شفت ابوي سكران !!

[سعاده2]

للاسف طول عمري ابوي قدوة كبيرة لي ابوي فضلني وملدعني من بين كل خواني وخواتي وكل شي اباه حاضر ولو فوق طاقته

احب ابوي حب ملحوظ لدرجه ان الكل يقول من صغيرة وانتي تحبين ابوج ومتعلقة فييه اكثر عن امج كان دوم من يروح ويا ربعه ولا يسير عليهم انا اكون وياه حتى كبره السمك انا وياه

وحتى من كبرت صرنا وايد قراب من بعض، بنات ابوي من وصغيره اشوفه ريال مصلي ومسمي ماشالله عليه ف حياتي ماشفته يدخن واعرف ومتاكده انه يكره التدخين كره العمى

لين قبل امس يا بنات انصدمت كنت طالعه مشوار وسيارتي هالفترة بالتصليح اتصلت بالبيت وابوي قالي بيمرني عقب مايخلص من الدوام وانتظرته ومن ياني ركبت السيارة سلمت واشوفه يضحك باستمرار ومايوقف وسالته الوالد ضحكني وياك تم يبلبل والله مافهمت ولا شي وصوته متغير انا سالته ابويه شو فيه صوتك ومن داخلي والله اني كنت خايفه

سكت مارد علي ولا تكلمنا من المشوار لين البيت 20 دقيقه ( بالعاده سوالف بالسيارة مانسكت) صار الجو هادي بس كل شوي يقول اشيا مافهمها وشوي يقول كلمات وسبات بنات بغيت اصيح وافتح السيارة وافر عمري بس ماشوف ابوي بهالمنظر وكنت ابي اقوله اسوق عنك ابوي قالي لااااااااااااااااااااا (يصارخ)

وشوي بطل المسجل ويحط اغاني انا هني خلااااااص عيني كلها دموع ادعي بداخلي نوصل بالسلامة (ابوي مايسمع اغاني اقولكم ريال مصلي وعارف الله)

وصلنا البيت ويلس يصارخ على امي وامي على طول طالعته وعطته نظرات غريبة حتى العامل الي عندنا استغرب من شاف ابوي (والعامل الي عندنا ملتزم)
كتمنا الموضوع ودخلنا نتغدا وطول الغدا سااااااااااااااكت ويتمايل يمين ويسار

من راح قلت لامي شو فيه ابويه امي ماردت وعصبت قالت عقب هالعمر يرد لهالمنكر لا وف عز النهار !!!!!!!!!!!

طلبت مني ماخبر حد من خواني عن الي شفته وخليناه يرقد (تخيلو الريال الي مايترك فرض وسنه نام من العصر لين اليوم الثاني)

صورته انكسرت جدامي يابنات خلاص كرهته ماعرف كيف اتكلم او اتصرف الصبح ياي يصبح علي ماعطيته ويه امس طلعنا مرة 2 انا وياه والوالده وشافني ساكته وحاول يكلمني ويتمصخر وياي مثل العاده بس مانطقت بحرف واحد

انا على ويه سفر بعد كم من يوم مب متخيله للحين اني اكرهه ومابي اتكلم وياه مب عارفه كيف بتصرف وياه بالايام اليايه فجاة كرهت كل جنس الرجال

مصدووووووومة

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[الغــــــلا]

الغالية مهما كان هذا أبوج .. ولو شو ما سوا المفروض توقفون وياه وتساعدونه .. يمكن ربع السوء ردوه لهالمنكر غصبن عنه .. مثل مافيه شياطين الجن فيه شياطين اﻹنس ..
يمكن زنوا على عليه ولعبوا بمخه ورد لهاﻷرف مرة ثانية ..
أنا مب قاعده أبرر للوالد الغلط .. بس المفروض لو شو ماتقولين كرهت أبوي .. صدق ضايجتيني !!!
ادعيله بالهداية .. انصحيه .. سوي اللي ترومين عليه من محاضرات وأدعية
ما أتخيل ف يوم من اﻷيام أقول كرهت أبوي ..!
صح انصدمتي بس مب جيه .. يتم أبوج اللي بسببه انتي على هالدنيا .. أنا رايي تكلمين واحد كبير من أخوانج يكون قريب ﻷبوج أو حتى واحد من أعمامج أبوج يعزه وايد يحلون هالموضوع .. بس انكم تسكتون وممكن يتكرر هالشي ﻻ ما أنصح ..
وعسى ربي يهديه ويصلحه ويثبته على طاعته ..

