حامل وزوجي يخوني!!

[أم همسات]

سلام عليكم ورحمه الله وبركاته

خواتي انا متزوجه من 7 سنين وعندي طفلين وحامل بالثالث زوجي انسان يدعي انه ملتزم ويصلي كل فرض في المسيد ويصوم ويقرا القران ولكن للأسف يخوني دوم اما علاقات تلفونيه او مسجات ويمكن في الفراش ( الله اعلم) وكل ما اواجه ينكر ويغير الموضوع ويتهمني اني انبش اغراضه وتليفونه واني ما لي حق افتش تليفونه وبدل ما يعتذر يقلب الموضوع على راسي فوق تحت ومن ناحيه الحمدلله بشهاده الجميع انا اصغر منه بوايد وجميله وجامعيه حتى كنت من فتره اداوم وماسكه منصب طلب زوجي مني اني اترك وظيفتي واتفرغ له وللعيال واستقلت وفي الأخير يقول لي أصلا انتي استقلتي عشان انتي مب مال شغل ودوام مع اني طموحه واحب شغلي وناجحه والحمدلله بس فضلته هو وعيالي على وظيفتي

من ناحيه العلاقه الزوجيه الخاصه من اول ما تزوجنا هو وايد مقصر وياي وانا البس واكشخ له وهو يقول لي ما عندج سالفه حد يقول حق حرمته هالكلام ااتصدقون حتى ما اطلع برا البيت كله يالسه في البيت اجابله هو والعيال والاكل احطه بايدي وفي الأخير ينتقد كل شي
المهم من يومين انا بالصدفه شيكت موبايله شفت مسجات جنسيه مطرشنه حق وحده الصراحه انهرت ويلست اصيح ومن كثر الصدمه ياني الطلق وعطوني ادويه عشان يوقف الطلق لان بعدني في شهر السادس عورني قلبي انه مسوي روحه انسان شريف متدين وهو من تحت لين تحت ويوم انا ايي عداله وأقول له كلام مثير يعصب علي يقول عيب هالكلام انتي ماسخه ( الحين الحرمه يوم تتغزل في زوجها وتقول له كلام جنسي استوت ماصخه)
يوم شفت المسج الجنسي اللي مطرشنه صراحه يتني صدمه ما توقعت ريلي متدين ويطرش مسجات جنسيه وانا حرمته ما يعاشرني ويوم اطلب منه يقول لي بعدين بعدين او يقول لي ما عندج سالفه

خبروني الصراحه خواتي شو اسوي معاه تعبت وايد من امس من التفكير وانا لين الحين ما واجهته لان اعرف بتم يتهرب ويقلب الدنيا على راسي وانا روحي تعبانه وحامل وما ابغي اربي في السادس واتعب

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[أم همسات]

خبروني خوااتي لو كنتوا بدالي بتفكرين اتيبين عيال منه مره ثانيه ولا بتكتفين اللي عندج والله يخليهم ان شاء الله

[امراه]

الله يهديه ويسخره لكم

[الأحلام الملونة]

لا حول ولا قوة الا بالله

الله يقومك بسلامة وبعدها وقفي أنجاب العيال يحتاجوا لآب قدوة

ثانيا أنصحك وبقوة تبحثي عن عمل وترجعي لترتيب حياتك واسترداد شخصيتك والآعتماد علي نفسك

ثالثا أنت شو مقررة الآستمرار مع زوج خائن مقصر بحقوقك أثبات الخيانة ليس صعب كون تمسكي أشياء أحتفظي فيها حتي لو أنكر عندك ما يثبت

شوفي الآيجابيات والسلبيات بحياتك وأيهم أكثر ولا أحد يستطيع أن يتخذا القرار غيرك

[أم أية 2]

أختي انا مريت وأمر باللي انتي فيه الفرق ان انتي خليتي وظيفتج وهاي غلطة انا تغربت عن أهلي عشانه وكانت نفس النتيجة خيانة ثم خيانة وسفر و هجر. شي يكره الوحدة فحياتها المهم انا أشوف رأي الأخت الأحلام الملونة زين لانه عن تجربة ييب نتيجة بس على المدى الطويل الله يعينج ويقويج ويقومج بالسلامة

[حلوة واموره]

حاولي تردين دوامج.

[ام حمده 77]

كيف تخليتي عن وظيفتك عشان زوج

الحين ضمنتي حياتك ومستقبلك ومستقبل عيالك معاه

[رورو الصغيرة]

الله المستعان

[ورقة ناعمة]

محد يسوي شي ويضحي عشان شخص مايستحق او يستاهل ,,,,

[بنت المكلا]

الله كون في عونج شي يقهر الصراحة
لكن مثل ما حصلتي شغل دوري مرة ثانية واشتغلي وركزي على عيالج وحياتج انتي الي فيه هالداء ما بيتغير الا قليل

لا تكوني ضعيفه ابدا وكل ما حصلتي رقم دقي عليها وشوفي منو هالبنت


الله يكون في عونج

[نبض الشارقة]

