الغالي ولد الغالي ,, قصة ولادتي ..

[falfool]

الغالي ولد الغالي ,, قصة ولادتي ..


اول شي اقوله الحمدلله علا كل حال .. ربي لك الحمد و الله يرزق كل محروومه ي رب العالميين ..
بداية قصتي كنت عند هليه ف الغربية كنت حزتها حامل ف الاسبوع الثاني من السابع .. حزة الظهر يالسين سوالف و ضحك و لا شويه احس بشي حار بين ريولي طنشت قلت يمكن يتهيألي .. و شويه اجووف الويع زاد عليه ( خواتيه انا من النوع اللي اذا فيني ويع اضحك مدري ليش خع ) .. ربعت الحمام اجووف شو السالفه و زقرت امايه تجيك و امايه الحبيبه محتاره ما تعرف شو تقولي فديتها و شويه جي دمووعي تخرر اربع اربع بس سايلنت و وداني ريلي المستشفى و اتخيلو خواتي ماشي و لا دكتوره و لا قابله بس نيرس كشفت عليه من تحت و خذو عينه و بس و ريلي اتضارب وياهم لدرجة مديرة المستشفى يت لين عنده تتأسف و مدري شو و ما طاعو يرخصوني .. المهم مني مناك طلعت من عندهم ..
ثاني يوم علا طول ردينا بوظبي اممم مدري ليش طنشت الموضوع و ما سرت اجيك فالمستشفى سبحان الله كنت موكله امري لله و الحمدلله .. كان فيني ويع فظيع بس بعد اتحملت و قلت كله بأجره .. عدا هالاسبوع بصعووبه و الاسبوع اللي عقبه ريلي نزل دوامه (يبات اسبوع فالدوام و اسبوع عندي) و بعد كان فيني الم مش طبيعي بس كنت صابره و ريلي كان يشجعني و يرفع من معنوياتي و عدا الاسبوع الرابع من السابع و كنت احس بكهربا ب ظهري و ضغط من تحت .. طنشت دوامي و الحمدلله تفهمو وضعي .. بداية الثامن كان عندي موعد ويا الاستشاريه في الكورنيش .. اتخيلو بنات اقوللها انه فيني جيه و جيه بس ما تصدقني و قلتلها اكشفي عليه من تحت ما طاعت .. طلعنا من عندها و سويت نفسي عادي مع انه فيني ويع و قلت لريلي ودني الجمعيه اخذلي سناك و عصاير و وداني و كان فيني ويع فجاه ما حسيت بعمري الا و انا يالسه عالارض فالجمعيه و الكل يطالعني مستغربيين هاي شو بلاهاا .. المهم خلصت من الجمعيه رديت البيت و فيني ويع ركبت الدري لانه حجرتي فالطابق الثاني .. عالساعه 7 المغرب يالسه احوط فالمنتدى و مدري كيف كحيت كحه خفيفه جيه و حسيت الله يعزكو اني سويتها و سرت الحمام بدلت و ما انتبهت اني خيست الشبريه و الارضيه و كل شويه ابدل ملابسي الداخليه و كان فيني ويع شرات ويع الدوره .. دقيت حق امايه و خبرتها ,, و امايه تعرف شو السالفه و قالتلي لا تتروعين تمي استغفري و انا من الويع مش فاهمه شي و قالتلي عشر دقايق و بدقلج .. و دقتلي و قالتلي وين ريلج قلتلها ظهر ويا خويه قالتلي انا ما ابا اروعج بس اللس فيج ها ماي الياهل و قالتلي دقي علا ريلج و خله يوديج المستشفى .. طبعا انا يلست اصيح و دقيت حق ريلي ..
انا: هلا اشحالك
هو: بخير و من صوبج؟
انا: بخييير ,, وين !!
هو: موجود صوب البيت .. فيه شي ؟؟
انا: لا سلامتك .. برايك باي ..
و لا انا الحبيبه واقفه صوب منزل كتكوت و اصيح و حاطه ايدي علا ويهي و الماي من تحت صبيب .. ريلي انصدم يتحراني طحت علا بطني او اتزحلقت .. قلتله السالفه و علا طول سرنا المستشفى .. وصلنا الكورنيش و طبعا الطواري باردين جدا لابعد الحدوود و تم ريلي يفاتن عليهم لين دخلوني حجره بروحي و لا متفيجين ينشدوني كم حدة الالم .. و سوولي الفحص الداخلي و كان فاتح عندي 4 سم هنيه انا انصدمت علا طول دقيت علا امايه و قلتلها تعالي و اصيح و طبعا لين اتيي من الغربيه يبالها وقت و حليلها .. المهم دخلوني