هل اترك ابني واسافر

[احلى الايام]

انا حابه اروح العمرة 4 او 5 ايام ان شاء الله بس مش عارفة اشل ولدي او اخليه عند اهلي .. عمره 5 شهور.. المشكلة مايهون علي اخليه ومايهون علي ابهدله ... شو اسوي خصوصا امي مريضة وهي الي تهتم فيه لما اروح الدوام وفيه خدامه عندهم فالبيت بس ما احبها تلزق بولدي وايد يكفي لما اروح الدوام لازقه فيه جنه ولدها فاخاف لو تركته ارجع احصله عباله هيه امه وفيه شغالتي بعد بس ماتعرف وايد لليهال بس تعرف تلاعب اما شي ثاني لا واخاف لما اسافر ما ارتاح وهو بعيد عني..
من خبراتكم شو تشورون علي اشله والا اخليه

المزيد من آخر المواضيع من نفس القسم:

• اجمل اسماء مواليد جديدة بحرف الراء ومعانيها
• افضل الطرق البسيطة التي تساعد على تنويم...
• متى يسمع الطفل وطرق التعامل معه خلال هذه...
• اهم فوائد الحفاضات القماش وانواعها
• هل يمكن ان ينتقل فيروس كورونا خلال الرضاعة...
• افضل طرق علاج نزلات البرد عند الاطفال
• وصفة التوت والشوفان والكوسة للاطفال الرضع...
• وصفة التفاح المهروس والذرة وقرع الجوز...
• وصفة الجزر والذرة واليقطين للاطفال الرضع حصري
• افضل طرق التعامل مع المولود الجديد

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[mrs.abk]

لو عندج شغالة مسلمة خذيها وياج .. أجر وفي نفس الوقت بتساعدج بالنونو ..

أو خذي وحدة من خوات ريلج وياج .. تساعدج


أو وهذا الأفضل أجلي العمرة لين يكبر شوي .. هاللي أنا مقررتنه بإذن الله

[وجدان الفجر]

لو عندج شغالة مسلمة خذيها وياج .. أجر وفي نفس الوقت بتساعدج بالنونو ..

أو خذي وحدة من خوات ريلج وياج .. تساعدج


أو وهذا الأفضل أجلي العمرة لين يكبر شوي .. هاللي أنا مقررتنه بإذن الله

مثل ما قالت الأخت
ولو كان لنونو هادي ومتعود على الأصوات العالية تقدري تاخذيه بدون شغالة, لأنه وقت الصلاة تقدري تحطيه جنبج وتصلي , بس لو كان يصيح كثير بيتعبج وما بتقدري تركزي في الصلاة وفي المناسك . ولو يخاف من الأصوات تراه صوت الإمام ماشاء الله في الحرم وقت الصلاة بسبب المكبرات مرتفع وأطفال كثيرة خصوصاَ في هذا السن يخافوا من الصوت ويتموا يبكوا ويصارخوا . أختي قبل أي قرار تتخذيه صلي إستخارة وربي يرزقج عمرة قريبة ميسرة ومتقبلة .

[دلع بسنع]

انا عن نفسي خذت ولدي بنفس العمر تقريبا بس شليت امي معاي وكنا نتناوب عالصلوات مرات انا انزل الحرم وهي تمسكه وتصلي بالفندق ومرات انا امسكه وهي تنزل وكنت مرتاحه ماقدر اخليه مابرتاح، انتي اذا امج بتشوفه خلاص توكلي

[marriyah]

انا اشوف لو امج تقدر تمسكه خليه بدون تردد او حد من اهل ريلج اذا يقدرون يتحملون مسوليته بس لا تودينه معااااج بتتبهدلين وياه وهاي عمره كلها كمن يوم وبتردين بس اهم شي انج تكونين ظامنه ان حد بيهتم فيه
او من راي الاخت ان كبر شويه سيري وخلي بشكارتج تتعلم عليه شوي تسوي الاشياء البسيطه تحت ملاحظة امج

[m.dxb88]

إذا امج تقدر تشوفه خليه أريح له هني

[الغندورة]

عادي خذيه وايد حريم يشلون عيالهم لاتخافين بس لاتتركينه انتي مابترتاحين ولو حسيتي ببعض التعب ترا ف النهاية نحن امهات ولازم نتحملهم مافي امان ابدا للخدامه يتبهدل وياي ولا يتم ف حضن خدامة
خذي وياج كل مستلزماته وياريت تاخذين الحمالات اللي ينحط فيها الطفل ويحمله ابوه اثناء العمرة مريحه وايد
انا واختي جي نسوي
الله ييسرلج ويتقبل منج

[افناان]

لا تخلين ولدج ابدا و تسافرين
اصلا ما بترتاحين بدونه و لا بتتعبدين عدل
وقت الطواف و السعي ابوه يشيله
و وقت الصلاة خليه يمج
و على فكرة هالعمر اسهل عمر في السفر
اذا بدا يحبي او يمشي ما بتقدرين تودينه الا بصعوبة
الله يوفقج و يعينج ع فعل الخير

[عواااشه]

جوفي اختي اولاااااااااااا العمره بها الوقت جداااااااااااااا سهله ما شي زحمه والجو حلو بها القت مخصص بس لمجلس دول التعاون جيه احيد عسب جيه ما بتجوفين زحمه ..


