جزر المالديف

**ماكو شراتي** · 2014-06-16, 04:54

مرحبا بنات
بصراحة تعبت من كثر ماادور ف هالمواقع
ياليت البنات اللي ساروا لها يفيدونا
شو احسن فندق من حيث النظافة و الاهتمام و السعر يكون اوك
لاني شفت وايد اراء و الاغلب يمدح فندق فور سيزن و سن ايلند و غيرهم
و شو الافضل برايكم ؟ فندق ع الشاطي ولا بانجلو ف وسط البحر
ولو اجرنا بانقلو كيف طريقة وصولنا للمطاعم و الشاطي بتكون و شو رايكم بالاكل
و يحتاي اودي معاي حلويات و شبسات ولا لا
و بالنسبة للفراش نظيف ولا اخذ معاي وايد احاتي هالنقطة
مااحب انام بفراش حد مستعملنه قبلي
و هل تنفع لشهر عسل
اعذروني على كثرة الاسئلة

المزيد من آخر المواضيع من نفس القسم:

**شيخه المنهالي** · 2014-06-16, 09:54

إن شاء الله البنات يفيدونج .. لاني بعدني يالسه اجمع معلومات عنها وماعندي اي خبره ^^

**حمده الفلاحي** · 2014-06-16, 13:06

المالديف رووووووعة وخياااااااااااااااليه وتنفع لشهر العسل والاستجمام
وفندق فور سيزن وفندق دوست تاني وايد روعه ونظييييييييييييف والناس جداااا طيبه
وطبعا الأفضل كوخ فالبحر وعادي مسوين مكان تمشين فيه لين ماتطلعين من صوب البحر
والأكل رووووووووووووووووووووووووووووووووووووووووووعة وودي معاج جبسات عادي
وطبعا يتعاملون بالدولار ...
وطرق النقل إذا كانت الجزيرة قريبة من المطار يكون بالطراد أما إذا بعيدة بالطيارة المائية

روحي ومابتندمين وأنا ناوية اكرر زيارتي مرة ثانية ان شاء الله

**مناي 1973** · 2014-06-22, 21:28

بتحصلين في موقع العرب المسافرون كل المعلومات عن جزر المالديف والفنادق وكل شي

**Bnt elnour** · 2014-06-22, 23:00

شوفي حبيبتي .. اول شي لازم تقررين تروحين في الجو المناسب

عندج من شهر ١٢ لين نص شهر ٤ وباقي الشهور تكثر الامطار والرطوبه

طبعا هذا ما يمنع انج تسيرين لان المالديف جو متقلب.

***

ثاني شي .. في فنادق توصلين لها عن طريق الطائرة المائية في ناس يحبونها

ويشوفونها متعه ^^ وبعض الفنادق تكون قريبه بحدود ٢٥ الى ٣٠ دقيقه وتوصلين لها

عن طريق الطراد... طبعا ااذا معاج اطفال الطراد اامن اكثر من الطائرة

****

وبالنسبة للنظافة فنادق ٥ نجوم نظييييييييفه لا تحاتين.

***

بالنسبه للغرف .. انتي وميولج.. في حد يحب عالشاطئ وجدامه البحر ممكن تقعدين العصر

برع عند غرفتج وتستمتعين ... وفي ناس تحب البنقلو ع البحر ^^

وفي ناس يحجزون ليلتين بنقلو وعقب ليلتين ع الشاطئ.. للتنويع

وطبعا البانقلو له ممر طويل يربطج مع الجزيره تمشين لين توصلين..

****

بالنسبه للمطاعم كل جزيرة يكون فيها تقريبا مطعمين او ٣ منوعين

اذا انتي حابه ممكن تودين معاج جبس وحلويات بسكوت تصبييييره بين الوجبات

****

ومن الفنادق المقترحة:

****tara kihavah
****tara Naladhu
Havuan fushi
Four season

ولج حرية الاختيار

ويفضل يوم تحجزين تاخذي وجبتين

افطار وغدا / او افطار وعشا

.

