تقريري لرحلة جزيرة صير بني ياس <<<<

**أم كاكي** · 2014-02-24, 11:54

السلام عليكم

اليوم حبيت اتكلم عن رحلتي لجزيرة صير بني ياس

كانت رحلتنا شهر 4 السنه الماضيه كان الجو جميل ومعتل قدرو الصغاريه يتسبحون في الحوض

كنت انا حامل في الشهر الخامس وعندي 3 اطفال 9 سنين و5 ووسنتين وحجزنا ليلتين

الحجز كان عن طريق النت بس ما اعرف الموقع كان زوجي اللي حاجز وعطونا خريطة كيف نوصل لنقطة التجمع في ابوظبي

طلعنا الساعه 8 صباحا من دبي ووصلنا 12الا ربع الظهر تقريبا 4 ساعات لين نوصل عند المركب شوي بعيد تقريبا صوب الرويس بس انا ما ادل وفي مكان للاستراحه مكيف وفيه حمام نظيف ويقدمون لج مشروب وعلى طول ركبنا لانه المركب يتحرك 12 وكل ساعتين يطلع

وهذا اللنج اللي ركبناه صغير وسرييع

وهذه مروحه في الدرب واستغرقنا 20 دقيقه فقط في البحر

هذا الفندق هو بس فندق واحد بالجزيره وحاليا سمعت فتحت شاليهات طراز قديم

واول ما دخلنا استقبلونا بعصير كركديه ودخلنا ريحنا وعقب حجزنا للفعاليات اللي عندهم
عندهم سفاري وركوب الخيل وركوب الدراجات الهوائيه ورمايه وركوب الخيل على الشاطي للكبار فقط هذا اللي اذكره

حجزنا للركوب الخيل العصر والسفاري لليوم الثاني الصبح

المزيد من آخر المواضيع من نفس القسم:

**أم كاكي** · 2014-02-24, 12:01

هذه السياره اللي اتودينا وسرنا عند الخيول تقريبا ربع ساعه لين توصلين المكان وفي الدرب اتشوفين الغزلان في كل مكان

وفي الدرب شفنا هالحيوان الوبري اول مره اعرف في الامارات جي حيوانات

والعيال ركبو الخيول وانا اتمشيت اشوف الغزلان والطوواويس

غزال بامبي

ارنب بري وما يخاف مني

وحتى القطو هناك !

ورجعنا قراب المغرب
ويلسنا على البحر وصلينا وعقب اتعشينا في بوفيه الفندق

تاببع

**أم كاكي** · 2014-02-24, 12:20

وهذا المطعم ليلا اكلهم لذيذ

وفي طاولات برع وجلسه على ضوء الشموع للرومانسيين خخخخ

وهاي سينما خارجيه للاطفال

وهاي صوره للفندق من الداخل ليلا
ورقدنا لانه ورانا نشه من الصبح للسفاري

اليوم الثاني

شروق الصباح في الجزيره جمييل

ركبنا نفس السياره تكون شبه مكشوفه

والغزلان في كل مكان واول شي استقبلتنا النعامه

تااابع

**أم كاكي** · 2014-02-24, 12:31

وكان المفروض انشوف الزرافات بس للاسف ما شفناها

دورناها وماشفناها

وهاي بطه ويا عيالها

ورجعنا وما شفنا الزرافه بس في وايد ناس شافوها

وشفنا الانجليز على السياكل

ورجعنا الفندق وتريقنا في بوفيه الفندق

والريوق هناك غير العصافير يتريقون وياج

واتغدينا في المطعم اللي على البحر

هالمشروب لذييذ

وبعدين العيال اتسبحو في المسبح

وانا يلست اصور

وشفت هالغزال الشارد

يتمشى في الفندق

تااابع

**أم كاكي** · 2014-02-24, 12:37

وهذه صوره للفنق من الجهه الثانيه

وطبعا في جم للرياضه وفي نادي اطفال بس صغير نسيت اصوره

وعلى البحر يلسه للرومانسيين

وكانت رحله خفيفه وحسينا بتغيير جو للي ما يقدر يسافر

واتمنى تقريري عيبكم والسموحه

**طيف الغربة** · 2014-02-24, 12:41

ماشاء الله تقرير ولا اروع واسلوب عرض مميز

حبيت التقرير مفصل ومتعوب عليه

امتعتينا عزيزتي وربي يسعدكم دوم

**مطلع** · 2014-02-24, 12:56

ماشاء الله مناظر حلوة وطبيعة احلا
ماقصرتي أختي تسلم يمينج
وزين تغيرين جو وف لبلاد الحمدلله
أختي كيف الحجز والاسعار خاطري اروح
والله يعطيج العافية يارب

**الاميرة11** · 2014-02-24, 13:06

روعة ماشاءالله
في خاطري اسير من زمان وصورج شجعتني زيادة
تسلم ايدج على هالتقرير الغاوي الي متاكدة الكل بيستفيد منه
مشكورة الغلا

**عاشقة حبيبي** · 2014-02-24, 17:47

رووعه ^^

**Zai** · 2014-02-24, 17:49

مكان جميييييل

يعطيج العافية ع التقرير

**أم كاكي** · 2014-02-24, 21:29

المشاركة الأصلية كتبت بواسطة الاميرة11

روعة ماشاءالله
في خاطري اسير من زمان وصورج شجعتني زيادة
تسلم ايدج على هالتقرير الغاوي الي متاكدة الكل بيستفيد منه
مشكورة الغلا

الله يسلمج ومشكوره وان شاء الله يستفيدون

**أم كاكي** · 2014-02-24, 21:33

المشاركة الأصلية كتبت بواسطة عاشقة حبيبي

رووعه ^^

مشكوره مرورج الاروع

**شما الهاجري** · 2014-03-02, 10:46

**ياقوتةخضرا** · 2014-03-04, 23:07

ما شا الله
رحلة جميلة وتقرير مرتب

استمتعت وايد وياج لاني من زمان ابا اعرف شقايل الجزيرة
وهل تستاهل الزيارة والا لأ !

ان شا الله نرتب رحلة لها في يوم من الايام

مشكورة وايد ام كاكي

**احتاجك..** · 2014-03-06, 04:53

Uppppppppppp

الموضوع: تقريري لرحلة جزيرة صير بني ياس <<<<

أدوات الموضوع

عرض