هوُ و هيَ .. وبعدين ؟

[نوودي ~]

السلالام عليكم
شحالكم خوٌاتي !؟



اليوم سمعت سالفَه عن وحده وزوجها من زميله لي فالجامعه ونحن نسولف ( للعلم انا مب متزوجه )
فقالتلي وحده من اهلهاا تقريبا متزوجّه من خمس سنوات او اكثر ومابينهم اعيّال
يحبها وتموت فيه وحياتهم حلُوه بوجود بعض
لكن دايما عايشين فمشاكل وعاادي تسبّه ويتضاربون وحالتهم حاله وتوصل مرات للطلاق او الهجر ! بس متمسكيين فبعض ماشالله تبارك الله
كيف ما اعرف !؟ انا احيد الي يحب شخص مستحيل يسبه صح ولا غلط ؟ او يرضى انه ينهان مثلا
النقطه الي صّدق استوقفتني ، وحيرتني كيف للحين حياتهم مستمره مع بعض اذا هم عايشينها فمشاكل وسب واهانات ؟
هل معقوله الرجل للحين متحمل هالاشيا ؟ او يرضى انه ينهان وينسب بسبات قويه ويسكت !!؟
ومايلجأ للخيانه لو حرمته ما اتغيّرت ويصبررر علييها ومتعلق فيها رغم عيوبها ومشاكلها ؟

وبرايكم وتتوقعون ، منو سبب المشاكل دايما الحرمه ولا الريال ؟
وبرايكم هالمشاكل لو استمرت بتأثر مستقبلا عليهم ؟
واذا باب المشاكل والسب انفتحوا بين الريال وحرمته تتوقعون ممكن ايي يوم ويتسكر ؟

اترك لكم المايك
واتمنى تدعولهم حبايبي بان الله ايسر امورهم ويخليهم لبعض ويصلح شأنهم البنت اعرفها شخصيا ومعرفه سطحيه بس ويانا جدا طيوبه !

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[mao]

احيانا السبات والاهانات تكون ف لحظة غضب الواحد مايقصدها .. ويمكن يرجع الشخص يعتذر ويقول انه مو قاصد .. يعني واحد منهم الزوج او الزوجه .. بس بشكل عام فعلن محد يرضى ينسب وينهان لكن ف النهايه عشرة العمر مستحيل تنهدم بمجرد سبة او اهانه اذا كانت بلحظة غضب .. الله يوفقهم ويصلح من بينهم .. ويرزقهم بالذريه الصالحه .. وعلى فكره ممكن عدم وجود عيال سبب من اسباب التوتر الي من بينهم ..

[احلى بعفويتي]

ماعرف بس انا اقوله حقير و انت ما تستحي .. و مو اكثر عن جي
بس سبب الي هو الالفاظ الشنيعه اتوقع لا ابدا لازم ما توصل لهالدرجه من القرف اعوذ بالله

و اتوقع المشاكل تكون بسبه اختلافات شخصيه او راي او تدخل حد من الاهل او مشكله الانجاب مادام ماعندها عيال

و عادي ترا الحب ضد الصدمات خخخخخخخخخخخ

[لحن الخلـود]

صدقيني إذا شفتي الريال يتحمل السب و (ما عندهم عيال)
نسبة كبيرة أنه يكون في هو عيب أو مشكلة
و الشي الثاني لا تنغرون باللي يصير جدامكم ما تعرفون شو يصير بينهم
و أنا تأكدت من هالشي وايد ياما أزواج مبين جدام الناس أنهم كناري بس
مع بعضهم بينهم جليد

[غرووب 22]

سيِّدُ الاسْتِغْفار أَنْ يقُول الْعبْدُ : اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ .

