فضفضة ادعولي

[khaleejiya]

الفراغ هو اللي مأزم حياتج
اشغلي نفسج بأي نشاط او ادرسي او اشتغلي

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[احلى بعفويتي]

الحريم دوووم تصيبهم نوبات اكتئاب اكثر عن الريال

مع الريال ضغوطات الدوام و المصاريف البيت وحاله بس الاكتئاب عنده اقل ليش لان اولا يرفه عن نفسه وما يحمل عمره اكثر عن طاقته

حبيبتي ماذكرتي ظروفج من اي ناحيه تعبانه ويا الصغار
هل ما عندج حد يوصلج ويوديج وتتلتهين يوم تبين شي
و الا انتي داومين ودوامج طويل و تحاتين اليهال
و عيالج بسم الله مرضى و لا شو بينيلنا عشان نساعدج اكثر

حبيبتي نص البنات نفس ظروفج الي مجابله عيالها وريلها موب موجود و اهلها طافرانين منها ومن عيالها
يعني جوفي كل الامهات عليهم مجابل الصغاريه نحنان جابلهم اكثر عن الابو طبيعي

بس لازم الابو يشارك وياج
بعني يوم السبت الصبح يطلعكم طلعه عائليه قوليله انت ابو حس بعيالك والله ما تهدينه لو تسوين اضراب ترى الرياييل لو انهدوا ما ترومين تزخينهم ابدا ..

وغير جي روحي عن نفسج .. روحي حديقة الفريج جوفي الخضار و سويلج دله الجاي الاخضر و لفواكهه و قضي ساعتين و الله ان بترتاحين ..

ممكن تسجلين بنادي جريب عليج مرتين بالاسبوع اذا عندج وااايد ضغوطات و الله بتحسين انج مرتاحه ..

واايد اشيا تونس .. افتري بالسياره بين الفرجان واطلبي كرك هههههههه عادي المهم خارج الروتين

لا تمين تضايقين روحج ع هالريل ترى اغلب الرياييل انانيين

[yummy mommy]

توني تذكرت اني كتبت هالموضوع من اخر رد رديته هني ما دشيت .. مشكورين خواتي والله نصايحكم بلسم على النفس .. الحمدلله اولا واخيرا ..

انا مب معلقة سعادتي بزوجي بس الايد الوحدة ماتصفق ..

الحمدلله على وجودكم يا بنات فهالمنتدى ﻷنكم صج تخففون عني الله يحفظكم لعين ترجيكم ..

مشكورين . .

وعشان ما اتعب العضوات يرجى اغلاق الموضوع ♡

[ماسه حساسه]

لا تقطعين علاقاتج مع الناس واهلج
يعني خلج على تواصل مع المل واهتمي بشئون بيتج مملكتج
طلعي لج افكار وتابعي الدنيا بعد ترا مب زين جي تعيشين

[الوردة الجورية]

وعليكم السلام والرحمة

الله يشرح صدرج ويفرّج كربتج ويصلح كل أمورج

عليج باللجوء إلى رب العباد

[بنت الشوامخ]

وعليكم السلام ورحمة الله وبركاته

حبيبتي الله يعينج
انا نفس حالتج تقريباً ويا ريلي

بس الفرق ان الحمدلله اهلي بنفس الاماره ف اكون عندهم طول ماهو مب موجود
مع هذا احس بملل وفراغ فظيع
وانتي الفرق بعد الحمدلله عندج عيالج الله يحفظهم يملون عليج حياتج و وقتج واكيد لو يلستي وياهم ولعبتي ودرستيهم وجي الوقت بسرعه يمر وياهم

لو تسوقين سياره اطلعي وياهم اتونسي غيري جو
لا اتمين طول الوقت في البيت وتخلين كل وقتج شغل وضغط
سوي اي شي تحبينه يشغل وقتج


بخصوص ريلي نفس ريلج لما يرجع بالويك اند
يطلعني مال ساعه او ساعتين بالكثير
وعقب يبا شوي يشوف ربعه ويجابل شغله ويشوف اهله

ماعليه لازم نتحمل ونقدر ظروف رياييلنا خصوصا بفترة الدوره
ونخفف عنهم المسئوليه هالفتره لانه صدق جنه سجن محبوسين ويبوون يتنفسون ويستغلون كل دقيقه


ولا تنسين هالوضع مؤقت بإذن الله

بس بما انه عندكم عيال عسى الله يخليهم خبريه انه الياهال مايشبعون منه ولازم يخصص لهم طلعه بعد او المهم يخصص وقت اكثر لكم


كل ماحسيتي بالوحده و الوحشه ف الله سبحانه هو افضل ونيس لج في هذه الاوقات
تمي استغفري و اذكري الله وصلي لج ركعتين و اقري قرآن

وكلمي اهلج خل يمروون عليج ولا ربيعاتج
المهم صدق تحتاجين تشوفين حد خلال غياب زوجج من الاهل او الربيعات
التواصل الاجتماعي مهم خاصه لو انتي انسانه اجتماعيه

[بنت الشوامخ]

طرشي حق المشرفات لانه مابيشوفون طلبج لو بغيتي يغلقون الموضوع
واذا حابه خليه مفتوح لانه بالعكس مافيها تعب يمكن تحصلين اقتراح ولا فكره تفيدج ^^

[دلع العاصمه]

اتوقع الفراغ هو السبب حاولي تلهين عمرج بشي