ما اتصور يوصل الظلم في بلادنا الحبيبة لدرجه لا توصف ولا تصدق

**نفل** · 2013-08-03, 04:20

صديقتي وعلى لسانها انا مواطنه عمري 45 سنه بس قررت اعرس شوفوا شستوى فيه ما تتصورن مدى القسوى وانعدم الضمير الانساني وموت روح الاسلام والرجوله في قضاتنا واهلينا طبعا مب الجميع ولا للتعميم ولكن انا هذا ما حصل معاي

اليكم التفاصيل

طبعا افنيت عمري ولم اتزوج بعد طلاقي تفرغا لخدمة امي المريضه وبعد مضي 20سنه على الطلاق وخلال هالفتره تقدم لي اكثر من خاطب وطبعا اخويه الكبير يرفض لين وصل عمري 45 سنه ، من سنه تقريبا تقدم لي شاب من جنسية عربيه قبيلي على خلق ودين وابوه شيخ قبيله
ولهم مكانتهم في بلادهم ويعمل مستثمر في بلادنا وعنده مصنع طبعا عمره 35 سنه ، اخويه الكبيركالعاده رافض سار الريال حق اخوي الثاني فوافق ولكن اشترط عليه شرط ان اتنازل له عن ارض هبه من الوالده معطتني اياها وبانيتها بقرضي ومأجره فللها , الصراحه طلب صعب وانا ماعندي غير هالارض ومتقاعده ومعاشي كله ما يتجاوز 10 الاف . قالي الريال طمعان فيج !! وانا ابا مصلحتج لازم تتنازلين من الهبه والفلل وتسجليها بإسمي , قلت ما بتنازل ولكن يوم انته نيتك تبا تتأكد ان الريال مب طمعان في حلاليه عندي لك حل افضل من اني اتنازلك عن حلاليه
انا باعطيك الارض لمدة 5 سنوات عقد استثمار وجيه بتكون حفظت حلاليه وبهالفتره تكون تأكدت من سلوك الريال اذا طمعان .

قال لا ما بتعرسين الا تتنازلين باسمي , طبعا ما طعت وسرت رفعت عليهم دعوى في المحكمه عضل ولي . المحكمه استدعت الخاطب واخويه
وسألهم الخاطب وقال انا ييت من الباب على سنه الله ورسوله وحسب قانون الدوله وسلوم سبع القبايل . وقال حق القاضي يسأل اخويه عن سبب رفضه ؟ قال اخويه طمعان في حلال اختيه . قال الخاطب انا مستعد اثبت حسن نيتيه من وراء الزواج واثبت للجميع اني هب طمعان

قال انا بسجل لها مزرعه في بلادي مساحتها 20 الف متر مربع وفيها بير ماء ومزروعه وفي منطقه راقيه . وفيها حضيرة هوش كبيره
وارض سكنيه في العاصمه على 3 شوارع

هل يا حضرة القاضي اكون طمعان ؟ ولا شاري البنت ؟

يا اخويه وقال انا موافق اذا تنازل لها من الاراضي والمزرعه يا الخاطب وقال حق القاضي ابا مهله 20يوم اسجل لها الاراضي وتم تدوين الاتفاق في محضر الجلسه في المحكمه ان الريال يتنازل ويتم الزواج + يتم تصديق الملكيات من سفارة دولة الامارات ف بلاده والخارجيه + يوصل تقرير التحريات عن الخاطب سليما وخاليا من اي قيد امني او جنائي

تأجلت الجلسه وانعقدت ويا الريال وفي يده التنازلات الرسميه وتمت في السفاره مختومه وموثقه ومصدقه من الخارجية ووصل تقرير التحريات ان الريال حسن السيره والسلوك وما شي عليه قيود جنائيه وسجله نظيف وانه يعمل مستثمر في الدوله .

وبس قدم الريال الملكيات تغير ويه القاضي وترك المنصه والقضاه والجمهور سار ركيض حق رئيس المحكمه وغاب نص ساعه ورد

قالي يا بنتي لازم نأجل الجلسه ونحجزها للحكم والريال طلع صادق واثبت حسن نيته ، وانا ما اتوقع قاضي ويقوم مقم رسول الله ويمثل العداله يكون انسان كذاب ومنافق وظالم ومافي ويهه ذرة رجوله للاسف عطاني موعد وهمي للجلسه القادمه والخبيث سجل في الاوراق موعد آخر .
طبعا عندي اثبااتات رسميه ميودتها على هاالقاضي . فحضرت في الموعد اللي عطاني اياه القاضي اقولكم دخلت عليه ويهه اسود وما طاع يرفع راسه في ويهي وقال لا الجلسه انعقدت وانتي ما حضرتي ونحن شطبنا الدعوى واعتبرناها كأن لم تكن ؟؟

طبعا طلعت شياطين راسي , وسرت حق ابو ظبي حق رئيس التفتيش القضائي وفي يدي شكوى على القاضي ورئيس المحكمه لان الموضوع كله واسطات محركه من قبل هليه ضدي في المحكمه .

