هل اطلب الطلاق .. ):

[أم تمنى]

مرحبا
خواتي انا تعبت من التفكير مب عارفة شو اسوي دخليلكم ساعدوني شو اسوي
تزوجت من فترة واحنا اهل ام ريلي طلبتني من امي ويتني شخصيا عشان تشوفني بالدوام وارتاحت لي انا وافقت لان ولدي ديرتي وبس اهلي كانو معارضين هالزواج لان عمتي مال مشاكل وتطلقت اكثر من مرة وعيالها اولاد مب مكملين دراستهم بس انا وافقت لان ظروفي اجبرتني علما بان ريلي ما عنده شهادة ثالث اعدادي وانا جامعية وافقت لان سمعت عنه خللوق .. بس في ليلة الملجة عمتي سوت ضجة بعد الحفلة اونة ليش احنا ما يبنا الكيك ..علما بان سويا الملجة بالخيمة والخيمة على حسابي بس الاكل عليهم .. تمت هالحساسيات لين ما تزوجت تميت 6شهور مرتاحة لان زوجي كان يداوم رغم ان انسان عصبي و حنون بنفس الوقت وكريم بس كنت موظفة بس وقدمت استقالتي لان مكان دوامي بععيد قلت بدور لي مكان ثاني
بس تفاجئت ان زوجي بعد قدم استقالته تميت سنة على هالحال وعقب توظفت الحمد لله بس زوجي بعده .. ما كنت مرتاحة انا اداوم وهو راقد في البيت .. واااايد استوت مشاكل بينا اكثر من مرة قال امي سارت بيتهم عشان تباه حقي وانا كنت ثقيلة على اهلي بس لان اختي الصغيرة تزوجت قبلي ...
وكنت كل ارقد فبيت اهلي بعدم ما اجهضت يوم كنت اقول له تعال شلنلي يقول لي
ليش انتي ياسة بالشارع .. اقول له انا متزوجة لازم ارد بيتي .. يوم يمر علي يكون معصصصصب ويقو والله اخر مرة تسيرين بيت اهلج وثاني يوم يوم اقول له بسير بيت اهلي احسه يستانس ويوصليني علي فكرة يوم كنت حامل كل يقول خلي امج توديج عيادة وكل ما اطلب منه شي يقول خلي امج .... ليش كنتي تداومين قبل زواج كانت توصلح الحين ليش لا لايكون لان ما قمتي تعطينها بيزات بعد ما قدمتي استقالتج .. انا بعت ذهبي وعطيته بيزات عشان نبني بيت صغير بس والله ذلني على هالبيت وموقع بيت بين سكن عمال ومنطقة جبلية ابداااااااا انا مب مرتاااحة ومطبخي عبارة عن غرفة لعامل عدلها بس والله انا مووووول ما تقبلته لان بعيد وبيتنا تحت الجبل ومكشوف نوع ما يبين وكلهم عمال (باكستانيون) مأجرين بيوت
من خمس شهور ربيت ويب ولد عمتي مب عايبنبها اسم ولد اونها ليش ما سميت على اسم طليقتها اللي هو ابو ريلي انا مسغربة من تصرفاتها وما بغت تسوفني وتشوف ولدي تم ريلي مبوز من خمس شهور كل مشاكل وضرابه بينا ويلعن امي ويسبها ويسب اهلي .... سب امي سب( قذف )..اهني انا انصعقت بس لان بالمستشفى امي قالت له ان اهي تسمى اسامي على كيفها وابوي يكون راضي ... فريلي سمى ولدي اسم اللي انا اباه بس ما كان عندي اي مشكلة عن اسم ابوه بالعكس انا ولدي يوم كان فبطبني كنت اقوم فديت (....) اللي هو اسم عمي ..
المهم انا موظفة وخلال 3 سنين ريلي يلس 2 من دون دوام و6شهور دوام وطلع اونة لان الراتب ما يكفيه .. والحين عنده دورة بس ما يداوم عدل
قبل اسبوعين ضربني لان يالس يحابني ليش ما اشتري بدلات حلوووة حل ولدي علما بان من سنة وشي ما يصرف علي ....لا ن مديون فوق المليووون وكان الراتب ما يكفيه من طيب خاطري قلتله لا تعطيني كل التزامات البيبي علي ملاسه وحفاظات و......... من غير هاذا انا اصرف حق نفسي واعطيه كل شهر مبلغ
ضربني يوم قال انا حاسب من تزوجنا انا كم عطيتج .. وانتي كم عطيتيني انا قلت انت زطي واهلك بعد لان من شهر يكلم امه وقام يودي ولدي عندهم انااا انا منقهرة من داخلي لان قبل سب اههللي وسب امي (قذف) على اساس ان امه قالت له ان امي تتكلم عنه جدام ربيعاتها بان اهو ما يداوم وربي يشهد انها جذااااابة يحاول تخرب بيتي ..امي ما مقصرة وياه تحترمه وتعطيه غذا وعشا رغم انه عاطل عن العمل ومقصر وياي
انا انصمت منه ووعقب هدددني باللخنجر على اساس اترك ولدي وما امسكه وقال بشل عنج وبعطي لامي المهم في الليل س 2 وصلني فبيت اهلي وكل مستغرب لانه ضربني و سبني وسب (قذف)امي و....
بلغت عليه بالشرطة والحين السالفة بالمحكمة .. الحين شو اسوي ارد له و لا اتطلق علما بان ما اضمن بانه بيتم فدوامه وامه توسوسه وتبا تخرب بيتي .. وبنفس الوقت كرهت لان يتكل عن اعراض بنات والناس خصوصا امي و... وقال انا اسير مرقص واشوف عيال اخوج عقب انكربنفس الوقت بانه يسير هالمكان شو اسوي ما اعرف .....

