قصيت معدتي .. وندمت !!

[ملاك_بوظبي]

مشكوووره اختي على موضوعج، ساعدتيني في اتخاذ القرار و الله ايسر اللي فيه الخير

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[أم سيف و سارة]

انا سعيده جدا ﻷجلك ﻷنك اتخذتي القرار الصحيح
و أنا أيضا" خضعت لعملية طوي معده و الحمد لله
و لكن أحب أن أوضح لأخوات هناك فرق بين الوزن الزائد و بين مرض السمنه
فهذه العمليه لخسارة 30 كيلو و أكثر

[حياتي الجديدة]

مراحب العاش ... انا وزني 117 وأفكر اسويها ... بس حبيت استفسر عن البداية ... شو كان نوع أكل اول الأيام أقصد وشو كنتي تأخذين فتامينات
وشو نوعها ... سمعت انه العملية فيها تسريب ومدري شو .؟
فهميني شو اللي حسيت من سويتي العملية ...؟
الحلويات مثل الشوكولا والايسكريم يمرون بسهوله
شو الممنوع وشو العادي مع العملية ...؟

[ام يوسف ويس]

حمد لله عل سلامتك

[التورمالين]

الله يعطيج الصحة والعافية و مبروك

[yara85]

قصيت معدتي .. وندمت !!

السلام عليكم ورحمة الله وبركاته

قبل ما تقرون قصتي ويا عملية قص المعدة أتمنى انكم تدعولي بالذرية الصالحة

بدت معاناتي ويا السمنة فجأة وكان عمري وقتها 23 سنة .. بدا يزيد وزني كل سنة تقريبا 10 كيلو لين وصلت 92 وثبت على هالوزن
كنت اسوي رجيمات وما خليت حبوب تنحيف في الصيدلية وسجلت في الجم واسوي رياضه وينزل وزني نزول حلو عقب تضعف المعنوية ويرد وزني يزيد مرة ثانية.
ومن كثر ما كنت اخربط واضعف وارد امتن في فترات بسيطة استوت عندي مشكله في المرارة وراجعت اكثر من دكتور في البلاد وبرع البلاد وقالولي لازم تشلين المرارة لانها مليانة حصى
توكلت على اللي وسويت عملية استئصال المرارة سنة 2012 وكانت عملية ناجحة والحمدلله وارتحت وتغير نظام اكلي وقمت ابتعد عن الاكلات الدسمة بس وزني حلف يمين انه ما ينزل !!

كنت اسمع عن عمليات التنحيف وكانت ويايه وحدة في الدوام مسوية عملية تحويل مسار في لبنان وزنها كان 116 وخلال سنتين وزنها 56 وكانت تقولي انها وااايد مرتاحة ونفسيتها تغيرت .. بس انا من طبعي خوافه واتردد واااايد وما اقدر اثق في اي دكتور خصوصا في هالنوع من العمليات .. وايد افكر في الاثار الجانبية وتأثير العمليه بعد 5 او 10 سنوات جدام وغيرها من المخاوف .. وغير هذا كله اهلي مستحييييييييل يخلوني اسوي العملية.. لمحت للوالدة بالموضوع ورفضت وسوت لي محاضرات ويابت لي قصص سمعتها عن فشل هالنوع من العمليات .. وشليت هالفكرة من بالي مؤقتـــــا


سنة 2013 الله كتب لي النصيب وانخطبت وملجت شهر 11 وزني وقتها كان 90 وبما اني طويلة .. كان المتن متوزع كل مكان واكثر شي منطقة الزنود يعني الشحوم مب متركزة مكان واحد.. وكنت احاول في فترة الملجة اني اخفف وزني لين العرس وكنت واااايد شاله هم هاليوم وكيف بيطلع الفستان و .. و... و....
عرسي كان شهر 3 سنة 2014 والحمدلله عدا على خير وكل شي كان حلو ومثل ما خططت له وبديت حياتي الزوجية اليديدة بكل تفاؤل وفرحة وسافرت شهر العسل واستانست ورجعت وبدت المعاناة اليديدة.

