قراري الي دمر حياتي !!

[حورية 2012]

السلام عليكم ورحمة الله وبركاته

مبروك عليكم عشر الاواخر من الرمضان

انا حاولت كم مرة اكتب قصتي في المنتدى واخبركم عنها واخد ارائك ونصايحكم قبل ماتوصل حالتي لهالدرجة بس ماقدرت
بس اليوم ابي اخبركم عن تفاصيل حياتي وشو الي صار وياي وكيف انخدعت!!

انا بنت جامعية عمري 24 سنة .. ولكن من ايام الدراسة عندي صديقة عزيزة علي وكانت صديقتي الروح بالروح كنا وايد قريبين من بعض فهي كانت دوم اتقولي يافلانه انا اباج حق اخوي ايامها نحن فالمدرسة كنت اضحك واطنش لين ماكبرنا ودخلنا الجامعة واهني بدا الجد كانت دوم فالجامعة اتقولي (مرت اخوي) لدرجة ربيعاتي حتى عرفوا بالموضوع.. ووقته هي خبرتني انه الشخص الي اتقول انه اخوها اصلا مب اخوها ( صديق اخوها)
بس لان من الصغير ويا بعض فتعبره نفس اخوها والشي الثاني انه مش اماراتي هو كان بدون!!

فقبل سنيت ربيعتي خبرتني ان هم ياين يخطبوني .. وصح يو الحريم كلموا الوالده وكل شي الوالده مارتاحت اولا كونه بدوون ومب دارس وفرق كبير بين عائلتنا وعائلتهم.. بس اهني الغلط مني انا صريت اني ابي اتزوج هالشخص قلت دام الريال روحه اختارني اكيد يباني من خاطره او حبني ومن هالامور

فياليوم كلموا في اهلي ويونا البيت عشان يخطبوني رسمي وطلبوا منه اخواني انه يطلع الجواز عقب يصير خير فالريال راح وطلع الجواز وبعدين صارت الملجة.... واهني تبدا القصة


انا ربيعتي اعرفها من 17 سنة من صف الرابع بس انا عائلتي وايد متشدده يعني ممنوع اروح بيت ربيعاتي فماكنت اعرف وايد عن طبيعة حياتها واخواتها بس بعد الملجة بديت بيت ربيعتي ومنها عرفت ان ربيعتي عندها ماشاء الله خوات يمكن 9 خوات واهني المشكلة ...

شفت ريلي يوميا لازم يزورهم ويقعد ماهم لاخر الليل وفوق كل هذا شوالفه كل ويالبنات يعني مب يقعد ويا ربيعه لا يقعد ويالبنات يطلعهم ... الصراحة المعاملة الي بيني ريلي والبنات انا ماقدر اعامل اخواني بهالطريقة .. فقعدت معاه وخبرته يا فلان انت عطيت نصف عمرك لهم نفس الخادم اتوديهم واتيبهم واتسوي اشغال بيتهم بس خلاص الحين انا مارضى انا ابي ريلي يكون له شخصيته وسمعة بين الناس ولين متى انت وياهم لازم تهتم في بيتك وفيني .. قال اكيد اصلا اصلا انا روحي تعبت بعد العرس خلاص ابا اقعد وارتاح في بيتي وياج قلت اوكي ...

مرت الايام وتصرفات ريلي ماتغيرت قلت ماعليه قالي بعج العرس بيتغير لدرجة انه قبل العرس باسبوع انا مريت شقتي عشان اعدلها الا اشوف ريلي طالع ويا وحده من البنات من الشقة .. وللعلم هو يدري اني ماحب هالبنت خير شر ..
وليلة الحنا رحت الشقة ويا اخوي عشان اشل اغراضي حق السفر الا اشوف مبهدل الشقة كان مسكن الشباب في شقتتي خيسواها وانا في حنتي قعدت انظف الشقة واغسلها هذا وانا عروس بعد سكت..

لين عرست وسافرنا ورجعنا من الشهر العسل اتخيلوا في السفر ماشترالي ولا شي كله كان يشتري حق البنات ويوم اقوله وانا ماتشتريلي يقولي انا حقج شو تبين بالاغراض ...

اتخيلوا من رجعت وانا ماشي يوم الا وانا ريلي انضارب فيه لانه هو مايسمع الكلام كله يروح يقعد ويالبنات اقوله افهمه ماشي فايده .. انا اصلا اداوم شفتات انا ساكنة في دبي واداوم في بوظبي يعني يوميا اروح اروح وارد قلتله بننتقل بوظبي قال ماقدر عشان اخوه مريض قلت ماعليه .. وانا كنت مول ماقصر ويا امه واخواته حتى اخوانه اقعد وياهم كل يوم عنده اطلع وايبهم لدرجة ماروح بيت امي..

