ريلي قالي خلج عند اهلج ...!

[بســـــكوته]

السلام عليكم جميعا
انا مب راعية النك انا ربيعتها وهي شارت علي اكتب مشكلتي هني

اتمنى القى عندكن الجواب الشافي الكافي

بنات انا متزوجه من 4 سنوات تقريبا

للحين ماخلفت ولله الحمد

انا وريلي كنا مرتاحين مع بعض تقريبا والدنيا لاتصفوا بس نمشي



نحن يعني اهلي واااايد طيبين ومسالمين وملتزمين
وانا طبعا نفسهم اهلي ويمكن اطيييب

ريلي انسان بحكم تربيته وشغله انسان قوي وشديد وقاسي

يعني سالفة رومنسيه واحظان وتدليع ماعنده الا نااادر جدا

بقولكن شو صار اول مره
صار بينا سو تفاهم كبير وتمينا نزاعق لين ماعطاني طلقه هني انا انصدمت وانهرت كثيير
تميت ابكي واترجاه ارجوك الا الطلاق الا الطلاق بس هو حقرني ولاعبرني
وطردني من البيت
رحت عند اهلي وتميت مقهووره واصيح وكل يوم اطرش له ارجوك سامحني وووو
ذليت نفسي عنده لابعد حد
تم ساكت مني
وبعد عشره ايام
طرش لي امية شرط لو ابا ارد له
قلت له تمام حاظر على امرك لاني كنت اشوف الغلط كله مني وهو بطريقته الخبيثه خلاني احس ان الغلط راكبني من راسي لريولي

المهم رديت له ف البدايه كان واايد صعب تواصلنا وكان الكسر والحاجز كبير واايد بينا
مع الايام رد كل شي اوكي الحمدلله بس لاحظت عليه انه وايد مستهين فيني
وكل مايصير شي تافه يقولي روحي عند اهلج على اتفه سبب

بعد فتره زخيته يكلم وحده
انهرت بكيت زاعقت صارخت
ورحت لاهلي وحقرررني ولااهتم ابد لين ماانقلب الموظوع علي ورديت انا اترجاه انه يردني ورجعت خليت اخوي يردني وانا داخلي متاكده انه الغلط منه بس كله هاذا خوف من اني افقده او يروح لغيري ماكلمت عنده اسبوع الا الريال ع الدخله والطلعه مبوز وكل ماقلت كلمه قال مو عاجبج روحي لاهلج ومن ها الكلام واناا سكته منه

ااخر شي صار انه كان برع البيت وكنت اترياه كاشخه ولابسه ومجهزه العشاء
تاخر
اتصلت له مارد
تميت اتصل يبند فويهي
ااخر شي رد وقالي شو تبين مب ناقصج
وبند فويهي

رد البيت كلمته عادي سالته شو فيك قال مب طايقج ولا ابا اكلمج
رحت من عنده و تميت اصيح وابكي وقعدت اصلي وادعي
قبل لايرقد ييت له وبست راسه وقلت له سامحني لان تصرفاته يوم يعاملني جي يخليني اشك انه الغلط مني واني كنت مقصره معاه وانه ها الامور تجمعت عليه وصار يكرهني ومن ها الوساوس

المهم ماعبرني ورقد
ييت انا رقدت عداله وزخيت ايده وبستها

س ثلاث ف الليل نقزت وياني خووف شديد لصقت فيه وحاولت احظنه عشان يروح الخوف
قام لف وعطاني ظهره
تضايقت وكتمت فصدري
سار دخل الحمام وبند الباب قمت زعقت بصوت عالي تعاال انا خاايفه تعال
طلع من الحمام وعصب علي ليش جي شو فيج
قلت له انا خايفه
قال زين خوزي بعيد
قلت له شو فيك انا خايفه اباك تحظني ليش جي تعاملني
قام عطاني صوتين ك العاده وشل عمره وطلع الصاله
قمت لحقته وقلت له حرام عليك اقولك انا خايفه تشرد وتخليني وقمت اصرخ واقوله شوفيك خبرني شو فيك
قاام وتم يصرخ ومد ايده علي ودزني وقالي انتي شو من انسانه روحي من قدامي وكان الشرار طالع من عيونه
خفت يطلق مره ثانيه وشردت من عنده وانا اصيح
وهو شل عمره وطلع من البيت