معاناتي بعد العرس وزني بعد ما كان 90 نقز ووصل 107 في اقل من شهر والسبب اكل المطاعم بما اني عروس يديدة وساكنة ويا ريلي في بيت بروحنا ما كنت اطبخ واكلنا كله من برع وغير هذا كل يوم عزيمة عند اهله وعند اهلي يعني كل اللي اسويه كان اكل وبس .. كل ملابس الزهبة اللي فصلتها وشريتها ما قامت تدخل !! كل شي استوى ضيق حتى خواتمي ونعولي .. تخيلو طول عمري البس مقاس 39 فجأة استوى مقاس ريلي 41 والدورة تلخبطت شهر كامل ما نزلت لان وزني زاد فجأة.. لاعت جبدي من عمري وياني اكتئآآآآآآآآآآب حااااد و24 ساعة دمعتي على خدي وكرهت اشوف عمري فالمنظرة وريلي يتحراني متولهه على اهلي ويبالي وقت اتعود على وضعي اليديد .. ويوم ازور اهلي اكثر كلمة اسمعها .. عواااش متنانة .. عواش غززتي .. عواااش انتفختي .. وهالشي كان يزيد اكتئآبي وقمت آكل اكثر واكثر بدال ما أخفف وانتبه !!

في هالفترة بديت افكر جديا في موضوع العمليات وسويت بحث كااااااامل .. ريلي يسير الدوام وانا ايلس اقراااا عن العمليات مرات اقتنع ومرات اتخوف لين ما قررت اني افاتح ريلي في الموضوع .. وفعلا لمحت له ان وزني زايد وقال انا بعد وزني زايد شي طبيعي تونا متزوجين .. قلت له انا وزني ما ينزل بسرعه وبيأثر على الحمل وممكن يتاخر وتستوي لي مضاعفات بسبة وزني مثل السكر والضغط إلخ.. آخر شي قلت له انا ابا اسوي عملية قص معده !!
تم يطالعني يقولي انتي شو تقولين .. ينيتي .. وهزبني وسكر الموضوع .. وليلتها تميت اصيح وما ياني رقاد ..وكل يوم كنت افتح هالموضوع واحاول اقنعه ومن بعد اصراااار شهر كامل وخليته يقرا عن العملية وسأل ربعه وكلم اكثر من دكتور وافق واخيراااا .. وكانت هذي اول خطوة.

خذت موعد عند الدكتور عبدالسلام الطائي يوم السبت تاريخ 3/5/2014 سرت العيادة وسألني كم سؤال عن تاريخي الصحي وريلي كان يحقق ويا الدكتور ويسأل وااايد .. وسألني متى تبين العملية .. قلت له باجر دكتور O_o كنت ابا اسوي العملية بسرعة عشان ما اتردد واغير رايي قالي ما يستوي لازم تحاليل تسوينها في البداية عشان نتطمن ان كل شي طبيعي وبعدين نتوكل ونسوي العملية وٍسألت الدكتور عن الحمل واذا في خطورة في المستقبل .. قال ماشي خطورة بس اول 6 شهور تجنبي الحمل لان البيبي محتاج اكل وجسمج ما بيتحمل وبتتعبين واذا صار حمل راجعي دكتورة نسائية توصف لج مكملات غذائية تساعد الجنين .. المهم تحددت العملية يوم الجمعة تاريخ 9/5/2014 وطبعا محد من اهلي يدري .. لا ام ولا اب ولا اخت .. بس ريلي اللي كان وياي في كل شي وكنت اشوف علامات الخوف والقلق في ويهه بس يحاول يبين انه طبيعي وبخير .. وقلت له من اطلع من العمليه بالسلامة اتصل في امي وخبرها ... كنت احتاج انها تكون يمبي بس فضلت اني ما اخبرها عشان ما تأثر على قراري وتخليني اغير رايي.


