الخيانه و الانستغرااااااااااااام

[بنت$الشيخ]

هلا بنات شحالكم؟
ريلي مثل اي ريال عنده باسورد في فونه وتييه
جلطة اذا قربت من تلفونه .
و24 ساعه مشغول في فونه اخر سنه وكم مره ييته
بالطيب والمسايس ما يفهم مشغول عني وعن عياله
وإذا هو في البيت اخر دخول للواتساب مستحيل
أشوفه لانه كالعاده " متصل الآن" وإذا ظهر من البيت
ما يدشه خير شر وإذا رمسته بالواتساب مستحيل
يرد علي وإذا اتصلت مستحيل يرد علي اذا هو طويل
العمر فضى بيتصل لي عقب ساعتين او 3، المهم هو عنده
انستغرام وكل البرامج المحادثات والدردشات مشغول فيهم
وايد لدرجه ما يقرب صوبي في الشهر مره !!! ويوم رمسته
قلت له بلاك ان شاء الله صحتك اوكي ، قال لي ليش؟
قلت له قللت من ---- يمكن عندك آثار جانبيه من مرض قال لي
لا حبيبتي تطمني كل شيء اوكي ولبسني شهرين !!!
اشياء وايده تغيرت فيه شو ما تدلعت ولبست له ولا كأنه يشوفني!!
المهم مره لمحته وهو يدق الباسورد وعرفته ، وتخيلو تميت أسبوعين او 3
افكر افتح فونه ولا لا عشان اعرف99,9٪ بنصدم بس في النهاية قلت خليني اشوف تعرفون الفضول يقتل اول ما رد من الدوام ودش الحمام بتسبح شيكت ع فونه وأيدي ترقل رقل ... وياليتني ما شيكت اول ما فتحت فونه
حصلت الانستغرام في ويهي وفتحته مسوي فلو لبنات بأرقام خياليه
وملفه مب برايفت مع انه قال انه برايفت ومليون بنت مسويه له فولو
من الخوف حفظت اسمه بالأنستغرام وشيكت من فوني ع بروفايله
ينكت مع البنات وضحك وسوالف وغراميات منزل بحدود الألف صوره
ومب حاط ولا صوره لعياله كلها صوره هي تصدقون!!!
لا تقولون يخاف من العين عادي يحط صورهم بالواتساب وانا ياما قات له
لا تحط صور عيالي بالواتساب وهو يقول عادي محد بيطقهم عين !!!
وحاط جم من طبخه انا طبختها له وكاتب فديت اختي ما تقصرين
ع اساس الريال عزابي تبرى مني....
والله كرهته موووت وهذا بس الانستغرام كيف لو فتحت البرامج الثانيه!!!
مب اول مره يخون ، المهم كنت بموت خنقتني العبره،
كله نكت وسوالف مع البنات وانا حقي الشرعي مب محصلتنه ومكرهني في حياتي ومانع عني وايد اشياء ، المهم قلت لازم ازخه بس بطريقه ذكيه
عشان ما يشك ويغير باسورد فونه، صورت كل محادثاته مع البنات وكل صغيره وكبيرة في بروفايله ،بعد اسبوع من ما عرفت خيانته دقيت عليه وهو في الدوام جم مره ما رد علي عقب ساعه دق علي قالي خير متصلة؟
قلت له ربيعتي معاها وحده في البيبي حطت 4 او 5 من صورك ديبي!!
ويوم قالت لها ربيعتي هذا ريل ربيعتي من وين يبتي صوره قالت لها انك انت ضايفنها هي ومجموعه من ربيعاتها في الانستغرام وتسولف وياهم وضحك وغيره، قال والللللللله جذابين كله عندي رياييل خلي يراووج دليل الجذابات ويوم بييج البيت براوييج حسابي قلت له ان شاء الله الحبيب في نفس الثانيه سوا ملفه برايفت وغير اسمه ومسح نص البنات ما بيلحق يمسحهم كلهم يباله شهر ، اول ما وصل البيت راواني حساب ثاني عنده من زمان وضايف إخوانه وربعه !!!! انصدمت بمكره وخبثه قال لي البنات
يبون يخربون اللي بينا قلت له اوكي سوري حبي شكيت فيك
المهم بعد شوي فكرت مره ثانيه ورجعت له قلت له حبيبي البنات طرشو لي أدله تشيب شعر الرأس شو رأيك ؟؟ قال لا مستحيل ويحلف وواثق في نفسه بطريقه ما تتصورونها ، قلت له شو رأيك انا بسامحك وبسكر الموضوع بشرط تلغي حسابك هذا قال لي لا انا مب غلطان وما عندي بنات وحاول يغطي جذبه ورى جذبه ورى جذبه المهم يوم راويته كل الصور تم يضحك بأسلوب ساخر قال خير قلت له هذا حسابك الأصلي واباك تقطع الانستغرام
صوره وهو في فنادق ما اعرف متى راحها حتى تفلسف بعدين سكت تعبت منه والله ياما سويت له مفاجآت وهدايا وطلعات
وما شيء فايده وع فكره هو انسان مصلي والحمد لله، الحين شو رأيكم شو اسوي ؟ كيف أتعامل معاه احقره؟ لانه بياخذ راحته ساعاتها وينأخر حتى 2 او 3 الليل وثاني يوم دوام هههههه
ولا شو اسوي ؟ على اي شيء يهددني بالطلاق في السنه الاخيره من زواجنا ، ادخل اشيك ع فونه من فتره لثانيه لأني اعرف الباسورد ولا البسه واعيش حياتي ؟؟ مع انه 90٪ من الأشياء ممنوع اسويها ...
كرهته انصحوني شو اسوي؟ نفسيتي زفت وما أنام لا ليل ولا نهار
لا تنسوني بدعاءكم