سرت بوظبي الريال ما عطاني اي اهتمام حولني على مستشار الصراحه كان في البدايه يسمع مني يدون الشكوى فجأه دخل عليه ريال مسؤؤل قالوا لي طلعي برى طلعت ورديت ولا المستشار متغير لونه والمسؤؤل كان موجود واسمعه يهمس في اذن المستشار ترى هذي كلمني عنها رئيس المحكمه الفلانية !!! المهم صرفوني وتمت الشكوى عندهم شهووور ولين هالساعه ما ردوا عليه !

في هالاثناء امي كانت مريضه وكنت وياها في امريكا حق العلاج 5 شهور . وردينا البلاد واستوت لها جلطه دماغيه ما تنطق ولا تتحرك ومب في وعيها ، اخويه الكبير عنده وكاله عامه من الوالده سار ورفع دعوى استرداد الهبه وافترى الكذب وحط امي في ذمته وسبحان الله رفع الدعوى وثاني يوم الوالده توفت ، شوفوا الواسطات شو تسوي في المحاكم المفروض اذا مات احد اطراف الدعوى تنقضي الخصومه بحكم القانون ولك الواسطات تقلب القانون سار حق رئيس المحكمه وضغط على القاضي ومشوا الدعوى رغم وفاة الوالده وقامت الممحكمه غيرت شكل الدعوى وخلتها من الورثه ضدي ! مشينا في الدعوى لباطله من الاساس وحكم القاضي الظالم بفسخ الهبه وتوزيعها على الورثه رغم اني انا اللي بانيتها بقرضي والهبه انتقلت رسميا قبل 4 سنوات وكانت امي بصحه وعافيه . ووقت رفع الدعوى كانت امي مريضه مرض الموت وتصرفاتها غير نافذه بحكم القانون بس لواسطات تفعل ما تشاء في قضاتنا للاسف . والمحكمه حكمت بفسخ الهبه على اساس اني جاحده لامي ؟؟؟ كيف عرفت المحكمه او ثبت لها قطعيا اني جاحده لامي ؟ وانا تميت طول عمري بدون عرس لعيونها وفي خدمتها ,, ما اصعب الظلم كنت اسمع فلانه انظلمت ما احس بقيمة الظلم ومراره وصعوبته لين طحت وانظلمت واخر عمري يحكمون عليه اني جاحده لامي !! وياخذون حلاليه اللي انا بنايتنه بفلوووسي وقرضي !!! والدعوى من الاساس باسم امي بس امي مب في وعيها ولا سارت محكمه والتقارير الطبيه تثبت انها من سنه ما تتحرك ولا تنطق ومب في وعيها بس كله كلام واقوال لا صدق لها تقولها اخويه على الوالده وافترى عليها الكذب حسبي الله ونعم الوكيل

الحين ابا رايكم مب عارفه وين اضرب راسي ماشي عداله وانا انظلمت اريد اوصل موضوعي حق الشيوخ سرت ماخليت مكان الا عقيت فيه الشكوى محد سامعني

والريال اللي الكل ظلمه وسجل حقي الارض والمزرعه ما يروم يرد حلاله الا عقب خمس سنين بحكم القانون وهالشي مكتوب في الملكيه بالخط العريض تتوقعووون شو قالي (( يا بنت الحلال بعرس او بغير عرس هالاراضي حقج ولا برد فيها لو اموووت )) وشوفوا اقرب الناس ليه طالبوني ظلم وبهتان في حلالي وماخلوا واسطه لين خذوا حلاليه بالظلم ولكن انا داخليا استوت لي عقده وافتضحنا فالريال فشله فشله واخويه السبب وهقني ودبسني في الاراضي ما اروم اردها عليه لان القانون ما يسمح الا عقب 5 سنين والحياه فيها موت وفوت وما عندي ملايين اعطيه قيمة الارض والمزرعه متوووهقه والله يا خواتي متوهقققققققققققققققققه

اللي تقدر تساعدني توصلني حق الشيخه سلامه حرم الشيخ محمد بن زايد الله يحفظها يارب اكون لها ممنونه واللي ما تقدر تدعالي ربي ينصرني على القوم الظالمين واقدر ارد حلالي واعرس واعيش باقي عمري مرتاحه

والسموحه على الاطاله

المزيد من آخر المواضيع من نفس القسم:

**نفل** · 2013-08-03, 05:28

يشهد الله ورسوله وملائكته وعباده الصالحين اني مظلومه وظلموني اخواني بس ماتت الوالده وتصلطن عليه حريمهم الظالمات

انا اتمنى اسير الحج لو مررررررررررررررره في حياتي واطلب هالطلب من اخواني وكل سنه يحجووون للاسف ما ياخذوني وياهم وانا مستده وما راح اكلفهم بشي

بس كل واحد حرمته مبرمجتنه على كيفها وعلى هواها

ماشي رجوله ولا خوووه للاسف

تصدقون انهم خذوا بيتي ظلم والحين متأجره انا وبنتي المعاقه المريضه ومحد يسأل فينا

عندي ادله ثابته لا تقبل النقض واضحه وضوح الشمس على رئيس المحكمه والقضاه واخواني واسماء الواسطات اللي خربت عليه حياتي وخلوني بدون بيت

اخواني الظالمين اللي هدفهم ما اعررررررررررررررررس لين اموت ويتورثوني

اقول حق اخويه خلني اعرس يمكن اييب لي بذره تنفعني تتوقعون شو رد عليه (( ياعلهم ما ايوووون ))

كم اتمنى من الله ينصرني واستر عمري واييي الولد الصالح اللي تقر عيني بشووفه

اللي تقدر تساعدني وتوصل معاناتي حق الشيخه سلامه الله يحفظها والله اكون لها شاكره وممنونه ومدينه لها طووووووووووووووول عمري وباتم ادعالها بالخير

لا اله الا انت سبحانك ربي اني كنت من الظالمين يارب تكشف عني الظلم وتنصرني على القوم الفاسدين الظالمين وحسبي الله ونعم الوكيل حسبي الله وكفى حسبي الرب من العباد حسبي الخالق من المخلوقين حسبي الذي بيده ملكوت كل شي وهو يجير ولا يجار عليه يا مجيب المضطر اذا دعاه اجب دعوتي في ليلة القدر ربي مسني الضر وانت ارحم الراحمين

**ريانه المزاين** · 2013-08-03, 05:40

لا حول ولا قوه الا بالله العلي العظيم ربي يكون ف عونج يااختي وايسر لج امورج

وع موضوع الحج روحي حمله زايد وااايد بترتاحين وفيها اهتمام وعادي بدون محرم الان بيكون مجموعه من النساء

والله ولي التوفيق

**أبل7** · 2013-08-03, 05:48

لا حول ولا قوة إلا بالله

والله ما أعرف شو إقولج

الله يعينج ويستر عليج ويرد لج حقج يا رب

ادعي الله في هالأيام الفضيله واكثري من الاستغفار وقيام الليل

**نفل** · 2013-08-03, 06:03

ريانة المزايين

ابل 7

يزاكن الله خييييييييييييير

والف شكرا على الحضووور

**عشق طاهر** · 2013-08-03, 06:18

نفل

الغاليه ماحاولتي تتواصلين مع البث المباشر؟

اذا ماقبلوها عالهوا يمكن يسمعون لج تحت الهوا
بذات بوراشد

لان دوم اسمع له واسم ناس تشتكي ع مدراء بالاسامي و جذي
يمكن يفيدونج الغاليه

الله ينصرج عليهم يارب

**سر سر** · 2013-08-03, 06:21

لا حول ولا قوة إلا بالله
الله يعينج أختي و يرد لج حقج يا رب

**نفل** · 2013-08-03, 06:30

لا ما حاولت في البث المباشر

بس البث راح يعتذر يقولون نحن ما نتدخل في القضااااااااااااااااااااااء

زين اذا الوحده ظلمها القاضي شووو تسوووووووووووووووووووي وعندها اوراق رسميه ودلايل واثباتات

الله ينتقم من الواسطات مع ان القاعدة تقوووووووووووووول لا سلطان على القضااااااااااااااااااااااااااء

**نفل** · 2013-08-03, 06:31

سر سر مشكوره اختيه يزاج الله خير وما تشوفين ششر يالغلا

**munamoor** · 2013-08-03, 06:41

حبوبة حاولي توصلين رسالة للشيخة شمسة او حتى للشيخ محمد بن زايد هو له برزة
اكتبي رساله و حاولي قدر الإمكان توصلين له و هي على فكرة ترومين تكتبين للشيخ عبدالله بن زايد
على تويتر ان عندج مشكلة و إخوانج كلوا حقج يالغلا

