بدون جرح مشاعر

[امواج لاتهدئ]

اول مرة في حياتي اطلب حل لمشكلة مسببة لي أرق كبير مع تأنيب الضمير
كنت في حالة صعبة شوي ومشاكل كبيرة مع ابوالاولاد وكنت اسأل محامين واستشاريين لقضية الطلاق
وكان محامي متعاطف معي من الظلم اللي شفته في حياتي ودخل قلبي بدون استئذان
وكنت اوهم نفسي ان هذا مب حب ولكن صار اللي صار طبعا حب من طرف واحد ولدرجة
اني ما اقدر اقضي يومي وانا مرتاحة اذا كان البيبي فاضي من ارساله للبرودكاست
محد يقولي اني ابا اعوض الحب اللي فقدته او ادور لعب لا ..الحمدلله محافظة ع اخلاقي
وتربيتي ولا عمري تكلمت مع رجل غريب او فكرت اني اكون علاقات مع انه عندي فرص كثيرة
ولكن خوفي من عقاب ربي يمنعني مشكلتي احين اني افكر فيه وايد واحبه لدرجة الجنون
ولم افكر فيه انه متزوج او لا ولكن لما عرفت انه متزوج حاولت ابتعد عنه لان اللي يحب انسان
ما يحب له المضرة ارتاح اذا حسيت انه فرحان وتضايق اذا كان مضايق اتمناه زوج وف نفس الوقت
اعاتب نفسي كثير ع اللى احس فيه وهو عنده زوجه وعيال افكر ابدل فوني للنوكيا حتى ما يكون عندي تواصل
مع احد واريح ضميري وانسى لكن اذا حبيتي حد هل من الممكن النسيان وتغاضي وجوده في وسائل الاتصال
ألم في نفسي كبيير اذا فكرت اني مب قريبة منه لان اخلاقه عالية ونادر وجودها في ها الزمن الحب شيء مانختاره
بأنفسنا ولكن يلقيه الله في قلوبنا ما الحل لنسيان حب كبير بدون ألم ..وشوق اليه لاينتهي كيف اوقف كل هذا
انا انسانة لا ابحث عن المشاكل ولا اريد ان اضر احدا كل ما اريده مشورة ونصيحة نابعة من قلب اخت شعرت
باحساس اختها

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[زهرمار]

فديتج الي تسوينه غلط وانتي عارفه هالشي

انتي إنسانه متزوجه وعندج عيال مب من حقج الي تسوينه اسمحيلي ع هالرمسه
حتى ديننا ما حلل هالشي يمكن انتي انعجبتي ف شخصيته وتمنيتي ريلج يكون شراته

بس انتي سمحتي ل هاي إنسان يدخل حياتج وانتي سمحتي ب هاي الشي ف عسب جي تاثرتي

بس يعتبر هالشي خطيئه تقربي من ربج واستغفري عسى ربي يغفر لج

[mao]

لا حول ولا قوة الا بالله!!
والله معارف شو اقولج اختيه!! الله يهديج ويحنن قلب بوعيالج عليج وتنسين هذا الانسان او المحامي!!!
بس الي تسويه غلط طبعن الله يهديج. ز عيل غيري فونج مثل ماتقولين هاذي اول خطوة عشان ما يكون فيه تواصل من بينكم. . وادعي رب العالمين ينسيج اياه

[اسيرت شوق]

تخيلي انج زوجته وفي وحده تفكر فيه يعني قلبي الادوار هل بترضين تاخذه منج بحجه الحب
اكيد لا
وانتي بعد تقولي ما داري عن هوى دارج يعني كل الي تحسي فيه اهو شي من طرفج انتي وبس
اذا شغلتج وياه خلصت حذفيه وانتهى الموضوع
واصلن باين ان حبج له وقتي بسبت انه ساعدج ووقف وياج مع مشاكلج ويا زوجج حتى لو قلتي لا بس هذا الواقع والايام بتثبتلج الموضوع
واذا كنتي بعدج على ذمة رجلج فترى الي تفكري فيه حرام

[راقية بطبعها]

الحل دليت وخلاص
واقطعي كل طرق التواصل وياه
انتي ما بتخربين بيتج وبس
بعد بتخربين بيت انسان متزوج عنده عيال
ومن غير أنها خيانة مهما كانت الأسباب والمبررات
هذا مب حب هذا اعجاب وما تعرفينه اصلا عشان تحبينه
مجرد موقف انساني اتعاطف وياج بحكم مهنته و رسالته
امسكي بيتج وعيالج وحاولي تصلحين ريلج و ترضين بحياتج
لأن اذا طاح الفاس بالراس بتندمين ومحد بينفعج

[بنت$دبي]

اختي نفسيتج تعبانه ها لفترة وها لإنسان وقف معاج وقفه وحاول يساعدج
فممكن هذا اثر فيج وايد ، بس جواب ع سؤالج اذا ممكن تنسيه اكيد يا حبي
بتنسيه وتقربي لربج وصدقيني حتى لو كان حب بتنسينه ...