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

[بنت الشوامخ]

لاحول ولا قوة الا بالله

حبيبتي بعد هالاشياء اللي شفيتها تحسين معاه بالامان ؟ يضرب ويهدد بالخنجر !!
وفوق هذا يخليج تساعدينه بكل شي وهو مايشتغل شو هالعيشه
اسمحي لي اختي
انا لو بدالج بعيش في بيت ابوي معززه مكرمه وماعليه اشتغل واصرف على نفسي ولا حضرته يقعد لي مثل الحريم ومايداوم فوق هذا يضربني واهله مايعاملوني زين وفوق كل هذا وقاحته تخليه يقذف امي يسب بنات الناس صدق هذا خل يولي

صلي استخاره واذا بغيتي تتطلقين خذي لج محامي شاطر ورجعي كل حقوقج والبيت اللي مافيه امان وكله عمال عدالكم بيعيه وارتاحي .. اهم شي تكونين بعد مسجلته باسمج

وبعد حبيت اقولج انج غلطتي يوم بعتي ذهبج وفي وايد نقاط تصرفتي فيها غلط
اكبر غلط انج تدفعين وتعودينه عالمصاريف وهو مايدفع وبعد تخلينه مايوصلج وامج توصلج مب على كيفه لازم يتحمل المسئوليه


المهم انصحج تترين شو يصير على سالفتج بالمحكمه
ولا تتطلقين منه خلي هذا اخر قرار عقب ماتجربين كم محاوله

خبريهم بالمحكمه انج تبين تردين له بس شرط يوفر لج سكن بروحج ( بدون امه لانه شكلها هي ورى اغلب مشاكلكم ) وشرط انه يداوم مايترك شغله و لازم يتأسف منج ومن امج لانه القذف شي كبير
وبعد بشرط انتي ماتصرفين ولا فلس الا برضاج وهو غصبا عنه يصرف عالبيبي وعالبيت

[Jawharah]

أختي ليش تعطيه بيزاتج غلط على كل حال المهم حالياً تشوفي حل وياه ولا تفكرين بالطلاق ريلج عنده ستريس من اليلوس بالبيت بد ن عمل وديون اصبري وادعي الله بالخير وصلاح الأمر

[احلى بعفويتي]

ها الريال مو كفو وظيفه و بيت و لا حرمه مثلج قدرته و استحملته و لا تصرفين عليه من جيبج و بعد مو عايبنه و يضربج ... مادام وصلتيها للمحكمه خلله يتادب
بتصبرين ع حساب شرف امج و اهلج و ع حساب صحتج يا قلبي ...

[LADUREE]

هذا شو من البشر ؟؟!
وكيف يتجرأ يسب امج ..
الريال بداله ريال .. بس الام مب بدالها ام ..
انا اشوف ان ماتستاهلين تكملين حياتج ويااه
و اسبابج وايد قويه الصراحه
يعني ف المحكمه الحين الحرمه لو شو تقول مصدقه ,, وحقوقج كلها بتكون لج ولدوج ...
بس لو ما تفكرين بالطلاق تقدرين توقعينه تعهد جدام القاضي و تقولين شرووطج . لو خالفهم ترى يعاقبوونه , الله يكون بعونج اختي

[افناان]

الله المستعان
يقذف و يرفع خنجر و بعدج مترددة تقعدين عنده ولا لا !!

[Pink Cherry]

شو ماكان السبب وشو من ضغوط يمر فيها

ماتوصل يسب امج ويوصل للقذف وضرب وغيره .. الانسان اخلاقه تبين وقت مايكون معصب ومضغوط

اشتري راحتج .. استخيري ولو ارتحتي لقرار الطلاق توكلي

[Unkonwn]

غلطتي يوم صرفتي عليه ولو صرفتي عليه المفروض يشكرج الف مرة لانج الريال هو الى يصرف ع الحرمة وماعتقد انه بيكون ريال لو اعتمد عليج .. بتكونين انتي الزوج وهو الزوجة .. و ماعتقد اخلاقه زينه دامه يسب و يهدد .. غلطتي يوم قلتي خذته عشان اخلاقه .. سوري مافيه اخلاق والمفروض من تعرفين عن عصبيته و مب مكمل تعليمة انج تتجنبينه ..