عندي سوال انتي رحتي اي محكمة شى محكمة النقض و شى بعد أقسام خاصة يمكن إخوانج يعرفون
ناس واصلين او تحت ناس مهمين بس بعد ما يعطيهم هالشى الحق في أنهم يسوون شى يغضبون فيها رب العالمين

( المال و البنون زينة الحياة الدنيا ) و شكلهم إخوانج كانوا يبغون كل شى لهم من البداية

**غلايوووه** · 2013-08-03, 06:42

الله يجعل كيدهم في نحرهم
و يرجعون لج مذلولين يطلبون رضاج و عفوج

**munamoor** · 2013-08-03, 06:43

المشاركة الأصلية كتبت بواسطة نفل

لا ما حاولت في البث المباشر
بس البث راح يعتذر يقولون نحن ما نتدخل في القضااااااااااااااااااااااء
زين اذا الوحده ظلمها القاضي شووو تسوووووووووووووووووووي وعندها اوراق رسميه ودلايل واثباتات
الله ينتقم من الواسطات مع ان القاعدة تقوووووووووووووول لا سلطان على القضااااااااااااااااااااااااااء

انتي من اي إمارة عسب نسال لج يالغلا !؟!

**نفل** · 2013-08-03, 06:49

مس بينكـ

يعلني م اذوووق حزنش

ني من العين

حاولت وسرت حق الشيخه فاطمه ام الامارات في قصر البحر وقدمت الشكوى من 5 شهور ما شي رد

طرشت حق الشيخ منصور بن زايد رئيس دائرة القضاء شكوى ما ياني عليها رد

طرشت وطرشت

محد رد عليه للاسف بس اكيد الشيوخ ربي يحفظهم هم سنام الدار ما يرضوووون فالظلم وانسانه بس لانها بغت تعرس تنتهك حقوقها وتسلب حلالها

لا واخواني يهددوني بالقتل ,,, ما يكفي انهم كلوا حلاليه وعقوني فالشارع

**نفل** · 2013-08-03, 06:51

غلايووووه

مشكوره الله يستجيب دعوتج اللهم امين يزاج الله خير ماتشووفين شر يالغلا

**munamoor** · 2013-08-03, 07:06

المشاركة الأصلية كتبت بواسطة نفل

مس بينكـ
يعلني م اذوووق حزنش
ني من العين
حاولت وسرت حق الشيخه فاطمه ام الامارات في قصر البحر وقدمت الشكوى من 5 شهور ما شي رد
طرشت حق الشيخ منصور بن زايد رئيس دائرة القضاء شكوى ما ياني عليها رد
طرشت وطرشت
محد رد عليه للاسف بس اكيد الشيوخ ربي يحفظهم هم سنام الدار ما يرضوووون فالظلم وانسانه بس لانها بغت تعرس تنتهك حقوقها وتسلب حلالها
لا واخواني يهددوني بالقتل ,,, ما يكفي انهم كلوا حلاليه وعقوني فالشارع

ما شى جدامج غير محمد بن زايد لازم توصلين الرسالة لبرزة محمد بن زايد
و عبدالله بن زايد عل التويتر اكتبي له رساله
منصور بن زايد هو الي ماسك القضاء فغريبة يمكن من الأساس محد وصل له رسالتج يالغلا

الموضوع: ما اتصور يوصل الظلم في بلادنا الحبيبة لدرجه لا توصف ولا تصدق

أدوات الموضوع

عرض

ما اتصور يوصل الظلم في بلادنا الحبيبة لدرجه لا توصف ولا تصدق

المزيد من آخر المواضيع من نفس القسم:

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

رد: ما اتصور يوصل الظلم في بلادنا الحبيبة لدرجه لا توصف ولا تصدق

المواضيع المتشابهه

مشغولات يدوية بأشكال وألوان علم الإمارات بلادنا الحبيبة حفظها الله

وين اقدر احصل الـــ WaterBed في بلادنا الحبيبة الإمارات?

وين اقدر احصل الـــ WaterBed في بلادنا الحبيبة الإمارات?

%%%اتصدقون ها الشي يستوي عندنا وفي بلادنا .. صدق أو لا تصدق!!!

أحبج موووووت يا إماراتي الحبيبة ،، تعالي عبري عن حبج للإمارات بلادنا الغالية ..