فــضــفــضــه مــن الــقــلــب " لا غيـــــــر "

[الــــدبـــــه]

بسم الله الرحمن الرحيم
السلام عليكم ورحمة الله وبركاته


شحالكن حبوبات

انا بفضفض باللي فخاطريه لأني تعبت
مابا وحده تقولي سوي جي ولا سوي جي
ولا تنصحني لأن النصيحه في هالموضوع مابتنفعني صدقوني
اللي بتحدر بس تدعيلي بدعوه حلوه من قلبها
واللي يعرفني معرفه شخصيه من المنتدى
يعرف انا كيف أعاني من هالموضوع
وماقول غير حسبي الله ونعم الوكيل


الله يسلمكن سالفتيه استوت من عرست
الحمدلله ام ريلي وابو ريلي ناس ينحطون عالجرح يبرا
وانا عن نفسي اشوفهم مثل امي وابويه واكثر ولا يهونون عليه ابدا
لكن عندهم بنت والعياذ بالله منها .. نعم واقووولها بصوت عااااااااالي
والعيـــــــــــــــــــااااااذ بــــــــــالله منـــــــــــــــهـاااااااا
هاي يمكن شيطان على شكل إنسان
هالوصف اللي اقدر اوصفه


الغاليات انا عرست وبعدني ماكملت حتى شهر من عرسي
فجأه وبدون مقدمات !! تقول لريلي اللي هو اخوها
واللللللللللللله العظيم لأيوزك بنت حلووووووووووووووووه
بنت خصها جذي وعيوني جذي والخلفيه (اذا فهمتوا عليه) جذي
انا عن نفسي بقققققققققت عيووووووووني
اقول فخاطريه خير وين تبين؟؟؟
انا تميت ساكته اشوف الموضوع وانا سااااااااكته
مستحيه توني عروس كيف ارد عليها !!!!!!!!
وتمت تحلف برب العباد تحلف بأسم الله انها بتيوزه

والللللللله العظيم ليتني سويت فيها شي
من عرست وانا اهديها الهدايا واسمعها المدح
لكن قلتلكم شيطان على شكل انسان

المهم ريلي هذاك اليوم تم يظحك وساكت
انا طووفت السالفه قلت يمكن تسولف بس حز فخاطريه الموضوع
ومع ذلك سككككتتتتتتت لأنها اكبر مني بواااااااايد


يانا يوووم والله العظيم ماعرف كيف اوصفه يعني هههههه
كان يوم الجمعه وقبل الصلاة طلبت من ريلي يخطف الدكان واييبلي جبنه مالحه حق السلطه
وخبرت بشكارة عمتيه انه السلطه اللي قطعتها تخليلي شي منها على طرف
قلت فخاطريه مابا حد يزعل مني ويقول خربت سلطتهم فقلت فخاطريه الافضل نسوي سلطتين
ولا شو رايكن حبوبات !!! ههههه
الموهيم
ريلي ياا وفي إيده الكيس واخته كانت يالسه معايه فالصاله
فجأأأأأأأأأأأأأأه ما اشوف غير غبرتها وراها
ركضت عند ريلي تبا تشووف شو مشتري
وانا مشيت وراها لأني عارفه شو يايب وابا أقطع الجبن مكعبات عسب اوزعه عالسلطه
تخيلوا وانا يالسه اقطع الجبن فجأأأأأأأأه أسمع وحده تصرخ عليه بصووووت عالي
تقوووولي بالحرف الواحد :
إيــــــــه إنتي شووووووو تسوييييين نحن مانحب الجبن لاتحطين بتخربين سلطتنا اقوووووووووولج لاتخربيييييييين

انا وللمره الثانيه من بعد الموضوع الاولي اببببقققققق عيوووني
قلتلها وبشكل هادي يا فلانه انا موصيه البشكاره تعزل لي من السلطه عسب ماخرب سلطتكم

بس هي ماسكتت وتمت تصررررررخ وتقول بصوت عالي
لاااااااااااااااااااااا كييييييييفج تتعبلين في بيتي؟؟؟؟؟؟؟ والله لااا ايووووز اخويه وحده احسن منننننننج

