زوجي رجعي ومعقد

[القلب 2009]

السلام عليكم
اولا اشكر ميرة انها خلتني اطرح مشكلتي في ها المنتدى وفديتها دوم تكتب مشاكل صديقاتها وخواتها من نفس النك نيم لكنها حبت اني اكتب مشكلتي بنفسي علشان توصلون للي اعانيه من ريلي
بصراحه ريلي انسان ملتزم اشوي وهو يحبني ويحب عياله ومامقصر معاي بشي موفر لي كل شي بيت وسياره وخدامه ومصروف كل شهر الحمدلله والشكر الف الحمدلله على ها النعمه
وريلي انسان سيده من الشغل للبيت للمسيد ماعنده ربع مايطلع ولا يروح الامعاي ومع عياله
وهذا اللي متعبني 😔
24 وساعه في البيت مايطلع احيانا ابا اتابع شي بالتلفزيون يقولي بطالع اخبار اقوله روح الميلس يعصب ويزعل يقولي ماتبي تقعدين معاي اقوله مااحب الاخبار يقولي كوره قدم اقوله ماابي ويزعل ويطلع واكثر من مره كنت اطالع معاه واقعد معاه مجامله بس والله بموت من داخلي
واذا شافني اتكلم مع خواتي بالواتس اب واضحك يعصب يقولي الضحك بس لاهلج
حتى ربيعاتي منعني عنهم ولما اروح بيت اهله اسولف واضحك مع خواته يقولي اتضايق لما تضحكين معاهم ما اعرف شو افسره يغار ولا شو!!! ودايما يقولي شورايج نقاطع العالم لا اهلي ولا اهلج ولا احد بس بروحنا عالمنا وانا اعصب اقوله ليش تبانا مخنوقين يقولي بطلعج وين تبين اقوله ابا اشوف ناس غير ويوه غير يعصب يقولي انتي ميته على الدنيا وتهتمين بالتطورات اتضايق احسه مريض واحيانا لما اهدده بروح بيت اهلي يصيح ويقولي ابيج لي بروحي
وانا انسانه ما احب التملك والانانيه ، ومره شريت بلاك بيري وعصب وقالي يا انا ياهو تزاعلنا اسبوع وبعته علشانه والحين عينه على الايفون كل ضرابتنا عليه شافني منزله انستقرام وتويتر عصب ومسحته علشانه لكنه مو مرتاح اول مايوصلني مسج بالواتس ابتسم اذا كانت نكته حد مطرشنها وهو بموت وده مايكون عندي تلفونات ولا معارف ولا اطلع وياربيعاتي وخواتي ،اتضايق لما اشوف خواتي يخططون ويطلعون احس اني ماعندي شخصيه والاكل البيت انا اطبخه مايحب اكل خدامه وكل شي بوقته الغدا بعد صلاه الظهر والعشا بعد صلاه العشا وبعدها نوم ممنوع السهر واذا شافني اسهر او شي يعصب ويصارخ ويقولي بس تحبي الدنيا وتحبي الخرابيط
تعبت منه احس اني مخنوقه ابا اشتغل هو ماطايع يقول الحرمه مكانها بيتها واخر ضرابه بينا قلت له انا اكرهك وما ابيك مخلني بشكاره عندك انا المعززة والمدلعه في بيت ابوي وانت هني تذلني على اشياء تافهه ومن يومها يكلمني رسمي مابينا اي كلام الاسؤال وجواب وين ها ؟ وين رايح؟ تبين شي من السوق ؟ كلها برود برود
تمنيت يبتعد اشوي من البيت يداوم بعيد علشان نشتاق لبعض لكنه يحب البيت والقعده فيه بس انا من النوع اللي امل بسرعه واحب الاجهزه والالكترونيات وهو عكسي تماما وما يحب ها الاشياء لاني احبها اقوله انا اخاف من ربي وما اسوي شي يغضب ربي وهو على قولته خايف علي من الفتن وما اعرف شو
ما اعرف شو اسوي وياه انا عقلي وين وهو وين وغصب يباني اقتنع برايه وانا دايما اقوله كل شي في ها الدنيا له ايجابي وسلبي وانت واستخدامك وهو يحسسني اني بسوي جريمه
اسفه طولت عليكم بس والله ردودكم تهمني
هل استمر معاه ولا كيف اتصرف وياه انا عصبيه وايد واتنرفز بسرعه وحساسه
بانتظاركم خواتي😭