وطبعا كانت في طقوس قبل العملية منها موعد ويا دكتور التخدير وتمارين التنفس .. واللي حابه تعرف عنها بالتفصيل بشرحها لها ان شاءالله

ووصلنا لليوم الموعود ولازم اكون صايمه قبل العملية 8 ساعات .. دشيت المستشفى وانا على وشك اني اغير رايي كنت خاااايفه .. وسرت غرفتي ويابولي لبس العمليات وجهزوني وحطولي المغذي وريلي ماسك ايدي ويشجعني ما تركني ولا لحظة .. ساعات الانتظار كانت واااايد صعبة وبطيئة وتوتر .. دخلت غرفة العمليات الساعه 10 وخلوني في غرفة الانتظار هناك فترة مب بسيطة لان في عملية قبلي وبعد كانت قص معدة .. وصل دوري وخدروني ومن بعدها ما حسيت بعمري الا وانا في غرقة الافاقة وآآلااااااااام فظيعة فيني ومن كثر الويع ما اقدر احدد مصدرة.. والنيرس كانت تضربني على خدي عشان اصحصح وتقولي مداااام عمليه خلاااااص .. وانا اقول في خاطري عملية شو انا وييين وشو السالفة !!!
طلعوني من الافاقة ودوني غرفتي وريلي كان هناك يترياني .. طبعا ما اتذكر واايد تفاصيل لاني كنت مدوخه تماما من المخدر والويع ..وريجي ناشف ابا ماااي بس قالولي ممنوع لين باجر الصبح بنسويلج اشعة عشان نتأكد ان مافي تسريب او مضاعفات لاسمح الله وعقب اشربي ماي .. كنت احس بويع من برع وداخل .. وما كنت اقدر اتحرك على راحتي بسبب الخياطة وهالشي جدا مزعج

المهم .. كنت ابلع ريجي وارجع (عزكم الله) يابولي طاسه عشان ارجع فيها وكل ساعتين يبدلونها .. وكنت كل ما ابلع ريجي ارجع وتميت على هالحال لين الصبح .. وريلي اتصل في امي وخبرها .. وامي خبرت ام ريلي ودقايق اشوفهم واقفين عند راسي .. ريلي مسكين تهزأ وهزبوه هزاب لانه طاوعني وخلاني اسوي العملية وامي فديتها كانت تقول وااايد كلام وتلومني بس انا مب في حاسيتي وما اقدر اركز وياااهم بعدني متخدرة من البنج.

الساعه 8 الصبح ودوني غرفة الاشعة وعطوني محلول طعمة خاااايس بمعنى الكلمة لازم اشربه دفعة وحده ومن خلال التلفزيون يشوفون مجرى المحلول وين يروح بالضبط .. وما كنت اقدر اشرب .. واااايد تعذبت لين شربت المحلول وقدروا يصورون بالاشعة .. كنت اشرب شوي وارجع والدكتور يقول شربي مره ثانيه لين عصبت عليه وخلاني ارتاح شوي وعقب شربوني مره ثانيه.

رجعت الغرفة وبعد كم ساعة مر علي الدكتور عبدالسلام وطمني ان كل شي اوكي والعملية ناجحة وسمحلي اشرب ماي وعصير تفاح غير محلى .. بديت اتحرك في الغرفة واروح الحمام عزكم الله .. هالشي ضرورري والنيرس كل ساعتين تقولي تحركي عشان التجلطات .. اول ما شربت ماي رجعت على طووول ما تحملت .. وعصير التفاح نفس الشي رجعته .. كانو يصبولي عصير في الغطا مال الدوا عشان اشرب شوي شوي .. لازم رشفه بس .. وبعد ما اشرب كنت ارجع على طووول .. وقالولي هالشي طبيعي !!