بس ريلي مانفع وياه هو ماقل زيراته لدرجة ماكنت اشوفه فالبيت لاني يوم انا ارجع من الدوام يا يكون راقد او يطلع حق دوامه .. بس فالليل انشوف بعض فكنت اقول لو ساعة انحصل نقعد ويا بعض لازم مانضيعه ...

اتخيلوا ريلي بدا يجذب علي كان يقولي انا فالدوام وعقب اعرف انه هو قاعد ويالبنات
كان يوديهم ويطلعم من وراي وانا مادري لان البنات مانعينه لاتخبر حرمتك
كنت اتصل فيه مايرد ويوم اساله يقولي ( قاعد مع البنات ماحب ارد عليج) ويوم ناقشت وياه ووصلت البيت وطبيت الموضوع واحاول اكلمه عادي لا يطلع الريال زعلان مني ولو انا مب غلطانه يلست طول الليل انا عند ريله اصيح كلمني مانش لين الفير نش وقال ( انا مب زعلان بس كنت ابي ادبج عشان ماتدخلين بيني وبين البنات)

دوم يجرحني بكلامه اونه ماكنت ابي اتزوج وحده تمنعني اروح عند البنات
وكله يقولي ماتبيني ودريني !!

لدرجة مرة وحده من البنات اتصلت وقالت له فلان ودنا المستشفى قلتله ماشاء الله كلهن عندهن ليسن وسيااير بروحون هاليوم اجازة خلك وياي لا انا بوديهم قلت ماعليه انا بي وياك قال اوكي بس هو مب راضي لين ماوصلنا بيتهن بدا يضارب قلتله يافلان اختار شي يا انا او البنات قالي(اودرج انتي ولا اودر البنات)

وصارت وايد مشاكل لدرجة اخت ريلي ويالبنات دخلوا بيت امي ظربوني ومدوا ايدهم على امي وسبوني وبهدلوني والبنات قالوا ( غصبن عنج بنكلم ريلج انتي منو عشان تمنعينا) واخت ريلي قالت صبري لو ماخليت اخوي يطلقج وياخذ غيرج ...وريلي واقف ويطالع مل شي ولا تحرك ولا رمس بعد كل هذا امي قالت يابنتي انتي غلطتي في اختيارج هالريال ونحن فهمناج بس ماسمعتي هالبنات يبون يخربون بيتج بس لاتعطينهم المجال وريلي بعد انا احبج ومن هالكلام رجعت ويا ريلي البيت ويوم الثاني فالليل البنت تتصل فيه قلت حق ريلي لاترد البنت تبا تقهرني واتكلمك ماسمع رد عليها ويسولف وياها ويدري بالامس ضاربتني وسابتني بس مانع ويوم صارخت بجا يصارخ علي فاتصلت فالبنت قلت ماتستحين اتكلمين ريلي بدات تضحك واتقول ( اتغارين موتي قهر هالي نبي انسوي فيج نباج اتموتين قهر ) وريلي يسمع الكلام ولا قال شي طلعت ويا اخوي ووصلت البيت وطحت مب حاسه في عمري الا بعد يدخلون البنات ويضربوني

انا وايد تعبت وياه وايد وانا ادري الغلط مني اتخيلوا عمره ماعطاني مصروف ولا صرف فلس علي
بس عطاني المهر والزهبة والباقي كله انا سويت

من الملجة والعرس والسفر وايجار الشقة مصروف البيت كل شي انا ولدرجة ملابسه وكل شي عنده من بيزاتي
بس هو ماقدر كل الي سويته وببهدل حياتي رفعت عليه دعوة الطلاق بالضرر راح يابله محاميه الي عمره ماصرف علي فلس قدر ايبله محامية بس انا بعد حطيتلي محامية ويارب اخد كل حقوقي منه والطلاق بماني قلتله طلقني والله اتنازل عن كل حقوقي قال لوت تموتين ماطلقج

والله خايفه اخاف ياخد حقوقي ويبهدل حياتي اكثر

وللعلم انا بعدني ماكملت سنة على زواجي !!

السموحة اخواتي وايد طولت بس الي كتبته وايد مختصر ريلي دمر حياتي !!

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية