امي خربت بيتي

[نسيمة الورد]

السلام عليكم .
امي خربت بيتي وتفشي اسراري للناس وحرضت زوجي للزواج وطبعا هو فرح . وتزوج علي وامي فرحانه ومستانسه ونهيت وسلمت عليه وعلى العروس الجديد .
وتركني زوجي في بيت اهلي . ما عندي بيت وسكن الحرمه الجديدة . وانا ساكته وما قلت شي وما سوالي سالفة خطف على الزواج سنتين وانا في بيت اهلي . وامي تقول وصلي عيالج عند الحرمة الثانيه تربيهم . انتي شو تبين العيال .
والله انقهرت واحس بالظلم والذله في بيت اهلي لكن صابرة ..............
وما مرتاحة في بيت اهلي احس اني عالة عليهم . كاني يالسه في فندق . يتشكون مني . الزوج ما يصرف علينا .

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

[نسيمة الورد]

بماذا تنصحوني لاني تعبت . من هاذي الحالة .........

[khaleejiya]

في اشيا مب واضحه في موضوعج
كيف امج سعت لتخريب بيتج وعقب تتشكى من وجودج ف بيتها وانج عاله عليهم وشو استفادت يوم اقنعت ريلج يتزوج عليج؟؟
في شي غامض بالموضوع

[نسيمة الورد]

اساسا كانت رافضة الزواج . دمرت العلاقة بيني وبين زوجي . كلامها للناس عندما تحدث اي مشكلة . صار يكرهني .. ويسب هلي ... ومرات تمنعني اني اسير عند زوجي ... وتقول خليه يتزوجي ...

[امراه]

عليكم السلام والرحمه الحين امج خربت بنتج واهدمت بيتج وعقب تتشكى منج ماتباج !!؟؟ليش جي سوت من البدايه عيل مافهمت الصراحه الله المستعان

[mao]

لا حول ولا قوة الا بالله معقوله ..!! ماشي ام ترضى بخراب بيت بنتها لو حتى ماكانت موافقه ع الزواج ... ليس تسوي جي الله يهديها ويحنن قلبها عليج يارب

[الوردة الجورية]

وعليكم السلام

أمج مطلقة او ابوج جد تزوج عليها؟؟

هل هي قاعدة تنتقم فيج؟؟!!

ممكن بعض الأمهات يخربن بيوت بناتهن عن غير قصد

لكن تكون متعمدة... ممكن بس نادر

لو وضحتي اكثر عن الاسباب يمكن نقدر نشور عليج

[دبي]

ارفعي عليه قضية نفقة لعيالج ، ولازم يوفر لج سكن لأنج حاضنه للعيال ، خذي حقوقج واهتمي في عيالج والباقي صار من الماضي بالتوفيق

[مراسيل الوفاآ]

شي من الامهات اللي يخربن حياه بناتهن
وخاصه لو البنت عرست وامها مب راضيه
حتى لو ما سعت لطلاقها من هالريال ممكن
انها تكره زياره البنت لبيت اهلها، لكن اللي
صار صار، ودامه ريلج رضى ب ها كله
واهلج ما يبونج اتمين وياهم خلاص عيشي ف بيتج
سواء كنتي بعدج ع ذمة ريلج او اتطلقتي
ف من حقج انه يكون لج سكن خاص دام
عندج عيال وريلج ملزوم انه يصرف عليهم
طالبيه ب هالاشيا بالكلمه الطيبه او القوه في
حاله انه ما رضى، وادعي ربج انه يردلج حقج


ما قدرت اطلع ب راي غير هذا لانه مشكلتج هاي
ما طلعت بين يوم وليله ف صعبه انه كل شي يرد
لوضعه الا اذا حليتي مشاكلج مع امج اول شي وعقب
ريلج

[Ward-uae]

