الزوجة 2

[مالتيزرس]

مادري شقول لج يا اختي هالموضوع حساس ، نحن البنات و النساء عامة ما نقبل بالتعدد رغم ان نحن ندري بأن التعدد حلال حلال شئنا أم أبينا ... و قبل لا نعطيج حلول لازم نحط الزوجة الاولى في حسابنا و نحطها في الصورة و نخلي نفسنا مكانها و ما نكون انانيات في هالمسألة ...

و دامج مقتنعه بالزواج من واحد متزوج و على كلامج زوجته الاولى ما تنجب عسى ربي يشافيها و ييسر امرها فأول شيء و قبل كل شيء عليج بالاستخارة و تفويض الأمر لله تعالى و الي ربنا كاتبه بيصير لا تسوين الشيء غصب و تعورين اعصابج و تتعبين قلبج و الي ييه من الله حياه الله ، و عليج بتفويض الامر لله .

و ثانيا حطي للريال شروط معينة و لا تتنازلين عن شيء حتى لو كنتي مطلقة تراج بنت ناس في النهاية و ( أحيانا ) التنازل يخلي الرجل يسترخص من قيمة البنت للأسف الشديد و خصوصا انج منفصلة و انا اقصد شروط معقولة و مب شروط تعجيزية ...


اول شرط ان زوجته الاولى تعرف بموضوع زواجكم و تحطونها في الصورة و ابدا لا تتزوجين من وراها و شوفي ردة الافعال شو بتكون عقب ما يوصل لها الخبر و انتظري شوي و صبري دامج على البر و عشان ما تنصدمين عقب شهر من الزواج يي و يطلقج و يقول لج زوجتي الاولى زعلانة و صار لها شهر ما تكلمني !!! و هالغلطة وايد بنات يطيحون فيها انها تتزوج واحد متزوج من ورى علم الزوجة الاولى لكن الموضوع في النهاية ينقلب على راسها و الزوج يختار الاولى عليها ، و هالشيء مطلوب شرعا و هو علم الزوجة الاولى بموضوع زواج زوجها ، و الرسول و الصحابة كانوا يشهرون امام زوجاتهم بانهم راح يتزوجون ... هاي اهم شرط تجنبا للمشاكل و الخوف ...

و ثاني شرط لا تتنازلين عن حقوقج كأنسانة مقبلة على زواج ، حتى لو كنتي مطلقة ، لج حق المهر و حق السكن المستقل و حق النفقة ، و سوي عرس حتى لو عرس بسيط لأن هالافعال تعزز قيمتج و مكانتج عند الزوج و ينظر لج حالج حال زوجته الاولى ما في فرق بينكم عكس لو تنازلتي ... لان الرجال غالبا للاسف يسوون مقارنة بين الاولى و الثانية ...

و الامر الثالث و الاخير لازم تتذكرين ان هو ريال متزوج و عنده وحده غيرج و لازم يكون عادل بينكم انتوا الثنتين ، و لازم تسوين لوجودها حساب و لازم تسوين للغيرة حساب و حتى لو ما كانت تنجب تراها في النهاية بنت ناس و حملها مب بيدها و حطي نفسج ماكنها و اتقي الله فيها ... حتى لو الله رزقج انتي عيال ترى محد فيكم افضل من الثاني .


كل هالأمور لازم تحطينها في بالج أختي العزيزة قبل لا تخطين هالخطوة ،،، لأن هاي مسألة زواج ( من رجل متزوج ) ، و مب مسألة زواج عشان الناس ما يتكلمون عنج و يسكتون ... أحيانا الجلوس في بيت ولي الأمر أفضل من الزواج فأنتي أدرى بظروفج و وضعج و أنتي أدرى اذا كان هالزواج يناسبج او لا ، و اتخذي قرارج و انتي واثقة و متاكدة عشان ما تندمين ...


موفقة

الأخت كفت ووفت وردها عين العقل ..
مثل ناقالت اتقي الله فزوجته الاولى لانه جد بتكون صدمة عليها الله يكون فعونها ..
ولازم تسمعين موافقتها بنفسج لاتنجلب لج المسالة باجر وتتلعوزين..انتي بنت ناس لاترضين لنفسج تعيشي معاه بالخش والدس وانتي ماخذج بالحلال ..ابد لاترخصي فعمرج ..
وشوفي نفسج اذا تتحملين الغيرة أو لا