الصبح طرشت له مسج
انا عاذرتك وعارفه انه كل اللي تسويه مو بااختيارك في شي ماثر عليك

رديت طرشت له ترى الظربه ماعورتني باالعكس هدتني والم الظرب مابيكون اقسى من الم المعامله
وانا مسامحتك ومن ها الكلام ومارد لا ع المسج ولا رد البيت

طرشت له اني بروح عند اهلي يوم واحد واني ابا مصروف رد علي اوكي روحي وحط لي فحسابي مصروف

المهم قعدت يومين عند اهلي مااتصل ولا سال
ثالث يوم اتصلت له مارد طرشت له وينك بتمرني
رد علي خلج عند اهلج لين مااشوف شو بسوي
انا خلاص ماابا اعيش في هم ومشاكل
حسيت كلامه غبي
طرشت له اوكي براحتك
تفاهم مع ابوي
وانا اقرب فرصه بيي الم اغراضي

اليوم الثاني طرشت له اني احبه وانه سعادته تهمني بس ماابا افرض نفسي عليه ولو هو مايباني خلاص براحته
واليوم اللي عقبه طرشت له دعاء
طبعا هو سااااااكت
والحين صار لي اسبوع تقريبا ساكته وهو ساكت

ادري كلكم بتقولون اني وايد عاقه عمري عليه وانا عارفه ها الشي بس مب ايدي احس مجرد افكر انه ممكن يخليني ويبعد عني يسبب لي خوف واايد

بس عقب ها الموقف احس اني واااايد انكسرت وانجرحت وخلاص ماابا انهان ولا انذل اكثر

صح بكل شوق وصبر اتريى يرد لي
بس ماابا انذل خلاص
ابا ع الاقل في ها الموقف بس ابين له اني قويت
ابا اخليه لصالحي بحيث اللي صار مايتكرر

اول شي ابا منكن الدعاء
ثاني شي
انا ابا اعرف كيف اتصرف الحين
اتم ساكته
وكم اتم ساكته
وهل ادخل حد بينا

ولو افترظنا انه قال بيردني كيل اتصرف
وشو اقول له
ابا ائدبه يابنات صح احبه واموت فيه بس خلاص مليت ذل واهانه ابا ها الموقف يكون لصالحي من كل النواحي

انا تميت افكر وايد بيني وبين نفسي
وقلت مابرد له الا بشروط وتدخل ريياييل
شو رايكن ..
والله عزت علي نفسي
وااااايد عزززت علي ������

يارب القى عندكن الحل والجواب الشافي
والف شكر للكل ..

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ام يوسف ويس]

ايوه يا حبيبتي لازم تدخلي ابوكي ابوكي يتصل عليه يقله اريدك بموضوع مهم ويكون اللقاء خارج البيت يعن ماتحضري ويحط وياه النقط عالحروف
مافي حل تاني الله يصلحلك الحال

[zozo zooz]

اهم اشي تخبري اهلك ابوكي وهوه بيجيبو عندكم علبيت وبيفهمو انك مش رخيصه
وانو لازم يعرف كيف يعاملك وانت انتي مش لعبه عندو ولازم يحترمك
وازا ما تأثر بكلام ابوكي لازم يوصل الموضوع لأهلو
لانو لو ما دخلتي اهلك بالموضوع رح يضل يزل فيكي ويضربك وما يحترمك
لازم يعرف انو وراكي اهل يحموكي
وحطولو شروط قبل مترجعيلو هيك بيصير يحسبلك حساب وبخاف يزعلك انشالله

[لحنْ #]

لازم تدخلين اهلج ، ابوج تحديدا واخوانج لو عندج
كفايه ذليتي نفسج وايييد ترا
وترا الريال يوم يشوف الحرمه ضعيفه يدوس عليها وايد ويحتقرها
ويوم تكون قويه وفيه او بدونه بتعيش يركض وراها ركض
لا تيبين سيره الطلاق لكن ادبيه ، كلمي ابوج يتفاهم وياه ويقوله لا تفكر تمد ايدج بعد جي
ويوم تردي ان شاءالله خلي بوزج شبرين وخليج وايييد بارده وياه وعاديه
سوي واجباتج فقط ، غير جي تمي ساكته وعاديه ولا تسالين عليه ولا تتصلين ولا تطرشين مسج ولا اي شي
وربي يحفظ لج بيتج وريلج ويردكم لبعض ويحنن قلبه عليج ..