ثانياا العمره انتي بتسيرينها 5 او 4 ايام يعني مده جداااا بسيطه ما بيبهدلج صدقيني

انا وديت ولدي عندي و اختي ودت بنتها بعمر نفس وولدج بس اقل يمكن 4 شهور مع ان بنتها صياحه ونحيسه الا انها بالعمره تقول ما شي احسن عنهاا

وديه وتوكلي على الله والله الحافظ باذن الله وخذي وياج الحماله اللي تحطيها فيها على صدرج وبالتناوب دره تكون وياج ودوره تكون عند ريلج وافضل وقت تسيرين بها اكليها ورقديها وسيده نزلو للعمره


اما عن سالفه الشغاله حبيبتي انا واااااايد سمعت مفتين يقولون حرام انج تاخذين وياج شغاله لانه العمره يبالها محرم وبدون محرم تاثمين وانتي بتحملين شغالتج اثم بها الطريقه لانه لاااااااااااااااااااااااااااااازم محرم لها


الله يوفقج وتروحي وتردين بالسلامه وفديته النونو سبحيه بماي زمزم زين له

[عالم الخيال]

اختي اذا تخافين تتلعوزين لا تشيلينه بس بعد لا تروحين العمره ، العمره في اي وقت ان كتب الله لج عمر ، انا ضد ان الام تودر ولدها يوم بليله منو بيهتم فيه يوم يقوم في الليل ، ما اعتقد فيه حد احسن وافضل له من امه سبحان الله من اول ما يفتح عينه يريد يقوم تحس فيه حتى لو ما بتقوم للمنبه خخخخخ وبعدين النوم سلطان ممكن الشخص اللي بيعتني فيه ما يسمعه ويتم يصيح او يتلعوز وياه ويقوم يسوي حليب في الليل ويتلخبط لانه مب شبعان رقاد ، الام بتعطيه صدرها بهدوء وبيرقدون هيه وياه براحه ،والعمره مب شرط 5 او 4 ايام ترى هيه مناسك اقل عن يوم يعني اذا مصره تودريه روحي مثلا يوم الخميس وارجعي الجمعه وان طولتي ترى عادي ينفطم ،واذا بتشلينه و بتقعدين 4 ايام من تخلصين العمره صلي في الفندق اذا كان يخاف من الاصوات العالية ، وبعد ما يخلصون الناس من الصلاة ممكن تنزلين الحرم تتمتعين بالاجواء الروحانية الحلوه وخلي ريلج يمسكه اذا تبين تقرأين قران او تصلين نوافل
وبالتوفيق اختي والله يحفظكم

[Cobon]

اختي دام امج موجودة لا تحاتين هي تراقب و تجوف
انا مرة سافرت و عمر ولدي شهرين و خليته عند الوالدة مع الخدامة صح الخدامة تلزق فيه بس امي موجودة تراقبها و جي و لا تحاتين دام والدتج موجودة

ترى بتتبهدلين في العمرة مع طفل صغير محتاج اهتمام و تبديل و ممكن يصيح و انتي تعتمرين ما بتركزين عدل
غير ان الجوو برد الحين + زحمة الناس يعني ممكن يلقط اي مرض بسرعه او زجام او حمى

يعني عندج حلين عمليين:
يا انج ما تسافرين حاليا او تسافرين و تخلينه عند ماماتج

[Lovely M]

مش عارفة الوضع محير

[احلى الايام]

اشكر كل الي ردوا علي .. وايدين من اهلي نصحوني اخليه عشان الجو والزحمة وهو توه ياهل ووحده من الاهل قالتلي انها تمت تصلي فالفندق وريلها يروح المسجد .. علشان جي قررت انقص الايام واخليهم 3 ايام واخلي ولدي مع امي لان محد رضى يروح معانا لا امي ولا حد من خواته.. وطبعا ماحبيت ااجل السفر لان خصوصا العمرة يوم تنوي تروحها والله سهل عليك فيفضل تروح والحمد لله.. انا محتاجة اروح العمرة ونويت اروحها .. وعادي اذا قرب وقت السفر وغيرت رايي بقصله تذكره وبشله تراه يحطونه فحضني ما يحتاج كرسي..

[حلو مالح]

عزيزتي عليكي بصلاة الاستخارة وباذن الله راح ربنا يخترلك الافضل بس انا لو كنت مكانك باجل سفري للعمرة للعام القادم لان ابنك بعدو صغير سؤاء لسفرو معك او تركوا عند والدتك وتربيتك لولدك والاهتمام في عبادة