نبا نبني بيتنا

[مراسيل الوفاآ]

خلاص دام انه ما يصير، ف هالحاله وقعوا ع عقد بينكم
وانتي حرمته وام عياله اختي ف النهايه هالبيت لج
ولعيالج لو صار شي لا سمح الله، اتفقي وياه يا انه يرد
البيزات وتسوون عقد ع هالاساس وكل ما تستلمين منه
مبلغ توقعون ع عقد يديد ع (كم بقى) او انه يوقع ع
عقد لو صار شي تنرد بيزاتج اللي انحطت، وخلي عندج
نسخ من كل شي وان شاء الله ما بيضيع حقج

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[sakura-san]

انتم بتبنون مسكن خاص على ارض منحة ولا طلعت لكم منحة بناء لان في فرق

لو مسكن خاص ما اعتقد في مشكلة يتسجل البيت بإسمكم بس للتاكيد تقدرون تسالون التسجيل العقاري والاراضي لان هم أدرى بهذا الامور ولان الارض منحة فما يستوي يتملك البيت إلا بعد كم سنة ويتحدد على حسب الامارة

بس بقولج نصيحة لكوني اشتغل في جهة إسكانية لا تحطين درهم على البيت الا وانت ضامنه حقج ونصيبج لان عادي يتزوج عليج ويسكن الحرمة الثانية وهالشيء صار والحريم تبهدلوا وكانوا المساكين يراجعونا ويطلبون يتحول البيت بإسمهم لانهم ساهموا في البيت بس المشكلة مافي شيء يثبت لانهم ما كانوا يوثقون هالشيء

وإسمحيلي على التدخل بس اهله ما عندهم بيت !! لان نفس الشيء كانوا الحريم يراجعونا بسبب المشاكل اللي تستوي من الاهل وتدخلهم في كل شيء وانهم يحتلون البيت والحرمة والعيال ماعندهم مكان

[بنت الشوامخ]

ساعديه بس تأكدي يكتب نص البيت بإسمج ضروري
واشوف انه 20 الف وايد
عالاقل 15 الف

و10 الاف حقج و وفري منها شي لج احتياط

وبعدين اذا اهله بيسكنون وياكم على طول لازم يساعدونكم

الا اذا قصدج امه و ابوه ف اكيد مالي داعي يدفعون شي والله بيجازيه خير على برهم

بالتوفيق حبيبتي

[munamoor]

السلام عليكم اتمنى لكم يوم جميل وسعيد وجمعة مباركة
تحملوني هاليومين زادت مواضيعي بس مالي غيركم
بسألكم نحن طلعت لنا ارض من زمان واستلمناها من فترة بسألكم ريلي يقول خلي من راتبج 20 الف كل شهر واستخدمي بس 5000 عشان نتساعد يوم نبني البيت طبعا انا ماا عندي مشكله بس قلت له من عيوني لكن نص البيت باسمي لان في عايلتهم عندهم عاادي الشباب ياخذون حرمة ثانية مب نفسنا نحن عندنا لاا بس هم بالهبل يعرسون شيابهم وشبابهم وكل يومين نسمع مسكينه فلانها ريلها تزوج عليها عشان جي صارت عندي عقده قلت له بساعدك عادي عندي بس نص البيت باسمي عشان اضمن حقوقي وبعد اهله بيسكنون ويانا ويقول استحي اقولهم يساعدوني انا وانتي بنتشارك شو رايكم ؟؟؟؟
اللي عندها خبره تفيدني دخيلكم عادي اساعده والا لازم اتاكد ان نص البيت باسمي !!!

اختي يصير يقول ان بعطي نص البيت هبة بس في اي وقت يمكن يتراجع عن الهبة
لذلك ديري بالج و اذا الارض منحة من الحكومة يقدر يكتب نص البيت باسمج بس يبغى لها شوية
إجراءات لا تسوين اي شى ولا تحطين اي درهم قبل ما تسألين البلدية

[Om Saif 1990]

حبيباتي مشكورات ع الردود

استحي اقوله والح عليه واايد بس بحاول اقوله عن سوالف صارت ووالخ

اخوه واحد ويا حرمته وعياله واثنينتهم يشتغلون وامه مسكينه حرمة عودة وابوه عادي وخواته ثلاث وكلهم يشتغلون بس ع الاقل اخوه يساعده وامه وابوه مستحيل انا ارضى يساعدون وخواته لو من عندهم يعني بطيب نفس بس نحن ما بنخبرهم يساعدون طبعا هم يدرون ان الارض ارض ريلي ولو بيساعدون جان قالو من زمان

مشكوراات مرة ثانية لازم اتاكد ان نص البيت باسمي واذا ما صار بسوي بيني وبينه عقد وان شاء الله الله ييسر الامور يارب


يعطيكم العافية حبيباتي

[(خيماويه)]

الريال اللي يوفر البيت للزوجه وهاذا من حقوقها الشرعيه توفير المسكن لو منج بشاركه مب مشكله بس البيت كامل باسمي مب نص وكل وحده وتفكيرها

الله المستعان

[عاشقة السعادة]

ومثلما قالو لج الاخوات الفاضلات تاكدي انه اسمج موجود فالاوراق ومصدقة من المحكمة او شو اجراءاتهم بالضبط وماتعتمدين على كلامه ومبروك على البيت مقدما ........

