قصيت معدتي .. وندمت !!

[العـــــاش]

قصيت معدتي .. وندمت !!

السلام عليكم ورحمة الله وبركاته

قبل ما تقرون قصتي ويا عملية قص المعدة أتمنى انكم تدعولي بالذرية الصالحة

بدت معاناتي ويا السمنة فجأة وكان عمري وقتها 23 سنة .. بدا يزيد وزني كل سنة تقريبا 10 كيلو لين وصلت 92 وثبت على هالوزن
كنت اسوي رجيمات وما خليت حبوب تنحيف في الصيدلية وسجلت في الجم واسوي رياضه وينزل وزني نزول حلو عقب تضعف المعنوية ويرد وزني يزيد مرة ثانية.
ومن كثر ما كنت اخربط واضعف وارد امتن في فترات بسيطة استوت عندي مشكله في المرارة وراجعت اكثر من دكتور في البلاد وبرع البلاد وقالولي لازم تشلين المرارة لانها مليانة حصى
توكلت على اللي وسويت عملية استئصال المرارة سنة 2012 وكانت عملية ناجحة والحمدلله وارتحت وتغير نظام اكلي وقمت ابتعد عن الاكلات الدسمة بس وزني حلف يمين انه ما ينزل !!

كنت اسمع عن عمليات التنحيف وكانت ويايه وحدة في الدوام مسوية عملية تحويل مسار في لبنان وزنها كان 116 وخلال سنتين وزنها 56 وكانت تقولي انها وااايد مرتاحة ونفسيتها تغيرت .. بس انا من طبعي خوافه واتردد واااايد وما اقدر اثق في اي دكتور خصوصا في هالنوع من العمليات .. وايد افكر في الاثار الجانبية وتأثير العمليه بعد 5 او 10 سنوات جدام وغيرها من المخاوف .. وغير هذا كله اهلي مستحييييييييل يخلوني اسوي العملية.. لمحت للوالدة بالموضوع ورفضت وسوت لي محاضرات ويابت لي قصص سمعتها عن فشل هالنوع من العمليات .. وشليت هالفكرة من بالي مؤقتـــــا


سنة 2013 الله كتب لي النصيب وانخطبت وملجت شهر 11 وزني وقتها كان 90 وبما اني طويلة .. كان المتن متوزع كل مكان واكثر شي منطقة الزنود يعني الشحوم مب متركزة مكان واحد.. وكنت احاول في فترة الملجة اني اخفف وزني لين العرس وكنت واااايد شاله هم هاليوم وكيف بيطلع الفستان و .. و... و....
عرسي كان شهر 3 سنة 2014 والحمدلله عدا على خير وكل شي كان حلو ومثل ما خططت له وبديت حياتي الزوجية اليديدة بكل تفاؤل وفرحة وسافرت شهر العسل واستانست ورجعت وبدت المعاناة اليديدة.

معاناتي بعد العرس وزني بعد ما كان 90 نقز ووصل 107 في اقل من شهر والسبب اكل المطاعم بما اني عروس يديدة وساكنة ويا ريلي في بيت بروحنا ما كنت اطبخ واكلنا كله من برع وغير هذا كل يوم عزيمة عند اهله وعند اهلي يعني كل اللي اسويه كان اكل وبس .. كل ملابس الزهبة اللي فصلتها وشريتها ما قامت تدخل !! كل شي استوى ضيق حتى خواتمي ونعولي .. تخيلو طول عمري البس مقاس 39 فجأة استوى مقاس ريلي 41 والدورة تلخبطت شهر كامل ما نزلت لان وزني زاد فجأة.. لاعت جبدي من عمري وياني اكتئآآآآآآآآآآب حااااد و24 ساعة دمعتي على خدي وكرهت اشوف عمري فالمنظرة وريلي يتحراني متولهه على اهلي ويبالي وقت اتعود على وضعي اليديد .. ويوم ازور اهلي اكثر كلمة اسمعها .. عواااش متنانة .. عواش غززتي .. عواااش انتفختي .. وهالشي كان يزيد اكتئآبي وقمت آكل اكثر واكثر بدال ما أخفف وانتبه !!