غرفة الولاده اختفى الالم و يلست سوالف ويا القابله و الدكتورتين اللي فالمناوبة الليليه و كنت ميته يوع و كل اشويه اقول للدكتوره ودوني العنبر باكل و برد مره ثانيه فوق و مش طايعين .. اخر شي الدكتوره عطتني اكلهاا خع لانه علا قولتها حبتني و هيك .. و تميت ف غرفة الولادة لين الصبح عالساعه ثمان ياني دكتور استشاري و قالي نحن عطيناج اقوى دوا يوقف الطلق عندج و طبعا ما فادني و قالي بما انه الجنين صغير بنولدج قيصري .. ريلي قاله اذا الله راد هالياهل يطلع الحينه بيطلع لو شو ما تسوون ما ترومون توقفون ارادة الله .. نسيت اقولك انه الليل عطوني ابرة حق رئة الياهل و عقب 24 ساعه لازم اخذ الثانيه .. وصلت امايه الساعه 11 الضحى و يلست تمسح علا بطني و تقرا قران و تشربني ماي زمزم ..
اليوم تاريخ 19/06/2013 عيد ميلاد ريلي الغالي و طبعا كنت محضره كل شي قبلها ب شهر .. الكيك و الهدايا و الكب كيك و البوكيه من عند وحده من التاجرات .. دق المندوب علا ريلي و ريلي مستغرب يقولي اعرفها حركاتج .. المهم عالساعه 8 و شويه استلم ريلي الكيك و جيه و انا هنيه زاد عليه الويع خلاص ما كنت اروم اتحمله كان ورا بعض بس بعد شديت علا عمري لين ريلي يقص الكيكه و نتصور .. المهم شويات النيرس دخلت تجيك عليه قالتلي خلاص انتي ولاده و انا اقوللها اتريي بذوق من كيكة ريلي خع اسميني انا بعد حركات .. طبعا خمست فيني النيرس لين ما وصلنا لين غرفة الولاده خع و ف غرفة الولاده عالساعه 11 و نص الليل و ريلي ويايه اقوله تذكر لما كنت اقووله اتخيل اربي في عيد ميلادك و حضرتك تضحك .. جان يقولي عندج 23 دقيقه ربي فيهن بسرعه خع الله يحفظه ... المهم زاد عليه الويع و الدكتوره خبقت كيس الياهل و الحمدلله طول الطلق و انا اذكر الله و استغفر .. عالساعه 1:25 الفير بتاريخ 20/6/2013 ربيت و يبت الغالي خليفه سمعته يصيح الكل يتحمدلي عالسلامه .. علا طول شلوه و ودوه الحضانه ما جفته حز بخاطري بس بعد ما كان فيني قوه بعد .. هلكت فالولاده .. بس الحمدلله علا كل حال ريلي يقولي كل الحريم يزاعقوون الا انتي ما شاء الله عليج .. حتى الدكاتره و القابلات ما لعوزتهن .. اتخيلو بنات لما طلعت المشيمه من التعب اللي فيني احسبها كبدي والله الدكتوره يلست تضحك عليه ..
المهم خليفه تم ف الحضانه 23 يوم لين دخل التاسع و صدق لعوزه كل يوم اسيرله و الخياطه ما برت بس الحمدلله علا كل حال .. باقي التفاصيل مش مهمه لو كتبتلين باجر ما بخلص خع .. الحمدلله علا كل حال ..

و خواتي لا تصدقون الحريم يوم يقولن الولاده هلاك لو هلاك جان ما سدحولج 4 و لا 5 ورا بعض .. الله سبحانه و تعالى ما يعطي الانسان فوق طاقته ..
انا عن نفسي حابه احمل مره ثانيه .. ادعووولي خواتيه اني اييب بنووته و ادعو حق حرمة حمي بالولد ...
اسمحولي جان طووولت اول مره اكتب فالمنتدى

المزيد من آخر المواضيع من نفس القسم:

• أسباب آلام الركبة بعد الولادة وكيفية علاجه
• ماهو الطلق البارد والطلق الحقيقي والفرق...
• اهم أسباب التهاب الجيوب الأنفية أثناء الحمل...
• افضل طرق الاستعداد لفترة النفاس
• اهم فوائد الحليب للمرأة الحامل
• افضل عشرة طرق طبيبعه لتسريع الولاده خاص...
• اهم نصائح للحامل البكر في الشهور الأولى
• اهم أسباب الجوع المستمر عند الحامل وطرق...
• افضل مسكنات طبيعية تخلصك من الألم أثناء الحمل
• طرق للتخفيف من آلام الظهر بعد الحمل حصري