[Cobon]

ربيعتج قالت عن ربيعتها يعني بطتنا بطت بطن بطتكم خخخخخخخخخخ

المشاكل موجودة في كل بيت
اذا نحن خوات لازم نتضارب مرة ف الاسبوع وين الزوج او الزوجة اللي مجابلين بعض
الحياة نقاش و اخذ و عطا و هذا قال و هاي قالت و انا .......الخ الحياة كلام ؟؟؟ بس الفعل شي ثاني تماما
المظهر شي و المضمون شي ثاني

بتجوفين اثنين يمكن ماخذين بعض عن حب 10 سنين و تستغربين شو سبب المشاكل منهم
انا استعجب الصراحة بس صدقيني ما تعرفين شو بينهم و شو مستوي و كل شخص يقول شي
يصطفلوا و يتضاربون و يدافنون و يستدون مع بعض
يمكن حبهم جي ضرابة فيهم دفاشة هههههههههههههه

اهم شي كل وحدة تكون مرتاحة وما يهمها مشاكل الناس لان تأثر عن نفسية الوحدة

[زينب الطيبة]

ما في بيت يخلوا من المشاكل

ومرات الريال يسكت عن السب لانه عارف عمره شو مسوي

يمكن مسوي شي كبيييييييير في حقها و قاعد يحمد ربه ان يت على قد السب بس

[مراسيل الوفاآ]

موضوعهم ماله داعي ينطرح هني ع صفحات المنتدى
دامهم يحبون بعض ومتمسكين ف بعض ف برايهم
كيف يتعاملون مع بعض، اهم شي انهم مرتاحين ف
حياتهم - الله يحفظهم ويخليهم لبعض -

اما بخصوص الاسئلة اللي طرحتيها

انا احيد الي يحب شخص مستحيل يسبه صح ولا غلط ؟ او يرضى انه ينهان مثلا
النقطه الي صّدق استوقفتني ، وحيرتني كيف للحين حياتهم مستمره مع بعض اذا هم عايشينها فمشاكل وسب واهانات ؟
هل معقوله الرجل للحين متحمل هالاشيا ؟ او يرضى انه ينهان وينسب بسبات قويه ويسكت !!؟

مب شرط اللي يحب يعني ما يهين الشخص اللي يحبه، مرات الاثنين يكونون متعودين ع
هالكلام ف ما يشوفونه على انه اهانه ومرات اذا الشخص يهين شريك حياته وهو ساكت
ف هذا يعني انه يحبه ويتحمل منه كل شي وياما سمعنا عن حريم متحملات رياييلهن وهم
يسبونهن ويسبون اهاليهم لكن الحب مثل ما قالوا أعمى ممكن حتى يمحي شخصيه الشخص

وف موضوع اللي تعرفينها ويا ريلها محد يعرف الاسباب يمكن هم يعقون كلام لكن عقب
يتراضون وينسون اللي صار عادي جدا، لكن لهم مستقبلا الافضل انه يكون بينهم احترام
عشان يوم الله بيرزقهم الذريه الصالحه يربونهم ويعلمونهم كيف يحترمون بعض بدال لا يعلمونهم
الالفاظ السيئة

ومايلجأ للخيانه لو حرمته ما اتغيّرت ويصبررر علييها ومتعلق فيها رغم عيوبها ومشاكلها ؟

مب شرط اذا الحرمه فيها عيوب يعني الريال يلجأ للخيانه !، حطي ف بالج سواء ريال او حرمه
اذا يخافون الله مهما صار ف حياتهم ف هم ما بيسيرون للحرام، محد كامل ف هالدنيا اذا الحرمه
عندها عيوب ف الريال مب خالي من العيوب وف الحياه الزوجيه لابد انه الطرفين يتغاضون عن
عيوب بعض ولا ما بيقدرون يكملون حياتهم مع بعض

وبرايكم وتتوقعون ، منو سبب المشاكل دايما الحرمه ولا الريال ؟

ع حسب، مرات تلقين الريال عاقل ويتغاضى عن المشاكل اللي تخلقها الحرمه من لا شيء
ومرات تلقين الريال يسوي اشيا تنرفز الحرمه وتخليها تفتح باب المشاكل بينها وبين ريلها
ومرات تلقين الاثنين ما يعرفون شي اسمه نقاش وكل واحد يفرض رايه ع الثاني وبالتالي
تنتج المشاكل بينهم بسبب سوء فهم الريال لحرمته او العكس

