التجمع الـ 11 لكروشات 4-5-6-2014 ❤️

[راقية بطبعها]

كل ما ادخل بكتب لكم قصة ولادتي اتذكر اللي شفته واحس باكتآب و اطلع عشان انسى
كلكم تدرون اني دخلت المستشفى يوم الثلاثا وكان مفتوح الرحم 1 سانتي و رقدوني ليلة و شردت عنهم الاربعا بصياح وضرابه
وكان فيني ألم الطلق خفيف يروح ويرجع لين الجمعة الفجر اللي هو المفروض موعد ولادتي 20/6
رحتلهم ويا ريلي زاد الويع بس قالولي بعده 1 سانتي وطلعوني كانت دكتورة حبوبه متفاهمه
و رحنا بيت أهليه اتغدينا عندهم وكنت امشي وآكل تمر وشربت ماي زمزم وماي ورد ويا زعفران و ع الساعة 9 المسا زاد الويع أكثر قلت حق أمي خلاص بنسير المستشفى وكانت أطول ليلة في حياتي شفت فيها المعاناه!
من وصلت عندهم كان الطلق يزيد والتقلصات قويه في التخطيط بس الرحم مب مفتوح غير 1 سانتي
طبعا رقدوني و سوولي توسعه و قالولي امشي في القسم والويع يزيد ويزيد وكل كم ساعة يفحصوني نفس الشي 1 سانتي مول ما يزيد والفير بدأ ينزل عندي الماي وخلاص بموت من الويع امشي واصيح واطيح ع الأرض من قوة الطلقه تذبحني بس اقاوم عشان يفتح الرحم..
الصبح خلاص نزل الماي كله واستوى الألم جنوني ماقدر اتحمله والرحم بعده 1 سانتي وبديت اهستر عليهم ويعطوني الأكسجين الأسود وابر مهدئات في الوريد وخلاص بديت ادوخ من تأثير المسكنات وأمشي واخربط واكلم عمري والسسترات راحميني زاخيني ويمشون ويايه وكل شوي اقولهم ابا الحمام وانا مافيني حمام بس ادخل واطلع وماعرف شو يالسه اسوي! رقدوني ع السرير خلاص اتخبلت من الويع اقولهم ابا عملية ومب راضين يقولون بنصبر عليج بعد 4 ساعات وانا اصارخ وارافس واقطع شعري واعق الأكسجين و ادز النيرسات و ريلي وأختي يحاولون يمسكوني ماشي فايده بس يشوفوني ويصيحون من الحالة اللي كنت فيها
الساعة 11 الصبح تاريخ 21/6 الاستشارية فحصتني وشافت بعده 1 سم قالت خلاص عملية لأن الماي كله نزل عندي وخطر ع البيبي يجازفون أكثر عن جيه
جهزوني بسرعة وحطولي القسطرة وانا اصيح وأقول حق ريلي وأختي ادعولي ادعولي وايد خايفه وتعبانه وأمي كانت راده البيت الفير بتبدل وبترتاح وبرجع ما تدري أن هذا كله استوى..
دخلت غرفة العمليات طبعا بنج كامل لاني خوافه موت ما استحمل نص بنج وقبل ما يضربوني البنج اشوف أمي تفتح الباب واتصيح تقولي لا تخافين اتوكلي على الله انا هنيه ادعيلج وبتقومين بالسلامة
و ربيت بالقيصرية الحمدلله وطلعوني من غرفة العمليات الساعة 12 ونص الظهر ماعرف متى صحيت من البنج بس كنت ميته من ألم العملية يذبح واصييح الله يخليكم عطوني مسكنات ومب راضين يحطون لي لأن البنج قوي في جسمي اصلا وما يقدرون يزيدوني واترجاهم ابا مسكنات مادري لين كم ساعة تميت على هالحالة عقب نقلوني الغرفة الخاصة وعطوني ابرة في الوريد وتحميله وهديت شوي خف الألم..
وبس هاي قصتي اللي ما كنت متوقعتنها لكن الحمدلله على كل حال وشوفتهم بخير تسوى الدنيا ومافيها