حبيت أفضض

**عيوني كيوت** · 2014-06-08, 13:34

شخباركم حبايبي أنا بس متضايجة شوي وحبيت أفضض

وما عندي حد غيركم من بعد الله وانا ماعندي خوات بس

أعتبركم أنتوا خواتي وبس أبغي تدعولي بالخير

طبعا اللي يعرف مشكلتي أنا وخطيبي من مواضيعي

الجديمة بقولك الأحداث اللي صارت واللي مايعرف أنا بخبركم

موضوعي باختصار أنا كنت مخطوبة وانا وخطيبي نحب بعض بس انفصلنا رسمي

من تقريبا 3 شهور بسب مشاكل مابينا (أنا أعترف أني انا سبب من ها مشاكل وغلطت يوم خليته هو كل حياتي واعترف أني قصرت في حق ربي )

وانخطبت أكثر من مرة من بعد ماانفصلت بس ماصار نصيب

بس وين المشكلة أنا لين الحين أحب خطيبي وايد فوق

ماتتصورون وحاولت أنساه بس ماقدرت ودوم أحلم فيه ومستحيل

يمر يوم بدون ماأذكره بالرغم كل المشاكل اللي كانت بينا

بس بعد كانت في أيام وايد حلوة مابينا
وأنا ادري أنه يحبني بس الله كريم

المهم من كم يوم شفته بصدفة شفته من بعد فترة طويلة

وماتوقعت أني بشوفه وان بنلتقي مرة ثانية ولانه

وشفته بالصدفة لانه هو طبعا من أهلنا بس من بعيد المهم

من شفته ماقدرت أشيل

عيني من عينه وهو بعد طبعا حسيت أني أبغي أصيح من

كثر ماأنا مشتاقه له بس أنا طنشته وهو تم يرمسني

وانا مسويه له طاف حسسته أنه مايهمني بس طبعا يوم رديت البيت يلست أصيح

لاني تذكرت كل شي صار بينا وأحس أني تعلقت فيه أكثر من قبل

مادري شو أسوي تعبت من التفكير

أنا مابغي شي منكم غير دعوة منكم أنا نرد لبعض أذا كان لنا نصيب

أنا أملي في الله كبير والحمد الله على كل حال

وسامحوني لاني طولت عليكم بس حبيت أفضض

المزيد من آخر المواضيع من نفس القسم:

**عنيده بحبك** · 2014-06-08, 13:48

ان شالله ترجع المياه لمجاريها اختي و تتهنون مره ثانيه ,,

دايما ادعي و استغفري ربج 1000 فاليوم و اقري البقرة و تصدقي و صلي القيام و الضحى بنية ان يخطبج مره ثانيه,,

و ان خطبج دوم حصني نفسج انتي وياه عن العيون الحاسده الحاقده و حاولي تبتعدين عن المشاكل تفاديها لان الشيطان ثالثكم ,,,,

لا تفكرين وايد عزيزتي التفكير بيتلف لج اعصابج و بتخسرين صحتج و شبابج ترى نصيبج مقدر و مكتوب بس ادعي و ربج كبير و رحيم ,,

**عيوني كيوت** · 2014-06-08, 13:51

يزاج الله خير حبيبتي عنيدة بحبك ومشكورة فديتج على كلامج والله يسعدج دنيا واخره

**طاغية الأنوثة** · 2014-06-08, 13:52

فديتج شكلج وايد متعلقه فيه شوفي الغالية دائماً وأبداً تذكري شي مهم خلي كل حبج لرب العالمين وانشغلي بالطاعات وأحب الأعمال لله ترى كل مازاد حبج لله ربنا بيحبب عباده فيج واتأكدي انج بهالحب بتنسين خطيبج وطوايفه بعد ههههه
المسألة تحتاج فقط انج تزيدي الجرعة الإيمانية فديتج

**روح.الامارات** · 2014-06-08, 13:58

خلي الثقه بربج كبيره ..
ادعي الله يكتب اللي فيه الخير
و عليج بالاستغفار ة الاذكار

**رورو الصغيرة** · 2014-06-08, 17:36

الله كريم

الله يجمعكم مرة ثانية ويكتب لكم الخير

**ورقة ناعمة** · 2014-06-08, 18:00

الغاليه اذا يحبج بيستمر معاج ومستحيل يهدج
الشخص اذا حب وحده من كل قلبه بيتمسك فيها لو شو ماكانت المشاكل لأن اكيد المشاكل بسيطه لأنكم مب معرسين فعادي تصير عالمشاكل اذا يبغيج بيستمر معاج ومستحيل يتركج لاتصدقين لغة العيون للقلب يحب والعين لها أشكال والوان فكري بنفسج ولاتضيعين نفسج عشان أوهام