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

[بنت$الشيخ]

نسيت أقول اهم كلمه
الحمــــــــــــــد للــــــــــــه

[ثلوج الصيف@]

بتتنازلين عن ريلج!
بتخلينه ع قولتهم طبق من ذهب جاهز حق البنات

ماعليج، والله لو مكانج ولااااااا افتكر ولا اصدع راسي
عناد بتم وراه وراه واعيش حياتي

[ناروتا]

والله يا اختي هذا الشعور الي اختبرتيه صعبببببب, واحس ما في امرأه متزوجه الا وعاشت مثل هالقصة مع اختلاف التفاصيل>>> ما علينا

االمهم الحين الحل بايدك اختي مثل ما فتحتي هالباب تسكريه,عيشي حياتك وحاولي تنسي الي عرفتيه والوقت كفيل بالنسيان,لأنك بتتعبي عمرك وبس,هو اكيد هيعاند وينكر ويمكن يقلب ضدك وتخربي حياتك على بنات خايسات ,اعتبريهم بنات وهميات الكترونيات مش حقيقة

اما بالنسبة لحقوقك الشرعية, انت ليش تستنيه؟؟؟ انت بادري
الموضوع مش على كيفه, ولا هو الي يقرر متى! دام صحته تمام, اتمنى فهمتيني

وحابه اخبرك شي: الرجال مثل الأطفال,يوم تقولي للطفل شاطر وتثني عليه ,يتحمس ويحس باهتمامك ويخرج احسن ما عنده
والرجل يحتاج يشعر بقيمته وجماله و و و و من الأنثى
هالشي الي يخليه يهتم بردود هالبنات ويعمللهم فلو,ويفهمهم انو عزابي حتى يحنو عليه ويسمعوه الكلام الحلو
انا ما اتهمك بالتقصير لكن في رجال ما تشبع

والله يهديه لك

[ظبيانيه ستايل]

الله يصرفه عنهم ويهديه طنشي لو قدرتي لاتخربين بيتج ان شاءالله فتره وبيمل منها اللهم اصلح ازواجنا واولادنا واكفهم شر هالاجهزه اللي خذت عقولهم ،،،،،