رديت عليها هالبيت مب بيتج هاا بيت عمي وعمتيه وبأسم عمي مب بأسمج
رديت هالرد لأني انقهرت صدق منهااا

المهم تمت تقول بيوز اخووويه وبياخذ عليج حرمه ثاااانيه
عاد عني خلاااااااص انا فووولت
قلتلها هاااذوووووووه اخوووج اشربيه وابلعي ميته بعد
جانج ميته على اخوج خليه في ثبانج
وفريت السجينه اللي كانت في ايدي عالطاوله
ورديت بيتي بسرعه منقهره واحس نار شابه في صدري

المهم ريلي ياني يراضيني يقولي ماعليه تحمليها هاي ختيه ومن هالكلام
قلتله ختك على عيني وعلى راسي لكن ماتقول هالكلام مايجوز حرام عليها تونا مكملين شهر من العرس

المهم وسامحتها وسكت عنها

المره الثالثه بعد ماربيت وانسجنت بشكارتيه وتميت بدون خدامه
تميت اشتغل في بيتي بروحي
المهم ريلي قال لأمه اطرش بشكارتها عسب تساعدني عالاقل فالكوي واذا اي شي ثاني احتاجه
وللعلم بشكارة عمتيه تيني مرتين او ثلاث مرات فالاسبوع ولمدة ساعه فقط يادوب تخلص ثياب ريلي وتروح عني
هالمساعده زينه لكن مب وايد نفعتني وللعلم كنت ابخششها بعد عسب ماتقول شغلوني في بيتين
تشتغل عندي وهي عالاقل مرتاحه ومستانسه
المهم انا قلت لبشكارة عمتيه اني مخليه روب وحليب فريش فالثلاجه وذاك اليوم انا بسير ابات في بيت هليه
وفجيت الثلاجه وراويتها وقلتلها ترا هذا الروب وهذا الحليب وديه بيت ماما وقالت اوووووكي مدام

تميت اسبوع في بيت هليه ورديت بيتي بعد هالاسبوع
ييت اشيك على بيتي اول ماوصلت ولقيت الروب والحليب بعده فالثلاجه
سألت ريلي انته شاري روب يديد وحليب؟؟ يرد عليه لاء
المهم قلت باجر بسأل البشكاره
ياا اليوم الثاني ويتني البشكاره تتظحكلي قلتلها فلانه ليش ماوديتي الروب والحليب بيت ماما؟؟
والله العظيم ارمسها عادي لاصرخت ولا شياته الله الشاهد عليه
ماحصلكم الا انها تصييييييييييييييييييح وتركض بيت عمتيه انا تميت اطالعها اقول فخاطريه شو استوى؟؟؟

المهم لبست بنتي وانا تلبست ونزلت عند عمتيه في بيتها
ومااااا أحصل لكم الا الشيطان يااااي ويصصصصصصصصصرخ
انتي شوووووووووووووووو قلتي لبشكاااارتيه ليش تصيحيييييييينها
نحن زيييييين مناااا عطيناج بشكارتنا

انا ظحكت بصراحه يعني شو بقول؟؟
قلتلها فضل عنج وعن بشكارتج وخليها عندج امبوني مب في حايتها
وشليت بنتي ورديت بيتي
للعلم البشكاره تبلت عليه اني ضربتها وصرخت عليها تتخيلون؟؟؟؟

المهم المخابرات المركزيه الشيطانيه اتصلت في ريلي وسووووتله فلم مصري هندي تركي امريكي ههههههههه
واتصل ريلي فيني قالي ماعليه خليها تيي البيت عالاقل تكوي قلتله اسفه هالبشكاره ماتدخل بيتي ولا يخصها فيني
وريلي يرمسني يقولي ماعليه عالاقل تكويلي ثيابي وتخلصهن وشراشف والكفرات والباقي انتي سديه
ساعه يرمسني وخلاف وافقت بس انه مابيني وبينها اي رمسه ابببببدا