في هالفترة بديت افكر جديا في موضوع العمليات وسويت بحث كااااااامل .. ريلي يسير الدوام وانا ايلس اقراااا عن العمليات مرات اقتنع ومرات اتخوف لين ما قررت اني افاتح ريلي في الموضوع .. وفعلا لمحت له ان وزني زايد وقال انا بعد وزني زايد شي طبيعي تونا متزوجين .. قلت له انا وزني ما ينزل بسرعه وبيأثر على الحمل وممكن يتاخر وتستوي لي مضاعفات بسبة وزني مثل السكر والضغط إلخ.. آخر شي قلت له انا ابا اسوي عملية قص معده !!
تم يطالعني يقولي انتي شو تقولين .. ينيتي .. وهزبني وسكر الموضوع .. وليلتها تميت اصيح وما ياني رقاد ..وكل يوم كنت افتح هالموضوع واحاول اقنعه ومن بعد اصراااار شهر كامل وخليته يقرا عن العملية وسأل ربعه وكلم اكثر من دكتور وافق واخيراااا .. وكانت هذي اول خطوة.

خذت موعد عند الدكتور عبدالسلام الطائي يوم السبت تاريخ 3/5/2014 سرت العيادة وسألني كم سؤال عن تاريخي الصحي وريلي كان يحقق ويا الدكتور ويسأل وااايد .. وسألني متى تبين العملية .. قلت له باجر دكتور O_o كنت ابا اسوي العملية بسرعة عشان ما اتردد واغير رايي قالي ما يستوي لازم تحاليل تسوينها في البداية عشان نتطمن ان كل شي طبيعي وبعدين نتوكل ونسوي العملية وٍسألت الدكتور عن الحمل واذا في خطورة في المستقبل .. قال ماشي خطورة بس اول 6 شهور تجنبي الحمل لان البيبي محتاج اكل وجسمج ما بيتحمل وبتتعبين واذا صار حمل راجعي دكتورة نسائية توصف لج مكملات غذائية تساعد الجنين .. المهم تحددت العملية يوم الجمعة تاريخ 9/5/2014 وطبعا محد من اهلي يدري .. لا ام ولا اب ولا اخت .. بس ريلي اللي كان وياي في كل شي وكنت اشوف علامات الخوف والقلق في ويهه بس يحاول يبين انه طبيعي وبخير .. وقلت له من اطلع من العمليه بالسلامة اتصل في امي وخبرها ... كنت احتاج انها تكون يمبي بس فضلت اني ما اخبرها عشان ما تأثر على قراري وتخليني اغير رايي.


وطبعا كانت في طقوس قبل العملية منها موعد ويا دكتور التخدير وتمارين التنفس .. واللي حابه تعرف عنها بالتفصيل بشرحها لها ان شاءالله

ووصلنا لليوم الموعود ولازم اكون صايمه قبل العملية 8 ساعات .. دشيت المستشفى وانا على وشك اني اغير رايي كنت خاااايفه .. وسرت غرفتي ويابولي لبس العمليات وجهزوني وحطولي المغذي وريلي ماسك ايدي ويشجعني ما تركني ولا لحظة .. ساعات الانتظار كانت واااايد صعبة وبطيئة وتوتر .. دخلت غرفة العمليات الساعه 10 وخلوني في غرفة الانتظار هناك فترة مب بسيطة لان في عملية قبلي وبعد كانت قص معدة .. وصل دوري وخدروني ومن بعدها ما حسيت بعمري الا وانا في غرقة الافاقة وآآلااااااااام فظيعة فيني ومن كثر الويع ما اقدر احدد مصدرة.. والنيرس كانت تضربني على خدي عشان اصحصح وتقولي مداااام عمليه خلاااااص .. وانا اقول في خاطري عملية شو انا وييين وشو السالفة !!!
طلعوني من الافاقة ودوني غرفتي وريلي كان هناك يترياني .. طبعا ما اتذكر واايد تفاصيل لاني كنت مدوخه تماما من المخدر والويع ..وريجي ناشف ابا ماااي بس قالولي ممنوع لين باجر الصبح بنسويلج اشعة عشان نتأكد ان مافي تسريب او مضاعفات لاسمح الله وعقب اشربي ماي .. كنت احس بويع من برع وداخل .. وما كنت اقدر اتحرك على راحتي بسبب الخياطة وهالشي جدا مزعج