[مهرووووووه]

يعني الحين لو كتبتي نص البيت باسمج.. مابيتزوج عليج!!!؟؟
يا اختي الريال لو عمده نيه يعرس بيعرس سواءا كتبتي البيت باسمج ولا لأ!!

هو من حقج بس لا تاخذينها بتحدي او بضرابه.. خذيها بالسياسه وبالاسلوب الحلو!

وقوليله حبيبي 20 الف مب وااايد.. انا حرمه وعندي مصاريف .. 10 الاف يناسبني... وخلي 15 حقج
اصرفي 5.000 و وفري لج 10.000

[Cobon]

حبيبتي لا تكبرين الموضوع
هو بيتزوج ولا ما بيتزوج ترى نفس الشي

انا عندي زميلة لي بنت البيت ويا ريلها و توفى الله يرحمه بحادث
والله العظيم اهل المرحوم مأذينها يبغون البيت و كل يوم محاكم و ساحبينها سحب
و هي دافعه فيه شي وشويات وما كتبه باسمها

الحق حق و المفروض هو ما يزعل لانه مب خسران
تكتبين نص البيت باسمج و ساهمي بالنص بس لا تزيدين
نصيحة لا ترضين الا لو كتب النص باسمج ولو ما كتب لا تحطين فلس احمر ولا ربع فلس حتى

نصيحة نصيحة نصيحة لا ترضين الا نص البيت باسمج حتى لو كان عسل و ما يملى عينه غيرج خاصة ان اهله بيسكنون وياج

انا ما اخرعج بس احسبي حساب المستقبل

[المغتربة]

انتي اسألي المجربات بس

انا الصراحة ساعدت ريلي بنص المبلغ مثلا 600 الف مني و 600 الف منه و كتب البيت نصه لي

و صدق اهله ع الدخله و الطلعه مسوين لي مشاكل و اقولهم البيت بيتي !!!
انتبهي لغدر الزمن اختي اللي مب مجربة بتقولج عادي بس اسالي المجربات
بدون ما تحسسينه بها الشي يعني بطريقة حلوة

قولي "حبيبي افا عليك بساعدك براتبي يعني بس شرطي تكتب نصه باسمي"

[احلى بعفويتي]

نهم 15 الف تعطينا و اهله ما يدفعون درهم ؟؟؟ ليش ..
المهم لو انتي راضيه .. وهو عادي يكتب البيت باسمج اوكي ... بس 15 وايد .. 10 الاف اوكي .. بتمر عليج ظرةف بتحتايين فلوس ..
مثل دفع مخالفات تجديد سياره ... عرس عزيمه .. مناسبه ..
ب

[سلامة عيونكم]

أختي أنا لو منج ما ادفع ولا فلس بالبنيان,, إذا على اشياء بسيطه ك ديكورات وزينه بسسسسسسسس

لأن الريال هو المجبور يبني البيت سواء عنده فلوس أو لا ,, وبعدين غريبه أخوه معرس ويسكن عندكم ,, ما يقدر يبني له بيت روحه

عيب أصلا,, أنا لو مكانج مستحيل أرضى أو أهلي يرضون ريال غريب يسكن عندي بنفس البيت حتى لو ملحق


المهم أختي , ترا الرياييل مالهم أمان حتى لو كان من أطيب الناس في العالم , وايدين قالوها وعرسو ع حريمهن بدون أي سبب

عالعموم, البيت بيكون لج و لعيالج حتى لو ما صرفتي ولا فلس, وباجر لو لا سمح الله صار شي, ترا البيت بيتم لج أنتي وهذا معروف


وربي ييسر أمورج

[munamoor]

الريال اللي يوفر البيت للزوجه وهاذا من حقوقها الشرعيه توفير المسكن لو منج بشاركه مب مشكله بس البيت كامل باسمي مب نص وكل وحده وتفكيرها

الله المستعان

كامل البيت ما يصير باسم الزوجة لان في شى اسمه ورث للوالدين عزيزتي

[munamoor]

توني اقرأ ان اخوانه و أخواته يسكنون معاكم
نعم !؟! شو !؟! فندق !؟!
لا يا اختيه امه و ابوه ملزومين ببرهم و لهم الحق
اما حد ثاني فلا

ما يصير اخوانه يسكنون معاج لانهم مب محرمين عليج انتي
تبغين تاخذين راحتج في البيت