مشكلة ولدي ابي حل لها

[الوردة الجورية]

وعليكم السلام اختي
نفس ولدي
أولاً:
امنعي عنه " العسل، جميع المعلبات والعصاير المعلبة، الجبس"
كثري له البروتينات مثل اللحم والبيض مرة يومياً وطبعاً الخضراوات والماي جداً ضروري

ثانياً:
فرّغي طاقته.. يومياً لازم يكون عنده نشاط بدني يا انج تشركينه في جمباز او كاراتيه و سباحة مثلاً و تطلعينه الحدايق العامة للألعاب الحركية مثل التسلق والنط و الدراجة "السيكل"
اليوم اللي ماتقدرين تطلّعينه ترسي حوض البانيو ماي وحطي العابه و" راقبيه " وهو يلعب في الماي

عقب عطيه وجبة صحية خفيفة و شربيه ماي "مب عصير" وبعدين درسيه،، يكون جسمه هدى وعقلياً اكثر تقبل للدراسة
ولا تضغطين ابد عليه ولا تعصبين ولا تخلينه يقعد للدراسة اكثر من عشرين دقيقة في اليوم
و نبهي عليهم في المدرسة ما يضربونه ولا يضغطون عليه
ان شاء الله بتلاحظينه اندمج السنة اكثر مع اليهال وسار يقلدهم في التعلم
اذا حسيتيه ماستفاد السنة من الدراسة عادي يعيد الأول يكون أفضل له عشان يتأسس صح تراه بعده صغير وضروري التأسيس
بس انتي حطي في بالج انه ياااااهل مب ثانوي