زوجي يكلم وحدة متزوجة

[جنة البيت]

السلام عليكم حبيباتي
ابا اخذ رأيكم في مشكلتي انا معرسة من 3 سنوات و عندي ولد عمره 6 شهور ربي يحفظه لي
مشكلتي اني اكتشفت ان زوجي يكلم وحدة متزوجة و كان يعرفها قبل و كان يبا يتزوجها بس ما صار نصيب و للاسف كان يكلمها عقب زواجنا بشهرين و يوم واجهته نكر و اتضاربنا و طلع من البيت و سامحته في نفس اليوم و الله الشاهد اني ما شكيت مرة ثانيه بس عقب كم شهر اتغير قلت اكيد يرمسها طرشتلها مسج اقول فيه احترمي زوجج و بيتج ولا تخربين بيتج بايدج و لو ما بعدتي عن ريلي ترا انا اللي بطرش لريلج صور الرسايل اللي بينج و بين ريلي المهم تاسفت و خلاص بس من اسبوعين اكتشفت انه بعده يكلمها طنشت و قلت جني ما عرفت شي بس البارحة اتضاربنا عشان شي ثاني و فتحت قلبي و طلعت حرتي و قلتله قالي هيه طلقت و بأخذها عليج!!!!
قلتله ترا هذا مستواك تاخذ وحدة تطلقت عشان اكيد ريلها اكتشف انها خاينه و تأخذها انت!!! احمد ربك ما طلعت من نصيبك و الا كانت الحين تكلم غيرك نفس ما تسوي وياك قالي لا تتكلمين في اعراض الناس قلتله انا شايفة شي بعيني
المهم طلبت الطلاق و قلتله لا تي البيت عاند و يه عقب الدوام و تم يدق الباب الفجر و يصارخ و طرش مسجات سبات و لعن عقبها انا سويت التلفون عالصامت و رقدت نشيت الصبح اقرأ عقب السبات يقولي الله يخليج افتحي ما عندي بيزات حق الفندق وين ارقد و مب قادر اسوق والله اوعدج برقد فالصالة و ما بسوي شي
الصراحة كسر خاطري الحين شو اسوي و شو اقوله اسامحه ولا اتم شوي اعلمه الأدب و اخليه بعيد عن البيت بس اخاف يروح عند اللي يرمسها لو صدق تطلقت

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[نوودي ~]

كثرت مواضيع الخيانه ماقول الا حسّبي الله ونعم الوكيل

الله يهديكم يا حيااتي ويصلح ريلج يا رب

[ليدي اسوم]

انا رأيي ما تسامحيه ع طول... خلي عندك شروط

[كتكوتة حبيبي]

علميه درس ولاترضين علی طول

[قلبي بزي]

خيبة وايد خيانات الحين شو السبب؟
لا حول ولا قوة إلا بالله

[Fa.R]

سامحيني بس ريلج وغد بكل قواة عين يقولج هيه باخذها عليج هالجملة ما ترن في أذنج ؟؟
وتفكرين تسامحينه !! كيف ياخذج من بيت أهلج معززة ومكرمة ويكلم وحدة هذا شو ماعنده ضمير ؟؟
ليش يحطج في ذمته يوم أنه يحب هالبنت شو مايروم يصبر لين تطلق وياخذها .......ااااااخ بس ااااااخ

والله مقهورة على الحال الي وصلنا عليه

[falfool]

لا حول و لا قوة الا بالله ،،

نحن ف دوامنا عندنا بنات يسولفون وَيَا المدير مال القسم و هو ريال معرس سوالف والله لو تسمعينعها بتنجلطين ،، كلام ما ينقال الا بين حبايب او متزوجين ،،،

هالزمن كثرت فيه الخيانه الزوجية بسبت الإغراءات اللي حولنا و ضعف الوازع الديني ،،

انا من رايي لا تكبرين الموضوع و لا تسيرين بيت هلج ادري فيج غصه و مقهورة بس الأفضل تقرين في بيت الزوجية و تتفاهمين وياه و تجوفين شو اللي مفروض تحسنينه في علاقتج وياه مدري ما اريد أظلمج و أقول إنتي مقصرة وياه بس جوفي وين المشكلة و حليها اسرع سريع ،،
بعض الرياييل لما يجوفون حريمهم مهتمين فيهم و واقفين وياهم تكبر في عينه ،، و يستحون علا ويوهم ،،

و اهم شي لا تمين تعايرين ريلج ف هالسالفه ،،

الله يهدي ريلج و الله يستر عليكم ،،

[الوردة الجورية]

وعليكم السلام


تعرفين ليش رجع لها من بعد اول اكتشاف لج لخيانته بالتلفون؟؟!!!

