امج تجذب بس عشانج

[المول]

اسمحولي على العنوان المستفز. مع احترامي لست الكل بس حبيت اكتب بعض المواقف اللي مرت بي خلال سنوات العمل واللي يتابعني يلاحظ بعض القصص ومواقف هي للنقاش وللعظه سبق وكتبت سابقا امج وين اليوم عنوان القصه امج كذابه. ولاني مدرسه سابقا مرت علي سوالف كثيره البنت هي اما ضحيه الاهمال او الدلال الزايد او زواج الاب من اجنبيه. المهم بطلت القصه اليوم( حواء). طبعا هذا مب اسمها طالبتي حواء هاديه وخجوله وتنفذ الاوامر بدون ما تلاسن كبقيه الطالبات لكن اللي يشوفها يقول انها في عالم ثاني يعني تسرح ووايد في مره وصلتنا اخباريه حشا مخابرات حواء عندها موبايل وتتكلم في الفسحه في زاويه بعيده من ساحة المدرسه وترصدنا لاحواء وشفناها بالجرم المشهود يعني متلبسه ولما جربنا سالناها وين الموبايل بكت وقالت ما عندي. قلنا لها طليعيه شفناج ها وهو وهي في النهايه طلعته من داخل اثيابها ويلا يا حوا الى غرفة التحقيق. اول سؤال ليش يايبه الموبايل ما اتعرفين انه ممنوع ؟ ما في اجابه منو اتكلمين. ؟. بعد ما في اجابه اتصلنا بامها تعالي يا ام فلانه الى المدرسه ضروري لانه المساله فيها فصل وبعد فتره وصلت. الام وبعدين الابو وشافت الام بنتها اتصيح خافت عليها طبعا وسالتنا شو السالفه قلنالها البنت عندها تليفون وتتكلم فيه قالت اتحسب في شئ خوفتوني يعني ( تكت ايزي ) سالناها ليش تعطونها موبايل قالت الام وهي مرتبكه لا هذا خالها عطاها الموبايل كانت تبرر السالفه جدامنا وجدام ابوها بس الابو عصب وما صدق وقال للبنت من وين لج الموبايل وقال للام اسكتي. البنت خافت واعترفت من. """"""""" حبيبها. مسكين ها الابو انصعق مثلنا وليش قالت يحبني وبيخطبني قال الابو للبنت الحين اتصلي عليه واطلبي منه ان يخطبج ودقت عليه وحطوا الموبايل على الاسبيكر الو فلان انا في ورطه ابوي عرف بالسالفه اباك تتقدملي كان معاه رفيجه ضحكوا الاثنين وقال صديق خلها تولي وبند التليفون شو ها الاشكال وبند بصراحه الموقف محرج للبنت اللي وطت راسها وللابو اللي ما يعرف ان بنته عندها موبايل وما يعرف وللام اللي تها ونت بالسالفه وكذبت طبعا الحمدالله ان السالفه انتهت بدون تخسر البنت نفسها وسمعتها واكيد اتعلمت من غلطتها وهي في بداية عمرها واترك لكم التعليق  

المزيد من آخر المواضيع من نفس القسم:

• بلد الفوارس لاداره العقارات
• النشرة الإخبارية الأسبوعية للمتداولين...
• إذا لم تجرب أساليب جديدة، لن تعرف الأفضل
• أوبك تتوقع زيادة في الطلب على النفط في عام...
• الدولار يواصل ارتفاعه مع بداية العام
• مايكروسوفت تتفوق على آبل لتصبح الشركة الأعلى...
• النشرة الإخبارية الأسبوعية للمتداولين...
• حتى لو كنت على الطريق الصحيح
• مؤشر نيكاي 225 يصل إلى أعلى مستوياته في...
• استمرار انخفاض التضخم في أستراليا، والزوج...

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المول]

عفوا للاخطاء الاملائيه ما قدرت اعاين المشاركه بس المهم فهمتو السالفه

[ورقة ناعمة]

المراهقات بهاالعمر تمر هالسوالف عليهم ... والانسان مب معصوم عالغلط ... والبنت كانت محتاجة لتوجيه قبل العقاب

وواضح انج مدرسة بس ما عندج كفاءة اجتماعية ...بمعالجة الامور الافضل الستر والستر واجب ... يعني مثل هالمواقف مش غريبة تصير لاغلبية المراهقين

حتى ردودها يدل عالبراءة الطفولة ... وانتي الموضوع مايستاهل تكتبينه لان مب شي يديد يمكن هالبنت الله يهديها صغيره باجر بتكبر وقارني بين عقلها وعقلج

وبعدين موضوعج قريب من موضوع سابق كتبتيه ما اعرف ليش حاطه راسج براس المراهقات وليش هالمراقبه

لو تنصحينهن بطريقة محترمة افضل

http://forum.uaewomen.net/showthread.php?t=1152054

[nooraaaa]

بارك الله فيج اختي . بهذه الطريقة بينتبه الاب اكثر لبنته و كلذلك الام بيكون لها درس في حياتها عمرها ما بتنساه و بتنته لبنتها و بتخاويها و بتحافظ عليها اكثر
و كذلك البنت بيكون هذا درس قاسي لها بتتعلم منه انه الشباب مالهم امان و انه الزواج يجب ان يقوم على اسس سليمة و مثالية . و ان العلاقات ما تأدي غير للمشاكل و الفضائح و تضييع الوقت.

مشكورة على الطرح و ربي يستر على سائر بنات المسلمين يا ر ب

[ماحد شراتي]

مفروض انج لميتي الموضوع وحليتي المشكله بطريقتج ..كلنا مرينا بمرحلة المراهقه وكل حد غلط وياما كنا نغلط وبقولج موقف صار وياي فالاعداديه نحن كان عندنا ممنوع نييب مجلات فالمدرسه وكنا بهذيج الفتره متخبلين عالفرق الاجنبيه (Boyzone, westlife,BSB) ايااام والله وكنا نتافس بتجميع الصور او نتبادلها والبنات كانن ييبن مجلات اجنبيه وما اعرف منو خبر مربيه الفصل انه نحن عندنا هالمجلات والصور وحلت الموضوع بينا وقالت لو عرفت الاخصائيه ولا المديرة ورقه تنبيه او ولي امر يحضر مب الام لا كانوا دايركت يدقون عالاب

فكان مفروض منج تحتوين البنت والموضوع ولو ما حصلتي نتيجه كنتي تقدرين تحولين الموضوع للاخصائيه مب احسن عن تتفشل البنت واهلها ..

[WATMOR]

UUUUUUUUUP

[امراه]

يزاج الله خير والله هالبنات يبالهن رقابه لانه فيه بنات لاهيات امهاتهن عنهن اتمنى انكن مااتقصرن وياهن واتكونن عون الهن وقدوه حسنه

[دلعي غيـر]

طيب و بعـــدين .....!!!!!
وين الاكــشن في القصــه او سالفـه ؟؟!!!

[بطوط]

مشكووره اختي ع هالموضوع وصدقج البنات هالزمن يبالهم تربيه ورقابه واحسن شي خبرتو ابو البنت اذا الام متهاونه الاب غير ويمكن الام من الي لهم قبل علاقات وسوابق وتتحرا كل شي عادي

[المول]

خواتي انتوا تتحسبون هذا قسم الاخبار لا هذه السالفه تذكريتها لما كنت مدرسه الموضوع مب عرض للخبر اكثر ما يهمني يمكن وحده من البنات مرت او تمر بها المرحله وتحس انها يمكن يكون مصيرها نفس البنت وانا ما فضحت البنت لاني ما ذكرت اسمها ولا الاماره هذه قصه قديمه لبنت يمكن اتكون اليوم ام او موظفه او ما ادري وعلى قولتكم السالفه بريئه والبنت على تصرفها بريئ لانه سوالف اليوم اتشيب الراس. الهدف فقط للعظه انا لما كتبت امهات اخر زمن فئه من العضوات قالوا ليش تركزون على الامهات الموظفات ولما كتبت عن البنات اتقولون ليش اتركزين على المراهقات شوفي اول المشاكل اللي تنكتب وهل لها علاقه بها الموضوع. لو سمحتي جاوبي؟

[مراسيل الوفاآ]

التربيه هالايام مب شرات اول،
التربيه الحينه فيها تنافس منو
يربي عياله ع الانفتاح اكثر عن
الثاني، الله يرحم ايام اول، ييبون
ياهل ويتنافسون من اللي يربيه
ع الدين والخلق الحسن، اما الحينه
نشوف عيال فاهمين ف الدين الصلاه
والصيام والاخلاق حدث ولا حرج !


كل شي موجود الحينه، الاهل لاهين
بعالمهم الخاص والعيال يتعلمون
اللي يبونه من النت وربعهم ونحن
ما نقول غير الله يثبتنا على دينه
ويعيننا ع تربيه عيالنا تربيه صالحه

[نقنوقة]

لاحول ولا قوة الا بالله

[عَسَلْ]

صراحة عنوان الموضوع استنكرته شوي ،،
وخصوصاً الموقف من الأم اللي انوصفت جذابة ..

ليش جذابة لأنها تبا تستر بنتها جدام أبوها والإداريات والمدرسات ..
هاي ردة فعل طبيعية للمسكينة اللي انحطت بهالموقف ..

ولا شو المطلوب منها مثلاً ..
هي الأم وهي المسؤولة عنها وعن تربيتها ..
ومب لازم تأدي دورها جدام الناس ..
كان من الأفضل انه تكلم بنتها على إنفراد
وما تتورط البنت بهالطريقة ،، خصوصاً لو دخل الأبو فالموضوع ..
ممكن لو انه متشدد يسوي فيها بلاوي وتروح فيها ..
ممكن توصل للضرب والإهانات وإنعدام الثقة لييين الله يفرجها على البنت حليلها !

ما أأيد هالطريقة في حل المواضيع ..
هذي نقطتي من هالكلام كله ..

عموماً الله يستر بنات المسلمين وأمة محمد عليه الصلاة والسلام
ويهدينا جميعاً لسواء السبيل

[عَسَلْ]

طيب و بعـــدين .....!!!!!
وين الاكــشن في القصــه او سالفـه ؟؟!!!

من قال هنيه قسم القصص والأفلام الدرامية ^^
هذي مواضيع جادة تطرح لهدف معين

[(( بسمه ))]

المفورض كتربويه تكون الالفاظ المستخدمه افضل وتكونين اوعى بمشاكل المراهقات وطريقة حلها

ومثل ما قالوا الخوات يمكن الام ما بتربيها جدامكم ومب لازم تؤدي دورها التربوي جدام العالم حفاظا على نفسية البنت والله يعلم شو المصايب اللي تستوي فبيوت الناس