المزيد من آخر المواضيع من نفس القسم:

• مخاطر كثرة ممارسة الجماع على الزوجين
• اسباب عدم الوصول للنشوه اثناء الجماع
• صفات الزوج المتنمر وكيفية التعامل معه
• الفرق بين الضعف والعجز الجنسي
• اهم فوائد الزنك السحرية للصحة الجنسية للرجل
• طريقة تنظيف المنظقة الحساسة بعد الجماع
• طريقة التعامل مع الزوج الصامت
• نصائح لحياة زوجية ناجحه
• فوائد الضحك للعلاقة الحميمة
• الزواج الثاني بين الأيجابيات والسلبيات

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[زينب الطيبة]

أختي حرام عليج ريلج ألف بنيه تتمنى طبعة اول شئ شو تبين بالشغل وبلاويه والاختلاط والمشاكل الي فيه ،،، وبعدين كل وحدة تتمنى ريل ما يطلع ويحبها نفس المواصفات الي في ريلج ،،، رأيي تحمدين ربج على هالنعمة ،،، وأقري مشاكل البنات بتعرفين ان عندي حق .....



الله يسعدكم لا تزعلين مني بس ابغي مصلحتج

[الحياة*أمل]

جملة ( هل استمر معاه )اتمناج ما تعيدينها اختي تراها جملة صغيرة لاكن ما ورائها أعظم انا حاسة فيج أختي لاكن هذا نصيبج وبينكم عيال اقري مشاكل أخوات غير وبتعرفين انه مافيه بيت خالي من المشاكل تقريبا لانه أطباع الناس تختلف استهدي بالله انزين حاولتي تفضفضين له شوي عن اللي مضايجنج يمكن يتفهم , شوي منج وشوي منه والحياة تمشي ان شاء الله اتمنالج التوفيق .

[أبل7]

حرام عليج ليش تهدمين حياتج وحياة.عيالج عشان شيء ما يستاهل
كل شيء له حل
ريلج شكله فطري يعني على اللي تربى عليه هو قاعد يسويه فيج وبعدين واضح من كلامج إنه يحبج ويغار عليج
الله يصلحكم

[بنت الملحم]

أختي يمكن انتي تشوفين مشكلتج كبيره بس الصراحة الوضع اللي انتي فيه اغلب الحريم يتمنونه غيرج عندهم مشاكل وبلاوي تشيب الراس
بس ريلج شكله من النوع اللي يغار وايد وإذا على سالفه البلاك بيري والتويتر ترى اغلب آلرياييل جي ما يحبون حريمهم يشتركن بهالبرامج وريلي واحد منهم يعني عادي لا تتحسسين من هالسالفه
وانتبهي تفكرين بالطلاق لأنج بنعمه ولله الحمد
الله يوفقكم ويسخر كم لبعض

[افناان]

قولي الحمد لله ع النعمة
يا ريت هم الحريم كان مثل همج
سبحان الله في حريم ما يعجبهم العجب
لو الريال خلاهم ع تراب من ذهب !!
النعمة زوالة يا اختي ، ديري بالج

[اسيرت شوق]

شوفي خلينا واقعين ريلج مزودنها حبتين
بس فيه مزايه زينه عاد انتي خذي الزين وخلي الشين الي ما يعجبج منه طنشيه دام لا منكر ولا حرام
لغاية ما يتعود شوي

[ام مصطفى..]