انج سامحتيه في نفس اليوم... اكيد كل مايغلط بتسامحينه فاكيد بيتمادى بالغلط


آخر رسالة اللي كسر فيها خاطرج يا فاهمة.. انه ما حس بالندم

صراحة قالها لج... ماعندي فلوس للفندق!!! يعني مب ندمان ولا حاس بتأنيب الضمير ولا حاس انه غلطان

رأيي لو كنت مكانج....

بقوله: ( ماعندي مانع تتزوجها اذا تأكدت بنفسك إنها محترمة وماعندها خرابيط.. راقبها فترة كافية على الأقل ستة شهور بدون ماتدري، عقب أنا بنفسي ببارك لكم زواجكم)

هو تمسك فيها يمكن لأنها علاقة بالتلفون بس،، بس هو مايعرف اذا عندها علاقات مع غيره او لا
هو ما بيقنع الا بعد مايجرب بنفسه ويشوف

[جنة البيت]

لا والله خواتي انا مب مقصره وياه و واقفه وياه و أتحمل اشياء كثيرة و حتى اذا هو متضايق من شي اسويله جو حلو و أطلعه من اللي هو فيه عشان ماباه يشل هم و أساعده في أشياء وايد
و تعرفون قبل شوي يه البيت و تكلمنا قاللي اوعدج ما يصير هالشي مرة ثانيه بس انا مب حاسه انه ندمان لان بدء كلامه انه ريال و عادي ما ينعاب بس انا ذكرته بالإسلام و ان مافي هالكلام في ديننا و فالاخر قال ان بينهم شغل و انه استفاد من وراها قلت في نفسي صدقي و خلاص و طنشي قلتله اوكيه الحين كلمها و قولها حفاظا على بيتي و لاني احترم مرتي و ولدي و اني إنسان اراعي ربي خلاص خلص الشغل اللي بيننا و مافي داعي نتواصل و جي تم يلف و يدور يقولي انزين بعدين باجر ولا عقب حسبت انه يبا يخبرها انه بيسوي جي بس عشان يسكتني و يتفق وياها تخيلو مسويلها حساب!!!!!!!!

[غرووب 22]

لا اله الا انت سبحانك اني كنت من الظالمين

[Mthayel]

حسبي الله ونعم الوكيل على رياييل هالزمن اللي مافيهم خير

[ليندااااا]

لا حول ولا قوة الا بالله

[Ward-uae]

مواضيع الخيانه وخاصه اذا الحرمه متأكده صعب اعطيج حل لانه يعتمد على شخصيتك
منهم من تتحمل ومنهم لأ
الحرمه بالنهايه انسانه لها مشاعر واحاسيس
فصعب يعرس ويساوي بين الثنتين مب السالفه سالفه عدل
كيف يساوي بين ذهب وزباله هنا الجرح
الحرمه تنجرح وتم طول عمرها تحاسب نفسها وتعيش وتقعد تحسس نفسها انها قصرت بشي
دخلي احد من العيله اهلج او اهله تعرفين انه حكيم يكلموه لا تخافي لكن خافي على نفسج وعيالج هذي سمعه ابوهم
واذا الريال ما ينعاب الا ينعاب ونص عنده حرمه وخوات سمعه هالاشكال بتخرب عليهم باجر بتدخل العيله وبتعلمهم ومن ينلام ذيج الساع
خلج قويه معاه لا تخلي له البيت ولا تعطيها فرصه تكلمه ملي وقته بالتفكير خله يفكر عدل

[um mohsin]

حبيبتي تمسكي بزوجك وحافظي عليه وعلى بيتك صدقيني نزوه وتعدي بيعرف قيمتك بسسسس
اثبتي له انك مهتمه ببيتك وبولدك وفيه كمان وكثري الدعاء وقولي له ربي يبعدك عن بنات الحرام
انتي بنفسسك تغيري صدقيني كل رجال يعرف معدن الحرمه الي معاه سوا زوجته او اخته او من متكون
اثبتي له ان لو خسرك هو الي بيندم ... و هالفتره عليكي ب سوره البقره وان شاء الله
الله لايغير عليكم حال ...

[افناان]

الله يكون في عونج حبيبتي
نصيحة : كوني صارمة معاه و حازمة في هالموضوع ، لا تعطينه مجال للحرام ابدا ..
قولي له بالحرف الواحد انا شريفة و ما ارضى اعيش مع واحد عنده علاقات !!
انتي ادرى فيه من غيرج ، بس الواضح من كلامج انج رخيتي معاه في هالموضوع فتمادى ..
عليج بالاستغفار و الدعاء
ربي يصلحه و يسخره لج