المهم .. كنت ابلع ريجي وارجع (عزكم الله) يابولي طاسه عشان ارجع فيها وكل ساعتين يبدلونها .. وكنت كل ما ابلع ريجي ارجع وتميت على هالحال لين الصبح .. وريلي اتصل في امي وخبرها .. وامي خبرت ام ريلي ودقايق اشوفهم واقفين عند راسي .. ريلي مسكين تهزأ وهزبوه هزاب لانه طاوعني وخلاني اسوي العملية وامي فديتها كانت تقول وااايد كلام وتلومني بس انا مب في حاسيتي وما اقدر اركز وياااهم بعدني متخدرة من البنج.

الساعه 8 الصبح ودوني غرفة الاشعة وعطوني محلول طعمة خاااايس بمعنى الكلمة لازم اشربه دفعة وحده ومن خلال التلفزيون يشوفون مجرى المحلول وين يروح بالضبط .. وما كنت اقدر اشرب .. واااايد تعذبت لين شربت المحلول وقدروا يصورون بالاشعة .. كنت اشرب شوي وارجع والدكتور يقول شربي مره ثانيه لين عصبت عليه وخلاني ارتاح شوي وعقب شربوني مره ثانيه.

رجعت الغرفة وبعد كم ساعة مر علي الدكتور عبدالسلام وطمني ان كل شي اوكي والعملية ناجحة وسمحلي اشرب ماي وعصير تفاح غير محلى .. بديت اتحرك في الغرفة واروح الحمام عزكم الله .. هالشي ضرورري والنيرس كل ساعتين تقولي تحركي عشان التجلطات .. اول ما شربت ماي رجعت على طووول ما تحملت .. وعصير التفاح نفس الشي رجعته .. كانو يصبولي عصير في الغطا مال الدوا عشان اشرب شوي شوي .. لازم رشفه بس .. وبعد ما اشرب كنت ارجع على طووول .. وقالولي هالشي طبيعي !!

المهم ثاني يوم طلعت من المستشفى .. بس آثار البنج بعدها فيني .. كنت تعبانه وراسي ثقيل امشي خطوتين واتعب وعطوني ادوية وكبسولات لازم اطحنها واذوبها في ماي واشربها وغيارات حق الجرح !! في البيت كنت احاول اشرب ماي وعصير تفاح بس كنت ارجع .. ما قدرت اتحمل ووقفت الشرب بس ريلي كان يحن على راسي عشان اشرب شوي.

تميت على هالحالة 4 او 5 ايام واكثر شي تعبني هو تأثير البنج .. ما ادري البنج كان واايد قوي او جسمي انا اللي ما تحمل .. كنت احس اني مهلوسه وراسي ثقيل وما اقدر اتحرك وكنت اشرب ماي وعصير تفاح .. رشفات فقط واكثر الاوقات كنت ارجع بس الترجيع بدا يخف تدريجيا .. وبعد عشر ايام راجعت العيادة وفتحوا الخياطة ونظفوا مكان العملية وقالولي خلاص خلي المكان مكشوف لا تحطين شاش وقست وزني وكنت نازلة 7 كيلو ..

جدول الأكل كان كالتالي لمدة شهر: اول عشر ايام ماء وعصير تفاح غير محلى .. ثاني عشر ايام سوائل غليظة شوي مثل الحليب وعصير الكوكتيل وثالث عشر ايام اكل مهروس مثل الكراميل والكاستر والهريس بدون حب او قطع
ومن الشهر الثاني اقدر اكل شي ما عدا البقوليات والمكسرات .. والمشروبات الغازية ممنوعة 3 شهور عالاقل

كل شهر كنت اروح آخذ ابرة فيتامين بي 12 وعطوني حبوب فيتامين حق شعري ومكملات غذائية .. ومن بعد شهر من العملية بديت آكل اي شي بس بكميات قليلة يعني اذا آكل عيش لازم بشوكة وامضغ الأكل عدل وبعدين ابلعة
واجهت صعوبة في الاكل لاني متعودة ابلع بسرعه واكلي كان سريع .. بس احاول اعود عمري اكل شوي شوي

في رمضان تعبت شوي اول اسبوع .. لان الاكل دسم ومقالي ومعدتي ابدا ما تقبلت اللقيمات والسمبوسه .. كنت آكل هريس وعيش ودياي واشياء خفيفه بس الكميات بسيطة يعني خاشوقة عيش وخلاص اشبع.. والسحور تمر وموز وماي

اليوم .. كملت 3 شهور من العمليه ومن 107 وزني استوى 87 الحمدلله لك الحمد والشكر .. وآكل اي شي اباه بس بكميات قليلة يعني ما انحرم من شي .. اصلا من بعد العملية نسيت شي اسمه اكل ويوع .. ما احس بيوع ابدا وريلي يتم يحن على راسي عشان اكل وما يستويلي هبوط ..

