لين متى؟

[رسايل غلا]

السلام عليكم ورحمة الله وبركاته

بطرح اكثر من نقطة او موضوع للحوار هني بس اتمنى نستوعب الفكرة مع بعض وما نتكلم عن الحرية او غيره نبا نكون شوي عقلانيين ومنطقيين:

اول موضوع:
اشياء وايد نشتريها بمبالغ طائلة وهي في بلد الصنع ارخص من التراب مثل:
شنطة تشترينها بعشرة آلاف او بخمس وعشرين الف بس عشان الماركة! اوكي خلي السعر ما سألتي نفسج الشنطة هاي منو سواها وكيف يت لين عندج وانباعت بهالمبلغ؟
الماركة يا عزيزتي مجرد اسم لصاحبها اللي سواها وبنى عليها تجارته وخلاها مشهورة بطرق اي تاجر نفسه يعرفها, يعني ماركة الشنطة الفلانية مجرد اسم حق الاستايل والكشخة, انزين اي شنطة اصلا وين تتصنع؟
الشنط تتصنع في الصين وفي الفلبين يعني عند الآسيويين اللي البعض منكم فالأصل ما يتنزل يشتري شي من عندهم, صاحب الماركة كل اللي يسويه انه يصمم الشنطة ويعطي التصميم لهالبلدان اللي لها الخبرة في الصناعة هذي واحيانا ما يهتم بخامة المنتج واغلبيتها في هالبلد ما تنباع يمكن بـ 100 درهم ولأنها ماركة بيزيد سعرها لين 10 و20 الف لان صاحب الماركة محصل حد يقص عليه وعارف انه في ناس بتشتري حتى لو بمليون عشان الماركة.
يعني لا تيين انتي وتبيعين حق الناس شنطة اصلا اصلا رخيصة بمبلغ وقدره بس عشان انتي خذتيها بسعر غالي!!! ترى مب مهم اصلية ولا تقليد كلهن مصنوعات في آسيا وبسكم من الحماس الزايد هههههههههههه

النقطة الثانية:
العبي وآآآآآه من العبي ما اقول الا الله يرحمنا برحمته, والله العظيم اني ما قمت اشوف عبي كل اللي اشوفه مفارش طاولات وشباري متحركة مب قاصر الا اللحاف!!!
ما تمت قطعة الا وحطوها في العباة مب فاهمة وين بنوصل؟ ولين متى بنتم جذي نرمس عن الكشخة ونحن نعنقش؟! اي ستايل هذا اللي اييب فيه قطعة قماش مالت بتان واحطها في العباة وارقع من كل صوب؟ وين راحت العباة الحلوة والساترة خاطري اشوف ستايل حلو ومرتب, صح فيه وانا شخصيا اسوي بس ما توصل لدرجة انه عباة كاملة تكون ملونة ما يبين فيها اللون الأسود
وفوق هذا تييج وحدة تفصل وتقولج والله الخامة والموديل والقصة والتكلفة....الخ اي قصة واي تكلفة يا بنت الحلال الخامة من سوق البتان وبرخص التراب وقطع العبي معروفة انواعها واللي يفصل هندي مب فرنسي...ليش جذي؟!


فيه وايد اشياء تغصص بالواحد وتمر بدون نقاش ولا فهم بس لين متى؟ متى بنتعلم ما نعق فلوسنا على اي شي وما نخلي حد يقص علينا ليش اشتري سلعة بمبلغ ممكن اتبرع بنصه او ممكن اساعد فيه شخص اذا شفت عمري مب محتايتنه لهالدرجة, ليش ما اوفر لعيالي ومستقبلهم, ليش ما افكر في كفالة اكثر من يتيم او اسوي مشروع خاص فيني يفيد بلادي ويفيدني؟

انتظر رايكم وسامحوني عالاطالة

المزيد من آخر المواضيع من نفس القسم:

• السلام عليكم
• فرق و اختلاف محتوى Netflix الامريكي و العربي
• عيدنا ليس هنا ................لعبدالحليم...
• مطلوب توظيف مندوبة تسويق في عجمان
• مطلوب توظيف سكرتيرة في العين
• مطلوب توظيف سكرتيرة في ابوظبي
• مقومات الدول الإسلامية في حالة ما إذا إتحدت
• حجامة
• الرقابة من الأهالي ضرورية قبل خوض مواقع...
• مجرمون بثياب كثيرة،،،،لعبدالحليم الطيطي