التغيير الإيجابي .. شو تبغين تغيرين من نفسج !

**المغتربة** · 2014-05-05, 08:36

السلام عليكم

كتبت لكم هذا الموضوع بعد ما حسيت اني محتاجة تغيير شامل
شرات السيارة يعني محتاجة تجييكات الوكالة

و عندي برنامج طويل عريض بشاركم فيه عقب في موضوع مفصصصصصصصصصصصصل عسب تستفيدون

كل وحدة تخبرنا كم كملت ع زواجها ! مالجة ! مخطوبة ! او لو هي عزابية مثل الغزالة اطير في كل مكان ^..^!
و شو اللي تحس انها لازم تغيره !
و متى ناوية تغير ؟

انا ما اتكلم عن الشكل و المظهر فقط ( مثلا الوزن الشكل عيوب مظهريه) ها الشي مهم جدا لنفسج
تمشين 3 مرات في الاسبوع مثلا ع البحر او الممشى
اللبس المكياج --ليش ما تتعلمين كيف تسوين مكياج و تساريح خفيفة و سهلة بدل الفرفرة في الصوالين لكل عرس و لكل مناسبة ( الكلام لي و لكم)
المشاعر
النفسية الجيدة
تزورين اهلج اهل ريلج و علاقاتج الاجتماعية
تنظمين وقتج و تعطين وقت لعيالج و لريلح
اللي مستوية دبور و لاصقة في ريلها و اللي مطنشة ريلها ع الاخر ( شو تبغين تغيرين )
تعطين وقت لنفسج و ادلعين عمرج بسبا صالون ليزر طلعات كشتات مع ربيعاتج و اهلج بعيد عن ريلج و عيالج هههههههههه
تكونين حبووبة اجتماعية
تبتعدين عن الحسد و الحقد و الغيرة
و اكثر شي منتشر ( تكونين حساسة جدا و تزعلين من اي كلمة و تفسيرين الامور ع هواج )
اممممم تغييرين مود اهلج و تسوون العاب حلوة و مسابقات مثلا تهادوا تحابوا
مثلا من فترة لفترة او كل عيد او في مناسبات معينة تهدين امج او ام ريلج هدايا معينة او يدتج مثلا او ريلج

اقربن و خبرونا برنامجكم شو تسوووون حاليا

المزيد من آخر المواضيع من نفس القسم:

**احلى بعفويتي** · 2014-05-05, 09:29

انا كملت 3 سنين زواج
و عايبتني نفسيتي و احس عمري حلوووه لو امثل جان يتني الملايين و الشباب الحلوين ههههه و اتنقى
الي ابا اغيره ريلي لو يستوي ..

فقط لا غير

**حــــلاوه** · 2014-05-05, 11:42

حلو الموضوع لي رد عقب

**Cobon** · 2014-05-05, 12:27

- من فترة اسوي رجيم و نزلت جمن كيلو و الحين مستمرة على رياضة و تخفيف اكل و شوية تخريب و بدينا نسوي قروب للرجيم في الدوام عسب نتشجع
و افكر اشترك في جم مشكلة لين ما افكر بكمل سنة ههههههه

- اممم خاطري في مساج بالاحجار ومن فترة قلت بسوي باكج لي و ل بعلي مساج مع فيشل و سوالف في سبا من باب الدلع شوي و تغيير المود يمكن خلال ها الاسبوعين

- و عن الاهتمام بالنفس انا مرات اتكاسل و عقب ارد اهتم .. ليزر ع تقشير ع مساج ع حمام زيت ع ماسكات تلقيني شهر عروس و شهر مالي خلق مول و ما شاء الله رمضان جرب و يالسة افصل لي جلابيات راقية و حلوة و يالسة افكر اليوم اني بفررر كل ملابسي لان سايزي تغير ههههههههه
و بشيل لي الكردت كارد و ابغي اتسوق روووووووووحي بدون اي حد و خاصة الصبح و ابغي اشل اكياس و اشتري و اكود الاغراض ^..^