السلبيات بعد العملية ..
1. كنت بسرعة اتعب واحس بدوخة .. اروح الجمعية امشي شوي احس اني ركظت عشره كيلو .. ارد ايلس في السيارة مول ما فيني حيوية ونشاط .. طبعا اول شهر حسيت بهالشي بس الحين الحمدلله رب العالمين اركظ واشتغل في البيت واطبخ واطلع وما احس بأي تعب

2. الترجيع .. لين الحين ارجع بس في الاسبوع مره .. ويكون السبب مني .. اكل بسرعة وابلع الاكل قبل ما امضغه عدل .. اللحم يتعبني واااايد معدتي ابدا ما تتقبله

3. الامساك .. قلة الاكل سببت لي امساك قمت اشرب عصير برتقال والحمدلله تعدل الوضع

4. الغازات .. كرشتي جني حامل وبربي من الغازات .. لان وقت العملية يعبون المعدة كلها غاز وبعدين يسحبونه بس البقايا ما تروح الا بعد ايام .. والشي اللي فادني المشي ولو كان بطيء وكنت افور نعناع واشرب الماي ووااايد ارتحت

4. انسدت نفسي من الألبان .. الحليب ومشتقاته تسويلي لوعة .. يمكن انا بس استوالي هالشي ويختلف من جسم لآخر



الحين أكيد تبون تعرفون وين الندم في الموضوع ... ندمت اني ما سويت العملية من قبل .. اني ما حنيت على امي يوم كنت بنت عشان اسويها وافتك .. الحياة غير بعد العملية التعب كان اول شهر بس وكل يوم حالتي تتحسن اكثر واكثر الحمدلله .. شكلي تغير واللي يشوفني يقولي صغرتي وااايد ويهج ضعف .. ثقتي في نفسي زادت واشوف الاعجاب في عيون ريلي .. حتى امي غيرت رايها يوم شافت الفرق ويوم تأكدت اني الحمدلله بخير ومافيني اي شي.

انا ما كتبت هالموضوع عشان اشجع البنات على العمليه واسوي دعايه لا والله .. ادري ان وايد بنات حالتهم مثل حالتي ويمكن اخس .. حبيت اطرح الموضوع للفايدة وانا ما لجات للعملية الا بعد ما استفذت كل الطرق الآخرى

لأي استفسار انا حاضرة وفي الخدمة .. وفالكم طيب خواتي .. واتمنى انكم تدعولي بالصحة والعافية

المزيد من آخر المواضيع من نفس القسم:

• افضل نظام غذائي مضمون لتنحيف البطن امن وفعال
• رجيم الكيتو في رمضان
• اهم اخطاء شائعة في الرجيم
• افضل طرق تنحيف الارداف
• خطوات واسرار تنحيف البطن بسرعة
• افضل نظام غذائي للتنحيف بعد الولادة القيصرية
• افضل طرق تنزيل الوزن الثابت
• افضل رجيم سريع ومضمون للتنحيف
• افضل اكلات لتنحيف وشد البطن
• طريقة زيادة الوزن في اسبوع للنحيفات

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ناروتا]

ما شا الله سردك للقصة شيق حسيت حالي عشت الأحداث هههههههه , الف حمد الله على سلامتك اختي , وان شا الله تنزلين اكثر واكثر والله يرزقك بالذرية الصالحه

بس حبيت اقول شي في خاطري , لو انك ما قصيتي المعدة وسويتي الي سويتيه بعد العمليه لمدة 3 شهور (يعني اول شهر ماي وعصاير واكل بسيييط وثاني وثالث شهر اكل بكميات بسيطه وتمضغين على مهل ومتجنبه المقالي والاكل الدسم والخ ) اعتقد كان نزل ونزنك بدون الحاجه لعمليه