خطفن الايام وفجأأأأأأه احصلها عقب الغدا تقولي اخت ريلي
ليش ثياب بنتج جي ملحه (يعني رايح لونها )
قلتلها اصلا جي لونها الوان الباستيل
قالت اخخخخخخخ وععععععععع شووووووو هااااااااا تقولون مقطن خاااااااااااايس
قلتلها ثياب بنتي حلوه الا عيونج حوله ماتشوف اقول هالكلام وانا اظحك
المهم هي عصبت ليش اني رديت عليها هي تتحراني بسكت ههههههه
قالت اشتغلي عند بنتج بشكاره وغسليهن بإيدج هالثياب مقطنه
قلتلها مايخصج كيف اغسل ثياب بنتي ولو مقطنات ماظن انه هالشي يخصج
المهم تمت تزبد ( يعني محتشره ) عليه واني كيف ارد عليها جي
المهم شليت عمري وخليت بنتي عند ابوها وامه ورديت بيتي


ومررررررررت الاشهر
وفجأه تقولي بنتي لبسها لبس شحاتات
قلتلها حرام عليج بنتي لبسها حلوو شي منه ماركات وشي من المولات قوم زارا ونكست وh&m وماركس وغييييييره
قالتلي اصلا ماعرفتي الماركات والزين الا عندنا
قلتلها وعاد انا معصبه بس مب حابه ابين لها قلت اني ماشفت الزين عندهم
ردت قالت نحن قوم بوو الماركات اذا انتي تلبسين قوم 2000 نحن نلبس قوم 10000
واهلج ثيابهم قوم بو عبوود ( يعني ارخص واخس شي ) شوفي حريم اخوانج وخواتج عيالهم ثيابهم تييب المرض

انا والله العظيم بتحمل انها تعق عليه وعلى بنتي كلام مثل السم
بس شوووووووو يخص أهلي فالموضوع؟؟؟
يعني حسيتها قلة ادب صدق !

الموهيم قلتلها اللهم لك الحمد ثيابي احسن عن ثيابج بمليون مره
وصح انا ماجذبت اللي يعرف خياط صالح غريب في بوظبي يعرف اسعاره ويعرف خياطته كيف
وبالذات الخياييط اللي في شارع المطار في بوظبي ويعرفون الاسعار
من غير محلات القطع قوم الغيداء والباقه وبوكيه والربع اللي هناك
انا ثلاث ارباع قطعيه القطن من الغيداء والباقه وبوكيه قليل بس الاكثريه من الغيداء
واللي يعرف قطع الغيداء بيعرف انه اسعارهن من 450 وطااااااالع
وانا ما اتمدح في عمري لكن ارمس صدق وخواتي وحريم اخواني كلللللللنا نفس الشي
هي والله كل ماتشوفني بكندوره يديده اتم تتخبرني من وين وبكم ومليون سؤال
يعني ليش هي تقول جي ؟؟؟


المهم غير هذا كللللللللللله لازم اذا اي حرمه يت بيت عمتيه لاااااااااااازم تسمعني وجدام الحرمه كلام سم
مثلا عادي تقولي انا وجدام الحرمه سيري شلي بنتج وردي بيتج بتخربون بيتنا
ومثلا بعد تقول وجدام الحرمه انا ماعندي بنات ابطرهن وبضربها هالبنت امره ماعليه لا امها ولا ابوها
اوك تهدد جدام الحرمه بخطفها لكن انها تدعي على بنتي بالموت وتقول الله لايكثر البنات ان شاء الله
وتدعيلي ماييب عيال وليتها تدعي مره ولا مرتين والله العظيم كللللللل مره تشوفني تقول جي
وتقول ياااا عل فلان (ريلي) مااااااييييب بنات ان شاء الله ولا اولاد
ليـــــــش ؟؟؟
قلتلها بييب عيالي من جيبج ؟؟؟؟
ولا حضرتج تغسلين وتلبسين وتأكلين بنتي وانا مادري !!!!

وهي تتغيض اذا اراددها لأني تعبت من كثر ما اسكت عنها

وفووووووق هذا كله لساااااانها بذيئ واااااااايد
تقول لبنتي يالـ قحـووو ..... يالـ ظــروو ....