[سبانش آيز]

الله يعينج بصراحه..انا لو كنت مكانج بغير من اسلوبي ومثل ماقالن الاخوات بخلي الاهل يدخلون ويشدون عليه شوي وبحمد ربي اني مايبت عيال منه يوم انه عالدقه يهددني وكله مشاكل واسلوبه جي.
وان شاءالله انه الله يوفقج

[A+k]

اول شي ربي ايسر امرج وتنالين مرادج

ثاني شي واضح انه في حد ف حياته وهو الي خلاه يعاملج جي وانه هالشخص يعرف تفاصيل حياتكم الزوجيه كلها .. انا اقول دخلي اهلج في الموضوع ولاتسكتين نصيحه مني لج لان لو رجعتي له بيعقد ع كل دقه يهددج بالطلاق ..

[خياطة]

حسب خبرتي في الحياة و مع زوجي طبعا و عشرة 12 سنة !
ريلج يحبج و ما يبا يضيعج مثل ما غنتي تبين تحافظين عليه .
المشكلة من وجهة نظري :
إهتمامج الزايد على اللزوم و اللي وصل لدرجة انه الريال يضيج منج هو المشكلة في حد داتها .
لو انا زعلانة و بشوف ريلي إهتم فيني ويلاحقني من مكان لمكان هيبته و مكانته عندي راح تهتز .
الريال و الحرمة نفس الشي في الإحساس و المشاعر مافيها أنا حرمة عادي اعق عمري و هو ريال عيب ومنقود .
أعتقد أنج كثرتي من التوسل والإعتذار لدرجة انه صار يعتبر أي تصرف منه راح يلقى صدى كبير عندج وصار يختبر مدى قوة صبج و تحملج
إنتي راح توصلين لمرحلة فالنهاية و آسفة على الكلمة ( إنتي وأباجورة البيت واحد ) .

الحل من وجهة نظري :
عزيزتي إلزمي الصمت هذه الفترة لا تخافين من الطلاق ، وتاكدي تماما انه لو ربج كاتب شي لج فهذا خير لكما .
من حقج تحافظين على زواجج و على ريلج و بيتج لكن الثقة و الصبر والتحمل وعزة النفس كلها صفات تكمل بعضها .
ماينفع نكون طيبين لدرجة الغباء ولا ينفع انه نكون واثقين لدرجة التكبر ولا مطلوب منج تكون واثقة ولا مسالمةو لا راعية مشاكل.
بالنهاية مشاعرنا لازم نتحكم فيه و بإعتداااال .
يعني مب عيب نغلط و نعتذر لكن لا نكرر الإعتذار ، نسامح ونعفو لكن نحط شروط .
تطلبين من ريلج يردج ؟ اكبر غلط . مب معناه تكبر لكن المرأة لها مكانة ولها إحترام و المفروض يدق هو باب بيتكم ويجي يسلم ويردج .

عيبتني حركة سواها ، انه حول مصروفج على طول اول ما طلبتي و قالج تقدرين تروحين بيت اهلج ( دليل على تحمله للمسؤولية ) نقطة إيجابية .
لو بنسمع منه راح يقول الحرمة لحالة و حنانة و تسوي مشاكل و تنتقد نفسها بنفسها ، ومب عارفة نفسها شو تبغي بالضبط !

إلزمي سيادتج و إدعي ربج يفرج همج و همه و إقري قرآن ولا عاد تكلمينه خير شر وكبري مخج باجر وراج عيال ومسؤولية ومع الوقت الوحدة تكبر و تعقل وربي يفرج همج .