[عاشقة السعادة]

الغالية... الغلط من البداية انتي جامعية وهو مب مخلص دراسته حتى يعني ما شيء بينكم توافق فكري ومب حاس فيج من اول ما تزوجتو ويخليج تصرفين وهو قاعد فالبيت لا شغلة ولا مشغلة ويهدد ويسبب ما خلاه شيء استخيري وتوكلي على الله

[قلب الذيب]

الله يصبرج ويعينج يا رب
اذا قررتي ترجعين له خذي مانع لين تحسين بالامان...لان لو ما استقريتي وياه وما قدرتي تكملين وياه تطلقين في واحد ولا في 2 او 3 لان شكلهم بيلعوزونج
عليج بالصبررر مب عشاااانه عشانج انتي ,,,واذا طلبج تردين ردي بشروطج ...اولهم يرجع ينتظم في دوامه
ثانيهم انه يحاول يبتعد من امه وكلامها
عسى ربي يسخرلج كل خير ولا حول ولا قوة الا بالله

[أدور حل]

مافيه من الرجولة غير اسمه يمكن.. هاي مش تصرفات رييايل
المشكلة لو تطلقتي بياخذ ولدج..
الله يعينج.. الوضعين صعبين.. اتمين معاه او تخلينه يطلقج..
فهاي الامور لازم تشاورين قلبج وتستخيرين ربج..
وشاوري الرييايل في عايلتج.. لو هو شاف حد واقف معاج ما احس بيتمادى عليج وعلى امج..

[ام خلود القمر]

مشكلتج متخربطه لإنج دخلت أطراف وايد فيها وهي سبب حيرتج


اول شي ريلج دراسته مب سبب انه ما يشتغل ناس غيره ما تعرف تقرا ولا تكتب وما شاء الله ناجحين في حياتهم


الاسلوب بينكم أبد ما يرقى لزوجين


المشاكل لما تكبر سببها الأهل امه ما بترضى عليه وأمج ما بترضى عليج وخاصه أنكم اهل المشكلة لما تكبريها بتكبر وتصغيريها بتصغر


سالفة تكلم على امج انتي حطيتيه في حيره صعب عليه يكذب امه ويصدقج وما فيه ريال بيرضى امه تنسب جدامه وهو يسكت عسب جيه السالفة كبرت وادري محد يرضى انه امه ينقال لها هالكلام بس كنتي تقدرين تغيرين هالكلام بأسلوب وانج ما ترضين على امج


الشغل انتي لج دور محيتي شخصيته ومسؤولياته


استخيري الله بيسر امورج

[شعاع امل]

والله مااعرف يااختي ماعندي خبره بهذي الامور خاصه الزوجيه ومااقدر اقولك طلبي الطلاق ولا خليكي عنده

بس بشكل عام انتي تقولين انه يهددك بالخنجر وبعد الفاظه نابيه كثير خاصه على اهلك بين قوسين امك

زين شو السبب ؟

موضوع التعليم ماله خص بالخلق وحسن الخلق!

في ناس مب متعلمه بس طيبه وتصلي وتصوم وكل شي

حتى يشتغلون اشغال دونيه(دونيه حسب المجتمع رغم ان مافي عمل دوني) وملتزمين وفي منهم فاتحين شركات! هع

موضوع الالفاظ هل هو يعاني من مشكله! يعني مثلا

الناس التشرب حكول او تمارس اشياء غلط بتكون مضغوطه طول الوقت وتوصل معاهم لصريخ وشتايم

هل هو من هذا النوع؟

في ناس بس جاهله يعني عمرها مب كبيره

وتغلط يعني مب عاقله

هو كم عمره؟


انتوا شكلكم ماسالتوا عنه زين

والواضح بعد انك اصلا انتي مب مرتاحه له بس

حتى قبل الزواج! ولكن الامور مشت

الحين لازم يدخل في الموضوع استشاري نفسي او اسري


ولكن مادام رفع عليكي سلاح ابيض

يمكن يسوي فيكي شي المره الثانيه اذاعصب

واهلها واهلك مايسعدون في الموضوع بصراحه! خاصه اهله

فلازم يكون في حل خارجي

يمكن الرجال يكون مريض نفسي

[أم تمنى]

انا ما كنت اصرف عليه وايد بس كنت اعطيه مبلغ بسيط 200 مرات 500 يوم كان يداوم من( طيب خاطري) لانه مديوووون غرقاان وانا الحمد للله حالي افضل منه وراتبي يكفيني.. وقلت يوم بيتوظف بالقوات المسلحة بوقف ما بعطيه .. علما بان ما شتريت شي حق بيتي وما اطبخ له لاني كنت ابا احسسه ان لازم يدور له مكان افضل .. المهم هل اتنازل عن القضية (سب+ضرب+تهديد) واعطيه فرصة ثانية ولا لا ..

[خولة المزروعي]

دام كل هالاشياء فيه لاتترين منه يعتدل فرقاه عيد عيشي معززه ومكرمه فبيت اهلج