[m.dxb88]

انتي تأثرتي وهو تعاطف وياج
وأكيد زوجته تحبه وهو يحبها فلا تخربين بين اثنين انتي ع ذمه ريال يمكن ع كثره اللي مريعي فيه ويا زوجج يمكن ماخانج للحين
وخاي نفسج مكان هذا لريال وفي حد يحب ريلج شو بيكون شعور

استهدي بالله وربي عيالج وكبيرهم لاهو بيتزوجج ولا بيربي عيالج لاتشتتينهم حرام خصوصا فهالزمن خلي أكبر همج عيالج وخلي أمور المراهقه والخرابيط لاصحابها

[ام براق]

والله لو فكرتي ف ربج مثل ما تفكرين فيه ولو تحبين ربج وما ترضين تضايقينه مثل ما ترضين هاك يضااايق صدقيني دقيقه وحده ما بيتم ع تلفووونج. والاخلاق مو بس بالكلام الاخلاق بالافعال يعني رفعي نفسج وامسحي من جهااازج انتي حرمه متزوجه حتى لو كنتي مو متزوجه الاخلاق ما ترضى باضافه رجل ع تلفونها. (انا ماجرحج ) بس الاخلاق تشمل القول والفعل. خلج ف بيتج لو ما تبين ريلج برايه اهم شي البذره اللي عندج محتاجين ام والله يكون ف عونج

[امواج لاتهدئ]

قلت قضية طلاق واللي صار بدا بعد ما قررت في نفسي اني اطلق وكان جاري الموضوع
بو العيال قبل ما اروح المحكمة ترجيته بقلب محب ان يحن علينا ويغير اسلوبه ولما كان بقلبي
مادخل غيرة ابد لاني ما سمح اصلا لنفسي حد يدخل مكانه ولو كان سيء معي يعني كنت متمسكه فيه
وما كنت اقصر وياه في شئ المحامي دخل قلبي بعد ما خلا مكان الزوج وكنت اصلا كارهتنه لاسباب الخلافات
اللي ما تنتهي يعني وانا طالعة من تجربة حياتي ما مدالي ارتاح ودخلت في الثانيه اللي اعتبرها ابتلاء واقاومها
الحمدلله استغفرالله ولا انسى وجوده في كل ثانية من حياتي والله يثبتني ويغفر لي ويبعدني عن ضرر نفسي وغيري

[أم حمووود]

توج طالبه الطلاق من رسلج مسرع ما حبيتي

[شوشو_24]

طلعيه من حيااتج بدون تردد ... واستغفري وااااااااايد

الله يسهل امورج اختي ويهدي بالج يارب .

[حبي لك]

الله يعينح

[ورقة ناعمة]

الغالية اذا بنخلي قلوبنا سوق بنحب كل حد يتعاطف ويانا


اذا سرت عند الدكتور وتعاطف وياي مب معناته يحبني ولازم ابادله هالحب


اذا طلبت من شخص غريب يحل مشكلتي وتعاطف معاي وساعدني مب معناته خلاص ارد الجميل له واحبه

اذا شرطي السير ساعدني وكان الوحيد معاي متعاطف وشو معناته اتعلق فيه


الغالية انتي سرتي عند قاضي وانتي بوقت صعب مع احترامي لج وقت الطلاق او المحاكم الوحده يوم تكون وقت طلاقها تكون مضغوطة ومقهورة

وبها الوقت نفسيتها تكون تعبانة انتي العكس سايرة عند قاضي وهذا دوره طبيعي يكون متعاطف والاغلبية تعاطف تمثيلي باهداف براسه وغريبة انتي بهالوضع

فاتحة قلبج للحب ... يعني تعرضتي للضربه الاولى عالاقل في وقت لترتاحين من ضربة الراس مب على طول تعيشين دور الحبيبة ... الحب مب حرام

لكن اذا كان صح ... واذا تبين تحبين حبي صح محد منعج تحبينه بس لاتعبين جسدج ونفسج بخيلات مع رجل يأدي دوره الوظيفي يمكن انتي ماجربتي انه حد يسوقف وياج ويساعدج

او انحرمت من المسانده العاطفية عشان شيه تعلقت بحب خيالي من راسج ... نصيحة ابعدي عنج هالافكار وخلصي اجراءات المحكمة من غير قصص اضافية ...

[عاشقة السعادة]

اول شيء استغفري ربج وانا مع الاخت بنت$دبي كلامها منطقي جدا وواضح

[:: DUBAI ::]

كل ما تفكرين فيه سيري صلي ركعتين .. و بعد الركعتين استغفري 10 مرات و صلي على النبي 10 مرات و سبحي عشر مرات ..

حتى لو فكرتي فيه اكثر عن 10 مرات سيري توضي و صلي هالركعتين .. و بتنسينه