الله يعطيج الصحه ويسهل عليج
بس ليش تركتي وضيفتج ؟؟؟؟ دام انج ناجحه ومتميزة بهذه الوظيفه المهم حبوبه دام انج عرفتي هذا الشي من ريلج اتحملي الين الولاده لانه الياهل ما له ذنب
وخلاف واجهيه وطلبي منه ان يكون راقي باسلوبه معاج وحاولي اتريدين على وضيفتج على الاقل تسلين عمرج وتنفعين عمرج وعيالج وفيه ريايل ما يتقبلون الكلام وهذه الحركات من حريمهم ( مش انتي بروحج تعانين من هذا الشيئ وايد حريم ريايلهم ما يتقبلون هذا الشي ) سايريه مثل ما يبا باسلوبه لاتزين شيئ
هذا النوع من الريايل محطين في بالهم هذا الشي اللي نباه برا البيت ( مع الصديقة او العشيقة ) اما الرزجه لازم تكون محترمة مع ريلها وبصراحه هذا تخلف من الريال بس حاولي حاولي وحاولي تريدين دوامج والله يهديه ويصلح حاله

[nightwaft]

اختي العزيزة ام همسات... انتي ماخذه ريلج من 7 سنين .. و لو هو لعاب من يومه و في دمه كان بيبين مو من اول سنة.. كان بيبين من اول شهر بعد..
عشان جي يا اختي اقولج هاي مطب في اي حياه زوجيه و الحياه فيها الحلو و المر... و صدقيني لو هو لعاب من يومه كنتي بتعافينه من قبل ما بتخلفين ماشاء الله الاول و الثالني و الثالث ربي يحفظهم و يخليهم لج..

عشان جي مع احترامي لكل اراء الخوات الي قبل.. ما اعتقد انج غلطانه في تركج للعمل و رعايه اطفالج و هم صغار ... لكني اعتقد انه الي تمرين فيه الحين ما هي الا هواجس من الحمل و حساسية المراة الزايده المعروفه عن الحمل.. و بالنسبه للمسج يمكن مطرشها لربيعه.. و لنفترض انه طرشها لبنيه ... لازم تحلين الموضوع معاه تقعدون و تتفاهمون.. عودتج لعملج رح يلهيج عن مشاكلج مع زوجج بس ما راح يحلها .. بالعكس يمكن يزيد الفجوة بينج و بينه اكثر و اكثر..

و بالنسبه لسؤالج عن الاطفال.. ربي يحفظهم .. من رايي خذي بريك .. اطلعو سافرو كعائله .. او خليهم عند الوالده و سافري انتي وياه حتى علاقل يومين مع بعض تسوي فرق كبير فوق ما تتصورين (عن تجربة)... انتي متزوجه من سبع سنين يا اختي و هي مو شوي و محتاجه كسر روتين و تسافرون او رحله لدبي او خورفكان او اي مكان بروحكم يجدد الحياه الزوجية و يعيد لها حيويتها و شغفها بين الزوجين...

ربي يجعل زوجك لكي قرة عين و يجعلك له قرة عين و يحفظ ابناءكم و يجعلهم من الصالحين...

تقبلي تحياتي

[Cobon]

الله يخلي لج عيالج يا رب
جوفي حبيبتي ماشاء الله ربي يحفظ لج عيالج عندج 2 و الثالث يا رب في الدرب

الحين رتبي امورج و رتبي وضعج و وقفي الانجاب فترة مب شرط بسبب زوجج لكن عشانج
ارتاحي و ريحي جسمج
ارتاحي و ربيهم عدل و تفرغي لحياتج و بيتج و عيالج و ريلج و دلعي عمرج شوي
لو قدرتي ارجعي لشغلج برضى ريلج عقب ما تربين بالسلامة

يمكن في نوعية رياييل لما يجوفون الوحدة تعتمد ع نفسها و تشتغل يخافون شوي لانه يدري ان ها الانسانة ممكن تتركه و يكون لها سند لها اللي هو شغلها

انتي رتبي امورج اول شي عقب فكري عدل شو الزين و الشين لج و لعيالج
لا تفكرين بنفسج فقط ولا تفكرين بعيالج فقط فكري بالاثنين

[احلى بعفويتي]

من رايي لا تتحسرين على شي ما تقدرين تغيرينه ...
نعم انا مع الوظيفه جدا جدا .. بس ما دام استقلتي لرغبة منج لوجودج مع الاطفال ها بعد شي حلو ..
لا تعتبرين هالشي تضحيه عشان ما تازمين نفسيتج ..

اغلب الخونه هاي تصرفاتهم .. واغلب الجميلات مالهم حظ مع ريايل محترمين والله
ماعرف ليش الخسفه ريلها يموت عليها و الحلوه حظها طايح فالبير ..

المهم ..
انا برايي الخاين راح يذوق طعم الخيانه لازم في يوم من الايام .. خليه الله حسيبه والله بتكلمين و بتعبين عمرج و بعدين بيقولج انتي الي تسوين مشاكل .. وبيرد كل شي عليج .. وعادي يمسك ايده عن المصروف او حتى عن الطلعات او المشاوير المهمه او اغراض اليهال بس عشان يلعوزج .. فليش ؟؟ مادام تعرفين رده ..
حبيبتي بقولج مقولة بابا .. يقول الجذاب اتركه .. لان بيتعبج و بيتعب قلبج وياه ..

بس من ناحيه الجنسيه كوني صريحه معاه .. حقج تاخذينه كامل مكمل ..

و عقب ما تيبين هالبيبي اعتني بجمالج و صحتج و رشاقتج .. لان الرياييل بلا هالايام .. عفانا الله ..
كل شي بيخونون فيه ما يطلع شي الا يستخدمونه حق التعارف و الوساخه و قله الادب ..

انا ما بيب عيال من واحد مثل جي .. حطي لولب وفكي عمرج ..

[أم همسات]

الله يهديه ويسخره لكم

امين فديتج ويهدي جميع الرياييل ويسخرهم لزوجاتهم