واي استفسار انا حاضره

**كلي برآءه** · 2014-06-29, 18:23

انا جربت جزيره اسمها باندوس
جميله و نظيفه ووايد حلوه

تبعد 10 دقايق عن المطار بالطراد

**بيذامة** · 2014-07-11, 01:59

اختاري الوقت المناسب
لأنه في شهور يكون المحيط فيها هايج بسبب العواصف البحرية

**صمت الزمن** · 2014-08-18, 12:10

بالعكس جزر المالديف مب وايد رخيصة على حسب الفندق, انا رحتلها مال 3 ايام تقدرين اتمين فيها 4 ايام كفاية وعقب بتملين لانه كله بحر
بس اول ما توصلين كل قروب له مرشد سياحي اي شي تبين تطلبين منه وتسألينه وكلهم مسلمين ويسألونج عن الدين لانه الدين عندهم مش ذاك الزود, الحلو عندهم ديفيدي في الغرف تقدرين تودين وياج أفلام او مسرحيات, وعندهم مكتبه مصغره فيها كتب وافلام تقدرين تأجرين الفلم بس الحق ما تلحق لانه اذا كان المكان زحمه يادوب تحصلين فلم غاوي.

والحلو عندهم رحلات صيد اذا انتي من محبي الصيد بس وناسة تغيير جو ,, عندهم نوعين في النهار وفي المسا وكل توقيت الصيد عندهم غير فجربنا الاثنينه, وذا صدتي شي تقولين لهم يشوونه لج نفس اليوم لو تبينه او ثاني يوم, والمعروف في جزر المالديف سمجة (جوب) لذييييذة وايد

وأكلهم لذيييذ عيبني عصير الفراولة والأسباجيتي اللي يسوونه يضبطوونه وودج تاكلين صحنين مب صحن واحد

تراني لحفة وايد آكل
عندهم محل تاخذين من عندهم ادوات الغوص ولا نظارة البحر ومال التنفس العادي عسب يوم تتسبحين في البحر عندج العدة ويسكرون المحل من وقت على 5 ولا 6 العصر وحلو لو انج تاخذين معاج جوكلت ونولدز وجبس وهالشغلات البسيطة ^___^

واجازة ممتعة, اللي يحب البحر والهدوء والاسترخاء عليه بجزر المالديف بتستانسون ... صح قبل لا انسى الفليل بعض الاوقات ينزل نفاااف خفيف والجو يكون روعة ,, مع هذا جوهم حار ومشمس

**وردة الخور** · 2014-07-17, 20:13

انا نفس الشي ابا اسير للمالديف بس راسي عورني من الحوسة ريلي يشجعني وانا اتشجع عقب نهون نغير الوجهة ....
ابا معلومات كافيه من الوصول للمطار هل تحتاج سايق ولا من نوصل دايركت للجزر ومنو جربت الطايرة المائيه واللغة و الترتيب ... المكان اللي تقعدون فيه هل يكون خاص شو افضل طيران كم التكلفة لاربع ايام. هل تنصحونا الاطفال نوديهم ؟؟؟شو النضايح اللي تنصحونا

**Fa.R** · 2014-08-03, 11:40

المشاركة الأصلية كتبت بواسطة وردة الخور

انا نفس الشي ابا اسير للمالديف بس راسي عورني من الحوسة ريلي يشجعني وانا اتشجع عقب نهون نغير الوجهة ....
ابا معلومات كافيه من الوصول للمطار هل تحتاج سايق ولا من نوصل دايركت للجزر ومنو جربت الطايرة المائيه واللغة و الترتيب ... المكان اللي تقعدون فيه هل يكون خاص شو افضل طيران كم التكلفة لاربع ايام. هل تنصحونا الاطفال نوديهم ؟؟؟شو النضايح اللي تنصحونا

في فنادق موفرين أماكن لعب للأطفال بس الصراحة وايد بتحاتينهم
مثلا طفل أو طفلين يكفي بالكثير ..