المهم ثاني يوم طلعت من المستشفى .. بس آثار البنج بعدها فيني .. كنت تعبانه وراسي ثقيل امشي خطوتين واتعب وعطوني ادوية وكبسولات لازم اطحنها واذوبها في ماي واشربها وغيارات حق الجرح !! في البيت كنت احاول اشرب ماي وعصير تفاح بس كنت ارجع .. ما قدرت اتحمل ووقفت الشرب بس ريلي كان يحن على راسي عشان اشرب شوي.

تميت على هالحالة 4 او 5 ايام واكثر شي تعبني هو تأثير البنج .. ما ادري البنج كان واايد قوي او جسمي انا اللي ما تحمل .. كنت احس اني مهلوسه وراسي ثقيل وما اقدر اتحرك وكنت اشرب ماي وعصير تفاح .. رشفات فقط واكثر الاوقات كنت ارجع بس الترجيع بدا يخف تدريجيا .. وبعد عشر ايام راجعت العيادة وفتحوا الخياطة ونظفوا مكان العملية وقالولي خلاص خلي المكان مكشوف لا تحطين شاش وقست وزني وكنت نازلة 7 كيلو ..

جدول الأكل كان كالتالي لمدة شهر: اول عشر ايام ماء وعصير تفاح غير محلى .. ثاني عشر ايام سوائل غليظة شوي مثل الحليب وعصير الكوكتيل وثالث عشر ايام اكل مهروس مثل الكراميل والكاستر والهريس بدون حب او قطع
ومن الشهر الثاني اقدر اكل شي ما عدا البقوليات والمكسرات .. والمشروبات الغازية ممنوعة 3 شهور عالاقل

كل شهر كنت اروح آخذ ابرة فيتامين بي 12 وعطوني حبوب فيتامين حق شعري ومكملات غذائية .. ومن بعد شهر من العملية بديت آكل اي شي بس بكميات قليلة يعني اذا آكل عيش لازم بشوكة وامضغ الأكل عدل وبعدين ابلعة
واجهت صعوبة في الاكل لاني متعودة ابلع بسرعه واكلي كان سريع .. بس احاول اعود عمري اكل شوي شوي

في رمضان تعبت شوي اول اسبوع .. لان الاكل دسم ومقالي ومعدتي ابدا ما تقبلت اللقيمات والسمبوسه .. كنت آكل هريس وعيش ودياي واشياء خفيفه بس الكميات بسيطة يعني خاشوقة عيش وخلاص اشبع.. والسحور تمر وموز وماي

اليوم .. كملت 3 شهور من العمليه ومن 107 وزني استوى 87 الحمدلله لك الحمد والشكر .. وآكل اي شي اباه بس بكميات قليلة يعني ما انحرم من شي .. اصلا من بعد العملية نسيت شي اسمه اكل ويوع .. ما احس بيوع ابدا وريلي يتم يحن على راسي عشان اكل وما يستويلي هبوط ..

السلبيات بعد العملية ..
1. كنت بسرعة اتعب واحس بدوخة .. اروح الجمعية امشي شوي احس اني ركظت عشره كيلو .. ارد ايلس في السيارة مول ما فيني حيوية ونشاط .. طبعا اول شهر حسيت بهالشي بس الحين الحمدلله رب العالمين اركظ واشتغل في البيت واطبخ واطلع وما احس بأي تعب

2. الترجيع .. لين الحين ارجع بس في الاسبوع مره .. ويكون السبب مني .. اكل بسرعة وابلع الاكل قبل ما امضغه عدل .. اللحم يتعبني واااايد معدتي ابدا ما تتقبله

3. الامساك .. قلة الاكل سببت لي امساك قمت اشرب عصير برتقال والحمدلله تعدل الوضع

4. الغازات .. كرشتي جني حامل وبربي من الغازات .. لان وقت العملية يعبون المعدة كلها غاز وبعدين يسحبونه بس البقايا ما تروح الا بعد ايام .. والشي اللي فادني المشي ولو كان بطيء وكنت افور نعناع واشرب الماي ووااايد ارتحت