وحابه اسألك اختي عن الخياطه هل هي واضحة؟

[العـــــاش]

أهلا عزيزتي ناروتا

الكلام سهل بس التطبيق صعب .. من اشوف الأكل افتتتح على طول أي رجيم أي بطيخ حاولت فترة امسك نفسي بس المشكلة اذا خربت وزني يزيد دبل

بخصوص الخياطة تبين بس شي بسيط .. سوولي 3 فتحات وكل فتحة طولها سانتيين تقريبا لونها باهت ويدوب تبين

[وثيـــــر]

الف الحمدالله على السلامة...

بس ما قلتيلنا وين سويتي العملية.

[فرحة عسل]

ريجيم السوائل بنفسه ينزل الووزن ... ~~
"
"
"
و هذا طبيعي يعطون المره عصائر او نظام غذائي ما بعد عمليات [الشفط و القص ]أسمه نظام بعد التكميم
حتى العاقل اللي ما سوى [هالعمليات القص او الربط او هالخرابيط ].... [بيفلح ] في النظام ...

[ إذا ] طبقه من الخاطر
"
"
"
"
في هالنهايه أبد ما اشجع هالعمليات ... لو شو مصار فيني انصح بالدايت
و الرياضه و لو اتم عليها اسنين و دهور ولااسويها
"
"
"
غيرهم [ ماشي ] فايده .... ~~~
"
"
"
المهم سلامتج وصحتج بخير الحين
و الاهم من جي تستمري بالدايت حتى ما يرجع خسارتج ....
"
"
"
موفقه

[مويز]

مشاء الله عليج قويه صراحه أنا أريد أسويها بس أمي تقولي لا وريلي بس انا صدق تعبانه من ثقل جسمي وحركتي ووزني زايد دبل دبل دبل والرجيم ماينفع ابدا وأن شاء الله أني بسويها

والحمد للله على سلامتج يالرشيقه

[سمكة الحب]

الحمد لله على سلامتج وهذا احسن قرار خذتيه..
وانا مثلج كل حد كان رافض فكرة التكميم وخاصه الوالده بس باصرار مني سويتها
والحين انا كملت شهر والحمدلله كل شي اوكي بس اول عشر ايام كنت تعبانه من ويع العمليه بس الحين احسن
وانا انصح اللي ماتقدر تقاوم الاكل وتستمر فالرجيم انها تسويها بدون تردد.. وأهم شي انها تختار المستشفى العدل
انا سويتها في القاسمي لاني وايد قريت عن العمليات الناجحه اللي سووها وشفت بعيني النتايج على بنات اعرفهن...

[سمكة الحب]

الحمد لله على سلامتج وهذا احسن قرار خذتيه..
وانا مثلج كل حد كان رافض فكرة التكميم وخاصه الوالده بس باصرار مني سويتها
والحين انا كملت شهر والحمدلله كل شي اوكي بس اول عشر ايام كنت تعبانه من ويع العمليه بس الحين احسن
وانا انصح اللي ماتقدر تقاوم الاكل وتستمر فالرجيم انها تسويها بدون تردد.. وأهم شي انها تختار المستشفى العدل
انا سويتها في القاسمي لاني وايد قريت عن العمليات الناجحه اللي سووها وشفت بعيني النتايج على بنات اعرفهن...

[Cobon]

ما شاء الله عليج

بس فعلا العملية محتاج شخص واثق من نفسه
دكتور شاطر + يخاف الله
و ع الاقل قبل العملية .. المريض يسوي دايت و ينزل وزنه
و ما عنده اي مشاكل صحية او ضغط او سكر !

