اللي عندها خبره ادش ):

**امر الله غالب** · 2014-02-13, 00:44

خواتي ابغي مساعدة الحريم اللي عندهن خبره ف الحياه الزوجيه
واللي لهن فتره معرسات

مثل ماقلت في موضوعي السابق اني احاول اتغير
من جممممميع النواحي
---------------------------------------------------

ابا اقضي وقت اكثر ويا ريلي عشان اعرفه عدل
اول شي انا عايشه ف ملحق ويا اهله و هو ٢٤ ساعه برع وانا اضطر اطلع من البيت وما اتم فيه لان ماحب اتم بروحي ف اسير بيت اهلي
اهله كل حد بمشاغله ومووول محد متفيج لي خواته يداومن ومن يردن اللي تعابل عيالها وريلها ومن ٨ كل البيت راقد
البيت كله شباب وانا ما اختلط فيهم ف ما اخذ راحتي ابد

ف اول شي ابا اسويه اني ابا اقول حق ريلي انه نبا نأجر بيت ونطلع من عند اهله ( قبل كل شي بكون ف بيت بروحي ف هو مابيروم يخليني بروحي ف البيت لان احينه مطمن اني يا ويا هلي او ويا هله ) خاصه ان بيت اهلي جريب منا وااااااااايد

احس هالشي بيقربنا من بعض وبيخلينا نعيش ويا بعض احسن

ف ما اعرف كيف ابدء الموضوع لان اعرف انه بيعارض وبيقول شو له اتعبل ب إجار وغيره من هالكلام وبعد مابيطيع لان بيبعد عن المكا اللي يتيمع فيه ويا ربعه

---------------------------------------------

ثاني شي ابا اغيره

ابا اقوله كلام حلوو من خاطري ،، يعني ما ابا احس اني يالسه اقول هالكلام من وراء قلبي واني ما احس بالكلمه يوم اقولها
ابا اكون صادقه ف مشاعري وياه

وهو من يومين احسه متغير لان امي نازعتني وتمت تقول هاي مب عيشه عايشتنها ويا ريلج ،، وقالتلي انها بترمسه
ف احس انه تغير من البارحه وهو كل شويه يدق يقولي متى بتردين البيت متوله عليج وانا من الصدمه اتم اضححك لان اول مره يقولي جيه

حتى لما رديت البيت ماكنت متعدله ولا متلبسه وكاشخه ،، بس تم يمدح ويقووول اوه شو هالحلاوه وشو هالكشخه

انا جيييه حز ف خاطري لاني ما اقوله هالكلام

-------------------------------------------

ثالث شي

انا مووووول ما ادلعه ولا اسويله مثل الحريم اللي يسون مفاجاءت حق ريايلهم ليله حمرا وصفرا وخضرا خخخ
مررررره وحده ف حياتي سويت له يوم كنت عروس وف بدايت ايامنا

ماعيبتني ردت فعله ابداااا كان وايد بارد ومشكوره ومن هالكلام وخلاص انتهى الشي

--------------------------------------------

رابع شي

اباه يسوي رياضه واباه يكون ستاااايل
هوو مول مايهتم ف هالاشياء وانا ماحب جيه

يعني المشكله لا هو يسوي اللي اباه
ولا انا اكشخ له واتعدله

احس مايهمه ومايلفت انتباهه هالشي
وكله واحد عنده

------------------------------------------------

اخررر شي

ابا احس انه يغااار علي
ابا يقولي لاااااا لاتسوين هالشي

اوقات اتم امدح ريايل جدامه وهووو عااادي خبر خيرررر
مول مايقول شو لج فيهم او انا شو جدامج
مافي اي احساس

وحتى لو ارد البيت ٢ ف الليل ولا ٣ مايهمه ولا يزعل ويحشرني

انا ابا احس انه يحححبني ويغار علي

ما احسسس بهالاشياء وياه

يمكن هو يسوي جيه لان يباني اخليه ع راحته ويظهر ويدش متى مايبي
عسب لو قلتله لا يقول انا خليتج تسويين ومن هالكلام

بليزززز حريم انا ماعرف اتصرف وماحس انه عندي خبره ف هالامور
يعني لو ابا شي بقوله بشكل مبااااشرررر ما اسايس ولا اتكتك ههههه

خلاص اذا ابا شي اقوله فلان ابا جي وجي وجي وانا قال لا تستوي الضرابه
ف ابا طريقه منها احبه وادش قلبه ويحبني

والله محتاجة لكلامكم ونصايحكم ف لا تبخلووون علي موووول

المزيد من آخر المواضيع من نفس القسم:

**ورقة ناعمة** · 2014-02-13, 09:42

الغالية لو تسمعين طلباتنا نبغي الكمال كله والزين كله لنا ,,, نبغي نبغي اشياء وماراح تخلص ,,,

وأحيان تكون أحلام ونشوف حيات الناس الثانية ونتخيل ان حياتهم افضل بوايد لكن الواقع يحدد شي ثاني ومانقارن

بغيرنا لأن احيان الناس تمثل بالحياه السعيد واحيان الناس تخترع قصص خياليه فالواحد يعيش مع الواقع ويحاول يغيير