يعني بنتي ياهل وتقول لها جي؟؟؟؟؟؟؟؟
وللعلم عمي وعمتيه من طيبتهم هي وااااااايد راكبه فوق راسهم لأنها ملسونه
كلامها هي اللي يمشي عالكل بدون إستثناء
وانا والله استويت اككككككررررررههه انزل لعمتيه بسببها
وريلي يحز فخاطره لكن اقول انزل واسمعلي كلام يسم قلبي ليش؟؟؟؟؟
وعمتيه ماتقدر تركب الدري حرمه عوده عسب جي انا انزل واسير بيتها


يعني انا احب ريلي واحب عمي وعمتيه واخوان ريلي محترمين معايه وخواته المعرسات محترمات معايه
إلااااااااا هالانساااااااانه ياربي ماقول غير الله يهديها وحسبي الله عليها لأنها اطفربي وتسم قلبي بكلامها

انا ماكنت اشكي لهليه عنها لكن اخر فتره بديت اشتكي لأمي وامي واااااااااااايد زعلانه من الموضوع بس انا قلتلها
إني افضفضلها ماباها تقول ولا تسوي شي لأني بصراحه فوق هذا كله اشفق على اخت ريلي

بتقولون كيف تشفقين عليها !!

اشفق عليها لأن كل اللي اصغر عنها والاكبر عنها عرسوا
ادري بتردون عليه بكلام يعور بعد لكن هذا صحيح
انا اعرف إحساس البنت اللي ماعرست ومن تشوف حد يعرس اكبر عنها ولا اصغر
يتم يحز فخاطرها لأن وحده تقربلي وكبيره بعد وماعرست بس الحمدلله متفتحه وتقول اللي فخاطرها
ومع ذلك حتى حريم اخوانها يمووووووووووووووووتن عليها وانا ماااقد سمعت حد اشتكى منها ابدا وتساعدهم كلهم
تمنيت اخت ريلي نفسها لأني والله ولله الحمد لو اراددها لكن بحدود وما اتطاول عليها ولا على اهل ريلي
وللعلم ولين يومكن اقوللها مرات فديتج ..








انا قلت هاي فقط فضفضه
الدعوه من القلب حلوه
نصايح لاء
ولا تيني وحده تقولي سوي وسوي





والحمدلله على نعمة ربي انه رزقني بزوج احبه ويحبني وامه وابوه يحبوني واحبهم
والسموووووووووووحه من الجميع

المزيد من آخر المواضيع من نفس القسم:

• مخاطر كثرة ممارسة الجماع على الزوجين
• اسباب عدم الوصول للنشوه اثناء الجماع
• صفات الزوج المتنمر وكيفية التعامل معه
• الفرق بين الضعف والعجز الجنسي
• اهم فوائد الزنك السحرية للصحة الجنسية للرجل
• طريقة تنظيف المنظقة الحساسة بعد الجماع
• طريقة التعامل مع الزوج الصامت
• نصائح لحياة زوجية ناجحه
• فوائد الضحك للعلاقة الحميمة
• الزواج الثاني بين الأيجابيات والسلبيات

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[Ward-uae]

يالله طلعتي شراتي تعاني عادي عادي لكن الفرق عندي انها معرسه وتناشبني ولما تدعي ارد عليها ولج بالمثل

[mao]

يااربي هاي ليش جي !!!! شو سالفتها غيرة ولا شوو ليش ماتحبج ..؟؟!!!!! بصراحه شي ينرفز ويبط الجبد .. زين منج مستحمله والله .. ماشاء الله عليج والله يعينج فعلن عليها .. الله يهديها ياربي ليش في ناس جي عافانا الله ... !!

[قلبي بزي]

عورتي قلبي الصراحة
والله يهديها

[الــــدبـــــه]

يالله طلعتي شراتي تعاني عادي عادي لكن الفرق عندي انها معرسه وتناشبني ولما تدعي ارد عليها ولج بالمثل

ههههههههههههههه
سبحاااان الله
احلى رد وحياتج ههههههه
مشكوره فديتج عالمروور

[الــــدبـــــه]

يااربي هاي ليش جي !!!! شو سالفتها غيرة ولا شوو ليش ماتحبج ..؟؟!!!!! بصراحه شي ينرفز ويبط الجبد .. زين منج
مستحمله والله .. ماشاء الله عليج والله يعينج فعلن عليها .. الله يهديها ياربي ليش في ناس جي عافانا الله ... !!

