بتخبل لحقوا علي

[MisS.Katkota]

السلام عليكم ورحمة الله وبركاته

اولا استغفر الله العظيم من كل ذنب عظيم

انا تعبااانة افف مب رايمه احس اني بموووت !!! انتوا تعرفون موضوعي اللي اكتشفت فيه ان ريلي يكلم بنات على الوتسب !! من بعد هالموضوع انزرع الشك في قلبي وانغرس مب طايع يطلع واجهته ذاك اليوم انكر وتم يحلفلي انه يكلم قروب الدوام مع اني بعدها فتشت تلفونه واكتشفت انه يكلم بنات !!

طنشت الموضوع بس امووووت قهر لما اكون بالدوام واشوفه اونلاين من اول ما ينش ويروح الدوام لين ما يرد !!! وانا دوامي طويل فاتم يالسه على اعصابي والله !! لدرجه اني قمت اروح الدوام واهد الشغل واجابل اكلمه وادلعه واقووله كلااام حلوو .. بس اشووفه انه هو يتاخر على الرد !!! ويوم اليمعه على اساس هو داوم قلت اليوم ما بكلمه بشوف هل بيسال عني ولا لا ؟ والله تميت طول الوقت اشوف التلفون هو اونلاين ولا حتى قالي تريقتي نشيتي ؟! شو تسوين !!

مع انه هو قبل واااااااااااااااايد يسال عني من اروح الدوام يتصل فيني طمنيني عليج وصلتي كليتي تريقتي؟ ونفس الشي لما اكون مآجزة..الحين طااااف !!! انا اللي اسال عليه لاني قمت اشووفه اونلاين ولا يعبر !!! اشوف التغير الوااااااضح والله وقسم بالله فيني صيحه وايد ايلس مع نفسي اقول انا اعرف عمري مب مقصره ابد معاه ليش جي يسووي فيني !

لا تقولين واجهي والله ينكر تعبت من المواجهه وتميت انغز له لين ما لاعت جبدي وهو يسووي عمره شريف مكه او يقولي ان طبع الرياييل يحب يشوف ويطالع ويتكلم !!!

والله نفسيتي تعبت وايد لا لي نفس ولا مزاج اجابل الشغل ولا اجابل نفسي بس ايلس افكر فيه وفي تصرفاته ..قام وايد يحب الكشخة مع انه قبل كندورة ما يحب يفصل والحينه مفصل كنادير انواع واشكال وغتر يديده واخس شي لما ييني ويقولي تعالي بخري كندورتي بنطلع !! نعمم !!! ولا نحن وين سايرين ان شاء الله تخيلوا بس نسير مول يبغي يتبخر !! ويوم اكون في محل عادي ما يتم معاي .. يطلع برع يترياني وييلس يطالع بنات اشكره مبين !!

واخر شي في البيت يسووي عمره احسن منه ما شي وشريف مكة من يشوفني دشيت الحمام او شوي رحت حجرة ثانيه على طول يبطل وتسب ويرد عليهم !! اونه يحبني ويهتم فيني ويوم اصرخ او اواجههه يسووي عمره البريء واني ظلمته !!


والله تعبت ما حبيت اكتب الموضوع الا لما الحينه وانا قبل ما اسير الدوام شفته نايم وطلعت اول ما وصلت الدوام بطلت الوتسب ولا اشوف الحبيب اونلاين مستغل اني مب في البيت ويكلم البنات !! والله طفح الكيل ما قمت احبه مثل قبل ..تعبني بتصرفاته

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

[Cobon]

اول شي اتمنى انج تتغيرين
انتي موظفة و الحمد الله الله رازقج بوظيفة و راتب
دلعي و دللي عمرج ع الاخر
تغيري خلج وحدة ثانية ما يعرفها ريلج
خليه هو يلحق وراج مب انتي 24 ساعه لاحقة وراه
اسالي عنه و طرشي له مساج صباح و مساء و غرقيه حب و حنان بس يوم الشي يزيد عن حده الريال يتملل

الريايييل بطبعهم كائنات ما تعرفين لها لا الدلع يفيد ولا الشدة تفيد
لازم الحرمة تغير بين الفترة و الثانية عسب تحافظ ع بيتها

صح هو غلطان من ساسه ل راسه بس شو بتسوين


عقب الحل النهائي عطيه كاش قولي لو حسيت او سمعت او شفت او قريت انك تغازل
انت ف صوب وانا ف صوب
جملة بسيطة و تهديد بسيط بدون صراخ و صياح و تكونين شديدة بيخليه يتصرقع << مرات ما ينفع ويى بعض الرياييل غير جي

[Ward-uae]

