الحرمة المتزوجــه والشغل

[UniQue Soul]

السلام عليكم ورحمة الله وبركاته ...

حاليا وبهالزمن اللي نشووف فيه الماديات والمستوى المعيشي الصعب وكل شي غآلي وخصــوصآ آزمة البيوت وآزمة المستلزمأت الشخصيــــة ... آشووف وبرآيي الشخصي ان الزوجــة لآزم تشتغل!!!

اذا اشتغلت بتوفر مكآسب لهآ مثل:
بتقدر تشتري اغراضهآ اللي ما يوفرها المصروووف
بتساعد ريلها في بناء البيت المستقبلي وفي أموور أخرى
بتووفر احسسن المعيششة للأبنآء
وبنفس الوقت بتشغل نفسها وبتكون من ركب الحضآرة لانها بتعرف شو قاعد يصير

طبعآ اذا عندهاآ عيال ..العيال اولى انهم ياخذون الرعاية من الام ..بسسس بعد يعتمد على مدى تنظيم الام مثلا لما العيال يسيرون المدراس تكون هي في الدوام وتحاول ترتب امووورها بين العيال والزوج والبيت..

هذا رايي الشخصي وآؤيده وبقوووه لان ما في شي ينفع المرآة بزمن الخيانات وزمن اللي ما ينعرف شو بيصير في المستقبل غير شهادتها وشغلها!

المزيد من آخر المواضيع من نفس القسم:

• السلام عليكم
• فرق و اختلاف محتوى Netflix الامريكي و العربي
• عيدنا ليس هنا ................لعبدالحليم...
• مطلوب توظيف مندوبة تسويق في عجمان
• مطلوب توظيف سكرتيرة في العين
• مطلوب توظيف سكرتيرة في ابوظبي
• مقومات الدول الإسلامية في حالة ما إذا إتحدت
• حجامة
• الرقابة من الأهالي ضرورية قبل خوض مواقع...
• مجرمون بثياب كثيرة،،،،لعبدالحليم الطيطي

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ماحد شراتي]

معاج فالرأي
لانها ما بتطلع تشتغل إلا وهيه مضطره الواحد ما يعرف شو ظروف الوحدة يوم تطلع وأكيد الأم الذكية والحريصة بتكون متابعه أمور بيتها وعيالها وبتوازن بين شغلها وبيتها

[ملكة الاحاسيس]

مو ضروري تشتغل خارج البيت بامكانها عمل مشروع من داخل البيت وجني الارباح

[UniQue Soul]

مو ضروري تشتغل خارج البيت بامكانها عمل مشروع من داخل البيت وجني الارباح

صح وآنا آؤيد هالشي وخصوصا اذا عندها راس مال

[احلى بعفويتي]

مو شرط الظروف الماديه هي سبب عما المراه
مثلا ... عالتنا عندها ثقافه عمل المراة ... للاسبابالتاللية:
المواطنه اولى من الاجنبي في الحكومه ...
العمل يرفع من قيمة المراه ويعطيها استقلاليه لان زمنا اختلفت فيها المعاير ... مو مثل قبل ... تلاقي الاخو و العم و الخال يصرفون ع خواتهم و عيالهم .. صارت الدنيا نفسي نفسي فقط ....
الدراسات العليا و تعب السنين حران يندس و يتنسي
العمل يلهي البنت عن واااايد تفاهات و تضيع وقتها في شي مفيد له مردود مادي حلوووو

بعد من وجهة نظري عمل الزوجه مهم هالايام ...
للرفاهيه الماديه و لضمان مستقبلها مهما كان الزوج ... يعني مو كل وحده توفقت بزوج طيب وكريم و يصرف عليها مثل ما تبي ...
المراه العامله طبيعة حياتها متغيره ... و رفاهيتها اكثر


طبعا وجود الاطفال ممكن احيانا ينغص عليها العمل و يجعلها مشغوله فيهم في اوقات العمل ... بس الي داوم لازم تعرف ان وقتها محدود فلازم ترتب اولوياتها .... و تنظم موضوع الحمل ... اذا كل سنه بيبي ما بتفشل في تنظيم حياتها و بتحس ان الشغل مسولها ازمه ...

[Mouza17]

برأيي أن الحرمه المتزوجهه عادي تداومم ، لأنني أشوف وايد من مجتمعنا يداومن ، بس أهم شي يكونون اليهال عند حد ثقة ، لأن أي وقت ممكن تخسرينهم لا سمح الله إذا كانوا عند خادمه غير موثوق فيها أو لحالهم ..

و أنا أقول حتى لو بداوم المفروض تتعهد مع نفسها ترجع لبيتها بنشاط عالي ، مب بس تيي تعبانهه و لا لهاخاطر ع حد ، يكلمها ولدها و أهي تكلمه بدون نفس أو من هالامورر ..

