرس و فستان ابيض لكن ع حسب ميزانية الزوج
لو عنده فلوس و راتبه زين ليش الوحدة ما تطلب خلى تطلب و تدلل

بس تبغين الصراحة هاي صارت شماعة
لان الشباب رواتبهم زينة و يحصلون صندوق زواج
غير انهم ما يستخسرون يشترون شقة ل ..... و يسوي فيزا لكل اهلها
و يستخسرونه للمواطنة ؟
اعرف وايد بنات قنوعات بس وين اللي يقدرهم ؟؟



لا تخلون المهر شماعة للزواج لان لاعت جبدي من سالفة المهر
كأن المواطنين فقارى و هم كل واحد موتره ع البنك و 24 ساعه مسافر لي تايلند و بانكوك و جوازه مختوم بكذا دولة يتونس
و عقب يقول المهر غالي اخذ لي اجنبية احسن
ياخي روح اذلف منو المينونة اللي امها داعية عليها و تاخذك خخخخخخخخخ

[ريم العسووله]

أختي تعبنا و نحن نقول
وايد بنات كبروا و تأخر نصيبهم بس محد يسمع
و المشكلة الكبيرة في ناس من جهه تشتكي من أرتفاع المهور و التكاليف و في نفس الوقت يسوون أعراس مكلفة و يطلبون مهور عالية !!! قمة التناقض

المشكلة الناس صارت تحب تقلد الناس و صار بينهم نوع من المنافسة و كل واحد يبي الأفضل و الأحلى و البعض صار مديون بسبب التقليد !!! يحمل نفسه ديون عشان يكون الأفضل !!! مادري وين عقولهم ؟!


السبب الأول في مسألة أرتفاع المهور هم النساء سواء أم العروس و خالاتها و عماتها أو العروس نفسها ، أما الرياييل قليل منهم يهتم بالمظهر و أغلبهم يبون يمشون الزواج على خير ، فننصح نفسنا و ننصح امهاتنا و بناتنا و اخواتنا و عماتنا و خالاتنا انهك يحكمون عقولهم شوي ...

الله يهديهم بس

[khaleejiya]

هذا ليش الشباب يشردون عن المواطنات وياخذون اجنبيات

[Ward-uae]

حبيبتي ما يصير مهر 70 حتى المليج ما يكتب هذا الرقم في العقد
يمكن قصدج الزهاب ؟
واذا راتبه اقل من 20 على ما اعتقد يقدم صندوق الزواج بيعطونه
حتى السكن صار اسهل في التقديم
نيي للعرس هالأيام الاعراس صارت ارخص والناس واعيين حتى البنت احيانا تكون تشتغل يعني بتساعد اذا هي تبي شي زيادة وبتتفاهم مع ريلها على التجهيزات مادام اتخذوا قرار الزواج ويحسون انهم قد المسؤولية خلهم يتحملون
وعن الخطبة معروف عند العرب انه تجهيزه على اهل العروس واما عن الملجه والعرس هذي السوالف بين رياييل يحددون اذا الملجه بحفله او بس عقد والعرس اللي تبي ريلها يدين او تسوي شو خلها تتحمل
فالحمدالله نحن ما عندنا هالسوالف اكثر الزواجات في العيلة أهلية والكل يعاون ومن الصوبين يساهمون اهل العروس وأهل المعرس

[angel.heart]

المظاهر والتباهي بالعرس والزهبة كلها عشان الناس تقول وتمدح

لكن منو اللي يتبهدل الزوجين

ضد هالظاهرة واتمنى كل عروس تقنع اهلها بان هذي حياتها وهي تحدد المهر والتكاليف

[جنان الفجيره]

و الله صح مظاهر جدام الناس وكسر ظهور

[احلى بعفويتي]

انا اقتصد في عرسي كل حد كلاني


الناس لهم الظاهر
و الاهل ما يتساهلون في هالامور

[مناية النعيمي]

واغلبي حالات العرس الي مبالغ فيها تكون نهايتها طلاق ومشاكل لانه ماشي بركه لا بالعرس ولا بالاسراف لي صار فيه