4. انسدت نفسي من الألبان .. الحليب ومشتقاته تسويلي لوعة .. يمكن انا بس استوالي هالشي ويختلف من جسم لآخر



الحين أكيد تبون تعرفون وين الندم في الموضوع ... ندمت اني ما سويت العملية من قبل .. اني ما حنيت على امي يوم كنت بنت عشان اسويها وافتك .. الحياة غير بعد العملية التعب كان اول شهر بس وكل يوم حالتي تتحسن اكثر واكثر الحمدلله .. شكلي تغير واللي يشوفني يقولي صغرتي وااايد ويهج ضعف .. ثقتي في نفسي زادت واشوف الاعجاب في عيون ريلي .. حتى امي غيرت رايها يوم شافت الفرق ويوم تأكدت اني الحمدلله بخير ومافيني اي شي.

انا ما كتبت هالموضوع عشان اشجع البنات على العمليه واسوي دعايه لا والله .. ادري ان وايد بنات حالتهم مثل حالتي ويمكن اخس .. حبيت اطرح الموضوع للفايدة وانا ما لجات للعملية الا بعد ما استفذت كل الطرق الآخرى

لأي استفسار انا حاضرة وفي الخدمة .. وفالكم طيب خواتي .. واتمنى انكم تدعولي بالصحة والعافية

أولا الحمدلله عسلامتك وثانيا غريب قصتك قبل العملية كم هي مشابهه لوضعي انا لما كنت بنت كان وزني كثير زايد وثاني شي قبل عرسي نزلت لصار 82 وكان جسمي حلو تقريبا بالنسبة لطولي ولكن بعد سنة زواج وانجاب طفلي ازداد وزني لبعد الولادة وصل لل 118 كيلو ورجعت نزلتو شوي ولكن استقر بين 107 و110 ولم يتحرك بعدها والان صار عمر ابني سنة و9 شهور وانا جدا مزعوجة وهناك تشابة انو ايضا بسبب تخبي الرجيمات كان عندي بحصة بالمرارة وعملت عملية المرارة تنظيريا عن طريق 3 ثقوب والتشابه ايضا ان لمحت لامي بخصوص العملية ورفضت تماااماا أما زوجي لم يشجعني في البدء ولكن لما صار يشوفني مزعوجة قلي اذا كانت امنة اعمليها ولكن المشكلة انا هنا في الامارات بغربة عن أهلي وحابي اعملها هون وما خبر اهلي لحتى اخلص من العملية بخير اذا الله راد ولكن الصراحة العمليات هنا غالية وبسوريا أرخص بكتير واذا نطرت لانزل عسوريا واعملها صراحة ما رح يخلوني الاهل اعملها ومحتااارة كتيير ولكن الي بدي قلك يا انو لما شفت قصتك والتشابه مابعرف كثير فرحت لما حكيتي انو نزلتي وزنك وانك مبسوطة لان حسيت حالي فيكي ونشالله يارب يجي يوم وافرح أنا بقصتي يااارب .... ف يا اختي مبروووووك ورح اسألك لو سمحتي كم سؤال صغير كم كلفتك العملية وكم المدة الي ضليتي فيها بالمشفى وهل الدكتور حس فيه مشكلة انو كنتي عاملة عملية المرارة قبل يعني هل في مشكلة أو قلك عادي وما بأثر العملية الاولى عن الثانية وومشكووورة سلف

[صفوويه]

ماااااااشاااء الله عليج صاحبه الموضووع قلبج قووي الصراحه لو انا مااسويها
الله يحفظج يااربي ^^

ما شاء الله عليج

بس فعلا العملية محتاج شخص واثق من نفسه
دكتور شاطر + يخاف الله
و ع الاقل قبل العملية .. المريض يسوي دايت و ينزل وزنه
و ما عنده اي مشاكل صحية او ضغط او سكر !