[قصايد الهاملي]

عورني قلبي واااايد وعيوني دمعت انتي انسانه قويه وطيبه واهلج ربوج احسن تربيه ماشاء الله عليج وقليلات امثالج وامثال تصرفج مااعرف شو اكتب الا لو كان خير لج انج تستمرين وياه الله يصلحه ويقربكم من بعض

[مناية النعيمي]

الغلط منج من اول موقف يوم رحتي عنداهلج وعقب تميتي تترجينه يرجعج ريلج شخصيته قويه مايحب الحرمة الضعفيه الي مالها شخصيه غيري من نفسج لا تمين تسالينه عن كل شي وتحسسينه انه مصدر حزنج وسعادتج لا تظغطين عليه عاطفيا خلج مكتفيه بذاتج عيشي وشوفي الدنيا الحياه مش زوج وبس انا اقرا مشكلتج اختنقت من تصرفاتج وين هو الاعتذار مره وحده السال مره وحده مش دوم وكل وقت
الله يهديكم ويصلح حالكم...

[قمر16]

تحتاجين وقفه مع نفسك
انتي مستغربه من تعامله معك وانتي تعاملي نفسك بنفس طريقه معاملته معك
لابد تهدي انتي بنفسك عجوله
حاولي تقرأين كثير جدا عن طرق التعامل والتواصل مع الناس متى العطاء متى المنع
وكيف وضع الحدود ومتى يكون العفو
بعض التربيه تكون مبالغ فيها بالأدب حتى تخرج شخص كل همه ارضاء الناس وينسى نفسه تماما
اي تخرج نفسيه ضحيه

[khaleejiya]

على فكره ترا الريال مايحب الحرمه الضعيفه المنكسره ترا ينظر لها نظرة شفقه
بالعكس ينعجب بالقويه المعتمده على نفسها اللي لها كلمه مسموعه و راي
لا تترجينه ولا تتذللين له لازم هو اللي اييج يحب ريولج ويترجاج ترجعين له
الغلطه اللي ارتكبتيها هي طلعتج لبيت اهلج من اول مشكله

[(خيماويه)]

اسمحيلي بس اللي يخلي عمره سبوس تلعب فيه الدياي وعمره الريال مايحترم الحرمه الضعيفه ﻻتتحرين هالتصرف ويوم بتعتذرين وهو الغلطان بيحسسه بتانيب الضمير بالعكس كبرتي راسه عليج بصراحه الكرامه فوق كل شي والريال مب كل شي ف الحياه الدنيا متروسه رياييل المشكله يوم الحرمه تحسس ريلها انه اخر حبه باجر عيل بيدخل وحده جدام عينج البيت شو بتسوين بتبوسين ايده وراسه بعد !!!

[عساك تبقى لي]

والله يا خواتي الريال مايعجبه العجب واذا حط براسه شي سواء كانت قويه أو ضعيفه..
أختي .. الله يكون بعونج ويحنن قلبه عليج يارب. .عليج ب الأذكار وقيام الليل والاستغفار والالحاح بالدعاء والله يفرج همج بإذنه وشو في الوالد أو أي أحد من العايله يكون مسؤول ويفاهمه بأسلوب طيب

[بســـــكوته]

الحمدلله حصلت عندكن الكلام اللي يقويني ويخليني اثبت على رايي
فعلا انا محتااااجه وقفه كبييييييره مع نفسي
انا فرحانه من نفسي وايد اليوم
احس اني كبرت وايد وتعملت وايد وقويت اكثر

انا اليوم رحت البيت وشليت ساماني اول شي لاني احتاجهن وثاني شي عشان يعرف انه خلاص ماعادت تفرق معاي والله
واكثر شي عشان ابا اطول عند اهلي ابا اربي نفسي اكثر واتعلم اكثر قبل ماارد

الله يقويني وينصرني ويرده ذليييل نااادم يااااااارب

[دودوالحلوة]

الله يهديه و يرده لج احسن عن قبل ان شاء الله
و انا ويا الخوات باللي قالوه لازم تكونين قوية و عندج ثقة بعمرج اكثر عن جي
و ربي يوفقج يا رب