[بهلولة]

انا زوجة وام وموظفة
ورايي ان الشغل حرم الام من وايد اولويات تخص بيتها وعيالها
والماديات كلت قلوبنا كلنا
وغلاء المعيشة
والفشخرة

اتمنى معاشات رياييلنا تكون اكثر من جي
اتمنى اجازة الامومة تمتد لين 3 سنين
بمعنى ان عقب 6 شهور تكون الاجازة بدون راتب لكن مكانها بالحكومة يكون موجود
وما تعاني لين تحصل وظيفة ثاني
حرام والله حرام الام تخلي عيالها الاقل عن 3 سنين
انا عني اعاني من هالشي
ودوم احس قلبي وتفكيري مو بالدوام
تفكيري بعيالي وبيتي والتزاماتي كام وزوجة

[مراسيل الوفاآ]

انا مب ضد عمل المرأة لكن الأفضل انه المتزوجه تعطي
الفرصه لغير المتزوجات بحكم انه عندها بيت وعيال
يشغلونها وبالتالي ما تحصل وقت فراغ وان حصلت ف
الاحسن انه يكون وقت راحه لها عشان ما تكثر الضغوطات
عليها واللي يأثر ع الحياه الزوجيه، والحياه الزوجيه مثل
ما نعرف تختلف عن حياة العزوبيه بما فيها من مسؤوليات
تجاه الزوج والعيال والبيت واللي فيها ضعف مسؤوليه الشغل
لانها ف الشغل تشتغل مقابل راتب + تخدم الوطن اما ربة
المنزل ف هي تربي اجيال وتساعد زوج وتاخذ عنه مسؤوليه
التربيه ويكون لها وقت فراغ غير اللي تشتغل (المتزوجه)
اللي ممكن انها ما توازن بين الشغل والبيت او تشتكي ضيق
الوقت ف ما تحصل الوقت اللي تقدر فيه تيلس ويا ريلها او
العيال لانه نص اليوم يروح للشغل

اما بخصوص

اذا اشتغلت بتوفر مكآسب لهآ مثل:
بتقدر تشتري اغراضهآ اللي ما يوفرها المصروووف
بتساعد ريلها في بناء البيت المستقبلي وفي أموور أخرى
بتووفر احسسن المعيششة للأبنآء
وبنفس الوقت بتشغل نفسها وبتكون من ركب الحضآرة لانها بتعرف شو قاعد يصير

اللي تشوف انه اغراضها ما بتقدر توفرهن بالمصروف
ف تقدر تشتغل لكن تتأكد انه هالشي ما بيأثر ع استقرار
حياتهم الزوجيه ولا بيسبب مشاكل لهم، واللي تبا تساعد
ريلها ف بناء البيت ف هالشي غلط اساسا لانه من واجب
الزوج انه يوفر المسكن لزوجته وعياله وبالتالي ها حق
من حقوق الزوجه ع ريلها ولازم يتحمل مسؤوليه توفيره
واذا تبا تساعده ف ممكن انها تيمع مبلغ معين لين ما
ينبني البيت وتوفر الاثاث من اللي يمعته او مثل ما نقول
كماليات البيت مب البيت نفسه وعن معيشه العيال ف اللي
بتتضرر هي اللي تسجل عيالها ف مدارس خاصه بحكم
انه الانجليزيه عندهم توب! لكن هالشي بنظري غلط لانه
الحينه نشوف وايد عيال يرمسون انجلش وان رمسوا بالعربي
ف لغتهم مكسره وهالشي ابدا مب حضاري لابد للعيال انه
يتعلمون لغتهم اول وعقب الانجلش ودام هاللغه صارت ضروريه
ف بلادنا ف يتعلمها عقب ما يتقن العربيه مب العكس ورسوم
المدارس الخاصه ممكن انها تأثر ع مادية العايله بعكس اذا دخلوهم
مدارس حكوميه ويمعوا مبلغ كل شهر لهم غير انه نوديهم اماكن ترفيهيه
كل ويكند اعتقد انه كافي للطفل لين ما يكبر ويكون له مبلغ محترم سواء
بنت او ولد، وف زمننا احسن شي ممكن يحصلونه العيال هو التربيه الصالحه
القائمه ع الدين والاخلاق واللي اصبحت نادره بحكم الانفتاح اللي يشهده مجتمعنا
واخيرا، الحضاره مب بعمل المرأة، الحضاره هي كيف انه المرأة تهتم بشؤون بيتها
وتربي اجيال المستقبل والنت ما يقصر من حيث الاخبار والمواقف اللي تنكتب والقصص
وكل مفيد نقدر نتعلمه ونحن ف البيت والتواصل بين الاقارب والاصدقاء . .