انا اعرف وحدة من اهلي سوت العملية و حليلها لين يومكم في العناية ما ادري شو اللي صار بس خبروني انها تنزف و جي
بس اللي اعرفه انها تعبانة وايد و كملت 5 شهور ع العملية و بعدها تعبانة و سوت قص معدة

><

حبيبتي الله يشفيها يااااااااااااارب

[مهرووووووه]

لو من البدايه سويتي رجيم السوايل كنتي ضعفتي 20 كيلو ف 3 شهور بدون عمليه ولا عوار ولا شي!!!

[ماحد شراتي]

حمدالله على سلامتج مع انها متاخره
شو جسمج ووزنج الحين ؟

[مسقطة القلب]

الحمدلله…..
مثل هالتجارب تشجع الناس…
الله يعطيك العافيه..

[شروقه]

عويش وينج غناتي
البنات عندهم اسئله ما رديتي
عاد انا جني يدوتهم خخخخ

الله يعطيج الصحه والعافيه

[ورقة ناعمة]

الف الحمدالله على السلامة...

ياليت يسوونها الخوات اللي وزنهن فوق 90

[wesamadi]

السلام عليكم
أولا الحمد لله على سلامة أختنا اللي عملت العملية
ومبارك نزول الوزن
ثانيا
الأخت اللي بتقول رجيم السوائل
ما اعتقد أنه سهل
ما بينفع إلا قص المعدة لأن أي أكل أو شرب قليل يشبعها
هي في البداية صعبة شوي أنا عن نفسي لا ترجيع ولا شي
المهم استخيري
واختاري الطبيب الجيد
أنا طبيبي هو عبدالسلام الطائي
كلفة العملية 45 ألف مع الكشفية الأولى اللي في العيادة
وحاليا صارلي ثلاث أشهر عاملة العملية
نقصت فيها 16 كيلو
أعمل معلمة يعني إجهاد وتعب غير إني أصلا نسبة دمي قليلة والحديد يكاد يكون عندي معدوم
بس أحس براحة لما أتحرك وأمشي وأقف في الفصل أمام طلابي
وإلى المزيد من النزول بإذن الله
الحقيقة اللي شجعني إنه ابني عملها من سنة
كان وزنه 126 والآن أصبح ولله الحمد والمنة 85

[nooraaaa]

ما انصح اي وحده بهذه العملية .. وحدة من اهلنا سوتها و الحين هي وايد تعبانه صح انها ضعفت 40 كيلو لكن جسمها ترهل و نفسيتها جدا تعبانه تعاني من اكتئاب و محرومة من الاكل ما تشتهي تاكل شي و تتعب بسرعه و شعرها نصه طاح و بشرتها تغير لونها .. حق شو الاذية و العذاب مافي احسن عن تخفيف الاكل و الحركة .. و اذا انتي طبيعة جسمج مليانة خلاص ارضي باللي مقسوم لج تراج حلوة بجميع الحالات .. حرام نحمل نفسنا فوق طاقتها .. عملية قص المعده مب سهله مثل ما تتخيلونها .. و هذا الطبيب عبدالسلام الطائي وايد يبسط الامور و يقولج تعالي عقب يومين بسويلج ياها كله عسب يكسب اكثر على حساب صحتج و حياتج .. كل شي خارج عن نطاق الطبيعه انا اشوفه مب زين .. حق شو يقصون معدتي 80% منها يعني بتستوي معدتي بحجم معده طفل عمره سنتين !
هل هذا شي طبيعي و معقول ؟؟

على العموم حبيبتي هذا قرارج و الحمدلله على سلامتج و زين انج طلعتي منها بسلامه و بأقل الخساير لانج صغيرة في السن .. هذه العملية خطيرة على المدى البعيد مب هينة مثل ما تتصورون و هذا كلام برفيسور اجنبي مب كلامي انا .. لو اتم دبة طول عمري ما بسويها خليني على تخفيف الاكل و الرياضة و ان شاء الله خير .. دمتم بخير

[العـــــاش]

برجع لكم بآخر آخباري

انتظروني