حظظظج وايد .. ناس تتمنى ربع الي انتي جايفتنه !
الله يهديج

[um nayil]

لا تهدمين بيتك بيدج
بينكم عيال ،،،

ثانيا كل وحدة تتمنى انه يكون رحيلها مجابلنها
الله يسر لج امورج
ويصلح حالكم

[ضياء الايمان]

غيرج يتمنى هالريل وما محصلتنه. سيري شوفي مشاكل.البنات. احمدي ربج. فيه اشياء بسيطه غلط لكن مقدور عليها. ا

[روح.الامارات]

امممم .. ريلج يعني كابت على نفسج مالومج ..
بس احمدي الله على كل حال .. بس فكري شو احسن هالحال و لا تزخينه كل يوم مع وحده .. خذي لفه على المواضيع اللي هنيه شوفي معاناه الحريم بتهون عليج مشكلتج..
حاولي تغيرينه شوي شوي بالهدوء وبدون عصبيه وخذيه بالطيب ..

[وجدان الفجر]

أعرف وحدة كان زوجها مثل زوجج وكان ما عجبنها وتشتكي منه كل يوم لأنه بيتوتي , لين سمعت نصايح اللي نصحوها وغيرته وصار منفتح وطلعات وروحات وعزايم وصار عنده ربع وبعدها صار ما يرجع البيت إلا الفجر , مرة علشان مناسبة تخص شغله ومرة ومرة علشان مشروع ينفذه ومرة مع رباعته وصارت تشتكي من أنها ما تشوفه أبد وصارت مسؤوليات الأولاد والبيت عليها وكانت بعد تشتغل وبعدها زادت المشاكل بينهم وتزوج عليها .هذه قصة حقيقية وصايرة لوحدة قريبة مني .
أختي ...زوجج الحمدلله زين ومثل ما قالن لي الأخوات ألف وحدة تتمناه . لا تخربي بيتج وتدمري حياتج بإيدج بسبب أشياء بصراحة تافهة .ربي يسخر لج زوجج ويسخرج لزوجج ويجمع بينكم دايماً بالخير .

[معاذير20]

اختي انتي ف نعمة

قولي الحمدلله وبوسي ايدج وجه وظهر ع هالريل
غيرج ف بلا وهم وغم

الله يهديج

[ميرة الإمارات]

ريلج مزودنها حبتين
بس في مزايا حلوة

دايما تذكري ايجابيات الزوج قبل سلبياته عسب ما تكرهينه

و ممكن تخلين زوجج اجتماعي بطرق مختلفة
مثلا كلما كان عندنا رحلة ولا سفرة ولا يمعة اقول لزوجي مثلا اهلي يسألون عنك و يقولون خلى ايى و طبعا ابهر الكلام شوي و شوي شوي بدى يتغير للأحسن
انتي تقدرين تخلين ريلج يطلع من قوقعته بأسلوب " ملتوي " مب بالاسلوب " المباشر"
لان الريااااااااال ما يحب الاوامر من زوجته

و خير يا طير يحط اخبار عيل انا شو اقولج 24 ساعه اخبار لدرجة يوم انام اتمممممم احلم في ها السوالف و ف الحروب و تلقيني عادي اكفخه وانا نايمه خخخخخخخخ
اول شي ما عيبني و كنت اتضارب وياه و عقب تأقلمت مع الوضع
من هو يظهر برى البيت اجوف اللي ابغيه تقولين وحدة مب جايفة الدنيا ههههههههههه و اتم افرفر بالقنوات ع راحتي
و بالعكس من يجوف شي او اخبار او كورة ايلس وياه و اسوي له شي ياكله كوفي ولا سويت ولا فواكه و ممكن اطلب منه اقوله لو بس تحط لي القناة الفلانية دقايق يعني بها الطريقة

[ام مؤيد2011]

والله فية بنات يشتكون من ريايلهم ما يقعدون وياهم
وانتي تشتكي من قعدت ريلج وياج


حبيبتي اشكري ربك عندج ريال بهالمواصفات
وعلى سالفة زيارت الاهل بالنقاش والحوار ممكن توصلين الى كل اللي تبيه