دعوة منكم تكفيني

**ميمي4** · 2014-08-07, 02:55

السلام عليكم

شحالكم خواتي

يمكن اغلبكم يعرفوني بس من الردود

اممم والله ماعرف شو اقول لأني مب من النوع اللي يحب يفضفض أبداَ

لكن عل وعسى دعوه منكم ف ظهر الغيب تسعدني طول حياتي

انا ما بدش بتفاصيل حياتي .. بس بختصر لكم الموضوع

المهم

معاناتي هي الوحده اللي اعاني منها بحكم اني بنت وحده وعندي اخ فقط .. ما عندي حد اسولف معاه ، الكل لاهي بحياته .. محد يسأل عني ولا يعبرني و قاعده فهالبيت لا شغله و لا مشغله ولا في شي يسليني جني بسجن ..!

بتقولون صديقات ؟

الصديقات انتثروا عقب ما طلعت من الجامعه و صاروا بس زميلات بالسنة حسنه اذا حد بيسأل .. مع اني والله شاهد اروح اعراسهم للحين و اسال عنهم وما اقطع حد .. بس انا الكل قطعني ..

و الاهل نفس الشي ، احس انا اللي كله اتلزق فيهم وانا اللي اتصل .. فشلة !

بقولكم شو اللي اتمناه

- اتمنى اول شي اكمل دراستي الجامعيه ، انا انفصلت من الجامعه لأن معدلي قام ينزل مع اني شاطره من ايام المدرسه بس حالتي النفسيه تدهورت فالجامعه و انفصلت .. حاولت ارد الجامعه او اسجل بأماكن ثانيه ما صار نصيب ، كله يقولون شهادتج جديمه مع ان شي حريم كبار يدرسون مادري كيف

وشي وايدين انفصلوا بس ردوا بعد مادري كيف !

فياريت اللي تعرف كيف اقدر اكمل دراستي والله ما انسى لها هالمعروف طول ما انا عايشه

يعني ابا حد ينصحني كيف اتصرف وين اروح وين اودي اوراقي ، اكتب رساله لمنو اكلم منو !
لأن ما عندي حد يفيدني حتى بالنصيحه !!
طرشت قبببل رسالة لـ مبرّه بس ما عبروني ..
بس يكون ( فجامعة الشارجه او المنطقة الشرقيه ، ماقدر اروح بعيد لأن محد بيوديني )..
و ما اقدر عالجامعات الخاصه ﻷن راتب الوالد ما يساعد .. و امي اهتلكت من كثر ما ودتني الجامعه نسأل و نستفتسر بدون جدوى

- خاطري اتدرب و آخذ دورات و اطور نفسي ، بس طبعا كل هذا ما بيستوي الا اذا اشتغلت و دلعت نفسي ..
قدمت اوراقي بالتوطين و الموارد بس طبعا لأني ما اراكض و محد يراكض لي اساسا فما ردوا علي ..

- انا وحده خجولة بدرجه ! حتى من ابوي !
فكرت قبل اني اكلم البث المباشر اللي ع قناة الشارجه عن موضوع الدراسه او الشغل ، بس عارفه اني ما بقدر اقول جملتين على بعض ف غضيت النظر ..

والله انا مب شاله هم الزواج كثر هم الدراسه ..

حبيباتي جد والله انا اسفه ماعرف شو خربطت

تأثير اخر الليل .. بس ان شاء الله فهمتوا علي و ما عقدتكم

آخر شي بقوله لا تتحروني اني وحده سوداويه ، لا والله بالعكس انا وحده متفاااءلة بعطايا رب العالمين ..
بس انا آخذ بالاسباب .. احس لازم اتحرك و اسوي شي عشان الله يرزقني .. يعني مب قاعده فالبيت و اتريا الفرج .. فهمتوا ؟

و الحمدلله علاقتي ويا ربي وثيقه ، صلواتي ما اقطعها و القران يوميا و عبادات سريه الحمدلله

ف ياريت تنصحوني ، والله تكفيني نصايحكم و دعواتكم اللي تبرد القلب

انتوا نفس خواتي الكبار عشان جي لجأت لكم من عقب رب العالمين ^^

كنت أبي ألون و اكشخ الموضوع بس جنه المساحه ما تسمح << متفيجه

ادعولي تتسهل اموري والله يرزقني و يرزقكم بكل اللي تتمنونه يا رب

والملائكة بتدعيلكم بالمثل ^^

و الموضوع قابل للحذف

الموضوع: دعوة منكم تكفيني

أدوات الموضوع

عرض

مشاهدة المواضيع

دعوة منكم تكفيني

المزيد من آخر المواضيع من نفس القسم:

المواضيع المتشابهه

نصيحة منكم تكفيني ..

دعوة حلوة منكم تكفيني

دعوة بظهر الغيب منكم تكفيني

دعوه منكم تكفيني....

دعوة منكم تكفيني