اللي يسويه من الفضاوة وانتي شكله دوامج طويل اذا قدرتي تغيريه وتحصلين دوام اخف لو براتب اقل بترتاحين
اخذي اجازة وسافروا مكان او تقربي منه

[مالتيزرس]

حبيبتي تمي دوم ادعي عسى يهديه ويصرفه عن البنات ..وعليج بالقيام وقولي اللهم اجعلني قرة عين لزوجي واجعله قرة عين لي وسخره لي وحنن قلبه علي ودوم استودعيه الله جميع جوارحة كل مايطلع الدوام طرشي له هالدعاء استودعتك الله الغالي ..وتصدقي وايد ترا الصدقة لها اثر وكل ماييج الوسواس خل لسانج بالاستغفار ..ولوتقدرين احجزي له ع الويكند تذكرتين ع العمرة عسى الله يهديه
عسى الله يهديه ويرده لج ردا جميلا وثقي بربج وتوكلي عليه ولاتاكلي فعمرج ترا الصحة غالية

[nooraaaa]

دوامج هو السبب و هو اللي امبعد امبينكم

[Crystal_Rose]

انتي تقولين انج مب مقصره و انه هو عينه زايغه اوك ليش عينه زاغت لبنات غير ؟ ليش يحب يسولف مع بنات غير ؟ شو المواضيع اللي يحبها ريلج حاولي تعرفيها قبل ما تكونين زوجه خلج صديقته اخته امه كل شي الريال مب بس يحب البيت نظيف و لا الاكل من ايدج و لا الكشخه يحب وايد اشياء و صعب نفهمها صح بس نحاول و نحاول


انا كنت قبل كله اشك بريلي و ضرابه ع طول مع انه ما عندي دليل انه يكلم و لا انه يغازل بدل ما افتش وراه قمت اتغيرت كليا استويت له صديقه و اخت و ام قبل ما اكون زوجه و ام عياله و الحمدالله وايد اقتربنا من بعض اعرف ريلي رياضي بستوي له محلله رياضيه برايه بتابع و بشوف ريلي سياسي بستوي سياسيه ريلج يكشخ عادي شجعيه و خليه يكشخ و اكشخي معاه ريلج يحب الواتس اب و 24 ساعه عليه سوي نفسه و لا تنسين الدعاء و الصلاه هي اللي تقرب النفوس لبعضها .

[رومنسية 84]

انتي تقولين انج مب مقصره و انه هو عينه زايغه اوك ليش عينه زاغت لبنات غير ؟ ليش يحب يسولف مع بنات غير ؟ شو المواضيع اللي يحبها ريلج حاولي تعرفيها قبل ما تكونين زوجه خلج صديقته اخته امه كل شي الريال مب بس يحب البيت نظيف و لا الاكل من ايدج و لا الكشخه يحب وايد اشياء و صعب نفهمها صح بس نحاول و نحاول


انا كنت قبل كله اشك بريلي و ضرابه ع طول مع انه ما عندي دليل انه يكلم و لا انه يغازل بدل ما افتش وراه قمت اتغيرت كليا استويت له صديقه و اخت و ام قبل ما اكون زوجه و ام عياله و الحمدالله وايد اقتربنا من بعض اعرف ريلي رياضي بستوي له محلله رياضيه برايه بتابع و بشوف ريلي سياسي بستوي سياسيه ريلج يكشخ عادي شجعيه و خليه يكشخ و اكشخي معاه ريلج يحب الواتس اب و 24 ساعه عليه سوي نفسه و لا تنسين الدعاء و الصلاه هي اللي تقرب النفوس لبعضها .

نفس كلام الأخت و اهم شيء حصني ريلج يوميا من النظر الى الحرام او قول الحرام او تخيل الحرام و الدعاء و الاستغفار و الصلاة على محمد ككثر ما تقدرين

[khaleejiya]

اللي تقولون دوامها هو السبب
انا باعتقادي كثرة التلزق بالريل هي اللي تخليه يطفش
لا تبينين له انه هو بس الشغل الشاغل بحياتج انتيعندج امور ثانيه مهمه غيره
بس بنفس الوقت مب تطنشينه تطنيش كاامل
ويوم هو يتكشخ انتي بعد تكشخي ترا مب احسن عنج
والشوبينق افضل تسوينه بروحج مب وياه لان الرياييل طبعهم جي مايحبون يطولون فالسوق
اذا بتطلعين وياه روحوا كوفي شوب او مطعم او سينما
واعتقد ريلج مايحب الروتين اكسري الروتين رتبي لكم سفره او احجزي فندق في اماره ثانيه و راويه الرومانسيه على اصولها دامه يحب هالسوالف

[احلى بعفويتي]