[ليتك تفهمني]

حبيبتي لا تعيشين عمرج في هم بعدج صغيره
خليه كلهم جيه احين يلعبون ويسوون بس مرده لام عياله وعياله
اولا انتي كشفتيه انه عنده حساب في الانستغرام بس ماتقدرين تمنعين الريال من هالشي اذا هو حابنه ويباه انسي الفكره
عيشي حياتج واهتمي في عمرج وفي عيالج وحاولي ما اتكونين الزوجه النكديه سويي له اجواء حلوه في البيت خليه يلتهي بعياله
ودايما ادعي في صلاتج انه الله يهدي ريلج
ممم وان شاء الله مع الوقت بيتغير

[jameela200]

خليني افكر بالموضوع
وان شاء الله اشوف لج حل ...

[Al-3sal]

صباح الخير ..

حبيبتي حقج الشرعي لا تتنازل عنه ..

و عن موضوع الانستغرام و .... الخ القرار لج لانج انتي اللي فالموضوع ..

[عاشقة السعادة]

ضريبة التطور التكنولوجي للاسف الله يهدي الجميع يارب العالمين

[ام زايد21]

الله يغربل هالتكنولوجيا اللى خربت وبتخرب واايد بيوت احينه وااايد نسمع مشاكل وتكبر لينتوصل للطلاق والعياذ بالله والسبه هالسوالف وتاكدى مثل ماهو يخرط عالبنات ويقول انه عزوبى حاله حال اى رياييل واايد بعد الحريم يخرطون عالرياييل ويقولون انهم بعدهم بنات يعنى الخيانه مزدوجه والخراب واحد انا اقول طنشيه واحقريه ولا تبينين له ان الامر يهمج حتى بعلاقتج وياه صدقينى بيتغير وبيفكر ليش ما قمتى تهتمين مثل اول والله يهدى ريايلنا جميعا ويبعد عنا شر عالتكنولوجيا المدمره للعقول والبيوت

[m3andah]

الله يغربل هالتكنولوجيا اللى خربت وبتخرب واايد بيوت احينه وااايد نسمع مشاكل وتكبر لينتوصل للطلاق والعياذ بالله والسبه هالسوالف وتاكدى مثل ماهو يخرط عالبنات ويقول انه عزوبى حاله حال اى رياييل واايد بعد الحريم يخرطون عالرياييل ويقولون انهم بعدهم بنات يعنى الخيانه مزدوجه والخراب واحد انا اقول طنشيه واحقريه ولا تبينين له ان الامر يهمج حتى بعلاقتج وياه صدقينى بيتغير وبيفكر ليش ما قمتى تهتمين مثل اول والله يهدى ريايلنا جميعا ويبعد عنا شر عالتكنولوجيا المدمره للعقول والبيوت

الله يعينج .. دايما ادعي ان ربنا يبعده عن هالسوالف

واشغلي نفسك بدراسه او دوام .. عشان ما تتمين تفكرين بمواضيع الخيانة

الله يصبرج

[قاهرهم غروري]

الله يعينج الصراحه دامه جي وياج كل شي ماله حق يمنعج منه سويه لانه مب معطنج حقج ولا محترمنج وما يستاهل اساسا انتي اتمين تترين منه شي ولا تحرين عمرج وتهديداته لج ماعليج منها بس الكلام ترى الريال يوم يبا يسوي شي ما بيقول لج بطلقج بيطلق على طول بس يهددج مابيسوها ماعليج يوم يهدجج عشان يدخل الخوف لقلبج عشان انتي تتمسكين فيه اكثر

[بنت$الشيخ]

مشكورات بنات ما تقصرون مشكلتي وياه انه الحين بدال ما انا احقره واتغير عليه
هو حاقرني وما يكلمني وزعلان كأنه انا اللي سويت الغلط مب هو ...
ضربني وبكى سبقني واشتكى