دام يستطيع التغيير ... مب شرط سويتي له مفاجأة اول مرة حسيتي انه بارد ماعليه لاتيأسين جربي مره مرتين وثلاث

نحن الحريم الملل صديقنا ومن النوع الملول وأحيان نتعود مع الروتين ونعيش معاه

الأفضل انج تقاومين هالرتين والملل وتستغلين وقتج انتي عندج وقت الأغلبية بيحسدج عليه

في ناس تتمنى بس تحصل وقت تمشط شعرها ... انتي استغلي هالشي بالأهتمام بنفسج استمري على هالموال

لاتملين .. إبدئي بمسجات رومانسية حلوة تعدوي من البداية تكتبين مسجات عشان تعرفين تتكلمين اتصلي اطمني عن حاله

وصل الدوام ماوصل ومن هالاهتمام بينيله انج مهتمة حتى لو ماعندج شعور بالاهتمام مثلي ,,,

الغالية الحياة الزوجية تحتاج لنوع من التمثيل مب الكذب لا بوايد أمور ,, عشان الواحد يعيش ...

تبين مسكن اطلبي واقترحي عليه وهذا حق من حقوقج مب عيب ولا حرام ’’ تبين تسمعين كلام حلو خبريه

اي شي بخاطرج خبريه باللي تبينه لاتستحين ولاتترددين ,,, عوديه عوديه وخليه يتعود ,,,

لاتعودين نفسج على طبع معين وتستمرين مع هالتعود وتقولين ابا اتغير مايصير اختيه

تقولين لو ارجع البيت الساعة 2 ها دليل على انه واثق فيج في رياييل لانهم مب ماشيين سيده فيحاسبون حريمهم عالثواني

البعض مب الكل ,,, اذكري الله يا اختي واحمديه وحاولي تسعدين نفسج لاتخلين هالتفاهات البسيطة تضايقج او تخرب حياتج

عدلي واصلحي وحاولى وبتحصلين النتيجة ,,,, ربي يسعدج

**الدرةالمصونة** · 2014-02-13, 11:23

حبيبتي

باين من كلامج ان زوجج حبوب وطيب

والحمدلله بس انت لازم تقدرين هالشي يعني هو يحبج وما يريد يزعلج لذلك هو ما يحاسبج وعنده ثقة فيج فانت لازم تقدرين هالشي مو تستغلينه

يعني لو حاسبج على ردتج للبيت بوقت متأخر كان اللحين زعلتي وصارختي و و

ريلج طيب ومحترمج لازم تحترمين مشاعره ولا تمدحين ريال غيره كدامه وحسسيه برجولته وقوامته عليج وعلى البيت

تطلعين بوقت مناسب وتردين البيت بوقت مناسب وتاخذين اذنه في كل شي طبعا مع شوي حب ودلال يعني اخذ وعطا مثل ما يقولون

ترى الرييال صدكيني بكلمة وحدة بيتقشمرون وانت وشطارتج بعد

**ام براق** · 2014-02-13, 11:57

الله يوفقج عزيزتي مثل ما قالن ورقه ناعمه والدره المصووونه قولي اللي ف خاااطرج يمكن بالبدايه صعب لكن صدقيني بيتعوووود وان شا الله حياااتج بتتغير للافضل

**mouzan7mod** · 2014-02-13, 11:58

عن نفسي أحب أقولج ،: أبدئي بنفسج أول قبل ريلج ، تعدلي و تكشخي و خليج مرتبه كل يوم ، و غيري جو لريلج ...سوي مفاجآت و تعلمي الكلام الحلو و الدلع و هالسوالف ... هو من نفسه بيتغير و بيستوي على كيفج عقب ... والله يهنيكم !!

**افناان** · 2014-02-13, 13:03

الحمد لله ريلج اعتبره مثالي في زمن اشباه الرجال و الدليل انه حس بتانيب الضمير و رجع البيت من وقت
ديري بالج عليه و اهتمي فيه و قولي له باسلوب حلو انه ودج تقعدين معاه فترة اطول و تطلعين معاه عشان يقلل من طلعاته اليومية ، و انتي لا تقصرين معاه اعزميه بين فتره و فتره واطبخي له شي يحبه و اهديه و اتصلي فيه تبينين له شوقج
ربي يسعدج العمر كله

**سامية22** · 2014-02-13, 19:03

بالتوفيق

**ليندااااا** · 2014-02-15, 19:26

احس ريلج طيوب ومسالم
والمشكله الي تعانين منها وايد بسيطه
الله يحفظ لج ريلج

الموضوع: اللي عندها خبره ادش ):

أدوات الموضوع

عرض

اللي عندها خبره ادش ):

المزيد من آخر المواضيع من نفس القسم:

رد: اللي عندها خبره ادش ):

رد: اللي عندها خبره ادش ):

رد: اللي عندها خبره ادش ):

رد: اللي عندها خبره ادش ):

رد: اللي عندها خبره ادش ):

رد: اللي عندها خبره ادش ):

رد: اللي عندها خبره ادش ):

المواضيع المتشابهه

اللي عندها خبره ترد على

اللي عندها خبره تحدر

ابي توأم اللي عندها خبره

اللي عندها خبره باسبانيا ادش............

اللي عندها خبره في الأسواق