ما يخصه الدوام

انا اعرف وحده فالبيت وريلها داير مغازل مايخصه

حبيبتي مررررررررررررررررررررض عافانا الله و الي تقول انتي السبب بيمر يوم عليج وبتعرفين ان الحرمه دووم مظلومه ترى في الزواج
عليها كل شي والريل ماعليه شي غير يروح الدوام ويب فلوس و عقب كل هالشقا بعد موب عايبتنه حرمته
هايله يبالهم نار تحرقهم وتفكنا منهم بس
ولا عنده حرمه و هو مختارنها وبعد يروح يدور الحريم مالت عليه

[ريم العسووله]

لا حول و لا قوة الا بالله


قريت موضوعج الأول و ظنيت أن الي يسويه ريلج طيش حاله حال وايد رياييل متزوجين
و كتبت لج أن الموضوع صار موضه أن المتزوج يكون في موبايله ( صديقات للتسلية)

و لكن عقب ما قريت موضوعج هذا و قريت آخر التطورات
أحس أن الموضوع أصعب من جذي

من وجهه نظري انا شخصيا
الريال ما يتغير على زوجته و حبيبته بسهولة حتى لو كان يكلم 100 بنت للتسلية و السوالف
و لكن اذا الريال تغير تغيير مفاجئ و كبير ناحية زوجته (( خصوصا اذا كانت زوجته مب مقصره معاه)) ، أتوقع و الله أعلم أن هناك أحتمال كبير بوجود أمرأة واحدة من بين البنات الي يكلمهم دخلت حياته و أثرت في كيانه و أثرت في الزوج تأثير كبير و لها مكانه مميزه في قلب الزوج ...

في هالحالة اذا الزوجة أكتشفت أن هناك أمرأة أثرت في عقل و تفكير زوجها و كيانه و ان هالمرأة صارت أكثر من مجرد ( تسلية و سوالف) للزوج ...
أول خطوة لحل هذه المشكلة أن الزوجة تاخذ الموضوع بهدوء و تروي ،،، ندري أن الموضوع صعب على الزوجة المسكينة و ان الزوجة في هاللحظة تحس بغيرة و قهر و ألم لكن لازم تكون هادية لأن الزوج في هالمرحلة قاعد يسوي مقارنه في عقله بين المرأة ( الدخيلة ) و بين زوجته ...
فمب من صالح الزوجة انها تقعد تصارخ و تتضارب و تشك و تفتش جدامه بكل عصبية و غضب لأن بهالطريقة راح ينفر الزوج أكثر منها و راح يجوفها على شكل انسانه مزعجه و على هيئه شيطان و راح يشوف ( الدخيلة) على هيئه ملاك هادئ ... فلازم الزوجة تمسك اعصابها و تكون عاقلة و هادية عشان تقدر تحط حل للمشكلة ، لأن الوحدة يوم تكون معصبة ما تقدر تحط حل لأي مشكلة فلابد من الصبر و الهدوء و ضبط الاعصاب و النفس .

الخطوة الثانية هو ان الزوجة تنافس المرأة ( الدخيلة) و تحاول تعرف شو الاسباب او شو المميزات الي موجودة في هالمرأة ( الدخيلة) و الي غيرت زوجها عليها، و و تنافسها أشد منافسه و تحاول تنتصر و تثار لكرامتها و عزتها و طبعا هالشيء يعتمد على ذكاء الزوجة ...و طبعا المنافسة مب معناته ان الزوجة تهتم في زوجها أكثر و تتلصق فيه و تلوع جبده لأن ساعات سبب نفور الزوج هو اهتمام الزوجة المبالغ فيه ... و خنق الزوج بالاهتمام ...

و طبعا هالحلول انا اعطيها حق الي بالها طويل و حابة تسترجع زوجها ، و طبعا الزوجات يختلفون عن بعضهم البعض في هالشيء انا عن نفسي اذا تعرضت لهالموقف بعيد الشر بطلب الطلاق فورا و بدون ندم ، انا من النوع الي ما أعطي فرص في هالمسائل كل شيء و لا عزة النفس ...


الله يوفقج و يسخر لج زوجج و يجبر بخاطرج الحل بيدج أختي الغالية

[خياطة]

الغالية اخبارج و علومج و كيف صحتج حبيبتي .
أول شي ريلج اون لاين مب معناه انه يالس يكلم بنات حلو الكلام

