زواج من أجنبي

[وجدان الفجر]

قال عليه الصلأة والسلأم ..

(( لأفرق بين عربي ولأ اعجمي ولأ ابيض ولأ اسود الأ بالتقوى ))

صدق رسول الله صلى الله عليه وسلم ...

وقال تعالى في كتابه الكريم ..

(( ياايها الناس انا خلقناكم من ذكر وانثى وجعلناكم شعوبا وقبائل لتعارفوا ان اكرمكم عند الله اتقاكم ان الله عليم خبير )) ..

صدق الله العظيم ...الحجرات 13

آنا طلبت نصيحتكم وانا عارفه شو العواقب .. انا قابله وانا ادري في وايد حريم عندهم مشاكل وهم مع مواطنين يعني التوفيق من الله والسعاده من الله وانا اريد الستر و الحلال واريد الله يسعدني .. اللي عنده كلمت خير يقولها وانا مثل اختكم

أختي السموحة منج , أنت ما تبي النصيحة أنت تبنا نوافقج على رايج . عني أنا نصيحتي لج كانت لوجه الله وصادقة فيها ولو كنت أختي أو بنتي أو قريبتي كنت بقول لها نفس الكلام .كل زواج مثل ما له إيجابياته له مشاكله وسلبياته الللي لازم الوحدة تقبل بها وتتعايش معاها لو بغت حياتها تستمر .والزواج من وافد له سلبيات أكثر بكثير من الزواج من نفس شخص من نفس جنسيتج .فكري فيها , هذا زواج ! مب وظيفة بجربها ولو ما عجبتني بتركها ! فيه تبعات لهذا القرار بتستمر طول العمر . في الزواج مب بس أنت وهو فيه أهلج وأهله , فيه أولاد بيوا بعدين , خلينا من الأهل, أولادج شو حقوقهم عليج ؟ ليش باكر يتبهدلوا ؟ من بيكون السبب ؟ وكيف بتبرري لهم ؟ لو شي ما بإيدج تراه ما بإيدج ومعذورة ولكن بهذه الحالة أنت مسؤولة عن هذا القرار .وحدة تزوجت واحد مب مواطن وكانت أول سنوات الزواج عايشة في عسل معاه والحين بعد ما جابت العيال والله العظيم ندمانة قد شعر راسها !زوجها طلع على حقيقته بعد كم سنة من الزواج وطلع ما خذنها بس علشان مصلحة وأنه تشتغل وتصرف ومواطنة وجاب أهله كلهم الدولة ,وهي خذت قرض علشانه علشان يسوي مشروعه الخاص وطبعاً مشروعه تبخر وتم الدين كاسر ظهرها , وبعد 12 سنة زواج بعدها تعيش في شقة إيجار وعيالها كل يوم يشتكوا لها من إحساسهم بالدونية وأنهم حاسين بالفرق بينهم وبين أولاد خالاتهم وأولاد أخوالهم وتقول وهي تبكي : ما شي كاسر قلبي غير إنكسار خاطر عيالي !!!.والثانية بعد ما سوت المستحيل وتزوجته مع أول مشكلة واجهته في حياته العملية , ترك الدولة وغادر من دون حتى ما تعرف !!!! والثالثة : تزوجته وجابت منه طفلين وبعدها قال أبي أرجع بلدي ومالي عيشة هنا وأجبرها على السفر معاه , يا تسافري معاي يا أخذ منج الأولاد ! وهي ماقدرت تتخلى عن أولادها والحين عايشة معاه بغربة في بلاده , وبعد تشتغل هناك علشان تساعد في مصاريف الحياة وتشتكي من الغربة والتعب وتغير سلوكيات أطفالها ومن تغير المستوى المعيشي !. وأعتقد أنج قرأتي قبل كم أسبوع عن المواطنة اللي تقدمت بشكوى أنها عطت شخص عربي وافد مبلغ من المال لأنه كان واعدنها بالزواج وبعدين خذ المبلغ وأختفى !!!!! ( الخبر كان في الجرايد ).
أختي ,,,, فكري زين وعدل ولا تخلي العاطفة تعمي عينج عن الحقيقة , وحطي السلبيات والإيجابيات كلها وقارني بينها عدل ولو شفتي إنج فعلاً مستعدة للعواقب وللنتيجة فإقنعي أهلج بطريقتج لأن هذول أهلج وأنت أدرى بهم منا . والله يوفقج .