- بالنسبة لعيالي امشي في الممشى و اودي نونوتي وياي في العربانة

- و حاليا مغيرة اسلوبي ها الفترة مستوية حبووبة اكثر وما اشل في خاطري شرات قبل و اجتماعية اكثر و اعذر الطرف الثاني وما ادقق في الرمسة وايد

**mao** · 2014-05-05, 13:52

مرحبا
حلو الموضوع
حسيت عمري ابغي ارد ههه
انا بكمل5 سنوات بعد كم شهر .. . حاسه اني تغيرت ومب نفس يوم كنت عزابيه .. اخب اهلي واهل ريلي وبالنسبه لي اعامل الكل باحترام وحب وموده لنه عندي معتقد ودايما اقول لنفسي الواحد كم بيعيش والحياه بنعيشها مره بس ... ومايغي اعيشها بحقد وغيره وحسد اناانكر احيانا تيني هالمشاعر بس ارجع اقول مابا اخسر حياتي ... لنه هذا كله محد بيضره غيري انا.. احسس عمري اني اهم شي علي ونفسي غاليه علي .. دايما اطمح للافضل واحاول اغير نفسيتي واسلوبي للافضل .. مع ريلس وعيالي .. ومع الكل .. ومره سمعت فيديو شيخ يقول عامل الناس كما تحب ان يعاملك الله .. مب كمل تحب ان يعاملوك .. احاول اطبق هالشي لنه ف النهايه هالشي بيخليني راضيه عن نفسي .. حتى لو الناس ماتعامل عدل ... اهم شي انا .. خخ المهم دايما اتسلح بالدعاء .. واحاول اشد حيلي بالعباده ... واخيرا ... دايما عندي قناعه الي يحب يسولف معاي اسولف معاه والي مايحب او مايبغي .. بكيفه عادي براحته مو مهم اول كنت اتحسس الحين طاف عادي عندي .. الواحد لازم يتعلم يكون بارد ف مواقف .. اهم شي دايما اكون بشوشه ونفسيتي حلوه مع الكل ... وبس ...

**Fa.R** · 2014-05-05, 14:15

الوحدة تغير من نفسها :

اسلوبها و كلامها و تعاملها
وتشل اي كره او حقد او غضب اتجاه زوجها

تهتم في عمرها من كل النواحي واهم شيء القناعة

ولو ريلها فيه عيب تحاول تصلحه ولو مافاد لا تعور راسها

مش كل التغييرات عشان خاطر الريل لا طبعاً

أول شيء لنفسها وبعديين الريل والعيال

ولو فشلت في تعاملها مع زوجها تقدر تنجح في مجالات ثانية

تشتغل و تستمتع بهواياتها وتنمي مهاراتها

الحياة قصيرة ما يسوى عليه اقعد افكر واتعب عشان خاطره

**عواشي121** · 2014-05-05, 15:01

مرحبا ..

انا عرسي عقب كم من اسبوع , احس اني نفس ما انا ونفسيتي مكتآبه من يوم ما ملجت علاقتي مب كلوز ويا ريلي علاقتنا جدا رسميه .. وانا متشآئمه من هالسنه كلها ضيق وصياح وعدم الراحه .. انصحوني بليز ماعرف كيف اغير كل هذا وعرسي قرب حتى فستان ماخترت لي من الضيق

**أم مغاوي** · 2014-05-06, 15:31

الله يهديج يا عواشي ويصلح امورج

ويبعد عنج كل ضيق وهم يارب

استانسي يا اختي وابدي اختاري الفستان هاي ليلة عمر مابترد مره ثانيه

استغليها وافرحيها فيها

يمكن شعورج طبيعي مع اقتراب موعد العرس يبدا هالشعور عند العروس

واللي زايد خوفه رسميتة ريلج

ماعليج ان شاءالله باجر بيبين لج ههههههههههه الحب والرومانسيه اصبري

**زينب الطيبة** · 2014-05-06, 17:41

اممممم

أما انا فخاطري أغير وزني ( أضعف عشرة كيلو بس ) و بعد طريقة لبسي كاملة

و خاطري أتشجع و ارد احفظ قران

و خاطري حياتي تستقر مع ريلي و أحس بالأمان

و خاطري الله يهدي هلي و نرد عائلة متحابه شرات قبل

هههههه خاطري في وااااااااايد اشياء حسيت عمري عند بير الأمنيات و بعق الدرهم و كل شي بيتحقق