سمحيلي امج ما خربت حياتج انتي وريلج اتخذتوا قرارات ودخلتوا اطراف وايد في مشاكلكم
البنت لما تعرس مب كل شي تقوله لامها فيه اشياء تحاول تصلحها بينها وبين ريلها لانه جيه ريلها بيتكلم وبيتشكى منها جدام امها
فالحريم بشكل عام عاطفيات كلمه توديهم وكلمه تييبهم عندج المنتدى وهذا القسم بالذات من البنات يقرون مشكله كل وحده تتأثر لكن الدرجه تختلف فما بالج بالام
التصرف الحكيم انه الاهل ما يدخلون بمشاكل عيالهم الا اذا كانت المشكله كبيره خيانه او خرابيط ودمار مستقبل شريكه حياته واسرته هنيه يدخلون
لكن الحين لا صارت البنت اذا ما اشترالها شي تحط عليه مقصر وما يعطيني وهو جيه وجيه ومن امها ترمسه يتمصخر ويقلب السالفه كلها عليها ولما امها توقف معاه يقوى مع انها ما تقصد تضر تصرفاتهم عشوائيه وعلى نياتهم
وريلج حصل حجه من امج يعرس فالقرار بايده مب بايد امج
اما انج قاعده في بيت اهلج لانه ريلج عرس وانتي بعدج على ذمته منحقهم يعصبون لانه الام ما تباج تضعفي تبيج توقفي على ريلج وتطالبي بحقج عيالج باجر يبون اب يسجلهم ويهتم فيهم ويجابلهم ويعيشهم الاهل الله يطول بعمارهم كم بيتحملوا ويشلوا
اذا انتي على ذمته طالبي ببيت ونفقه مب لازم محاكم بالطيب وانتي ادرى بريلج وتعرفينه عدل

[ميميه88]

ماعرف احس الموضوع جيه مب راكب
كيف سوت هذا وكيف اهلج ساكتين؟ وانتي وين من هذا كله ؟
كنبه عالزاويه؟ جيه لج راي لج كلمه ولج حق!!!!
رتبي الافكار كلها وامورج كلها وتحرك لاتمين جيه يالسه
اصلا مب بكيفه يخليج معلقه ومفروره فبيت اهلج لامطلقه ولا انج عنده
شو الدنيا فوضى؟

[سامية22]

الله المستعان

[ياقوتةخضرا]

الانسان سيد قراراته
وحياتج انعكاس لهالقرارات

انتي منزلة الموضوع مجرد فضفضة ؟
والا تبين تاخذين قرار قوي وتتوصلين لحل جذري
لوضعج اللي ما يرضي حد ؟

اذا كنتي تفضفضين فمن الحين اقول لج وقت الفضفضة خلص
ما دام نزلتي مشكلتج في المنتدى
يعني تبين تصرف ترجعين فيه حياتج لطبيعتها

اولا لازم تيلسين يلسه عائلية تحلين فيها مشكلتج ويا امج
ثانيا تتخذين خطوات ملموسة تضمنين فيها حقج كسيدة متزوجة وعندها عيال

الحل يكون التواصل مع ريلج بالطريقة اللي تشوفينها مناسبة
حتى لو ادى الامر انج تدخلين حد من اهله كواسطة خير

واذا ما رضى هاذيج الساعه تهددينه بالمحكمة
وخاصة انه كل شي في صالحج

الزوجة لها حق في سكن منفصل
ونفقة لها ولعيالها

اتحركي عشان تنقذين بيتج وعيالج

[الأحلام الملونة]

شو ما كانت اسباب انفصالك عن زوجك وزواجه من حرمة ثانية وهجرة

لك حق شرعي وقانوني أنت وعيالك وعليك المطالبة به بالطرق السلمية او المحاكم لكن السكوت ما اشوفة تصرف سليم وخاصة لعيالك

[Fa.R]

قلبي لا تقعدين ساكتة وإييديج مكتوفة
الله كرمج وعطاج حقوقج أقلها أنج تكملين تعليمج وتحصلين الشهادة
وتقدمين ع وظيفة الي تعينج ، وأنصحج نصيحة لااااا تعتمدين ع ريلج وأهلج من اليوم ورايح
أنتي قوية وقدها وقدود ! أمج خربت الله فوق وربج ما ينسى عباده
وتعتبرين مظلومة ودعاء المظلوم مستجاب وبيي يوم ربج بياخذ حقج، من كلامج يبين عليج طيبة وضعيفة وتحتاين حد يساندج ويوقف وياج
بس عليج بالصبر وتمسكي برب العالمين ماظني شيء وحدة تروم تتحمل الي سواه ريلج وأمج الله يهديهم

الله يوفقج