**الأحلام الملونة** · 2014-06-08, 19:53

الله المستعان

**نور الايام** · 2014-06-09, 00:53

حبيبتي الامر من بعد الله لاهلك اولا لاتتبعين خطوات قلبك وعيونك وكوني دايما قريبه من رب العالمين وشوفي اذا هوه متمسك فيج ويبيج واهلك راضين في بترجعون لبعض ونصيحه لوجه الله اذا الوالد والوالده حابينه وداخل قلبهم بتنسعدين لكن اذا كانو اهلج مو راضين بهالزواج هذا فصدقيني راح تخسرين كثير اتبعي ربج واهلك الله يقدم لك مافيه الخير يارب

**سار90** · 2014-06-09, 09:59

عاندي وطنشي بس بشكل حلو لانه اذا حس انه زعلج كيوت ان شاء الله المياه تعود لمجاريها

**nooraaaa** · 2014-06-09, 10:35

المشاركة الأصلية كتبت بواسطة ورقة ناعمة

الغاليه اذا يحبج بيستمر معاج ومستحيل يهدج
الشخص اذا حب وحده من كل قلبه بيتمسك فيها لو شو ماكانت المشاكل لأن اكيد المشاكل بسيطه لأنكم مب معرسين فعادي تصير عالمشاكل اذا يبغيج بيستمر معاج ومستحيل يتركج لاتصدقين لغة العيون للقلب يحب والعين لها أشكال والوان فكري بنفسج ولاتضيعين نفسج عشان أوهام

انا اضم صوتي لصوتج .. فعلا اللي يحب وحده مسسسسستحيل يعوفها لو مهما صار و بيتم متمسك فيها مهما كانت الظروف .. وين كان طول هالفترة ؟ ليش ما حاول يتواصل وياج و يرجع الامور الى مجاريها ؟ ليش ما حاول يوقف بويه اي مشكلة تقابلكم و يحلها بالطرق السليمة عسب ما يخسرج ؟
لا تضيعين نفسج و شبابج فالحب و الهيام . حاولي تنسينه و تلتفتين لحياتج لين ما اييج النصيب الزين اللي ينسيج كل هالالم و العذاب . موفقة حبيبتي

**Ward-uae** · 2014-06-10, 12:33

انتي تبينه!!!
اختي اذا كان من نصيبج يدل البيت لا تقولين حب ما حب اللي يحب يصبر ومب من اول مشكله تفكون الخطبة
اللي انتي فيه إعجاب مب اكثر الحب الحقيقي بعد الزواج وثمره الحب العيال
خلج ثقيله وملي حياتج بهوايات او دورات او شغل او كملي دراستج اللي بيستاهلج ما بيرضى يشوف قطره من دمعج

**عيوني كيوت** · 2014-06-10, 12:58

شكرا على ردودكم خواتي

وأنا احترم رايكم وشكرا بعد على النصايح بس أنا من البداية قلت لكم أنا بس بغيت دعوة منكم

بدون ماتجرحوني في ردودكم وعلى فكرة أنا اللي فكيت الخطبة مب هو قبل ماتظلمونه أو تظلموني لاني في أشياء صرت بيني وبينه ماحبيت أذكرها للخصوصية

وأنا بس حبيبت أفضض لا أكثر

**حلوة واموره** · 2014-06-10, 13:01

خلي حد من الاهل يصلح بينكم اذا هو يبا بعد.المشاكل ممكن تصير في اي مرحلة من مراحل الزواج.والمهم ان الواحد يتعلم من خطأه

**Ward-uae** · 2014-06-10, 13:24

فضفضي والله يرزقج الزوج الصالح اللي يحبج ويصونج وكل اللي صار خيره لكم
بخبرج عن سالفة هم عيال عم كانو يحبون بعض حتى كل اللي في الفريج خلاص انه بيعرسوا وكبروا وكبر الحب لدرجه من يسمع مريضه يكلم عمه بوديها المستشفى كان يوقف عند الباب يترياها تطلع وخلاص العيلتين حددوا الملجه ومن سووا فحص قبل الزواج طلعت أمراض وراثيه عاندوا لكن اهلهم ما رضوا والبنت عرست ويابت عيال والحين تحب ريلها وولد عمها عرس والحين يموت في عياله وين ما سار عياله وياه

الموضوع: حبيت أفضض

أدوات الموضوع

عرض