[إآٌحسآس نمله]

الله يهديه ويصبركم .. بس مارد لهالشي الا وفي سبب خلاه يرد.. دامه تاب وعرف طريج ربه مارده للخراب الا شي وجيه ..
اذا تقدرين انتي مب صغيره نصيحه مني يعني ( لاتكرهينه مهما كان ها ابوج حاولي تقعدين معاه وتقولين له اللي بخاطرج قوليله بابا امس انا شفتك بحاله ومن شفتك قلبي تقطع عليك بابا شو فيك .. في شي مزعلنك احنا عيالك مقصرين ولا مضايقينك في شي ولا ماما مزعلتنك في شي ، انت مب مرتاح ويانا اذا قال ليش جي تقولين ، قوليله بابا وضعك امس ضيعني وشتتني تمنيت الموت ولا اشوف نظر عيني واغلى شي في دنيتي بهالحاله ، يمكن يفتح لج قلبه ويمكن كلامج يأثر فيه بيقول عيالي كبروا وغيره يعني تقربي من ابوج اكثر وخلج مب بس بنته خلج صديقته واخته ،وانتي تكلمينه صيحي واحضينيه وتمي حبيه على راسه ، يمكن هالشي يصحي ابوج ويرد له عقله ، وحاولوا انتو هالفتره تلهونه عن الناس اللي برع ، يعني خليه هو يوديج يقضي مشاويرج ومشاوير خواتج ، ولا حاولوا تطلعون طلعات عائليه تسيرون اماكن بعيده عن منطقتكم تغيرون جوو ، تسووون ف البيت باربكيو ، تسيرون عند اهلكم اللي ساكنين بعيد عنكم كم يوم تباتون عندهم يعني خلكم هالفتره انتو محور حياته تقربوا منه اكثر واكثر وان شاء الله يرد لربه على ايدج راح تكبرين في عينه وقلبه واجرج عند رب العالمين مابيضيع بس لا تقولين كرهت ابوي ) انتي حاولي تسوين هالشي واذا ماقدرتي بروحج رمسي حد من اخوانج الكبار وابوج يسمع كلامه ويحترمه خله يكوون وياج وحطوا ايدكم في ايد بعض وطلعوا باباتكم من اللي هو فيه ..

عسى ربي يهديه ويصلح حاله ويطول بعمره

[سعاده2]

اشكركن خواتي الغلا واحساس نملة انا ما اقصد الكره الكره مادري بس جد متشتته ومن يومها مقدر احط عيني بعينه ماحس اني اقدر اكلمه للاسف صارت مشاكل كبيره بين ابوي واخواني وتركو البيت ورااحو لامهم ومحد بقى بالبيت غيري وامي وهو !!!!!

[إآٌحسآس نمله]

ماعليه اخوانج محد ف البيت بس اكيد يحبون ابوهم مثل ماتحبينه لي كلمتي واحد منهم اكيد بيوقف وياج وبيساعدج انتي لا تسكين البيبان في ويهج حاولي والله مابتندمين صح الموضوع مب هين بس عشان حياتكم ومستقبلكم لازم تحاولين وتسوين شي ( يعني انتي وامج مالكم غير ابوج وهو سندكم في هالدنيا من بعد رب العالمين ) ف لازم تسوين شي وتردين ابوج لعقله بليز انتي حاولي وان شاء الله خير

[كشكوشة منفوشة]

انصحيه دامه رد وهاي البداية قصوا عليه الريايل
وليش ماتخبرون اخوانج
لين يطيح مثلا!!
لازم الرياييل يتصرفون معاه عن يضيع منكم

[شعاع امل]

اختي لازم تشوفون حل

لان الخمر مشكله كبيره

حاولوا تكلمونه خاصه انتي عشان بنته ومدلعنك ويحبك

يمكن الله يهديه

[بهلولة]

ابوج بالاخير انسان مو ملاك
يغلط شرات ما انتي تغلطين وانا وغيرنا كلنا
ادعيله بالهدايه
وعسى ما يعيدها مره ثانيه
واذا عادها انا رايي تكلمينه
وتخبرينه كيف ان نفسيتج تدمرت عقب اللي شفتيه
عسى ربي يهديه

[ماحد شراتي]

أكيد رد لرفقاء السوء
الله يهديه
حاولي انج تكلمينه دامنه علاقتج قويه وياه

[شيخــــة]

ادعي له وخلي امج تتصرف ... وسيري وياه عمره على وعسى يستشعر الندم .. اهم شي يندم ما يفرح ويحس الوضع طبيعي

[WATMOR]

UUUUUUUUUUUUUUUP

[مجروحة وأكابر]

الله يهديه ويصلح حاله ادعيله و كوني معاه مب ضده

[مـــــريم]

الله يهديه شي يحزن ونا مع احساس نملة..

[نونة الدلوعة]

لا حول ولا قوة إلا بالله

أكييد من ربع السووء
عسى ربي يهديه ويصلح حاله

حاولي انج تذكرينه بربه وتنصحيينه بطريقتج
وما دام انتي أقرب وحدة من عياله له ويجوفج انج تنصحينه أكييد بيستحي من عمره

والخمر من الكبائر
لا تخليينه على راحته ولو دخلتي حد من أعمامج أو خوالج يعني رياييل العايلة بس انه ما يندرج بهالطريق
الله يهديه ويرده لعقله ولدينه

[× كوكو ×]

ما انصحج تكلمينه على طول
لأنه بهالطريقة الموضوع بينشد من الطرفين
بيتنرفز و بيعصب و يمكن يعق كلام ما ينقال
سايسييه شغلي آية قرآن فيها ان الخمر حرام
و ردي كرري هذي الآية هنيه هو بيحس
واذا ما حس ولا يه بالمسايسه آخر شي كلميه اهم شي طولت البال
الله يهديه و يهدي جميع المسلمين