ابي حل

[Al3'wya]

مرحبا الغاليات

عندي مشكله وهي اخو ريلي واايد يدخل فاشيا تخصني بدون معنى

ريلي مسافر تدريب مع دوامه لمده 3 شهور ، ومن اللحظه اللي سافر فيها اخوه قام يدخل فكل صغيره وكبيره تخصني والمشكله هو عنده بزنس يعني مايداوم وقاعدلي عالدقه

انا ساكنه ففله فبيت عمي وهو متزوج وعايش معاهم فنفس البيت ، فيوم الصبح يدق الجرس من الساعه 6 ونص اونه يقومني للدوام ؟ محد طلب منك هالشي اول مره طوفتها المشكله تم 4 ايام ع نفس الموال ، دقيت لريلي وخبرته بعدين ريلي دق قال هو يقول انتي قايله لحرمته توعيج بس هي تلتهي الصبح وهو ايي بدالها

مع اني والله ما قلتلها شي ولا حتى طلبت من حد يقومني الصبح .. الشي الثاني سيارتي بعد اسبوعين من سافر ريلي سيارتي فضت بطاريتها لاني نسيت الليتات مفتوحه .. فدقيت لخوي عساس يوديني الدوام ويعبي البطاريه عقب .. بعد ما خلص اخوي شافه اخو ريلي وقاله عطيني السويج يوم بتي بعطيها اياه تخيلو شل السياره تقريبا من الساعه 9 ونص الصبح للساعه 1 وربع فليل والسياره وسخه ومافيها بترول اونه كان يمرن السياره وطلع يودي حرمته بيت اهلها .. عالاقل استاذن ماطلبت منك شي.. والمشكله بكل قوات عين يقولي ترا بشل عنج سويج السياره ماعندنا حريم يسوقن

خدامتي ماسلمت منه .. كل يوم يدش بيتي ويقولها لاتنظفين كل يوم مره وحده تكفي ويقولها تعالي نظفي عند حرمتي .. واذا طلعت من البيت يتم يدق واذا قلتله رايحه مكان يقعد يسال لين طفرت وماقمت ارد عليه بس للاسف قام يلحقني كل مكان اروحله .. لو بروح المول القاه وراي .. حتى بيت اهلي لحقني له وتم واقف حوالي ال3 ساعات يترياني اطلع .. وايام يسال الموظفين فدوامي عني .. حتى لما اروح المستشفى يكون وراي

خبرت ريلي والمشكله صارت مشاكل فقلت ببدا احل الموضوع بنفسي .. خبرت عمي وعمتي قالولي خبري ريلج ونحن بنخبر ولدنا يخوز عنج

بنات كل شي يهون بس انه يشل ولدي من غرفته ويطلع ومايخبرني هذا اللي مابسكت عليه .. تخيلو اليوم عندي اجازه لان ولدي عنده موعد نشيت الساعه 10 عشان البس ولدي عشان نروح المستشفى مالقيته .. صرت مثل المينونه ادوره واسال الخدم .. حتى حرمته سالتها قالت ماشفته وما اهتمت وصلت لدرجه اني ببلغ الشرطه ورحت اشوف تسجيل الكميرا اللي فغرفه ولدي لقيته داخل وشله وهو راقد

تخيلو يا حوالي الساعه 2 ونص ويايب ولدي محلق عالزيرو وفيه طر فيبهته وملزق وبكل بساطه يقولي ولدج ماقعد عند الحلاق دواه يوم انطر راسه .. بصراحه انا ماعرف شو بالضبط قلتله بس شليت عمري ورحت بيت اهلي وقلت لريلي يوم بترجع تعال خذني من بيت اهلي


الحين شو لازم اسوي فيدوني حبيباتي

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية