ريلي والمصروف

[a.a.m.a]

السلام عليكم ورحمة الله وبركاته ..

كل عام ونتو بخير ومبارك عليكم الشهر ..

خواتي انا معرسة صارلي سنة تقريبا .. وعندي بنت توها صغير بعمر شهرين ..

ريلي هب مقصر ويايه ابد .. كل شي موفرنه لي من اكل وشرب ولبس واشياء اساسية .. ويوم نطلع هو يدفع من جيبه اذا عيبني شي وبغيته ..

محددلي مصروف فالشهر يكون عندي 500 درهم .. بسسس احسسه مايسدني وهو راتبه زين والحمدلله ..

بسس ساعات يكون فخاطري ميكب مثلا او عطر او حتى افصل جلابيه ولا اخذ قطع ولا اخذلي شنطه و. و , الخ

يوم اقوله يقولي مب لازم كبتج متروس من هالسوالف عندج شو تبين بعد !!

مره رحت السوق وبغيت اخذ نعال عيبني .. قالي شو تبينه عندج وايد فالبيت , زين عندي بس ها كله من زهابي خاطري بشي يديد ,

باختصار يشوف اني محتاية اشيا مالها لزمه واصرف وابذر ع الفاضي .. طبعا اذا ييت حنيت عليه اني ابا اخذ شي واصريت ياخذلي اياه بس عسب ما ازعل ,, لكن ملييت مب حاله هاي ساعات يكون اشياء فخاطري واسكت وماقول ..

حتى الحنا .. كان خاطريه اتحنى ع شهر رمضان .. قالي ع العيد مابعطيج بيزات تتحنين !! يشوف الحنا خساير وانا مب من اللي دوووم اتحنى يعني كل 4 شهور او اذا في مناسبه ..

الصالون ماسيرله وايد الا اذا شي مناسبه غيره ماسير كل شي اسويه فالبيت .. حتى المناسبات البسيطه اعدل عمري فالبيت

واذا قلتله ابا وابا يشوفة شي سخيف وماله لزوم وان طلباتي ماتخلص ..

امسات فتحتله الموضوع وقلتله اني ابا مصروف محدد .. مابا انته تدفع عني كل شي ..

قالي كم تبين .. قلتله 2000 درهم .. انا باخذلي لبس .. اكسسواار .. ميكب ..صالون .. جلاليب .. الخ انته لا تدفع من مخباك

بس الجمعيه واغراض البيت والبنت عليك ..

قالي يبالي افكر فالموضوع ..

امس رديت فتحتله الموضوع .. قالي 2000 واايد !!

بعطيج 1500 ومصروف بنتج وياج .. يعني يوم اطلع ويا هلي ولا اخواني اذا فخاطر بنتي شي اخذلها .. لا تترين تطلعين وياي وتتشرينه عقب ! انا اعترضت ع هالشي لانه مصروفي وحقي ليش اصرف بعد ع البنت .. هو موجود هو يخصص لها مصروف .. اوكي اذا ع الاكل يعني اكيد باخذلها ولا حلاوه ولا أي شي بسيط ولا اذا كان لبس انا عايبني خاطري اخذلها باخذلها ما بقصر بس مب دووم يوم انا ابا .. حرج من ردي وقالي عنبوه تحسسيني انج مب امها ومالج خص فيها وووو كلام واايد ( حسسني اني وحده حقيره وانانيه )

قلتله مب مشكله اذا عطيتني 2000 بصرف ع بنتي .. قالي مب انتي اللي تحددين مصروفج كم,,, انا اللي احدد وانا اللي بعطيج .. وقالي انصدمت منج اذا ها تفكيرج اانا لو منج والله معاشي فدوه لعيالي .. قلتله انته المسؤول عنهم وانته اللي تصرف انا مب ملزومه اصرف عليهم انا لي حاياتي والمصروف من حقي انا اذا ايمعه ولا اصرفه ...

المهم تم الموضوع معلق .. وهو يشوفني اني انانية واحب نفسي وماحب بنتي وماقدر ظروفه ومصاريفه وفوق ها شال بخاطره علي .. ولا يكلمني .. وانا ماعتذرت له لاني اشوف انه معاي حق وماغلطت عليه ..

2000 درهم احين يالله يالله تسد ,, كل شي مستوي غالي

خواتي بس شورن علي انا ماغلطت فشي صح ؟ يعني ماله حق يزعل ويعصب اذا اني مابغيت اصرف ع بنتي من مصروفي ؟

بس ابا مصروف لي .. مرات فخاطري اخذ هدايا لاخواني او عماتي او امي وابوي ..

انحرج يوم اطلب منه هالشي واللي عطيني اياها مايمديني ايمعهن واذا طلعت مثلا فالشهر ويا هلي بال500
اخذلي اكل ولا اخذلي مثلا تيشيرت عيبني ولا روج اطير ال500 واتم بدون بيزات
واذا قلتله يسالني وين راحن ويوم اقوله اني صرفت ع الشي الفلاني احسه يضايق لاني اصرف ع شي تافه فمن جيه من تخلص بيزاتي مااقوله اتريا لين الشهر اللياي او يوم اطلع وياه هو يدفع عني ..
حتى احين عيد زواجي عقب شهر وانا افكر احيز وارتب واخذله هدية بس كييييف وانا ماعندي سيووله :"( ..

والله قهههههرر

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

[الفرفوشة 11]

حبيبتي الغالية
انتي كنتي من البداية اتعلمينه انه يصرف عليج اسمحي لي 500درهم شو اتسوي الحين و بعدين هو حق يشتغل لج و لبنته اصلا كمصروف من طويل العمر و من حكومة الامارت لبنتج 600و لج 500علاوة زوجية يستلمها يعني هو مايتعب فيها هاي اتي له زيادة عاراتب و مستخسر فيج 2000اكيد اذا في خاطرج شي بتشترينه و البنت هو امكلف بمصاريفها.
اما اذا كان زوجج بخيل فالله اعينج صعب يقتنع و لو عطاج 2000بخلي كل شي عليج

[طيف الغربة]

معليه اختي تعالي له بأسلوب دلعيه حبتين وبيرضى

طالما وافق مبدائيا على 1500 معناته في مجال يقبل يمكن طبعه كده وتدرين مب بسهوله يغيرون طباعهم

لكن خديه بالهداوه وبيني له انه خيركم خيركم لاهله واحنا منو معنا غيرك ووو بيحطاها وهو مغمض

لاتبيني له انه غصب لازم يدفع لا حسسه انه انتو بحاجته وماعندكم غيرة

[ام براق]

الله يعييينج والله انا سوالف البيزاات ماعرف اتصرف او انصحج فيها بس اكيد احسن لما طالبتي انه يزيدج. المهم نحن ف رمضان لا تضيعين اياامك بالزعل. والله يهديه

[بهلولة]

اختي الغالية حققققج
شو 500 !!
يا الله شو تسوي 500 الحين؟!
يالله يالله يسدون عيالي يوم احطهم الالعاب!

قوليله حقي تعطيني
ولا تريدني اسير عند ابوي واخذ منه مصروف؟!
ولا تباني اشتغل واريحك من همي وهم بنتك؟!!
هذا وانتوا الحين عندكم بنيه وحده !
عيل شو بتسوون يوم بتكبر عيلتكم؟!
هذا بخل يا اختي
لازم تحذين وياه كل شي من الحين!!

ويوم تشوفينه اشترى لعمره اي شي قوليله هذا المفروض ما كان له داعي!

[بنت الشوامخ]

انتي ما غلطتي هذا من حقج لانه ٥٠٠ ما تسد
الا اذا طلعاتج ويا ريلج وهو يدفع لج كل شي هني راح تسد
اما اذا ٥٠٠ انتي تدفعين فيها حق عمرج صعبه يعني يباله تخطيط وحرمان

البنت هو ابوها مسئول عنها ويعطيها معاش منفصل عنج
وانتي حرمته بعد من حقج معاش منفصل
هذه حقوق ولازم يصرف عليج انتي وبنتج

بس اذا ريلج ظروفه صعبه ومديون ماعليه خلي معاشج منه عالاقل ١٠٠٠ وحق بنتج ٥٠٠
وطبعا لو ماسد بنتج ٥٠٠ اطلبي منه عادي

او ٢٠٠٠ لج ولبنتج لو قدر

اهم شي شوفي ظروفه والديون اللي عليه

واذا في مجال تشتغلين اشتغلي لانه بالاخير مب كل ريال يقدر يوفر لحرمته الحياة اللي تتمناها بمعاشه نحن بالاخير لازم نقدر ظروفهم
يعني لو ريلي معاشه قوي ماله حق مايعطيني اما لو معاشه ضعيف بعذره وبحاول اشتغل لو اني حابه ادلع عمري واشتري

[وجدان الفجر]

أختي , أنت تقولي :ريلي هب مقصر ويايه ابد .. كل شي موفرنه لي من اكل وشرب ولبس واشياء اساسية .. ويوم نطلع هو يدفع من جيبه اذا عيبني شي وبغيته ..
طيب , يعني الحمدلله مب بخيل .ويعطيج 500 درهم شهرياً كمصروف يد .ما بقول لج كافي , هذا على حسب صرف كل وحدة . ولكن بقول لج كل شي بالتفاهم ويصير , يعني تفاهمي أنت وياه بالهداوة وخذيه بالهداوة والمسايسة .
وأختي العذر منج ومن جميع الأخوات بس مب كل شي نشوفه لازم نشتريه ! ومب لازم في كل طلعة لازم أشتري وأصرف ! تراه أنت قلتي كمالايات يعني مب لازم أجيبها .
يمكن ريلج راتبه زين مثل ما قلتي ولكن عليه التزامات . يمكن مديون , يمكن يبا يجمع لبنيان بيتكم أو لمشروع يزيد الدخل .
أنا ماضدج أختي , ولكن أباج تفكري وما باج تخسري زوجج أو تصير بينكم مشاكل بسبب شي ما أساسي .
أمهاتنا ما كان ليهن مصروف , الريال كان يصرف على الأساسيات ويوم تبى شي وفي مقدوره يشتريه ليها , وإذا ما يقدر ما تقول عطني مصروف .
هذا اللي بغيت أقوله للجميع .وربي يسخر لج زوجج ويسخرج لزوجج أختي .

[ميرة الإمارات]

اختي ما على استهدي بالله
لو انتي ما تشتغلين و تقولين راتبه

انتي عايشة وياه و تعرفين اموره المادية و تقدرين تجوفين لو عليه دين سيارة او دين بيت او ايمع ل بيت العمر او يفسفس فلوسه يمين و يسار

يعني لو يعطيج 500 درهم و كل شي عليه ترى زين يعني لبس و اغراض و كل شي بس يمكن انتي مب مرتاحة انج تبغين تشترين اشياء معينة يوم هو مب وياج

تفاهمي وياه ولا تسوينها سالفة كبيرة لو ما رضى خليج ع ال 500 و يشتري لج كل شي
و دوم لو طلعتي ويا اهلج حطي ف بالج شو تبغين و اكتبي ف ورقة و من تسيرين وياه اشتري ع طول و ذكريه انه هو قال بيدفع لج كل شي

بس لا ترضين مصرف بنتج ويا مصرفج عوديه يوم تطلعين يدفع مال بنتج ف حدود المعقول يعني لا تكونين مسرفة و دوم تبغين تشترين خلج وسط

لو معاشه زين مثلا 20 الف و ينزل له صافي ما عليه دين ما اجوف فيها شي لو عطاج 2000 حقج
بس حتى لو معاشه 15000 شو يعني 2000 تراها ولا شي لو راتبه ينزل له صافي كامل مكمل

يمكن ريلج يحب يعطيج 500 و يطلعج و يشتري لج ما يبغي يعطيج 1500 و عقب انتي تسوين لج كل شي يعني يحب يكون وياج و انتي تشترين
و لا تجوفين الموضوع من جانب واحد ادرسي كل الجوانب

سوي لستة لو تبغين تخرعينه شوي باغراض العيد و اكتبي جلابية ب 1000 عبايه ب 800 شوز ب 500 شنطة ب 1000 حنا ب 300 صالون ب 300
قولي له شو الاحسن تعطيني 2000 ولا كل شي عليك هههههههههههههه

[دبي]

اسالوا المشايخ واصحاب القانون عن حقوقكم وبتعرفون ان الريال مب ملزوم بانه يعطيكم مصروف قد ماتبغون . القناعة كنز

[قاهرهم غروري]

المفروض يعطيج وحتى لو كنتي تشتغلين انا الحمدالله اشتغل وعندي راتبي بعد اخذ مصروفي ومصروف ولدي منه طبعا مصروف ولدي بحساب التوفير ماله وهو يشتري لي احتياجاتي واحتياجات ولدي من راتبه يعني مايقولي خذي من مصروفج يعني شهريا الحمدالله يعطيني 3000 و واذا مثلا بيكون عنده التزامات الشهر مثلا بيدفع مخالفات وجي وتجديد سياره يعطيني 2000 او 1800 واراعيه لانه عنده التزامات ومرات حتى مصروفي لاني ماحتاجه احطه لولدي بحسابه لاني الحمدالله راتبي عندي فلازم تكلمينه عن المصروف واذا هو كل شي ماله داعي اي بيشتريه انتقديه حق عقب بيحس

[بنت رااك]

المفروض يعطيج وحتى لو كنتي تشتغلين انا الحمدالله اشتغل وعندي راتبي بعد اخذ مصروفي ومصروف ولدي منه طبعا مصروف ولدي بحساب التوفير ماله وهو يشتري لي احتياجاتي واحتياجات ولدي من راتبه يعني مايقولي خذي من مصروفج يعني شهريا الحمدالله يعطيني 3000 و واذا مثلا بيكون عنده التزامات الشهر مثلا بيدفع مخالفات وجي وتجديد سياره يعطيني 2000 او 1800 واراعيه لانه عنده التزامات ومرات حتى مصروفي لاني ماحتاجه احطه لولدي بحسابه لاني الحمدالله راتبي عندي فلازم تكلمينه عن المصروف واذا هو كل شي ماله داعي اي بيشتريه انتقديه حق عقب بيحس

ماشاء الله ونعم الزوج الله يدوم بينكم المحبه ويبعد عنكم الحساد ويرزقكم أكثر واكثر

[munamoor]

مصروف الصالون يطلع فوق ال2000

[تاجرة خلطات]

ريلي كان نفس ريلج بضبط بس تغير والحين بتفاهم وياه وباسلووب حلو عطاني 3000 مصروف لي وعياله هو يصرف عليهمم بس باسلوووب حلوو وكلام عسل ترى الريال شرات الطفل كلمه تيبه وكلمه توديه....

[ابداااع]

الحمدلله500زينات

[m.dxb88]

الله يحنن قلبه عليج