وبرايكم هالمشاكل لو استمرت بتأثر مستقبلا عليهم ؟

ما تأثر اذا ما كان في كتمان، اما لو احد الطرفين كتم وشل ف قلبه وايد اشيا ع شريك حياته
ف هني ممكن انه ينفجر ف أي لحظه وعقبها ما بيلقون اي حل يردهم لبعض او يعطيهم فرصه
انهم يبدون صفحه يديده لانه تتولد الكراهيه من عقب الحب/الاحترام والنسيان عند هالمرحله
صعب

واذا باب المشاكل والسب انفتحوا بين الريال وحرمته تتوقعون ممكن ايي يوم ويتسكر ؟

ممكن اذا يلسوا يوم مع بعض وناقشوا كل امور حياتهم وقرروا انهم يبدون من اول ويديد "اي يحطون النقاط
ع الحروف" ويحطون حدود لبعض الاشيا، والمشاكل ملازمه الشخص لكن الفرق ف كيفيه حلها اما السب
ف المفروض يكون شي حدود واحترام بين الطرفين واذا هالشي ما كان موجود من بينهم ف المسأله ما
بتكون سب وخلاص، بل تتحول لضرب بعض الاحيان ..

[حياتي انجاز]

الاحترام أهم شي في العلاقة الزوجية و السب و الإهانة يقتل الحب حتى لو تموا مستمرين مع بعض مب شرط يكون سببه الحب انت لو ربيعتج اللي تموتين فيها اهانتج بتم نقطة سودة في قلبج اتجاها فما بالك بالإهانة المستمرة القلب بينترس نقوط سودة و بيموت الحب

[نوودي ~]

موضوعهم ماله داعي ينطرح هني ع صفحات المنتدى
دامهم يحبون بعض ومتمسكين ف بعض ف برايهم
كيف يتعاملون مع بعض، اهم شي انهم مرتاحين ف
حياتهم - الله يحفظهم ويخليهم لبعض -

آمين
وسامحيني حبيبتي الموضوع كان شاغلني وقلت بتناقش مع بنات المنتدى مجرد نقاش بس
انا ماعرفها الا معرفه سطحيه وماذكرت اي شي عنهااا
بس قلت انه هم يحبون بعض ومتمسكين فبعض ومع هذا بينهم مشاكل كبيره توصل للطلاق !
هذا الي ذكرتّه عسب الموضوعَ يوضح وتندرج تحته اسئلتي ..
والسموحه منج حبيبتي ماكنَت ادري انه فيَه شروط لوضع الموااضيَع

مشاركتَج قيَمه بارك الله فيج
ومشكورات كل الي شاركن حبيباتيَ

[مراسيل الوفاآ]

^

السموحه منج فديتج، ادري نيتج انج تناقشين الموضوع بشكل عام
بس مثل هالمواضيع الوحده تبتعد عن ذكرهن افضل لانها ما تغير
شي مجرد قراءه بدون استفاده، لكن اسئلتج ف محلها وأي وحده
ممكن انها تستفيد من خبرات العضوات بتنوّع الردود فيها والنصايح
اللي تنطرح


يزاج الله خير اختي

[ام مصطفى..]

وايد مكبرين الموضوع على حسب الشخصين وعلى حسب البيئه المتربين فيها يمكن هالسب عادي عندهم

[ونتر]

دام المشاكل ما تطلع برا سهل انهم يردون عادي عقب الملاسن واي شي ممكن يستوي بين الازواج وكل واحد واسلوبه وتربيته

[ونتر]

وبعدين يوم تتزوجين بتعرفين انه فيه رياييل يطلعون الواحد من طوره ويستوي مثل نقار الخشب ع الراس ههههههه

[jameela200]

ههههههههههههه
الحمدالله علاقتنا طيبة ..
بس انا يوم اعصب استوي شيطان مااااااااااارد .. ومخيفة ابشكل ..
وما اخلي كلمة الا اقولها ..
بس اهداء ترجع المياه لمجاريها .. ولا جنة شي مستوي .. عادي تستوي حياتي ...