[**هدوء**]

مع احترامي لكل أم عامله ولكل ربة منزل الكل تعبان ومهما كانت الظروف أنا رأي انه الحرمه أحسن وظيفة الله خلقها لها هي تربيه عائلها واهتمامها ببيتها لان ما فيها أحسن من الأم والزوجة لهذه الوظيفة

[ميرة المنصوري]

موافقة معاج بخصوص عمل المراة
بس مشكلة العيال خاصة الصغار منهم وين بتخلينهم
للاسف معظم الدوامات ماتراعي هذا الشي ابسط شي يوفرون حضانه

[cute uae]

مع احترامي لكل أم عامله ولكل ربة منزل الكل تعبان ومهما كانت الظروف أنا رأي انه الحرمه أحسن وظيفة الله خلقها لها هي تربيه عائلها واهتمامها ببيتها لان ما فيها أحسن من الأم والزوجة لهذه الوظيفة

[احلى بعفويتي]

اختلاف الاراء دوووم موجود ..

بس الي تشوف شغلها معطل حياتها الاسريه تتنازل عن الشغل ..
غيرها محتاي .. مو لازم تجبر نفسها .. و اذا ع الفشخره تكتفي بالي عندها و الله يسهل ..
بس بعد ضيقه ذات اليد مصيبه اكتئاب يا اختي ..
تبين تطلعين تغيرين جو .. في رياييل ماعندهم .. مره فالشهر بس ..
عندج مناسبات واعياد تبين تجاملين حد .. بعد في رياييل ما يعطون مبالغ اوكي ..
تبين تساعدين امج او خواتج .. ما عندج دخل ما تقدرين ..
تبين تسافرين .. مافي فلوس ..
تبين تتعالجين في مستشفيات خاصه او خارجيه .. ماعندج ..
صارت ضائقه ماليه .. ما تقدرين تساعدين بشي الا بذهيباتج ..


كل الرياييل تقريبا عليهم ديون و المعاش الي يتم يمشي نفسه ع مصرف الكهربا و الماي و الراشن .. وايجار البيت ..
و ثياب يهال .. كم وكم بيوبل ..
الي بتشتغل بتريح مخها من الحمل المادي .. بترتاح .. والحمل المادي صار من الضروريات هالايام ..

و القنوعه الي تروم تعيش ع مبلغ 2000 او 3000 كل شهر يا حيها .. تعيش و تستانس ..

و الزوج ملزوم بماكل وملبس و المسكن ع قد حاله .. يعني الريال الي ما عنده حق ايجار بيت بيلس مرته في ابيت ابوه .. لا يدفع كهرب و لا ماي و لا راشن .. بس هالحال اغلب الحريم ما يرومون عليه لكثره المشاكل .. بس مو منحقا تعترض لان حالة الزوج ما تسمح .. ممكن هي تتكفل بسكن اخر اذا ما عجبها الحال و هذا من القانون و الشريعه ..

و الاسلام ما يمنع المراه من حقها في العمل المحترم ..
انا ما اتكلم عن الاعمال الي فيها علاقات مع رجال و اجتماعات مع الرجال و الكلام والخلوه مع الرجال ..
في كثير من الوظايف الي تشرف الزوج بزوجته ..
وهالشي مو ممنوع و لا حرام ..

وياما امهات افنو نفسهم عشان العيال واخر شي مكانهم دار العجزه او هي الي تبتلش بمصايبهم ..
طبعا التربيه لها دوووم مهم .. يعني مو شرط الام في البيت الاطفال متربايين ..

و ع فكره احيانا كثيره الي تشتغل تبا هالشي لنفسها مو انانيه منها ..
بس الريال بعد كثيييير من الاشياء يسويها لنفسه حتى لو قصر في حق مرته وعياله ..
و لازم الحرمه تصبر عليه و ع تقصيره وتسكت و تتحسب الاجر .. و يكبر عمرها 100 سنه ..
تلاقي الحرمه شكلها كبير من الهم والريال جنه فرخ ..

[بنت بوظبـي]

برأيي أن الحرمه المتزوجهه عادي تداومم ، لأنني أشوف وايد من مجتمعنا يداومن ، بس أهم شي يكونون اليهال عند حد ثقة ، لأن أي وقت ممكن تخسرينهم لا سمح الله إذا كانوا عند خادمه غير موثوق فيها أو لحالهم ..

و أنا أقول حتى لو بداوم المفروض تتعهد مع نفسها ترجع لبيتها بنشاط عالي ، مب بس تيي تعبانهه و لا لهاخاطر ع حد ، يكلمها ولدها و أهي تكلمه بدون نفس أو من هالامورر ..

[شعاع امل]

الشغل ضروري للمراه باي مجال تقدر عليه

بس اذا في زوج يوفر لها احتياجاتها حقيقي او هي غنيه ومقتدره خلاص مافي له داعي كثير

بس انا اشوف حتى الغنيه مفروض تتحرك وتشتغل لو شي بسيط

عشان الشغل كيان!