ان شاء الله ربي بيحقق كل أمانينا

**لحن الخلـود** · 2014-05-07, 00:06

وايد أشيا
اولا أنا بعدني آنسة لطيفة

أريد أغير علاقتي بنفسي أبا احب نفسي و ارفق بحالي و أكون أكثر جدية في تطوير نفسي من الناحية العلمية و الثقافية أبا اذا ابتديت بشي استمر و ما اوقف لآني ملولة جدا سواء قراءة او ممارسة هواية او رياضة

من الناحية العملية أنا مسالمة جدا و فحالي لدرجة أنه صدق أحس مالي كيان أجاوب بس على قد الاستفسار ما أبدي اي راي سواء إيجابي او سلبي أبد أبد ماكل القطو لساني أريد أكون أكثر اندماج و جرأة بس بحدود و خاطري اذا ما عيبني شي أتكلم مب أتحرطم بيني و بين نفسي
من ناحية الصحة مهملة جدا لنفسي ما اراجع الفحوصات و لا أطمن ع نفسي حتى لو طلعت عليه أعراض و ما أحب اتعالج الا اذا شفت لا مفر من العلاج

وايد وايد أشيا أباً اغيرها و أهمها علاقتي مع ربي

يا رب اهديني و ردني إليك ردا جميلا

**التفاؤل طبعي** · 2014-05-12, 19:32

اريد انحف شوية و ارجع احفظ قرآن
اريد اسجل ف الجم و اتزاور مع اهلي و اهل ريلي
و الله ودي ارجع للتجمعات الاجتماعية و اشارك ف الدورات اللي تطور الذات
استوي كريمة شارت قبل مدري وش ياني صرت بخيلة اللحين

**زم_قمر_ان** · 2014-05-12, 19:45

اممممم أنا أم عبدالله

الحمدلله راضيه عن نفسي طبعاً طموحي كثيرة

وﻻ تنتهى مشكلتى عجوله وبسرعة اتملل

طموحاتى واايد أكمل حفظ القرآن

اسوى بيزنس ناجح ومعروف

واﻻهم عيالي ينجحو ويحققو أعلى الدرجات

**ورقة ناعمة** · 2014-05-13, 10:15

ابغي اتغير وارجع نفس ماكنت في بيت اهلي ,,,,,,,,,, البنت الصغيرونه اشتقت لنفسي

**M-Alshehhi** · 2014-05-13, 14:40

- ألتزم بديني أكثر
- أثقف أكثر وأحاول أقرأ كتب وايد

**تعابير طفلهـ** · 2014-05-14, 02:33

حلووو موضووعج
خاطري اتوظف وحياتي صارت ممله عندي طفلين ولد وبنت احس حياتي روتين
انتظر بس كل خميس ايي عسب أجوف ريلي وتجتمع العيله
دورت دورات اشترك فيها للأسف ماشي .. فكرت اكمل دراستي بس ماحصلت الجامعة اللي تعيبني ويوافق عليها ريلي
امممممم صح أحب الأشغال اليدوية وعندي مكينة خياطة بس ع حسب المزاج وانا من النوع الملول
خاطري ادخل ولدي نادي سباحة بس عمره صغير يمكن ما يقبلونه .. احاول أسوي اي شي يغير من حياتي ولو شوي .. هيي حلووه الحمدلله بس مشكلة الروتين اليومي بدون مسؤوليات كبيرة

الموضوع: التغيير الإيجابي .. شو تبغين تغيرين من نفسج !

أدوات الموضوع

عرض