أغلب الطيران يوفرون رحلات ل مالي

**Mall.08** · 2014-07-17, 20:23

لـ لأسف ما عندي علم
يا ليت اللي تعرف أي معلومه لا تبخل علينا

ويا ليت نعرف من تجاربكن
1- متى كانت السفرة [أي شهر]
2- اسم الفندق
3- مدة الاقامة
4- التكلفة

متابعة باذن الله

**سامية الروح** · 2014-07-19, 16:55

انا ذهبت الى جزيرة جاية ايلاند حلوة وتبعد حوالي 10 دقائق من مطار مالي جميلة والسكن في بيوت على شكل شاليه صغيرة وفي بيوت على شكل غرف في المحيط بس الصراحة ما تقدري تجلسين اكثر من 5-6 ايام في جدول للترفيه صيد ورحلة الى جزيرة محلية اسمها حراء فيها اشياء حلوة ورخيصة وتنفع هدايا وفي رحلة داخل غواصة وزيارة العاصمة مالي بس حلوة المالديف روحي والله يوفقك

**مس تاتوتة** · 2014-08-02, 02:45

شو سعر الاكل هناك سمعت انه ٥٠٠ للشخص الواحد ؟

**Fa.R** · 2014-08-02, 16:14

السلام عليكم،

أنا من عشاق المالديف وإن شاء الله أزورها
يوم من الأيام صدق أنه حلم يراودني من سنة هههههه
صارلي فترة طويلة اقرأ عنها و اشوف التقارير وفيديوهات
واقارن المنتجعات ،، بحاول أفيدكم باللي عندي ..

- مالديف عاصمتها مالي واسم مطارهم إبراهيم ناصر الدولي
- دولة إسلامية
- يجيدون اللغة العربية والإنجليزية
- يتعاملون بالدولار
- إجراءات المطار سهلة جداً
- ما تحتايوون فيزا
- أول ما تحجزون الفندق لازم تخبرونهم الساعة كم بتوصلون
وبيستقبلكم أحد أفراد الفندق و بيوديكم للإستراحة لين ما هم
يجهزون إجراءات التنقل
- لو الجزيرة قريبة من المطار يستحسن بالطراد
وماله داعي الطيارة المائية بس في حد يفضل الطيارة
معنى وايد قريت الطيارة مافيها مكيف و ريحة الله أعلم
بس لو حجزتوا جزيرة بعيدة عن المطار اكيد بتحتايون الطيارة

اكيد تحتايون حلويات و اجباس لان هناك كل شيء بفلوس ماشي ابلاش !!

طبعاً لازم تشترون بكج ،، مثلا للمعرسين يعطونهم بكج خاص: عشا ابلاش و نشاط بحري
و غيره

خاطري ازور وايد منتجعات هههههه
مثل:

Jumeirah Vittaveli

Dusit Thani

Niyama

Taj Exotica

Six Senses Laamu

Shangri la

هذيلا التوب عندي الصراحة

**munamoor** · 2014-08-04, 00:16

يعد منتجع هوفافن فوشي Huvafen Fushi أحد أفخم المنتجعات المالديفية على الإطلاق ، و المنتجع حائز على عدد من الجوائز من بينها أفضل منتجع شاطئي في العالم و الذي حصلت عليه عام 2008م و كذلك على العديد من الجوائز العالمية ، يقع في نفس مجموعة الجزر التي تقع عليها العاصمة ماليه Male و المطار الدولي وهي مجموعة جزر ماليه الشمالية North Male Atoll و يقع المنتجع على بعد 30 دقيقة بالقارب شمال غرب العاصمة ماليه Male و التي يقع بقربها الجزيرة التي عليها المطار الدولي .
يحتوى المنتجع على عدة طرازات من الفلل و هي الفلل الشاطئية Beach Bungalow و Deluxe Beach Bungalow و Beach Pavilion و الفلل المائية " أي التي فوق سطح البحر " Lagoon Bungalow و Ocean Bungalow و Ocean Pavilion للتعرف على ميزات كل فيلا و مساحاتها

XxxxxxxxxxxxxxxxxxxxxxxxXxxxxxxxxxxxxxxxxxxxxxxxxx x

الموضوع: جزر المالديف

أدوات الموضوع

عرض

العرض المتطور