يهدي الجميع ويعين الجميع ان شااااااااااء الله
اظن غيريه فديتج والله اعلم ليش جي تعاملني
مشكوره الغلا عالرد

[الــــدبـــــه]

عورتي قلبي الصراحة
والله يهديها

آآآآآمييين حبيبتي
وفديت قلبج
مشكوره عالرد

[Fa.R]

قليلة أدب و وقحة ،، شو مشكلتها هاي مريضة نفسياً ؟؟؟؟؟
تسب بنتج هالسب ؟؟؟ وريلج يعرف أن بنتج ينقال عنها قح*** ؟؟؟؟؟
ليش شو بينج وبينها عسب تقول بيوزك وتحلف ؟؟؟

[الــــدبـــــه]

والله فديتج مابيني وبينها شي
اهل ريلي قرايب لنا بالدم ومن بعيد
مانتواصل ولا اي شي
وسبحان الله نصيبي كان انه ولدهم ياخذني
ومن دخلت حياتهم وعشت بينهم وانا اعيش هالمعاناة مع اخت ريلي
ريلي يعرف ويرمس اخته ويحاول يهديني لأنه مايبا المشاكل ابينا تكبر
بس هي قلت من قبل اصلا راكبه على راس اهلها ولسانها طويل
حتى ابوها وامها مب قادرين عليها شو تبين من ريلي يسوي يعني !!

مشكوره فديتج عالمروور الطيب

[غلآ نفسي]

اللي اشوفه حولي .. اذا الريال ماشالله عليه زين وياج فأكيد اهله تعانين منه .. ودام العمه زينه وياج فأكيد اخته او حريم اخوانه بتعانين منهم

يعني ماشي راحه يا تعانين من ريلج يا عمتج يا اخته يا حريم اخوانه

وانتي اخته ملوعه جبدج وتعانين منها

انتي لا تسوين شي طنشيها لا تردين عليها لا تسوين لها سالفه اذا غلطت ع اهلج او ملابس بنتج عطيها نظره ذاك اللي نعطيهم للحريم بالعاده ونشي قومي طلعي عنها يعني لا تعطينها اهميه وتردين ع كل تعليق تعطيج اياه

الحل مع هالاشكااااااااااااال التطنيش وبالقو بعد جنها مش موجوده

حتى لو تكلمت سوي عمرج ما سمعتيها ولا تشوفينها ترمسج ولا تعبرينها ابد

بالتوفيق

[Miss PiXy]

هيه والله صدقج غلا نفسي يا تعانين من ريلج لو مب ريلج عمتج لو مب عمتج حميتج

طبيها عنج صحيح انها وقحه ولسانها وصخ بس التطنيش احسن بهالموقف لين تمل وتنطم عسى الله يهديها ويرزقها بريل وتفتكين منها

[عاشقة السعادة]

احلى شي فيج الحين انج تردين عليها لان في ناس صدق يستاهلون.... الله يعينج صراحة

[مالتيزرس]

ماعرف سبحان الله احسها تعاملج كانها عديلتج ..انزين انتي ماخذة اخوها موب ريلها الله يهديها ..سبحان الله يوم تتكلمين عنها أحس فيها انفصام فالشخصية ..ادعي فصلاتج ان الله يكفي شرها عنج ويحنن قلبها عليج ..الله يهديها ويرزقها الزوج الصالح ..يوم بتعرس وبيكون عندها حميات صدقيني ذيج الساعة بتحس فيج ..ادعيلها الله يرزقها الزوج الصالح ..

[افناان]

اعوووذ بالله ، للحين في ناس بهالتخلف ما عندهم اسلوب و لا ذوق
بس الشرهة مب عليها لاتزعلين الشرهة على ريلج عنبوو ريال مب قادر يسكر حلج اخته ؟؟!!
اقل شي يقول لها يا تحترمين زوجتي يا ما عرفج ولا تعرفيني ، احترامها من احترامي انا ،
رياييل اخر زمن يا مخلي حرمته تقاطع اهله بدون سبب لا تزورهم ولا ترد عليهم يا مخلي اخته تتمادى و تقل ادبها على مرته !!!

[sama DXB]

دوم رددي " اللهم اكفنيهم بما شئت"

والله يكفيج شرها ويشغلها بنفسها