حسب كلامج شيكتي فونه و عرفتي انه على علاقة ببنات و اكيد هالشي غلط ، و انا معاج قلبا و قالبا ،
لكن تتوقعين انه ماراح يكلم بنات حتى لو هو كان ريال ملتزم و زين و عقولتج شريف مكة ،
يا عمري هذا بني آدم الغلط عنده شي طبيعي مثل ما احنا الحريم نسنسهل انه نحف حواجبنا ونسوي بلاوي كثيرة تغضب ربنا و العياذ بالله .
لكن أسمعي كلامي قاعد يكلم بنات و انتي تحرقين دمج و ما تبينه يكلم حد صدقيني بتتعبين ولاراح توصلين لحل .
إذا ريلج يبا يدخن و يقولج تعالي بخري كندورتي ، يا ذكية إنتي بخري كندورته و حتى بدون ما يقول حتى لو ساير ان شاء الله للدكان مب بس المول
ليش الدخون هو اللي بيجذب البنات صوبه ؟ حبيبتي كبري مخج دخني كندورته وقولي له الله ماشاء الله ريحتك غاوية و كل المصلين بيشمونها
عزيزتي اهتمي بريلج و دلعيه و حتى لو انتي من داخلج تعرفين انه هالشي ممكن يخلي البنات ينغرمون فيه ، حسسيه أنج حرمة سنعة وماهمج البنات كثر ما همج هو يكون مظهره لائق .
وعاد لا تكثرين الاتصالات عليه و تسوين عمرج تبين تشغلينه عن يكلم حد فالواتس اب ، لا يا عمري عادي يظهر له تلفون ثاني ويسوي اللي براسه .
إذا ريلج يصلي صلواته الخمس في المسيد و يصوم و ما يسكر ولا يضربج و يهتم في بيته و يصرف ومش بخيل ، هذا يكفي نوعا ما حاليا أقولها مرة ثانية حاليا .
ريلج ربما يمر بعتبات متفاوتة في حياته و غالبا ما تصادف الفترة هذهه فترة ما بعد الزواج خاصة لو ماعندج عيال ،
لو كنتي حامل راح يبدأ يحس بشعور الأبوة و انه ريال شهم و من هالشعور الجميل
عقب ما الحرمة تجيب اول بيبي بيسوي عمره مشغول مع البيبي وانه زادت عليه المسؤوليات و تجي ، عقب ثاني حمل لج أو ثاني بيبي
توقعي أنه ممكن يرجع للخيانات ، لكن الحرمة الذكية هي اللي تحاول تخلق جو من المنافسة مع نفسها وفي بيتها بحيث أنه الريال ما يمل
بالرغم أنه هي مالها ذنب ، ليش تكون أم و زوجة و دكتورة نفسية و إجتماعية و كله عليها ومدرسة و طبيبة ،
يا عمري هدي وراقبي من بعيد بدون ضغط راح تضغطين عليه يصير يطلع جدامج وماراح تتكلمين وان تكلمتي ردو عليج و قالو ريال ،
وإن اشتكيتي قالو مش مقصر عليج و مالج حق تشتكين ، هدي هدي حبيبتي وأكسبيه بالطيب و اللين ، و خلي طلعاتج اكثر انتي وياه و عطيه مساحة للحرية بحدود

[ورقة ناعمة]

استغرب من بعض الردود يعني اللي لازقة بريلها اربع وعشرين ساعه ,,,,, خلاص هالضغط مايولد انفجار

يعني بتعوضه عن باقي الحريم ,,, وكل المغازلجية حريمهم يشتغلون ,,,

في حريم مصليات صايمات ومن اجمل مايكون من اخلاق وجمال بس رياييلهم راضعين الخيانة من صغرهم متعودين عالحريم ,,,

وما يعيش من غير مايكون خروووووووووووووووف لحد ............

[الوردة الجورية]

وعليكم السلام

عادي بخريه بالعود وطيبين بدهن العود والمسك مع بوسة وكلام حلو

الواتساب ممكن فاتحنه بس مب معناته يغازل حد او قاعد يكتب

لا تصارخين عليه عشان مايشوف داخل البيت صريخ و نكد وبرع البيت ابتسامات وضحكات و سوالف حلوة

صح انج مب مقصرة، لكن القصور مب بس في الشكل واللبس والفراش! اكسبي زوجج بعد بالمعاملة والكلام الطيب..

حاولي يكون دوامج اقصر يعني تطلعين بعد زوجج و ترجعين قبله

اغلب الرياييل ما يتقبلون ان هو قاعد في البيت و حرمته برع البيت


الله يهدّي سريرتج ويصلح بينج و بين زوجج و يزيد المودة والرحمة والحب بينكم

[البطبط]

فيه ريايل شو ما سويتي ما يعيبهم وما يملا عينهم الا التراب وهذا طبع وصعب يغيره بسهوله

[(خيماويه)]

غطي عنه خلج غامظه هو بيبدا يدورج الريال مايحب اللي تلاحقه والدوام ماله شغل عيل جان كل الموظفات رياييلهن بيلعبون ترا حتى الريال موظف من سوولنا هالبرامج ماشفنا خير من وراها والبيوت تدمرت