انا اعرف وحدة من اهلي سوت العملية و حليلها لين يومكم في العناية ما ادري شو اللي صار بس خبروني انها تنزف و جي
بس اللي اعرفه انها تعبانة وايد و كملت 5 شهور ع العملية و بعدها تعبانة و سوت قص معدة

[عذوج]

الف الف مبرووووووووك حبيبتي والحمدلله عالسلامة احسن قرار اخذتيه هالعملية ولا تحزنين وارفعي راسج فوق وابتدي احلا حياة جديدة مع ريلج بلعكس انا اشجع هالعمليات لانه اللي مايشجعون ماحسوا بالمتن الفظيع والاثار النفسية والجسمية اللي يمر بها الانسان المتين والحياة السوداء اللي يعيشها بس شاطرين يتكلمون وبس , عيشوا اول الاجواء وبعدين ارمسوا , صح المفروض ريجيم صحي ورياضة ومن هالكلام بس لو كان سهل هالكلام جان ماعانوا ناس كثير من السمنة وجان طبقوه ع طول ومالقينا حد متين _ المهم حبيبتي داري على عمرج وراجعي الطبيب وانتبهي لصحتج وامشي ع كلامه وماعليج بالناس لاتسمعينلهم ابدا حتى لو كانوا اهلج , اباركلج من كل قلبي حبيبتي , عاد خبرينا عقب كم نزلتي ويومياتج مع قص المعدة علشان تشجعينا , والف الف مبرووووووووووك مرة ثانية

[حور 123]

ماشاء الله عليج

ريلي سوا العمليه ف رمضان صح انه اول 3 ايام وايد تعب ويرجع بس الحمدلله اموره طيبه الحين

والله انا كنت اشجعه يسوي العمليه لان السمنه تسبب امراض خطيره وجلطات الله يبعدها عنا جميعا

ربي يسعدج اختي و توصلين للوزن المثالي

[دلايع]

هلا والله بالعـــاش ..

تصدقين طول الوقت وانا اقرى موضوعج اقول ياربي ليش ندمت خخخخخخ .. والله انج ييتي ف وقتج .. اول شي مبروووك عليج الرشاقه وعقبالي يارررب
انا عمليتي الاسبوع الياي عند نفس الدكتور ويالله اني محتاجه تشجيع من اي شخص سوى العمليه .. لان جد هالكلمتين اثرهم وايد ف نفسية الانسان المتين ههههههه
انا عندي وااااايد اسئلة .. في مجال نتواصل عشان اسألج عن السوالف اللي شاغله بالي

[العـــــاش]

الف الحمدالله على السلامة...

بس ما قلتيلنا وين سويتي العملية.

د. عبدالسلام الطائي يسوي عملياته في مستشفى ميدكير في دبي .. بس المراجعة قبل وبعد العملية تكون عنده في العيادة

[العـــــاش]

ريجيم السوائل بنفسه ينزل الووزن ... ~~
"
"
"
و هذا طبيعي يعطون المره عصائر او نظام غذائي ما بعد عمليات [الشفط و القص ]أسمه نظام بعد التكميم
حتى العاقل اللي ما سوى [هالعمليات القص او الربط او هالخرابيط ].... [بيفلح ] في النظام ...

[ إذا ] طبقه من الخاطر
"
"
"
"
في هالنهايه أبد ما اشجع هالعمليات ... لو شو مصار فيني انصح بالدايت
و الرياضه و لو اتم عليها اسنين و دهور ولااسويها
"
"
"
غيرهم [ ماشي ] فايده .... ~~~
"
"
"
المهم سلامتج وصحتج بخير الحين
و الاهم من جي تستمري بالدايت حتى ما يرجع خسارتج ....
"
"
"
موفقه

صح كلامج المواظبة على نظام السوائل مفيد ويعطي نتيجة .. بس اتحدى أي انسان يقدر يستمر على هالنظام اكثر من اسبوع لانه جدا متعب
انا ما لجأت للعملية الا من بعد تفكير واستخارة وصدقيني لكل شخص حاجته وظروفه

اشكرج على المرور

[العـــــاش]

مشاء الله عليج قويه صراحه أنا أريد أسويها بس أمي تقولي لا وريلي بس انا صدق تعبانه من ثقل جسمي وحركتي ووزني زايد دبل دبل دبل والرجيم ماينفع ابدا وأن شاء الله أني بسويها

والحمد للله على سلامتج يالرشيقه

الله يسلمج من كل شر عزيزتي .. اذا كنتي مقتنعة كلمي ريلج وتفاهمي وياه وحاولي تقنعينه بهدوء وخليه يروح معاج عند دكتور شاطر ويسمع الكلام بإذنه عشان يتطمن
الله يوفقج ان شاءالله ويارب تفتكين من عقدت السمنة .. حاسه فيج والله