[زمن الماضي]

السلام عليكم
اختي الكريمة .. بقولج نصيحتين وبتنفعج وحاولي تجربيها لآن من خلال تجاربي قدرت اعرف 90% من الحلول
الريال يحب التغيير والتجديد .. وسبحانه وتعالى حلل للريال 4 زوجات لآن يعرف انه ما تملى عينه وحدة
ويحب الكلام الحلو والطلعات والتغيير في البيت وفي كل مكان لان اذا صارت الحياة الزوجية روتين يومي بيكون فيها ملل
اذا ع البنات لا تخافي فالاول وبالاخير بيرجع لج ..
اول نصيحة : لا تخربين بيتج وعيالج وتتندمين لآن الريال عقله صغيير ويوم يشوف بنات ويتعرف يحس نفسه انه مميز وفي زمان هذا الرياييل صارو يتنافسون على عدد البنات فنصيحة لا تخربين بيتج وهو بيرجعلج
..حاولي تتغيرين عشانه .. مثلا قصي شعرج او اصبغيه او غيري بملابسج يوم تطلعين برا ويوم تكونون على الفراش .. اشتري عطور مميزة .. واهم نصيحة حاولي تسوين اللي يحبه الاكلات الاشياء اللي يحبها لان الريال يحب البنت اللي تفهمه والبنت اللي تسويله كل شي قبل ما يطلب + واهم اهم شي يوم يطلع من الدوام طرشيله مسج مال صباح معاها كلام رومانسي احبك ومن هالكلام
وفنص الدوام نفس الشي وقبل ما يرجع وفنص الدوام نفس الشي .. بس تكون فترات متباعه كل 3 ساعات مثلا .. حاولي ترسليله مسجات وتحسسيه ان انتي مهمته فيه وتسأليه عليه وتحبيه وتقدرين تعطيه كل الحنان اللي يبيه .. وحاولي تتقربين منه ليش كزوجة فقط انما صديقة اخت ام اخ اب كل شي حاولي تكونين كل شي .. لا تحسسيه ان انتي الزوجة اللي تبي تتجسس ع زوجها وتعرف عنه اشياء .. لان بيعاند اكثر واكثر وبتصير مشاكل .. حاولي ادخلين المواضيع المضحكة بينكم لا تكونين جدية في كل كلامك خليج مرحة
هالكلام اقل شي تمي عليه شهر واذا مرررة مررة ما لقيتي فاايدة
النصيحة الثانية :سويلج حساب بأسم دلع وضيفيه وحاولي تكلميه بس لا تستعيلين حاولي انه يهتم فيج ويسأل عليج لين ما يي اليوم اللي تتواعدين معاه فمكان وامسكيه متلابس
ساعاتها بس يمكن يحس بالندم وقتها تقدرين تقوليله انا زوجتك ام عيالك .. سويت كل شي عشانك ما قصرت بشي كل اللي طلبته سويته كل اللي تحبه يبته غييرت واايد اشياء عشانك .. وصديقني وقتها اتوقع بيصيح او بيندم

وان شاء الله النصيحة الاولى بتصير وبترجعون شرات قبل واحسن

تقبلي تحياتي شكرا ً

[حرم الظآهري]

عليج بالاستغفار بنية انه الله سخرلج ريلج والله الاستغفار له عجايب

وادعي في كل سجدة تسجدينها ادعي انه الله يسخره لج وعيالج ويبعد عن الحرام

اقري سورة الانشراح يوميا وسورة الملك و((( سورة يوسف )))) بتشوفين كيف الله بيغير حياتكم وريلج شوي شوي بيهتدي بإذن الله

انتي الملكة في حياته فلا تتنازلين عن ريلج وابو عيالج بسبة علاقات الانستقرام !!

هذا ملكج وحلالج حاولي بكل ما تقدرين تتخطين اي شي يخرب بيتكم

الله المستعان